Փուչիկ. ժողովուրդ փողոցներում

Տպագրվել է «Հայկական Ժամանակ» օրաթերթի՝ 2005 թվականի հունվարի 18-ի համարում

Երբ հայտարարվեց, որ Ռոբերտ Քոչարյանը Լեհաստան կատարած այցի ընթացքում համաձայնագիր է ստորագրել Իրաք հայկական զորախումբ ուղարկելու մասին, Հայաստանում գործող բազմաթիվ քաղաքական կազմակերպություններ դա որակեցին որպես հակահայկական եւ հակազգային քայլ՝ խոստանալով, որ թույլ չեն տա դրա իրականացումը: Այսօր, երբ զորախումբը մեկնում է Իրաք, այդ կազմակերպությունները ոչ ասելիք ունեն, ոչ՝ անելիք: Ամենասպառնալից հայտարարություններով հանդես եկող Մտավորականների ֆորումը եւ նրա ավագանին, որ այն ժամանակ խոստանում էին ժողովրդին փողոց հանել, այսօր հերթական նիստերն են անցկացնում:

Երեկ ֆորումի քաղխորհուրդը ընդամենը քննարկել է այն փաստաթղթի նախնական տեքստը, որը պետք է վավերացնի առաջիկա օրերին կայանալիք Մտավորականների ֆորումը, որի քաղխորհրդի անդամ Գառնիկ Մարգարյանը չի բացառում, որ իրենք, այնուամենայնիվ, կարող են ժողովրդին փողոց հանելու կոչ անել, սակայն հարց է ծագում, թե ինչ իմաստ ունի փողոց դուրս գալ այն ժամանակ, երբ զորախումբը այլեւս Իրաքում կլինի: «Հայ ժողովուրդը պետք է արաբական աշխարհին ցույց տա, որ այդ զորախումբը Իրաք է ուղարկվել հայ ժողովրդի կարծիքն արհամարhող մեկ-երկու հոգու որոշմամբ, որոնց հայ ժողովուրդը մերժում է»,- պարզաբանում է Մարգարյանը:

Ստացվում է՝ երկակի խաղ ենք խաղում. մի կողմից իշխանությունները զորախումբ են ուղարկում Իրաք՝ կատարելով իրենց տված խոստումը, մյուս կողմից՝ արաբական աշխարհին համոզում ենք, որ հայ ժողովուրդը դատապարտում է այդ որոշումը կայացնող-իրականացնողներին: Եւ արաբական աշխարհը ներում է հայ ժողովրդին՝ հասկանալով, որ պետք է պատժել ոչ թե տեղի հայ համայնքներին կամ հայ ժողովրդին, այլ՝ ՀՀ իշխանություններին: Հերթական կոմպլեմենտար կոմբինացիան: Հայ արիական միաբանության առաջնորդ Արմեն Ավետիսյանն էլ, որը նախկինում կամավորական ջոկատ էր կազմավորել Իրաքի ժողովրդին գլոբալիստական զավթիչների դեմ պայքարում օժանդակելու համար, այսօր հույսը կապում է առաջիկայում սպասվող զոհերի հետ:

«Այո, Իրաքում ամերիկացիների կողմից, այսպես կոչված, հակաահաբեկչական ներխուժման ժամանակ մենք ձեւավորեցինք 100 հոգանոց կամավորների ջոկատ, որը պատրաստ էր մասնակցել Իրաքի ժողովրդի ինքնապաշտպանական պայքարին: Այն ժամանակ մեզ ընդունեց ՀՀ-ում Իրաքի դեսպանը, շնորհակալություն հայտնեց նման նախաձեռնության համար, բայց ասաց, որ դրա անհրաժեշտությունը չկա, քանի որ Իրաքի ժողովուրդը ինքնուրույն էլ կարող է արժանի հարված հասցնել զավթիչներին», - ասում է Ավետիսյանը եւ ցավով ավելացնում, որ ջոկատի անդամ տղաները բավականին պատրաստված էին եւ դիվերսիոն գործողությունների մեծ փորձ ունեին:

Մեր զրուցակիցն այսօր ընդամենը ցավում է, որ տեղի է ունենում ճիշտ հակառակը, եւ ՀՀ-ից զինվորականների ջոկատ է գնում գլոբալիստ նվաճողներին օժանդակելու համար: «Մենք զգուշացրել ենք, որ այդ որոշման իրականացումը բացասաբար է ընկալվելու արաբական աշխարհում, եւ դրա հետեւանքները կզգան ոչ միայն տեղի հայ գաղութները, այլ նաեւ Հայաստանը: Երբ ՀՀ-ում տեղի կունենան ահաբեկչական գործողություններ, երբ կունենանք առաջին զոհերն Իրաքում, այն ժամանակ բոլորը կհասկանան, որ դրա պատասխանատվությունն ընկնում է իշխանությունների վրա: Այդ ժամանակ ժողովուրդը առանց որեւէ մեկի կոչի դուրս կգա փողոց պարտադրելու իշխանություններին՝ խայտառակ ձեւով ետ կանչել այդ զորաջոկատը», - կանխատեսում է նա:

Որ Իրաք զորախումբ ուղարկելու որոշումը որոշակի ազդեցություն է ունեցել Մերձավոր Արեւելքի հայկական գաղթօջախների վրա, հաստատում է նաեւ Հնչակյան կուսակցության ատենապետ Լյուդմիլա Սարգսյանը, որը սոցիալ-դեմոկրատական կուսակցության ղեկավար Ա.Մարտիրոսյանի հետ դեկտեմբերին հայտարարություն էր ստորագրել՝ սպառնալով, նման որոշման ընդունման դեպքում, իմփիչմենթի գործընթաց սկսել Ռ.Քոչարյանի նկատմամբ: «Մենք բազմաթիվ ահազանգեր ենք ստանում Սիրիայի եւ Լիբանանի մեր հայրենակիցներից, որոնք պնդում են, թե այդ երկրներում հայ համայնքներին շատ կարճ կյանք է մնացել: Ասում են, որ եթե մինչ այս որոշումը հայերին իբրեւ գործարար եւ բարեկամ ժողովուրդ ընդառաջում ու աջակցում էին, այժմ դիտում են իբրեւ երախտամոռ դավաճանների:

Այսօր հայերի համար հատկապես Սիրիայում ստեղծվում են ամենատարբեր խոչընդոտները՝ թույլ չտալու նրանց զբաղվել գործարարությամբ» - ասում է Լ.Սարգսյանը, որի ղեկավարած կուսակցության կենտրոնական վարչությունը Լիբանանի մայրաքաղաք Բեյրութում է, իսկ վարչության ատենապետը Սիրիայի քաղաքացի է: Ըստ Սարգսյանի՝ հայերը ուղիներ են փնտրում գաղթելու ԱՄՆ, Եվրոպա, ոմանք էլ՝ ՀՀ: Իսկ Ազատագրված տարածքների պաշտպանության հասարակական նախաձեռնության գրասենյակը երեկ փակ էր, թեեւ այդ կազմակերպության քարտուղար Արմեն Աղայանը եւս դեկտեմբերի վերջին Իրաք զորախումբ ուղարկելը որակել էր իբրեւ ազգային դավաճանություն եւ խոստացել, որ այդ ծրագիրը իրագործողների նկատմամբ իրենք կվարվեն՝ ինչպես վարվում են ազգի դավաճանների հետ:

Ավետիս Բաբաջանյան