Մարտի 2-ին Հայաստանի խորհրդարանը կընտրի հանրապետության 4-րդ նախագահին: Արդեն պարզ է, որ նախագահի ընտրությունը կանցկացվի մեկ թեկնածուով՝ իշխող ՀՀԿ-ի կողմից առաջադրված, թեեւ, եթե ԱԺ-ի 105 պատգամավորը ցանկանար, կարող էր մինչեւ 4 թեկնածու առաջադրել: Արդեն պարզ է, որ ՀՀԿ-ի թեկնածուն Մեծ Բրիտանիայում ՀՀ արտակարգ եւ լիազոր դեսպան Արմեն Սարգսյանն է:

Ըստ որոշ տեղեկությունների, Սերժ Սարգսյանը հանձնարարել է նախագահին ընտրել մեկ փուլով, թեեւ 2015-ին ընդունված Սահմանադրությունը թույլատրում է ընտրության երեք փուլ անցկացնել: Հանրապետական կուսակցության տարբեր գործիչներ «ՀԺ»-ի միեւնույն հարցին պատասխանելով՝ նշում էին, թե մեկ փուլով ընտրված նախագահը միանգամից ընդունելի կլինի ինչպես մեր, այնպես էլ միջազգային հասարակության կողմից: Սերժ Սարգսյանի բարի ցանկությունը, որ նախագահը պետք է առաջին փուլով ընտրվի իրականություն չի դառնա, եթե խորհրդարանի իշխանական ճամբարին չմիանան ընդդիմադիր որոշ պատգամավորներ:

Տեսականորեն առաջին փուլով ընտրվելու համար թեկնածուին անհրաժեշտ է 79 պատգամավորի կողմ քվե: ՀՀԿ-ն իր քաղաքական գործընկեր ՀՅԴ-ի հետ ունի 65 պատգամավոր, այսինքն, եթե կոալիցիոն գործընկերները եկել են հայտարարի, չունեն տարաձայնություններ, միեւնույն է նրանց ընդդիմադիրներից եւս 14 ձայն է անհրաժեշտ: ԵԼՔ դաշինքի մի քանի ներկայացուցիչներ «ՀԺ»-ի հետ զրույցում միանշանակ բացառել են, որ իրենց 9 պատգամավորից որեւէ մեկը կողմ կքվեարկի ՀՀԿ-ի թեկնածուին: Խորհրդարանի կուլիսներում թեժ քննարկվում է, որ իշխանության քվեների պակասը լրացնելու է ընդդիմադիր Ծառուկյան խմբակցությունը:

Ծառուկյան դաշինքի պատգամավորներն այս հարցի մասին խոսելիս եւ մեկնաբանություններ կատարելիս՝ խիստ զգուշավոր են ու զուսպ: Տեղեկացնում են, որ ԲՀԿ-ի խորհրդի նիստ տեղի չի ունեցել, վերջնական որոշման դեռ չեն եկել: Չի բացառվում, որ կուսակցությունը նիստ անի, քցի-բռնի եւ որոշի առաջնորդվել խիստ ժողովրդավարական գաղափարախոսությամբ, եւ դաշինքի յուրաքանչյուր պատգամավորի ազատ իրավունք տա ընտրություն կատարելու՝ ըստ սեփական համոզմունքների, եւ պատահականորեն ստացվի այնպես, որ ըստ արդար խղճի քվեարկած պատգամավորներից 14-ի խիղճը եւ համոզմունքները տանեն դեպի ՀՀԿ-ի թեկնածու Արմեն Սարգսյանը: Այսպես, հա՛մ Սերժ Սարգսյանի հերթական հրամանը ի կատար կածվի՝ նախագահին մեկ փուլով ընտրելու մասով, հա՛մ Ծառուկյան դաշինքը կպահպանի ընդդիմադիրի կեցվածքը:

Դաշինքի խոսնակ Տիգրան Ուրիխանյանը «Հայկական ժամանակ»-ի հարցին, թե հնարավոր է, որ կուսակցությունը որոշի պատգամավորներին ընտրության հարցում ազատ թողնել, կամ որոշում կայացվի սատարել ՀՀԿ-ի թեկնածուին, քանի որ բոլորովին վերջերս Գագիկ Ծառուկյանը խորհրդարանում չբացառեց ՀՀԿ-ի թեկնածուին սատարելու հավանականությունը:

«Գագիկ Ծառուկյանն ասել է, որ հնարավոր է կքննարկենք, ավել բան չեք լսել: Դեռ քննարկում չենք արել, իսկ իմ անձնական դիրքորոշումն անձի մասին կհայտնեմ մեր քննարկումների ժամանակ»,- ասաց Ուրիխանյանը:

ՀՀԿ-ից չեն շտապում ենթադրել, թե ընդդիմադիր թեւից, մասնավորապես՝ Ծառուկյան խմբակցությունը կսատարի՞ իրենց թեկնածուին, թե՞ ոչ: ՀՀԿ խմբակցության ղեկավար Վահրամ Բաղդասարյանը «ՀԺ»-ի հարցին պատասխանելով ասաց, որ այդ ամենը պարզ կդառնա այն ժամանակ, երբ իրենց թեկնածուն հանդիպի խորհրդարանի քաղաքական ուժերի հետ, այդ թվում նաեւ՝ Ծառուկյան խմբակցության: Սրան զուգահեռ, ՀՀԿ-ական մի քանի պատգամավորներ «ՀԺ»-ի հետ մասնավոր զրույցներում զգուշացնում են՝  չզարմանանք, եթե ծառուկյանական թեւն ամբողջական կազմով կողմ լինի ՀՀԿ-ի թեկնածուին: Նրանք մատնանշում են Գագիկ Ծառուկյանի վերջին այցը խորհրդարան, համապատասխան սատարման մասին հայտարարությունը եւ ԵԼՔ-ի թեկնածուին չսատարելու հանգամանքները: Այսպիսով՝ ՀՀԿ-ում վստահեցնում են, որ հարցը լուծված է, մի անհանգստացեք:

Իշխանության մաս կազմող ՀՅԴ-ն եւս չի շտապում հստակ պատասխան տալ այս իրավիճակի հետ կապված: Սակայն «Հայկական ժամանակ»-ի հետ զրույցում ՀՅԴ խմբակցության քարտուղար Աղվան Վարդանյանը մի դեպք հիշեց, երբ ԱԺ լիագումար նիստի ժամանակ սահմանադրական օրենքներից մեկի առաջին ընթերցման ժամանակ քվեարկել է 63 պատգամավոր, իսկ երկրորդի ժամանակ՝ 80-ից ավելի: Վարդանյանի ասվածի ենթատեքստում թերեւս այն է, որ Ծառուկյան դաշինքը պատրաստ է իշխանության թեկնածուի օգտին կողմ քվեներ շռայլել:

Տպել
3956 դիտում

Արմեն Սարգսյանն առանձնազրույց է ունեցել Վրաստանի վարչապետ Գեորգի Կվիրիկաշվիլիի հետ

Սա նոր Հայաստանն է, որը ես շատ սիրում եմ. զվարթ շրջանավարտները՝ կառավարական ամառանոցում

Սահմանամերձ համայնքների շրջանավարտների տոնը կառավարական առանձնատանը՝ լուսանկարներով

Նախագահ Արմեն Սարգսյանը տիկնոջ հետ ժամանել է Թբիլիսի

ՊԵԿ նախագահի 2 տեղակալներին հարցաքննել են, ձերբակալվեց 4 հոգի. ԱԱԾ-ի աղմկոտ բացահայտումը

Էրեբունու բանդայի անդամները թաղապետարանի աշխատակիցներ են (լուսանկարներ, տեսանյութ)

Վարչապետը միացավ շրջանավարտների տոնախմբությանը (տեսանյութ, լուսանկար)

Էրեբունիում զանգվածային անկարգությունների գործով կասկածվողը Արտաշես Չիչոյանի հայրն է

ԵԽԽՎ համազեկուցողները բարձր են գնահատել հավաքների ժամանակ Պաշտպանի աշխատանքը

Ֆրանսիայում ՀՀ դեսպանի հանդիպումը ԱԺ Ֆրանսիա-Հայաստան բարեկամության խմբի հետ

Իրանի Իսլամական հանրապետության քաղաքացու դի է հայտնաբերվել

Վարչապետն ընդունել է Ֆրանկոֆոնիայի ՄԿ քարտուղարության պատվիրակությունը

Կիսադատարկ նիստեր. նախանձելի աշխատավարձ ստացող պատգամավորներն աշխատանքի չեն գալիս

Նիկոլ Փաշինյանին շնորհավորական ուղերձ է հղել Միացյալ Թագավորության վարչապետ Թերեզա Մեյը

Վերջին անգամ «Ռեալը» հենց «Լիվերպուլին» է պարտվել Չեմպիոնների լիգայի եզրափակչում

Հստակեցվում է Էրեբունիում անկարգությունների մասնակցած անձանց շրջանակը (տեսանյութ)

Սահմանամերձ դպրոցների բազմաթիվ շրջանավարտներ այսօր հյուրընկալվել են վարչապետի առանձնատանը

ԴԱՀԿ-ի պատասխանը «Հայկական Ժամանակ» օրաթերթի հրապարակմանը

Սպիտակի համայնքապետարանի ուշագրավ գնումները եւ ֆինանսական բաժնի պետի բացատրությունը

Արագաչափերը չեն բարձրացրել անվտանգության մակարդակը եւ դրանց նպատակը եղել է փող գռփելը