Ականջացավ. համախմբում չի ստացվում

Տպագրվել է «Հայկական Ժամանակ» օրաթերթի՝ 2005 թվականի փետրվարի 18-ի համարում

«Արդարություն» դաշինքի մամուլի քարտուղար Ռուզան Խաչատրյանը երեկ դաշինքի լիդեր Ստեփան Դեմիրճյանի հետ ունեցած խոսակցությունից հետո մեզ հայտնեց, որ «Արդարություն» դաշինքի անունից որեւէ մեկը ՀՀՇ-ի կամ որեւէ այլ քաղաքական ուժի հետ շփումներ չի ունեցել եւ առավելեւս նրանց չի առաջարկվել մասնակից դառնալ ապրիլին դաշինքի կողմից իրականացվելիք իշխանափոխությանը: Նման պարզաբանման անհրաժեշտություն առաջացել էր այն բանից հետո, երբ «Արդարություն» դաշինքի անանուն մի ներկայացուցիչ մեր թերթի միջոցով հայտարարել էր, որ Ստեփան Դեմիրճյանին այլեւս չեն վախեցնում ՀՀՇ-ի ականջները եւ իշխանափոխության խնդիրները լուծելու համար անհրաժեշտ է ամբողջ ընդդիմադիր դաշտի համախմբում:

«Մենք միշտ էլ հայտարարել ենք, որ ցանկացած քաղաքական ուժի ներսում կան ազնիվ, սկզբունքային եւ հայրենասեր մարդիկ: Եւ ամենեւին պարտադիր չէ, որ մենք բանակցենք այս կամ այն կուսակցության հետ, որպեսզի այդ մարդիկ աջակցեն մեզ»,-ասում է Ռուզան Խաչատրյանը: Այսինքն, հանուն իշխանափոխության մեծ նոր ընդդիմադիր բլոկի ձեւավորումը, թեկուզ «Արդարություն» դաշինքի շուրջ, այս պահին բացառվում է: Ոչ միայն «Արդարության» եւ նրա լիդերի դիրքորոշման, այլ նաեւ այն ուժերի դիրքորոշման պատճառով, որոնք կարող էին աջակցել դաշինքին: ՀՀՇ-ի մի ներկայացուցիչ, որը դարձյալ ցանկացավ չնշել իր անունը, մեզ հետ զրույցում հայտնեց, որ իրենց համար ամենեւին էլ զարմանալի չէ, որ «Արդարություն» դաշինքը եւ նրա լիդերը այդքան համառորեն դեմ են արտահայտվում ՀՀՇ-ի հետ համագործակցությանը:

«Մի պահ պատկերացրեք, որ համատեղ հանրահավաք է: Եթե հարթակից ելույթ ունենա ՀՀՇ որեւէ ներկայացուցիչ, համոզված եղեք, որ հավաքվածները այլեւս չեն ցանկանա որեւէ մեկին լսել»,- ասում է մեր զրուցակիցը: Սակայն անկախ գործող ընդդիմության վերաբերյալ ունեցած իրենց մոտեցումներից, արդյո՞ք ՀՀՇ-ն պատրաստ է օժանդակել ընդդիմությանը Հայաստանում իշխանափոխություն իրականացնելու եւ արեւմտյան արժեքային համակարգ հաստատելու համար: «Արեւմտյան բառը մեզ համար մի քիչ անհասկանալի է: ԱՄՆ-ն էլ է արեւմուտքում, Կուբան էլ: ԱՄՆ-ում ժողովրդավարություն է, Կուբայում` բռնապետություն, հիմա մենք չենք հասկանում, ո՞ր արեւմտյան երկրի արժեքներն են իրենք ցանկանում հաստատել Հայաստանում»,- կեսլուրջ, կեսկատակ ասում է մեր զրուցակիցը: Իսկ ինչ վերաբերում է իշխանափոխությանը, ապա ՀՀՇ ներկայացուցիչը այնքան էլ հակված չէ հավատալ, որ գործող ընդդիմությունը ընդունակ է իշխանափոխություն իրականացնել:

«Այդ նույն մարդիկ իշխանափոխություն էին իրականացնում 2002 թվականի ապրիլին, երբ փակվեց «Ա1+» հեռուստաընկերությունը, հետո իշխանափոխություն էին իրականացնում 2003 թվականի փետրվարի 19-ին, մարտի 5-ին, 2003 թվականի խորհրդարանական ընտրությունների ժամանակ: Հետո որոշեցին իշխանափոխություն իրականացնել 2004 թվականի ապրիլին: Բոլոր այդ իշխանափոխությունները ավարտվում էին հասարակության ըմբոստ եւ պայքարի պատրաստ մասի ձերբակալություններով, մասսայական ծեծով, որը այդ նույն ընդդիմությունը գնահատում է, որպես բարոյական հաղթանակ: Այսօր էլ ամեն ինչ կառուցելով ժողովրդի կարճ հիշողության վրա, այդ նույն մարդիկ եւ ուժերը որոշել են տանել հերթական բարոյական հաղթանակը, որի արդյունքը կլինի այս իշխանությունների հավելյալ պաշտոնավարումը»,- պարզաբանում է մեր զրուցակիցը:

Իսկ հնարավոր է, որ ինչպես պնդում է «Արդարություն» դաշինքի քարտուղար Վիկտոր Դալլաքյանը, իշխանությունները այս տարի չեն համարձակվի դիմել ուժի գործադրման, քանի որ վերջին մեկ տարվա ընթացքում Հայաստանի իշխանությունների դիրքերը թուլացել են, իսկ ԼՂ հարցը մտել է փակուղի: Մեր զրուցակիցը միամիտ է համարում նաեւ այս ձեւակերպումները, խորհուրդ տալով նկատի ունենալ, որ ԼՂ հարցը փակուղի մտել է դեռեւս 1998 թվականից, իսկ իշխանությունները, ըստ մեր զրուցակցի, միշտ էլ թույլ են եղել, սակայն ընդդիմությունը չի կարողացել օգտվել այդ թուլությունից:

«Եթե այդ սկզբունքով առաջնորդվենք, ապա հաջորդ տարի իշխանությունները ավելի թույլ են լինելու քան այս տարի են, իսկ 2007-ին ավելի թույլ կլինեն քան 2006 թվականին»,- ասում է մեր զրուցակիցը: Այդ դեպքում ինչ է առաջարկում ՀՀՇ-ն եւ ինչպիսի լուծում են տեսնում իրենք: «Եթե իրոք շատ են ուզում իշխանափոխություն, թող մեզ գոնե չխանգարեն եւ մենք անպայման կանենք»,- վստահեցնում է նա: Հայաստանի ազատական առաջադիմական կուսակցության քաղխորհրդի անդամ Էդուարդ Անտինյանն էլ ասում է, որ իրենք շարունակում են պնդել իրենց տեսակետը, ըստ որի Հայաստանում իշխանափոխություն կարող է տեղի ունենալ միայն գաղափարական դաշինքի ձեւավորման դեպքում:

Ավետիս Բաբաջանյան