Խմորումներ. Բազեյանի հերթական հրաժարականը

Տպագրվել է «Հայկական Ժամանակ» օրաթերթի՝ 2005 թվականի հունվարի 18-ի համարում

Ուրբաթ օրը տեղի ունեցած «Հանրապետություն» կուսակցության քաղխորհրդի նիստում կուսակցության նախագահ Ալբերտ Բազեյանը կուսակցության քաղխորհրդի նախագահի պաշտոնից հրաժարական է ներկայացրել: Անցած երեք ամիսների ընթացքում Բազեյանն առնվազն երեք անգամ կուսակցության քաղխորհրդում հայտարարել է, որ ինքը չի ցանկանում գլխավորել կուսակցությունն ու հրաժարական է ներկայացնում: Անցած ուրբաթ եւս պարոն Բազեյանը պնդել է իր հրաժարականը, որը, սակայն, քաղխորհուրդն առայժմ չի ընդունել: Այդուհանդերձ,  ինչո՞ւ Ալբերտ Բազեյանն այլեւս չի ցանկանում գլխավորել «Հանրապետություն» կուսակցությունը: Ըստ մեր աղբյուրների՝ պատճառները տարբեր են. սկսած լուրջ, քաղաքական դրդապատճառներից՝ մինչեւ կենցաղայինը:

Կուսակցությունից հրաժարվելու կենցաղային պատճառն այն է, որ  Բազեյանը չի ցանկանում գլխավորել մի կուսակցություն, որի դե ֆակտո նախագահն Արամ Սարգսյանն է, չի ցանկանում գլխավորել մի կուսակցություն, որը ֆինանսավորվում է մեկ մարդու՝ Արամ Սարգսյանի կողմից: Բացի դա, ըստ մեր ունեցած հավաստի տեղեկության, վերջին ժամանակներս «Հանրապետություն» կուսակցության քաղխորհրդի նիստերում քննարկված գրեթե բոլոր առանցքային հարցերի վերաբերյալ մերժվել է Բազեյանի տեսակետն, ու կուսակցության քաղխորհուրդը գրեթե միշտ կողմ է քվեարկել այն տարբերակին, որն առաջարկած է եղել Արամ Սարգսյանը:

Մասնավորապես, երբ «Հանրապետություն» կուսակցությունում քննարկվել են ավանդների վերադարձի կամ Իրաք հայկական զորախումբ ուղարկելու հարցերը, Ալբերտ Բազեյանը պնդել է, որ, ինչպես «Արդարություն» խմբակցության մնացած պատգամավորները, իրենց երեք պատգամավորները եւս պետք է գնան ԱԺ եւ գրանցվեն: Սակայն քաղխորհուրդը որոշել է, որ «Հանրապետության» պատգամավորներն ընդհանրապես չպետք է ԱԺ շենք մտնեն, եւ այդ որոշմանը պարտադրված ենթարկվել է նաեւ Բազեյանը: Այդուհանդերձ, ակնհայտ է, որ վերը նշված պատճառները չեն, որ որոշիչ են եղել Բազեյանի հրաժարականի համար: Գաղտնիք չէ, որ Ալբերտ Բազեյանը երբեք էլ ոգեւորված չի եղել «Հանրապետություն» կուսակցության դե ֆակտո ղեկավար Արամ Սարգսյանի ոգեւորությամբ՝ քաղաքական դաշտի աջ-ազատական թեւի ու մասնավորապես առաջին նախագահ Լեւոն Տեր-Պետրոսյանի նկատմամբ:

Մինչդեռ, Արամ Սարգսյանը երբեք էլ չի թաքցրել իր քաղաքական նախասիրությունները: Իսկ քաղաքական նոր ֆորմատ ձեւավորելու շուրջ վերջին ժամանակներս ընթացող բանակցությունները,  որոնք, ըստ վարկածներից մեկի, միտված են լինելու առաջին նախագահի վերադարձի համար քաղաքական հենարան ապահովելուն, Բազեյանի համար միանշանակ մերժելի են եղել, ինչի մասին վերջինս բազմիցս ասել է  քաղխորհրդի նիստերում: Երեկ մեր զրույցի ընթացքում պարոն Բազեյանը չցանկացավ մանրամասնել իր հրաժարականն ու ընդամենն ասաց. «Ուրբաթ օրը կայացած քաղխորհրդի նիստում ես հայտարարել եմ, որ հրաժարական եմ տալիս քաղխորհրդի նախագահի պաշտոնից, որովհետեւ ես ինքս բավարարված չեմ կուսակցության նախագահի պաշտոնում իմ սեփական աշխատանքից:

Ես ակնկալում եմ, որ քաղխորհրդի անդամները կհարգեն իմ որոշումն ու իմ իրավունքը»: Իր սեփական աշխատանքից դժգոհ լինելը Ալբերտ Բազեյանը բացատրում է նրանով, որ ընդդիմությունը, այդ թվում՝ նաեւ «Հանրապետություն» կուսակցությունը, բազմաթիվ խոստումներ են տվել ժողովրդին, որոնք, ըստ էության, չեն կատարվել, եւ այդտեղ ինքը տեսնում է նաեւ մեղքի իր բաժինը: Ի դեպ, մեր զրույցի ընթացքում Ալբերտ Բազեյանը վստահեցրեց, որ ինքը «Հանրապետություն» կուսակցությունում որեւէ մեկից նեղացած չէ. ինքը կմնա կուսակցության քաղխորհրդի անդամ, իսկ կուսակցության նախագահի պաշտոնում առաջարկում է Արամ Սարգսյանի թեկնածությունը:

Երեկ, պատասխանելով մեր այն հարցին, թե արդյո՞ք «Հանրապետություն» կուսակցությունում համաձայն են իր հրաժարականին, Ալբերտ Բազեյանը պատասխանեց. «Արտաքուստ համաձայն չեն, բայց ներքուստ գուցեեւ համաձայն են»: Բազեյանը տեղեկացրեց նաեւ, թե քանի որ այսուհետ ինքը չի լինելու կուսակցության նախագահ, բնականաբար, արդեն որպես միայն քաղխորհրդի անդամ, մի քիչ պասիվ կզբաղվի քաղաքականությամբ եւ միշտ չէ, որ կայցելի կուսակցության գրասենյակ: Ի դեպ, չնայած կուսակցության հերթական՝ չորրորդ համագումարը տեղի է ունենալու մարտի 4-ին, սակայն, «Հանրապետություն» կուսակցության կանոնադրության համաձայն, քաղխորհուրդն իրավասու է առանց համագումարի փոխելու կուսակցության նախագահին:

Այսպիսով, իշխանափոխությունը հասավ նաեւ «Հանրապետություն» կուսակցություն: Իհարկե, կուսակցության քաղխորհրդի անդամ Սուրեն Սուրենյանցը պնդում է, որ կուսակցության նախագահի հնարավոր փոփոխությունը որեւէ կապ չունի գաղափարական կամ քաղաքական խնդիրների հետ: «Ուրբաթ օրը կայացած քաղխորհրդի նիստում պարոն Բազեյանն իսկապես ներկայացրել է իր հրաժարականը քաղխորհրդի նախագահի պաշտոնից: Հարցի վերաբերյալ կուսակցության քաղխորհուրդն առայժմ որոշում չի կայացրել: Ուզում եմ նաեւ տեղեկացնել, որ հնարավոր կադրային փոփոխությունը ոչ թե գաղափարական կամ քաղաքական տարաձայնությունների հետեւանք է, այլ բնականոն գործընթաց է մի կուսակցության համար, որի ղեկավար մարմինները կարծրացած չեն եւ գործում են քաղաքական իրավիճակին ադեկվատ: 

Այսինքն, պարոն Բազեյանը կարծում է, որ տվյալ պարագայում ինքը կարող է առավել արդյունավետ գործել որպես քաղխորհրդի անդամ, իսկ կուսակցության ղեկավարումն ավելի արդյունավետ կիրականացնի այլ գործիչ»,- ասում է Սուրեն Սուրենյանցը: Այդուհանդերձ, որքան էլ «Հանրապետություն» կուսակցությունում փորձեն ներկայացնել, թե Ալբերտ Բազեյանի հրաժարականը քաղաքական ենթատեքստ չունի, ակնհայտ է, որ «Հանրապետություն» կուսակցությունն առաջիկայում կտրուկ փոխելու է իր քաղաքական կուրսը: Ըստ մեր աղբյուրների՝ մարտի չորսի համագումարում պաշտոնապես հայտարարվելու է «Արդարություն» դաշինքից դուրս գալու եւ ընդդիմադիր նոր ֆորմատի ստեղծման մասին, որը գործելու է աջ-ազատական դաշտում:

Ի դեպ, հիշեցնենք, որ սա Ալբերտ Բազեյանի առաջին հրաժարականը չէ. Բազեյանը 1998-ին հրաժարական էր ներկայացրել ԱԺ փոխնախագահի, իսկ 2000-ի մարտին՝ քաղաքապետի պաշտոնից: Եւ միայն ընկերների խնդրանքով էր այդ ժամանակ կրկին ետ վերցրել իր հրաժարականը: Այս անգամ, սակայն, դատելով «Հանրապետություն» կուսակցությունում տիրող տրամադրություններից, Ալբերտ Բազեյանին առանձնապես չեն խնդրի մնալ «Հանրապետություն» կուսակցության քաղխորհրդի նախագահի պաշտոնում:  

Նաիրա Զոհրաբյան