Պահանջվող դեղատոմսի փոխարեն փորձել են կնիքով եւ բժշկի ստորագրությամբ դեղորայք ձեռք բերել

Մարտի 1-ից դեղատոմսով բաց թողնվող հակաբիոտիկները, հորմոնալ եւ կոդեին պարունակող դեղերն այսօր դեղատներում հարցրել են առանց դեղատոմս ներկայացնելու: «ՀԺ»-ն հարցում է կատարել Երևան քաղաքի կենտրոնական մի շարք դեղատներում, որոնց աշխատակիցների վստահեցմամբ, նշված դեղերը առանց դեղատոմս բաց չեն թողնվել, իսկ դեղատոմս ունեցող այցելուներ դեռ չեն եղել:

Պարզվում է, հասարակության զգալի մասը, տեղյակ լինելով կատարված փոփոխության՝ առանց դեղատոմսի հակաբիոտիկներ, հորմոնալ եւ կոդեին պարունակող դեղորայք ձեռք բերելու արգելքի մասին, այնուամենայնիվ այդ դեղերն առանց դեղատոմսի հարցրել են մեր այցելած բոլոր դեղատներում: Նշենք, որ Կառավարության համապատասխան որոշմամբ, փոխվել են նաեւ դեղատոմսերի ձեւերը, դեղատոմսեր գրելու կարգը: Ըստ այդմ, դեղատոմսերում գրվելու են դեղերի համընդհանուր (ջեներիկ) անվանումները: Որեւէ այլ թղթի վրա գրված դեղատոմսով դեղի դուրսգրումն արգելվել է:

Տեղյակ լինելով դեղատոմսի ձևի փոփոխման մասին՝ քաղաքացիները փորձել են մեկ կնիքով եւ բժշկի ստորագրությամբ թղթով դեղորայք ձեռք բերել, սակայն դեղատների աշխատողների վստահեցմամբ նրանք մերժվել են:

Դեղատներից մեկում մերժված հաճախորդի ներկայացրած թուղթը

Գրեթե բոլոր դեղատներում մեզ վստահեցրին, որ վերջին շաբաթում եւ հատկապես երեկ՝ մինչև ուշ գիշեր բնակչությունը տոպրակներով դեղորայք է գնել եւ մեծ հերթեր են գոյացել: Նրանց կարծիքով մարդկանց մեծ մասը խուճապի են մատնվել ու առնում են անգամ այն դեղերը, որոնք դեռևս մի քանի ամիս կարելի է առանց դեղատոմսով ձեռք բերել: Ընդհանուր վիճակագրական տվյալներով միջին եւ միջինից բարձր տարիքի անձինք են եղել դեղատներում, երիտասարդները համեմատաբար քիչ տոկոս են զբաղեցրել:

Դեղատների աշխատակիցներից շատերը վստահեցնում են, որ այսօրվա հաճախորդներն հիմնականում տեղյակ էին կատարված փոփոխություններից, ուղղակի ցանկանում էին ստուգել, արդյո՞ք իրականում ամեն ինչ այդքան լուրջ է, ինչպես ներկայացվում է: Դեղատներում ասացին, որ այսօր առանց դեղատոմս հավասարապես հարցրել են եւ՛ հորմոնալ դեղեր, եւ՛ հակաբիոտիկներ:

Վերջին ժամանակներս մեծ աղմուկ հանած Կառավարության նոր որոշումը՝ դեղերի վերաբերյալ՝ հասարակության կողմից ամենաքննարկվող եւ մտահոգող հարցերից մեկն է: Այսօր դեղատուն մտած 47- ամյա կինը բողոքում էր, ու ասում, որ շատ սխալ բան են արել. «Ես վահանաձև գեղձի խնդիր ունեմ, իմ դեղը հորմոնալ է, ես պետք է խմեմ ամեն օր: «Սիրմեդ» բժշկական կենտրոնից է բժիշկս, իսկ ինքը տեղում է լինում շաբաթը երկու անգամ ընդամենը, հիմա ինչ, եթե դեղս պրծավ ես որտեղից գտնեմ այդ պահին բժշկին, որ գնամ դեղատոմս վերցնեմ, էլ չեմ ասում, որ ամեն անգամ իր մոտ մտնելը արժե 10 հազար դրամ»,-ասաց նա: 47 -ամյա տիկինն ասում է, որ հիմարություն է համարում հորմոն պարունակող դեղերի դեղատոմսով բաց թողնելը, պարզաբանելով. «Ինչի պիտի մարդ հենց էնպես խմի, եթե խնդիր չունենա, դա էլ հո հոգեմետ դեղ չէ»: Վերջինս նշեց, որ այսուհետ Թբիլիսիից կամ Մոսկվայից բերել կտա իր դեղերը, քանի որ ամեն անգամ չի պատրաստվում գնալ բժշկի մոտ:

Դեղատներից մեկի աշխատակից Հարութ Հարոյանը «ՀԺ»-ի հետ զրույցում ասաց, որ շատերը դեռ նորմալ չեն էլ տիրապետում, թե ինչ փոփոխություններ են եղել. «Դեղատոմսերը մոտ վեց ամիս պահվելու են ապա ներկայացվելու հատիկ առ հատիկ հաշվվելու են, թե յուրաքանչյուր դեղատնից քանի դեղատումս է դուրս եկել: Մեզ մոտ մեկը եկավ, սովորական թղթի վրա էր գրված դեղի անունը մի կնիք էր ու բժշկի ստորագրությունը, անտիբիոտիկ էր ուզում՝ չենք տվել քանի որ չէր համապատասխանում պահանջվող դեղատոմսի ձևին»:

Դեղատան աշխատողն ասաց, որ դեռ մի դեպք ենք արձանագրել եւ բնական է, քանի որ առաջին օրն է: «Մարդիկ էլ կային, որ գիտեին ուղղակի համեզվելու համար նորից էին հարցնում», ասաց նա: Դեղատան աշխատողն ավելի շատ հակված է այն տարբերակին, որ հիմնականում անտեղյակության պատճառով են վերջին շաբաթում շատ դեղեր գնել, բացի հակաբիոտիկներ, հորմոնալ եւ կոդեին պարունակող դեղերից տարել են այլ դեղեր:

Նշենք որ որեւէ այլ թղթի վրա գրված դեղատոմսով դեղի դուրսգրումն արգելվելուց բացի սահմանվել է դեղատոմսի 4 նոր ձեւաթուղթ՝ թմրամիջոցների, հոգեմետ նյութերի, մեկանգամյա կամ բազմակի տրամադրվող դեղերի համար: Ինչ վերաբերում է դեղատոմսի  ժամկետներին, ապա, թմրանյութեր ու հոգեմետ նյութեր պարունակող դեղերի դեղատոմսերն ուժի մեջ են 10 օր, իսկ մնացած դեղերն ու բազմակի դեղատոմսերը` 6 ամիս:

Միայն դեղատոմսով դեղ բաց թողնելու փոփոխությանը, սակայն, նախատեսվում է անցնել աստիճանաբար: Մարտի 1-ից դեղատոմսով բաց են թողնվելու հակաբիոտիկները, հորմոնալ եւ կոդեին պարունակող դեղերը, հուլիսից` ներարկումային դեղերը, իսկ հոկտեմբերից դեղատոմսով դուրս կգրվեն մնացած բոլոր այն դեղերը, որոնք Հայաստանում գրանցված են որպես դեղատոմսով դուրս գրվող:

                                                                                         Աղունիկ Հովհաննիսյան

Նյութը տպագրվել է «Հայկական ժամանակ» օրաթերթի մարտի 2-ի համարում: