Սեֆիլյանի մեղադրանքում մոռացել են Քենեդու սպանության մասին, իսկ դատավորի ձայնը դողում էր

Երեւան քաղաքի ընդհանուր իրավասության դատարանի Շենգավիթի նստավայրն այսօր շրջափակված էր ոստիկաններով. հրապարակվում էր «Նոր Հայաստան» հանրային փրկության ճակատի առաջնորդ Ժիրայր Սեֆիլյանի եւ մյուսների գործով դատավճիռը:

Սեֆիլյանին եւ մյուսներին ուղեկցումը դատարան այսօր ավելի էր խստացվել, նրանց ուղեկցում էին տասնյակից ավելի ոստիկանական ու քաղաքացիական մեքենաներ: Տարածքում էին նաեւ ՀՀ ոստիկանության հատուկ նշանակության վարչության աշխատակիցները (ՀՆՎ), որոնց ըստ ոստիկանության՝ կարելի էր տեսնել միայն, եթե տարածքում վտանգավոր հանցագործ է: «Օպերացիան» ղեկավարում էր Երեւանի փոխոստիկանապետ, ոստիկանության գնդապետ Վալերի Օսիպյանը: 

Դատարանի բակում կարգադրիչները լրագրողների մուտքը թույլ էին տալիս միայն զույգերով՝ մի քանի րոպեն մեկ. դատական նիստերի դահլիճն այսօր լեփ-լեցուն էր: Իսկ ահա նիստերի դահլիճում կարգադրիչների թիվը եռապատկվել էր, հատուկ հսկողություն էր սահմանվել ապակիների մոտ՝ հնարավոր «հարձակումն ապակու վրա» կանխելու համար: Եվ չնայած, դատավճիռը թե՛ նիստերի դահլիճում գտնվողները եւ թե՛ դատավարության մասնակիցները պետք է ունկնդրեին կանգնած, կարգադրիչները կարգադրեցին նիստերի դահլիճում գտնվողներին նստել:

Նիստերի դահլիճ մտավ նախագահող դատավոր Տաթեւիկ Գրիգորյանը. Սեֆիլյանը, Սաֆարյանը, Սասունիկ Կիրակոսյանը, Ներսես Պողոսյանը, Հրայր Թոփչյանը դատավճիռը լսեցին նստած: Դատավոր Տաթեւիկ Գրիգորյանի ձայնը դատավճիռը հրապարակելիս դողում էր:

Երբ հրապարակվեց Ներսես Պողոսյանի վերաբերյալ դատավճիռը, Պողոսյանը բարկացավ եւ սեռական բնույթի հայհոյանքներ հնչեցրեց մեղադրող դատախազ Պետրոս Պետրոսյանի հասցեին: Ուղեկցող ոստիկանները նրան քաշքշելով դուրս հանեցին: Իսկ դահլիճում ներկա գտնվող Պողոսյանի քրոջ ինքնազգացողությունը վատացավ, նրա համար շտապօգնություն հրավիրվեց դատարան:

Տաթեւիկ Գրիգորյանը, սակայն չէր շեղվում եւ շարունակում էր հրապարակել դատավճիռը: Դատարանը, ամենամեղմ պատիժը սահմանեց Ժիրայր Սեֆիլյանի դեմ ցուցմունք տված միակ անձի նկատմամբ. Հովհաննես Պետրոսյանը դատապարտեց 2 տարվա ազատազրկման։ Սա նշանակում է, որ Հովհաննես Պետրոսյանն երկու ամիս անց կհայտնվի ազատության մեջ: Ամենախիստ պատիժը բաժին հասավ Սեֆիլյանին՝ նա դատապարտվեց 10.5 տարվա ազատազրկման: Դատավճռի հրապարակումից հետո դահլիճում ներկա գտնվողները բղավեցին «մահ ռեժիմին», իսկ նրանցից մեկն էլ սկսեց երգել, ապա անիծել Սեֆիլյանին պատժողներին: Մեղադրող դատախազներ Պետրոս Պետրոսյանին եւ Հակոբ Ենոքյանին, սակայն չհաջողվեց անխոչընդոտ հեռանալ. քաղաքացիները նրանց վիրավորեցին եւ հայհոյանքներ հնչեցրին, նրանք կարողացան հեռանալ միայն ոստիկանների միջամտությունից հետո:

Դատավճռի հրապարակումից հետո, Սեֆիլյանի եւ Ներսես Պողոսյանի պաշտպան Արայիկ Պապիկյանը նշեց, որ մարտի 20-ին ՀՀ-ում արդարադատությունը մահացավ: Հարցին, թե Սեֆիլյանն ինչպես արձագանքեց, քանի որ ապակիներից այն կողմ գտնվողների համար լսելի չէր, Պապիկյանը փոխանցեց. «Ասաց՝ բրավո, կեցցե՛ք, շուտով նմանատիպ դատավճիռներ ձեզ համար է ընթերցվելու»: Նա ասաց, որ այս ողջ ընթացքում ոչ թե դատավարություն է իրականացվել, այլ՝ թատերական ներկայացում: «Անձին դատապարտում են ազատազրկման՝ երեք հոդվածներով, որեւէ մեկով ապացույց չունենք, սա հաշվեհարդար էր, քաղաքական բացահայտ պատվեր, այսօր մահացավ արդարադատությունը: Այս օրը պետք է դատարաններից դրոշն իջեցվի եւ դրա փոխարեն փողի վրա սեւ լենտ ամրացվի: Սա ուղղակի պատմության մեջ կմնա, եւ կգա ժամանակը, երբ քաղաքական իշխանությունը պատասխան կտա դրա համար»,- ասաց Պապիկյանը:

Դիտարկմանը՝ եթե Սեֆիլյանը հանցավոր մտադրություն ուներ, ինչու չէր կանխվել, Պապիկյանը դժվարացավ պատասխանել՝ հավելելով. «Սեֆիլյանի կոնկրետ մեղադրանքներում մոռացել են նշել Քենեդու սպանության մասին, որովհետեւ մյուս երեք հոդվածներն էլ ֆանտաստիկայի ժանրից են: Սեֆիլյանը էական լուրջ վտանգ էր ներկայացնում քաղաքական իշխանության համար, ինչի համար էլ իրեն լռեցնել էր պետք: Քաղաքական իշխանության համար ներկայիս վարչախումբը վախենում է Սեֆիլյան անձից, վախն այնքան մեծ է եղել, որ նրան պետք է ձայնազրկեին եւ հնարավոր ֆիզիկական ոչնչացում իրականացնեին»: Պաշտպանը նշեց, որ բողոքարկելու են դատավճիռը զուտ ձեւական ընթացակարգը պահելու եւ միջազգային ատյան դիմելու համար:

Ժիրայր Սեֆիլյանի կինը՝ Նանոր Սեֆիլյանը, չցանկացավ պատասխանել լրագրողների հարցին, նա հուզված էր: Իսկ Գեւորգ Սաֆարյանի մայրը մեր զրույցում արցունքները կոկորդում խեղդելով ասաց, որ որդու նկատմամբ քաղաքական հաշվեհարդար է իրականացվում՝ նշելով, որ ողջ դատավարության ընթացքում չեղավ որեւէ հիմք, որն ապացուցեր իր որդու մեղավորությունը:

Նույն կարծիքն է նաեւ Ներսես Պողոսյանի կինը՝ Լիա Պողոսյանը, որի ծննդյան օրն է այսօր: Նա ասաց, որ Ներսես Պողոսյանին կալանավորելու առաջին օրվանից նրա նկատմամբ անձնական թշնամանք է եղել նախկին քննիչ եւ ներկա փաստաբան Ամրամ Մակինյանի կողմից. «Զգույշ եղեք իրենից, ինքը էն մարդն է, ով մեղադրյալի ստորագրություն է կեղծում»: Նա նաեւ Գլխավոր դատախազությանը հանցագործության մասին հաղորդում ներկայացրեց երկու դրվագներով. «Փաստաթուղթ կեղծելու, անձնական սպառնալիքներ հնչեցնելու Ներսեսին հասցեին...Իր հացադուլի ժամանակ ես հասա մինչեւ գլխավոր դատախազի տեղակալ, հիմա հասնելու եմ մինչեւ գլխավոր դատախազ ու ապացուցեմ, որ այս մեղադրանքում տրամաբանություն չկա», - ասաց Լիա Պողոսյանը: Նա համոզված է` Ներսես Պողոսյանը որեւէ կապ չուներ ներկայացվող մեղադրանքների հետ, եւ նրան պարզապես ձերբակալել էին Ժիրայր Սեֆիլյանի դեմ ցուցմունքներ կորզելու համար: Այդ մասին իր պաշտպանական ճառում ասաց նաեւ ինքը՝ Ներսես Պողոսյանը:

Այսօր դատարան էր եկել նաեւ Շանթ Հարությունյանի եւ մյուսների գործով դատապարտված եւ օրեր առաջ ազատ արձակված Ավետիս Ավետիսյանը: Նա մեր զրույցում ասաց, որ որքանով հնարավոր է եղել, հետեւել է Սեֆիլյանի գործով նիստերին. «Պարզ է՝ ինչ է կատարվում, 4.5 տարի առաջ նույն էս ամեն ինչի միջով ես եմ  անցնել: Պետք է մեկուսացնել մարդուն, մեկուսացնում են, մեկին հինգ տարով, մեկին՝ 10»,- ասաց Ավետիսյանը հավելելով, որ ազատության մեջ գտնվելուց հետո էլ շարունակելու է իր պայքարը:

Դատավճռի հրապարակումից հետո էլ Սեֆիլյանի եւ մյուսների գործով դատապարտվածների հարազատները շարունակում էին գտնվել դատարանի բակում, նրանք թույլ չէին տալիս մեքենաներին անցնել, այդ կերպ փակելով նրանց ճանապարհը:

Հավելենք, որ մեղադրող դատախազը Սեֆիլյանի համար պահանջել էր 11 տարվա ազատազրկում, դատավորը 7 ամսով ընդամենը կրճատեց պատժաչափը: Դատավարության ողջ ընթացքում Սեֆիլյանը ու Սաֆարյանը չկարողացան ո՛չ ցուցմունք տալ, ո՛չ պաշտպանական ճառով հանդես գալ. պատճառն այն էր, որ նրանք հանդգնել էին ոտքի չկանգնել դատարանի առջեւ: Դատավարության սկզբնական փուլերում որպես «պատիժ», դատավորը ժամերով հեռացրել էր նրանց նիստերի դահլիճից:  Հետո դատավորն այլ տակտիկա մշակեց՝ բավարարվեց միայն նախազգուշացումներ տալով:

Տպել
2207 դիտում

Անվերապահ աջակցությունն ենք հայտնում արտահերթ խորհրդարանական ընտրությունների անցկացմանը․ ՕԵԿ

Արմեն Սարգսյանը ստորագրել է Ազգային ժողովի ընդունած մի շարք օրենքներ

Ինչպե՞ս է Հայաստանը պատրաստվում «Եվրասիական շաբաթ»-ին․ քննարկում նախարարությունում

Վալերի Օսիպյանը կառավարության նիստին նվերներով է եկել

Խոստացել է 10․000 դրամ․ ընտրակաշառք տալու դեպքի առթիվ երկրորդ քրգործն է հարուցվել

Միջոցառումներ, ներդրողների հետ հանդիպում եւ գրքերի առաքում․ սփյուռքի նախարարության աշխատանքը՝ թվերով

Ավտոտրանսպորտով հացահատիկային բեռների ներկրման արգելքը Վրաստանը հետաձգվել է մինչեւ տարեվերջ

Փաշինյանի թիմը այլեւս կաշկանդված չէ նախկին պայմանավորվածություններով

Ճանաչողական այցով ԱԱԾ-ում էր Ղազախստանի արտակարգ եւ լիազոր դեսպան Թիմուր Ուրազաևը

Մենք կողմ ենք ղարաբաղյան հակամարտության խաղաղ կարգավորմանը. Ռոուզ Գոտեմյուլլեր

ԵԽ մարդու իրավունքների հանձնակատարն ու ՀՀ դատախազի տեղակալները խոսել են ընտանեկան բռնությունների մասին

Գուգարքի անտառտնտեսությունում բենզասղոցով ապօրինի հատվել է 68 ծառ, վնասի չափը ճշտվում է

Վարչապետն ընդունել է Եվրոպայի խորհրդի մարդու իրավունքների հանձնակատարին

ՀՀ պաշտպանության նախարարն ընդունել է ՀՀ-ում Գերմանիայի արտակարգ և լիազոր դեսպանին

Սպասվում է անձրեւ եւ ամպրոպ, քամու ուժգնացում, առանձին հատվածներում հնարավոր է նաև կարկուտ

ՀՀ ոստիկանությունն Արցախի գործընկերներին կնվիրաբերի տրանսպորտային միջոցներ և սարքավորումներ

Տրագիզմ կլինի, եթե պարզվի՝ Փաշինյանը Մսրա Մելիքն էր Հայաստանի գլխին, հետո ՀՀԿ-ն էլ չի փրկի. Աշոտյան

Բրազիլուհին մոլորվել է Սևաբերդ գյուղից դեպի Ակնալիճ տանող լեռնային հատվածում

Վաղը Հայաստանի խորհրդարանի հիմնադրման 100-ամյակն է. հրավիրված է 600 հյուր

Երթևեկության կազմակերպման փոփոխություն Երևանի Բագրատունյաց-Արարատյան խաչմերուկում