ԱԱԾ-ի ամենամյա տվյալները. սահմանախախտման բազմաթիվ գործեր դատարանում են

Արդեն մի քանի ամիս է՝ մամուլը գրում է Հայ-իրանական սահմանին հերթական սահմանախախտների ձերբակալման մասին: Այս ամիսներին բազմաթիվ դեպքեր է բացահայտվել եւ մի քանի օտարեկրացիների քրեական պատասխանատվության ենթարկվել, սակայն այդ մասին ԱԱԾ-ն հայտնեց երեկ երկարաշունչ հաղորդագրություն տարածելով:

Ըստ այդմ՝ բացահայտվել է անօրինական միգրացիայի կազմակերպմամբ զբաղվող անդրազգային հանցավոր խումբ, որը Հայաստանի Հանրապետության տարածքով իրականացրել է օտարերկրյա քաղաքացիների անօրինական միգրացիա դեպի Իրանի Իսլամական Հանրապետություն, ապա՝ Թուրքիայի Հանրապետություն:

2017 թվականի հունվար-հունիս ամիսների ընթացքում ՀՀ ԱԱԾ աշխատակիցների կողմից բացահայտվել է հայ-իրանական սահմանի Մեղրիի հատվածում Իրաքի 1, Ուզբեկստանի 1 եւ Իրանի 4 քաղաքացիների ապօրինի սահմանահատման 5 դեպք: ԱԱԾ-ն միայն չոր վիճակագրական տվյալներ է հայտնել, մինչդեռ այդ դեպքերի մասին օրեր առաջ էլեկտրոնային ԶԼՄ-ներից մեկը ավելի մանրամասն գրել էր՝ ենթադրվում է ԱԱԾ-ից ստացված արահոսքի հիման վրա:

Այսպես՝ 2017 թվականի դեկտեմբերի 26-ին ԱԱԾ աշխատակիցները ձերբակալել են Ուզբեկստանի Հանրապետության քաղաքացի Գապառովա Օմինակոնին, Ղրղըզստանի Հանրապետության քաղաքացի Դիլֆուզա Ումարովային, Եմենի Հանրապետության քաղաքացի Ալ-Քուբլանի Եսմայիլ Ալի-Աբդոլիին։ Պարզվել է, որ վերջիններս նախնական համաձայնության են եկել Թուրքիայի Հանրապետությունում բնակվող ոմն Սալիհի հետ, ով շահադիտական նպատակով խոստացել է Իրանի Իսլամական Հանրապետությունում բնակվող ոմն Կադայիի օգնությամբ կազմակերպել նրանց անօրինական միգրացիան՝ Հայաստանի տարածքով դեպի Իրանի Իսլամական Հանրապետություն, որտեղից էլ՝ Թուրքիա։ Այդ ամենի դիմաց պահանջել է յուրաքանչյուրից 2000 ԱՄՆ դոլար։

ԱԱԾ ծառայողները պարզել են նաեւ, որ Հայաստանում որպես տաքսու վարորդ աշխատող Սարգիս Թ.-ն այդ անձանց 2017 թվականի դեկտեմբերի 26-ին տեղափոխել է Ագարակ քաղաք, որտեղից էլ Նյու Վադի գյուղ, այնուհետեւ նշված անձինք իջել են Արաքս գետի ափին եւ փորձել են ապօրինի հատել սահմանը, որպեսզի Կադայիի օգնությամբ նավակով անցնեն Արաքս գետի վրայով դեպի Իրանի Իսլամական Հանրապետություն։

Նշված անձանց ծրագիրը խափանվել է, քանի որ ԱԱԾ աշխատակիցների կողմից նրանք հայտնաբերվել եւ ձերբակալվել են:  

2017 թվականի ընթացքում ՀՀ ԿԱ ԱԱԾ քննչական վարչությունում այդօրինակ դեպքերի առթիվ ընդհանուր առմամբ հարուցվել է 45 քրեական գործ, որոնցով 47 անձ (22-ը Հայաստանի Հանրապետության, իսկ 25-ը՝ օտարերկրյա քաղաքացիներ) ներգրավվել են որպես մեղադրյալ։ Նրանցից 40-ի վերաբերյալ 21 քրեական գործ մեղադրական եզրակացությամբ ուղարկվել է դատարան, իսկ 7 անձի նկատմամբ հայտարարվել է հետախուզում։

ԱԱԾ-ն ամեն տարվա սկզզբին կամ վերջին հանդես է գալիս նման հաղորդագրություններով: Ընդհանուր առմամբ՝ նման սահամանխախտման դեպքերով գործեր կարելի է գտնել նաեւ Դատական տեղեկատվական համակարգում (տարբեր տարիների):

Այդօրինակ դեպքերից մեկով 2017 թվականի դեկտեմբերին հրապարկվել է դատավճիռ: Մասնավորապես Թուրքիայի քաղաքացի Օզգյուլ Դումանին մեղադրանք է առաջադրվել այն բանի համար, որ նա 23.05.2017թ. Թուրքիայի կողմից հատել է Արաքս գետը եւ հաղթահարելով սահմանային ինժեներատեխնիկական կառույցները` սողանցելով փշալարերի տակով, առանց սահմանված փաստաթղթերի եւ առանց պատշաճ թույլտվության, Արագածոտնի մարզի Թլիկ գյուղի հատվածում ապօրինի հատել է Հայաստանի Հանրապետության պահպանվող պետական սահմանը: Նա  մեղավոր է ճանաչվել Արագածոտնի մարզի ընդհանուր իրավասության դատարանի կողմից եւ դատապարտվել ազատազրկման 6 ամիս ժամկետով:

Նույն գործի շրջանակներում Թուրքիայի քաղաքացի Աբդուլբարի Կանատին մեղադրանք է առաջադրվել այն բանի համար, որ նա տեղեկանալով, որ Թուրքիայի Հանրապետության քաղաքացի Օզգյուլ Դումանն ունի խնդիրներ Թուրքիայի Հանրապետության տարածքում, ցանկություն ունի ապօրինի կերպով տեղափոխվել Հայաստանի Հանրապետություն, և ստանալով առաջարկություն` հիշյալ հանցավոր մտադրությունն իրականացնելու նպատակով օժանդակել է նրան, ստանձնել է 10000 ԱՄՆ դոլար գումարի դիմաց` խորհուրդներով, ցուցումներով եւ տեղեկություններ տրամադրելով` օժանդակել նրա ապօրինի սահմանահատմանը: Նա եւս մեղավոր է ճանաչվել եւ դատապարտվել 6 ամիս ժամկետով:

Նյութը հրապարակվել է «Հայկական ժամանակ» օրաթերթի հունվարի 27-ի համարում: