Լուսանկարը՝ ՀՀԿ 16-րդ համագումարից, 2016 թվական, նոյեմբեր

Հանրապետական բարձր մակարդակի մի շարք գործիչներ շարունակաբար հայտնում են «իրենց անձնական տեսակետն» առ այն, որ Սերժ Սարգսյանն իր անցած ուղիով, առկա հմտություններով եւ կարողություններով ուղղակի անփոխարինելի է երկրի ղեկավարի պաշտոնում: Նրանք միաժամանակ նշում են, որ ՀՀԿ շրջանակներում վարչապետի թեկնածուի հարցը դեռ չեն քննարկել: Թեեւ նրանց բոլորի թեկնածուն նույնն է՝ Սերժ Սարգսյանը, սակայն տարբեր են մոտեցումները: Մոտեցումներից մեկն այն է, որ ներկա մարտահրավերներին ծանոթ է եւ կարող է դիմագրավել միայն Սերժ Սարգսյանը: Մասնավորապես՝ Մանվել Գրիգորյանը մարտի 5-ին Ծիծեռնակաբերդում իր լիարժեք աջակցությունը հայտնեց Սերժ Սարգսյանի վարչապետի թեկնածությանը, նշելով որ Սարգսյանն իր համար անփոխարինելի է:

ՀՀԿ փոխնախագահ Արմեն Աշոտյանը դեռեւս փետրվարի 11-ին ասել էր, որ Սերժ Սարգսյանին տրվող քաղաքական գնահատականները՝ հատկապես անվտանգային եւ արտաքին քաղաքական ուղղություններին, «հիմնված են բացառապես ոլորտային հաջողությունների վրա»: Նա նաեւ նշել էր «տեսանելի այլընտրանքի բացակայության» մասին: Ինչ վերաբերվում է Սերժ Սարգսյանի անփոխարինելիությանը, ապա արդեն մարտի 3-ին ՀՀԿ փոխնախագահը հայտարարեց, որ այդ «թեզը բացարձակ կապ չունի պաշտամունքային ընկալումների հետ»: Ուշագրավ է, որ Աշոտյանը, անդրադառնալով հասարակական հնարավոր բողոքին, չի բացառում, որ «տասնյակ հազարավոր մարդիկ... քաղաքական լուծումներին այդ ժամանակահատվածում համաձայն չեն լինի եւ կարող են օրենքով իրենց բողոքն արտահայտել»:

Այս հարցում փոքր-ինչ տարբերվում է ՀՀԿ խոսնակ Էդուարդ Շարմազանովի կարծիքը: Ընդդիմության օրակարգը՝ թույլ չտալ Սերժ Սարգսյանի վարչապետացումը, նա համարում է կեղծ: Իսկ Սերժ Սարգսյանի վարչապետացման հարցով կիսում է նշված կուսակիցների կարծիքը: 2014 թ. էլ Սերժ Սարգսյանի արած հայտարարոթյունը, թե ինքը Սահմանադրական բարեփոխումներից հետո կառավարման խորհրդարանական մոդելի անցնելու պարագայում չի հավակնի նաեւ ՀՀ վարչապետի պաշտոնին, ՀՀԿ խոսնակը մեկնաբանում է հետեւյալ կերպ. «Վարչապետ ու նաեւ նախագահ չլինելու մասին Սերժ Սարգսյանը հայտարարել է այլ ժամանակաշրջանում եւ այլ իրողությունների պայմաններում»։ Հիշեցնենք՝ անցյալ շաբաթ նույն Շարմազանովը, բացատրելով, թե ինչպես կարող է քաղաքական, պետական գործիչն ասել մի բան, հետո հրաժարվել իր խոսքերից, բերեց Չերչիլի ու դը Գոլի օրինակները, ըստ էության զուգահեռներ անցկացնելով Սերժ Սարգսյանի եւ համաշխարհային այս երկու պատմական լիդերների միջեւ: Սա մի քիչ տարօրինակ է, որովհետեւ Շարմազանովը, օրինակ, լավ գիտակցում է, որ ինքը դեռ շատ հացուպանիր պետք է ուտի, որ Սերժ Սարգսյանի մակարդակի քաղաքական գործիչ դառնա: Այս մասին նա ասել էր «Հայկական ժամանակ»-ի թղթակցին տված հարցազրույցում: Իսկ Սերժ Սարգսյանը փաստորեն Չերչիլին եւ դը Գոլին հասնելու համար հացուպանրի կարիք չունի, նա արդեն նույն մակարդակի վրա է, ինչի համար մնում է նրան  եւ Շարմազանովին միայն շնորհավորել:

Ու քանի որ ՀՀԿ-ի շարքերում Սերժ Սարգսյանը միակն է, որ նման կալիբրի գործիչների հետ ոտք է մեկնում, ապա ՀՀԿ-ի վարչապետի թեկնածուն, ըստ ՀՀԿ խոսնակի անձնական կարծիքի, նա էլ պետք է լինի: Եվ այնուամենայնիվ Շարմազանովը «Ազատության» եթերում ասում էր, որ դա իր կարծիքն է, իսկ ՀՀԿ-ում հարցը կքննարկեն ապրիլի 9-ից հետո եւ մեկ շաբաթվա ընթացքում որոշում կկայացնեն: Դա փոքր-ինչ հակասության մեջ է մտնում ՀՅԴ պատգամավոր Արմեն Ռուստամյանի կարծիքի հետ, ըստ որի՝ մինչեւ ապրիլի 9-ը Դաշնակցությունը «ներքին կարգով» տեղյակ կլինի, թե ով է կոալիցիայի թեկնածուն: Այս մասին Արմեն Ռուստամյանն ասաց երեկ առավոտյան ԱԺ ճեպազրույցների ժամանակ: Նա ասաց, որ իրենք ներքին կարգով տեղյակ կլինեն, թե ով է լինելու ՀՀԿ-ի թեկնածուն, սակայն պաշտոնապես հարցը կքննարկեն ապրիլի 9-ից հետո: Եթե ՀՀԿ-ում հարցը քննարկելու են միայն ապրիլի 9-ից հետո, ինչպե՞ս է մինչեւ այդ կոալիցիոն գործընկերը ներքին կարգով տեղյակ լինելու: 

Երեկվա ճեպազրույցների ժամանակ, անդրադառնալով Սերժ Սարգսյանի հայտարարությանը, թե ինքը չի հավակնի վարչապետի պաշտոնին, ՀՀԿ խմբակցության ղեկավար Վահրամ Բաղդասարյանը հերթական անգամ ասաց, որ որոշումը կայացվելու է կուսակցության կողմից: Այս հարցով նախորդ հայտարարություններից այս մեկը տարբերվեց իր կտրուկ ձեւակերպմամբ. «Սերժ Սարգսյանը, բացի Հայաստանի Հանրապետական կուսակցության առաջնորդը լինելուց, շարքային կուսակցական է եւ պարտավոր է ենթարկվել քաղաքական ուժի որոշումներին»,- ասաց Բաղդասարյանը: Բարդ է, սակայն ՀՀԿ-ում պատկերացնել որեւէ մեկին, որը կարող է պարտադրել Սերժ Սարգսյանին իր կամքին հակառակ նշանակվել վարչապետ: Անհասկանալի է նաեւ՝ ինչո՞ւ պետք է Սարգսյանը առհասարակ դեմ լինի վարչապետ նշանակվելուն: Ինչեւէ, դրանից հետո Բաղդասարյանը եւս մեկ միտք արտահայտեց, որից հետո ամեն ինչ ընկավ իր տեղը: Նա հորդորեց անակնկալների չսպասել, թեեւ հետո փորձեց շտկել իրավիճակը, նշելով որ «քաղաքականության մեջ ոչինչ չի բացառվում»։

Նման բնույթի հայտարարություններն ավելի են ամրացնում վստահությունը, որ ՀՀԿ-ՀՅԴ կոալիցիայի թեկնածուն լինելու է Սերժ Սարգսյանը: Իսկ այն, որ երեկ հայտարարվեց, որ հարցը կքննարկվի միայն ապրիլի 9-ից հետո եւ մեկ շաբաթվա ընթացքում կհայտարարվի արդյունքների մասին, ակնհայտ է դարձնում, որ գոյություն ունի քաղաքական որոշում՝  Սերժ Սարգսյանի անունը որպես թեկնածուի հրապարակել միայն վերջին պահին, տվյալ դեպքում՝ ապրիլի 16-ին: Ինչպես հայտնի է, ԱԺ կանոնակարգ օրենքում արված փոփոխության համաձայն, կարող են վարչապետի թեկնածուին առաջադրել ապրիլի 16-ին եւ ընտրությունը անցկացնել 17-ին: Սա նման  է թաքուն-թաքուն վարչապետ դառնալուն: Եթե ամեն ինչ այսպես ընթանա, կստացվի, որ Սերժ Սարգսյանը, նախ խոստացավ չառաջադրվել վարչապետի պաշտոնում, ապա դրժեց իր իսկ խոսքը, եւ վերջում ծածուկ ընտրվեց վարչապետ՝ հասարակությանը նույնիսկ արձագանքի ժամանակ չթողնելով:  

Նյութը տպագրվել է «Հայկական ժամանակ» օրաթերթի մարտի 6-ի համարում:

Տպել
2669 դիտում

Պետք է զգալ ժամանակի ռիթմը. Լուիզա Ներսիսյանը՝ մշակութային խնդիրների մասին

«Ի՞նչ, որտե՞ղ, ե՞րբ» հաղորդումը հաջորդ տարվանից լինելու է բացառապես հայերեն. Արայիկ Հարությունյան

Փակ, դժվարանցանելի ճանապարհներ. Հայաստանի յոթ մարզերում ձյուն է տեղում

«Հայաստան» համահայկական հիմնադրամը այս տարի ավելի շատ դրամ է հանգանակել, քան նախորդ տարի. Արշամյան

Թուրքմենստանում ՀՀ նորանշանակ դեսպանն իր հավատարմագրերը հանձնեց Թուրքմենստանի նախագահին

Իմ ջանքերով Կիպրոսն ընդդեմ թուրքական ժխտողականության օրենք ընդունեց. Շարմազանովը՝ վերջին անգամ ԱԺ իր աշխատասենյակում

Նոր մասնագիտություններ, նորացված ֆակուլտետ, կրեդիտների տեղափոխում. սպասվող փոփոխություններ

Ջավախահայերի բողոքի ցույցը դադարեցված է. վաղը ՀՀ կառավարությունում կընդունեն նրանց

Հայաստանը հյուրընկալությամբ գերազանցել է Վրաստանին ու Ադրբեջանին. Passport Index

ՀՀ պաշտպանության նախարարի պաշտոնակատար Դավիթ Տոնոյանը զինգրքույկի լրացման կարգը սահմանելու մասին հրաման է ստորագրել

Էդմոն Մարուքյանն անակնկալ նվեր է ստացել (լուսանկար)

Միջազգային հեղինակավոր պարբերականները՝ Արցախի դրոշով «Արսենալի» դաշտ մտած երկրպագուի մասին

ՀՀ ՊՆ-ն հայտարարություն է տարածել ԶՈՒ պատվո պահակային վաշտում ծառայության անցնելու մասին

ԼՂ հակամարտության խաղաղ կարգավորումը շարունակում է մնալ Հայաստանի գլխավոր առաջնահերթությունը. Նիկոլ Փաշինյան

ՊՆ-ի հանդեպ ստանձնած պարտավորությունները չկատարելու դեպքերի առթիվ հարուցվել են քրեական գործեր

Ադրբեջանը Հայաստանի հետ սահմանի Ղազախի եւ Աղստեւի հատվածում ԶՈՒ-ն կփոխարինի սահմանապահներով

Նոր նշանակումը ավելի կբարելավի առաջնագծի ամրակայունությունը, իսկ Կարապետյանը Արցախի ծեծ ու ջարդի քավորն է. Վ. Բադասյան

Քոչարյանի պաշտպանները կալանքի որոշումը կբողոքարկեն. օրակարգում է նաեւ ՍԴ եւ ՄԻԵԴ դիմելու հնարավորությունը

Հանրապետության հրապարակում գլխավոր տոնածառի լույսերը կվառվեն դեկտեմբերի 21-ին

Երկրում ստեղծված իրավիճակը շատերին հուշում էր, որ կարող էր մեկ այլ որոշում լինել. Արմեն Գեւորգյան