Սուպերարեվմտամետները. լեյտենանտ Շմիդտի որդիները ՀՀ-ից

Տպագրվել է «Հայկական Ժամանակ» օրաթերթի՝ 2005 թվականի հունվարի 21-ի համարում

Անցած շաբաթ «Գերման Մարշալի» հիմնադրամի ծրագրի շրջանակներում ճանաչողական այցով տարածաշրջանում էին գտնվում  ԱՄՆ կոնգրեսականների խորհրդականներն ու օգնականները, որոնք հանդիպել են հայաստանյան քաղաքական ուժերի ներկայացուցիչների հետ: Նշյալ այցն ու հանդիպումները դժվար թե հատուկ հիշատակության արժանի լինեին, եթե այդ հանդիպումների ընթացքում մեր քաղաքական որոշ ուժերի ներկայացուցիչներ այնպիսի ելույթներ չունենային, որոնք երգիծական ժանրի փայլուն նմուշներ են եղել: Մեր որոշ գործիչներ ԱՄՆ կոնգրեսականների ընդամենը օգնականների առաջ, իրար հերթ չտալով,  այնպես են նվաստացել ու ինքնամատուցվել, որ այդ ինքնամոռացության մեջ, հյուրերի ներկայությամբ, սկսել են միմյանց մեղադրել կոմսոմոլական անցյալ ունենալու մեջ:

Նման որակով ինքնամատուցվելու պատճառը, թերեւս, վրացական եւ ուկրաինական հեղափոխություններից հետո  արեւմտյան մամուլի պարբերական վստահեցումներն են, թե հեղափոխության հաջորդ օջախը Հայաստանն է: Ուստիեւ, ԱՄՆ կոնգրեսականների օգնականների հետ հանդիպման ժամանակ ոչ միայն ընդդիմության, այլ նաեւ իշխանական ու մերձիշխանական ուժերի որոշ ներկայացուցիչներ վերջիններիս ուղղակի հասկացրել են, թե իրենք են հայաստանյան սահակաշվիլիներն ու յուշչենկոները: Մասնավորապես, երբ հունվարի 13-ին ԱՄՆ կոնգրեսականների օգնականներն ԱԺ-ում հանդիպել են կոալիցիայի եւ ՄԱԿ խմբակցության ներկայացուցիչների հետ, ըստ հանդիպման մի ականատեսի, եթե Պարոնյանը ողջ լիներ, ապա կգրեր «Մեծապատիվ մուրացկանների» մերօրյա պատմությունը:

Հանդիպմանը ներկա ՀՀԿ, ՀՅԴ եւ ՄԱԿ խմբակցությունների անդամները, յուրաքանչյուրն առնվազն տասն անգամ, իրենց խորին շնորհակալությունն ու երախտագիտությունն են հայտնել ԱՄՆ-ին՝ Հայաստանին ցույց տված նյութական եւ բարոյական օժանդակության համար, եւ յուրաքանչյուրն իր կուսակցության անունից պաշտոնապես հայտարարել է, թե իրենք են Հայաստանում արեւմտյան արժեքների կրողն ու պահպանողը: Ու եթե ՀՀԿ եւ ՀՅԴ անդամները, որոնք, ինչպես պարզվել է այդ հանդիպման ժամանակ, ընդմիշտ արեւմտյան արժեքների անսասան կրողն են եղել, գոնե աշխատել են ինքնամատուցման չափը անցնել չափավորից մի քիչ շատ, ապա ՄԱԿ խմբակցության ղեկավար Գուրգեն Արսենյանը մի քանի այնպիսի հայտարարություններ է արել, որից մինչ օրս խորհրդարանական նրա կոլեգաները ուշքի չեն գալիս: 

Նախ, պարոն Արսենյանը կոնգրեսականների օգնականների ուշադրությունն է հրավիրել այն հանգամանքի վրա, որ համաշխարհային քաղաքակրթությանը վտանգ սպառնում է ոչ թե Մերձավոր Արեւելքից, այլ Ռուսաստանի հակաժողովրդական իշխանություններից: Ըստ ականատեսների՝ Արսենյանի այս դիտարկումն անսահման հիացրել է կոնգրեսականների օգնականներին, որոնք սկսել են սրտաճմլիկ հայացքով նայել Հայաստանում ժողովրդավարության եւ արեւմտյան արժեքների կղզյակ Արսենյանին: Ֆիքսելով, որ ամերիկացիների սիրտն այլեւս գրավված է՝ Արսենյանը, իր եւ հայաստանյան մյուս քաղաքական ուժերի կոնտրաստը շեշտելու համար, ամերիկացիների ուշադրությունն է հրավիրել այն փաստի վրա, որ երբ ՀՀԿ ներկայացուցիչ Հրանուշ Հակոբյանը ՀԼԿԵՄ կենտկոմի քարտուղար է եղել, ինքն այդ տարիներից եղել է անկախական եւ արեւմտյան արժեքների կրող (իմիջիայլոց հիշեցնենք, որ երբ Հրանուշ Հակոբյանը կոմսոմոլի քարտուղար էր, նույն այդ տարիներին Գուրգեն Արսենյանը Մասիս քաղաքի «Հայէլեկտրոմեքմատ» գործարանի ԼԿԵՄ կոմիտեի քարտուղարն է եղել):

Իհարկե, որեւէ մեկը չի վիճարկում, որ ՄԱԿ-ը արեւմտյան արժեքներին դավանող քաղաքական ուժ է, սակայն առնվազն մեկ ամիս առաջ, երբ ԱԺ-ում ՌԴ Պետդումայի նախագահ Բորիս Գրիզլովը հանդիպում էր խորհրդարանական ուժերի հետ, նույն Գուրգեն Արսենյանը, չգիտես ինչու, իր ելույթում խիստ բարձր է գնահատել ռուսական հակաժողովրդավարական իշխանությունների տնտեսական նվաճումներն ու անգամ Գրիզլովին խորհուրդ է տվել ուշադրություն դարձնել ոչ միայն Մոսկվայի, այլ նաեւ մարզերի վրա: Ավելին, նա մեր միակ քաղաքական գործիչն է եղել, որ հիշել է Գրիզլովի ծնունդն ու նրան նվեր մատուցել:  Ինչեւէ, ըստ մեր աղբյուրների, ԱՄՆ կոնգրեսականների օգնականները Հայաստանի խորհրդարանից դուրս են եկել այն հաստատ համոզմամբ, որ  հայաստանյան բոլոր քաղաքական ուժերը զզվում են Ռուսաստանից, եւ որ բոլորը երդվյալ արեւմտամետ են ու պատրաստ են օծվել հայկական Սահակաշվիլի եւ Յուշչենկո:

Այդուհանդերձ, արեւմտյան հյուրերը հայկական Սահակաշվիլի ու Յուշչենկո միայն իշխանամերձ ճամբարում չէ, որ հայտնաբերել են: Հունվարի 13-ին ԱՄՆ կոնգրեսականների օգնականները հանդիպել են նաեւ ընդդիմության հետ, եւ մասնավորապես «Ազգային միաբանության» նախագահ Արտաշես Գեղամյանը, ըստ մեր աղբյուրների, ամերիկացիների համար այնպիսի մանրամասնությամբ է վերաշարադրել արեւմտյան ժողովրդավարության հիմնադրույթները, որ բոլորի ճաշը սառել է:  Պատմում են, որ Գեղամյանը կոնգրեսականների օգնականներին նա՛խ իրազեկել է, որ իր գլխավորած խմբակցությունը միաձայն կողմ է քվեարկել Իրաք հայկական կոնտինգենտ ուղարկելուն, որից հետո ամենայն մանրամասնությամբ ներկայացրել է ԱԺ փակ նիստի ընթացքում իր ունեցած արեւմտամետ ելույթը:

Դրանից հետո Գեղամյանը կոնգրեսականների օգնականների համար ցիտել է Բժեզինսկու վերջին աշխատություններն այնպիսի մանրամասնությամբ, որ խմբի ղեկավարը ձանձրույթից սկսել է կարդալ իր առջեւ դրված մենյուն: Այդուհանդերձ, ինչպես վկայում են մեր աղբյուրները, ԱՄՆ կոնգրեսականների օգնականները Հայաստանից հեռացել են խիստ ոգեւորված ու խանդավառված. նրանք մեր փոքրիկ երկրում այնքան Սահակաշվիլի ու Յուշչենկո են հայտնաբերել, որ հիմա խիստ դժվար ընտրության առաջ են կանգնած, թե ում վրա ստավկա անել:

Իսկ առաջիկայում Հայաստան է այցելելու ՌԴ ԱԳ նախարար Սերգեյ Լավրովը: Ոչ մի րոպե չենք  կասկածում, որ մեր քաղաքական ուժերը ջանք ու եռանդ չեն խնայի ռուս պաշտոնյային պատմելու իրենց երդվյալ ռուսամետության ու հայ-ռուսական դարավոր բարեկամության մասին, որը չի կարող խաթարել ոչ մի քրչոտ արեւմուտք:

Նաիրա Զոհրաբյան