Խնդիրներ եւ խոչընդոտներ. «Կրեմլյան զեկույցում» հայտնված ռուսաստանցի օլիգարխները «սկում» են

ԱՄՆ-ում վերջերս հրապարակած «Կրեմլյան զեկույցում» հայտնված ռուսաստանցի գործարարները սկսել են խոչընդոտների ու անհարմարությունների բախվել:

Ինչպես գրում է Bloomberg-ը, գործարարները սկսել են նկատել, որ իրենց գործունեությանն ավելի ակնդետ ուշադրություն է հատկացվում: Ցուցակում ընդգրկված գործարարներից մեկը, որը չի ցանկացել հրապարակել իր անունը, հայտարարել է, որ այս պահին իր գործարքը կարող է խափանվել:

«Գործարքը, որը պետք է ավարտվեր մի քանի ամսվա ընթացքում, կարող է խափանվել»,- ասել է նա Bloomberg-ին: Մեկ այլ գործարար, գրում է գործակալությունը, դժգոհել է, որ զեկույցը հարված է հասցրել իր հեղինակությանը:

Նշվում է, որ զեկույցի հրապարակումից հետո բանկերը սկսել են ուշադիր հետեւել ցուցակում ընդգրկված գործարարների գործարքներին:

ԱՄՆ ֆինանսների նախարարությունը հունվարի 30-ին հրապարակել էր ռուսաստանցիների ցուցակը, որոնք սերտ կապեր ունեն ՌԴ նախագահ Վլադիմիր Պուտինի հետ եւ ամերիկյան պատժամիջոցների թիրախում են: Ցուցակում էին հայտնվել 210 անձանց՝ 114 բարձրաստիճան քաղաքական գործիչի եւ 96 օլիգարխի անուններ:

«Կրեմլյան զեկույցն», ըստ էության, անցյալ տարվա օգոստոսին ԱՄՆ կոնգրեսի հաստատած եւ նախագահ Դոնալդ Թրամփի ստորագրած ՌԴ-ի դեմ պատժամիջոցների նոր փաթեթի տրամաբանական շարունակությունն է: Զեկույցում նշվում է, որ ցանկում ներառվել են 1 միլիարդ դոլարից ավելի կարողություն ունեցող գործարարները:

«Կրեմլյան զեկույց»-ում են ընդգրկվել նաեւ Կրեմլի խոսնակ Դմիտրի Պեսկովը, վարչապետ Դմիտրի Մեդվեդեւը եւ արտգործնախարար Սերգեյ Լավրովը: Բացի պաշտոնյաներից, այնտեղ ներառված են խոշոր տնտեսվարողներ, որոնց թվում՝ ռուսաստանաբնակ հայ գործարարներ Սամվել Կարապետյանը, Դանիլ Խաչատուրովը, Սերգեյ Գալիցկին (Հարությունյան):

Չնայած ցանկում հայտնված անձինք չեն հայտնվում պատժիչ միջոցների տակ, ինչպիսին է հաշիվների սառեցումը կամ վիզաների արգելքը, սակայն նրանց ներառումը կարող է հետ կանգնեցնել ԱՄՆ-ում եւ Եվրոպայում գտնվող բանկերին եւ այլ կառույցների նրանց հետ բիզնես վարելուց:

Գուցե այդ է պատճառը, որ «Կրեմլյան զեկույցի» հրապարակումից հետո ցուցակում ներառված 96 ռուսաստանցի օլիգարխի համակցված կարողությունը նվազել է 1,06 մլրդ դոլարով: Այս մասին հաղորդել էր Deutsche Welle-ն: Առավել շատ էժանացել են «Լուկօյլ» ընկերության ղեկավարի ակտիվները: Օլիգարխները նման ֆինանսական կորուստներ են կրել ընդամենը 13 ժամվա ընթացքում:

ՌԴ նախագահ Վլադիմիր Պուտինը բավականին կոշտ ու հեգնական տոնով էր մեկնաբանել տվյալ փաստաթուղթը, պատասխանելով հարցին, որ միայն ինքը չկա այդ ցուցակում: Նա կարճ կատակել է՝ արտաբերելով հետեւյալ բառակապակցությունը. «վիրավորական է»:

«Ցուցակում ընդգրկված յուրաքանչյուր կառույցի կամ մարդկանց հետեւում կանգնած են հասարակ քաղաքացիներ, աշխատանքային կոլեկտիվներ: Ըստ էության, մեզ բոլորիս ընդգրկել են մի ինչ-որ ցուցակում»,- ասել է ՌԴ նախագահը ու հավելել, որ հարկավոր է առաջնորդվել հայտնի կանոնով. «Շունը հաչում է, քարավանը գնում»:

Ռուսաստանին նետած ԱՄՆ-ի մարտահրավերը պատահական չէ եւ այն բխում է Մոսկվայի աշխարհաքաղաքական ամբիցիաները զսպելու Վաշինգտոնի ռազմավարական նպատակադրումից:

Բոլորովին վերջերս ԱՄՆ նախագահ Դոնալդ Թրամփի ներկայացրած ազգային անվտանգության հայեցակարգում Ռուսաստանը Չինաստանի հետ մեկտեղ ներկայացված էին որպես ռեւիզիոնիստական երկրներ, որոնք փորձում են հաստատել ամերիկյան շահերին եւ արժեքներին հակասող աշխարհակարգ:

Տպել
987 դիտում

Ցուցակում ընդգրկվածների հետ հարցազրույց ենք անցկացրել. Ալեն Սիմոնյան

Երթևեկության կազմակերպման փոփոխություն Երևանի Սասունցի Դավիթի և Բելինսկու փողոցների խաչմերուկում

Բակո Սահակյանը Փարիզում հանդիպել է Ֆրանսիա-Արցախ բարեկամության շրջանակի անդամների հետ

Սամբոյի աշխարհի առաջնությունում հայաստանցի սամբիստները նվաճեցին երեք մեդալ

Իտալիայի Ազգային հետազոտությունների խորհրդի նախագահը հետաքրքրված է ՀՀ նախագահի քվանտային տեսությամբ

ՀՀԿ-ն գալիս է որպես ընդդիմություն՝ ունենալով Արցախի անվտանգ ապագան իր օրակարգի 1-ին կետ. Վ. Սարգսյան

Ձյան ու մերկասառույցի պատճառով արդեն ահազանգեր կան, մեքենա է արգելափակվել. ԱԻՆ

Հայաստանում ձյուն է տեղում, դժվարանցանելի են Դիլիջանի ոլորանները, որոշ տեղերում մառախուղ է, մերկասառույց

Արարատի աղբավայրից վտանգավոր արտանետումներ այլևս չեն լինի, աղբը թաղել են, մի մասը՝ մշակել

«Արզնի կաթ»-ը հերքում է բուսական յուղի մասին հրապարակումը. սեփական կովերի կաթն է օգտագործում

Հոգեկան խնդիրներ ունեցող հարևանուհու պատճառով տունը մոխրակույտի է վերածվել. տանտիրուհին օգնություն է խնդրում

Սոցիալ Դեմոկրատ Հնչակյան կուսակցությունը չի մասնակցի ընտրություններին. գաղափարական սկզբունքի խնդիր է

Քրեական գործեր՝ հոգեբուժարաններում արձանագրված խախտումների վերաբերյալ

«Քաղաքացու որոշում» ՍԴԿ-ն հրապարակել է ցուցակի առաջին 31 թեկնածուների անունները

Վարորդներին խորհուրդ է տրվում երթեւեկել ձմեռային անվադողերով

Ես կլինեմ ՀՀԿ-ի կենտրոնական հարձակվողը. Մենուա Հարությունյան

Դեկտեմբերին արտահերթ ընտրություններ կլինեն նաեւ Ուրցաձորում, համայնքի ղեկավար են ընտրելու

«Ազգային Առաջընթաց» կուսակցության ցուցակը կին է գլխավորում

Գլխավոր դատախազությունը կարճել է Հայաստանում Քևին Օքսուզի դեմ հարուցված քրեական գործը

Գողություն Աբովյան փողոցի սրճարաններից մեկում. որոնվում է տեսապատկերված անձը (տեսանյութ)