Մերկացրել են դաշույնները. միջազգային մամուլի արձագանքը Պուտինի ընտրությանը

Միջազգային մամուլն ուշադրության կենտրոնում է պահում Ռուսաստանում տեղի ունեցած նախագահական ընտրությունները, որի արդյունքում համոզիչ հաղթանակ տարավ եւ շուրջ 76.6 տոկոս ձայներով ՌԴ նախագահի պաշտոնում վերընտրվեց գործող նախագահ Վլադիմիր Պուտինը:

Բրիտանական մամուլը, իսկ այդ երկրի հետ Ռուսաստանի հարաբերությունների ՌԴ ԳՀՎ կրկնակի լրտես Սերգեյ Սկրեպալի ու նրա դստեր թունավորումից հետո կտրուկ վատթարացել են, Պուտինի չորրորդ ժամկետն անվանում են «սեփական փրկության» ծրագրի մշակման փուլ:    

Financial Times-ը արձանագրում է, որ Պուտինը մեծ աջակցություն է ստացել նաեւ Մոսկվայում եւ մեջբերում մայրաքաղաքի բնակիչ 18-ամյա Իրինայի խոսքերը. «Ես քվեարկել եմ Պուտինի օգտին, չգիտեմ դա ճիշտ ընտրություն է, թե` ոչ, սակայն Մոսկվայում կյանքն ավելի ու ավելի բարվոք է դառնում»: Թերթը նշում է, որ նույն կարծիքին է նաեւ 19-ամյա Սվետլանան, որի գրեթե ողջ կյանքի ընթացքում Ռուսաստանը ղեկավարում է Վլադիմիր Պուտինը:  

Եթե Մոսկվայում մարդիկ ուրախ եւ առանց կաշկանդվածության մասնակցում էին ընտրություններին, ուրիշ պատկեր էր երկրի այլ տարածաշրջաններում: Օրինակ, Մոսկվայից 2 հազար կմ հեռավորության վրա գտնվող Մախաչկալայում հարձակվել են դիտորդի վրա, որը փորձել է Դաղստանում եւ Չեչնիայում հետեւել ընտրությունների ընթացքին: Այդ երկու երկրամասերում Պուտինը 2012 թվականին ստացել է ձայների 93 եւ 99 տոկոսներ, հիշեցնում է բրիտանական թերթը:  

Թեպետ բռնություններն ընտրությունների ժամանակ շատ չեն եղել, սակայն իրավախախտումների մասին բողոքներ բավականին շատ են ստացվել:

«Այն բանից հետո, երբ Կրեմլում խնդիր է դրվել 70 տոկոս Պուտինի օգտին քվե ապահովել շուրջ 70 տոկոս մասնակցության պայմաններում, Ռուսաստանի ռեգիոններից շատերի ղեկավարներն անցել են գործի եւ բոլոր ջանքերը գործադրել այդ խնդրի կատարման համար»,- գրում է թերթը ու հղում կատարելով Youtube-ում տեղ գտած ընտրախախտումների մասին տեսանյութերին, արձանագրում, թե ինչպես են լցոնումներ կատարել տարբեր ընտրատեղամասերում:

Չեչնիայի այն ընտրատեղամասերում, որտեղ եղել են ընդդիմադիր Ալեքսեյ Նավալնիի կազմակերպության դիտորդները, մասնակցությունը, նրանց խոսքով շատ սակավ է եղել՝ 29-49 տոկոս, ինչը, ըստ FT-ի տարօրինակ է 99 տոկոս հօգուտ Պուտինի քվե ապահովող երկրամասում: «Տեղի են ունենում Ռուսաստանի համար սովորական դարձած լցոնումներ, մարդկանց գրանցումների խախտումներ»,- ասել է դիտորդներից Պյոտր Վերզիլովը:  

Թեպետ Արեւմուտքի հետ Ռուսաստանի կոնֆլիկտը վերջին վեց տարվա ընթացքում խորացել է, իսկ տնտեսական վիճակը՝ վատթարացել, սակայն շատ քչերն էին կասկածում Պուտինի հաղթանակի վրա, որն այսօր՝ երրորդ ժամկետից հետո իրեն ավելի վստահ է զգում, գրում է Guardian-ը:

«Պարադոքս է, սակայն Պուտինն առաջին հերթին, ըստ վերլուծաբանների, պետք է սկսի ստեղծել փրկության ծրագիր: Եթե, իհարկե, ստացվի այն: Խնդրին այն է, որ չորրորդ ժամկետում նա պետք է կարողանա իշխանության փոխանցման մեխանիզմ ստեղծել, որն իր եւ իր մերձակա շրջապատի համար անվտանգության երաշխիքներ կստեղծի»,- ասել է թերթին Կարնեգիի Մոսկվայի կենտրոնի աշխատակից, լրագրող Կոնստանտին Գաազեն: Նրա խոսքով, կրեմլյան քաղաքականությունը վերածվել է «արյունալի սպորտի»:

«Տնտեսական վիճակը վատթարանում է, էլիտայի մանեւրելու դաշտը սեղմվում: Դաշույնները մերկացված են, շատերը մտածում են, թե ում են պատրաստելու որպես Պուտինի ժառանգորդ»,- նշում է թերթը:

Բրիտանական Reuters-ը Պուտինի հաղթանակը տպավորիչ է անվանում, սակայն նկատում, որ քվեարկությանը քաղաքացիների մասնակցության բարձ տոկոս հնարավոր է եղել ապահովել ադմինիստրատիվ ռեսուրսի գործադրման միջոցով: Մյուս կողմից՝ Պուտինի աջակիցները նշում են, որ ընտրություններում գրանցված արդյունքներն Արեւմուտքի նկատմամբ նրա կոշտ դիրքորոշման հարցում ժողովրդի պաշտպանությունն է:

«Կարծում եմ՝ Միացյալ Նահանգներում եւ Մեծ Բրիտանիայում հասկացան, որ չեն կարող ազդել մեր ընտրությունների վրա»,- ասել է խորհրդարանի վերին պալատի անդամ Իգոր Մորոզովը: Միեւնույն ժամանակ, վերին պալատի խոսնակ Վալենտինա Մատվիենկոն հաղթանակը բնութագրել է որպես Արեւմուտքի դեմ տարած բարոյական հաղթանակ: «Մարդիկ միավորվեցին: Աշխարհում ոչ մի երկիր նման բաց եւ թափանցիկ ընտրություններ չունի»,- ասել է նա:

Ռուսաստանի գործող նախագահ Վլադիմիր Պուտինը, ըստ ԿԸՀ տվյալների, մարտի 18-ին կայացած նախագահական ընտրություններում ստացել է 76,67% քվե քվեաթերթիկների: Այս պահին մշակվել են քվեաթերթիկների 99,75%-ը: Պուտինը, ըստ ԿԸՀ-ի, իր կարիերայի ընթացքում ընտրողների ռեկորդային քաղաքական աջակցությունն է ստացել: Նրա օգտին է քվեարկել 54,4 մլն քաղաքացի, ինչը 5,1 մլն-ով ավելի է 2004 թվականի ցուցանիշից։