Չուզողներիս ինադու. վարչապետն էլ խորհուրդներ ունի

Տպագրվել է «Հայկական Ժամանակ» օրաթերթի՝ 2005 թվականի մարտի 22-ի համարում

Չնայած իշխանական կոալիցիայի դե յուրե միասնությունն, ըստ ամենայնի, կպահպանվի մինչեւ խորհրդարանական ընտրությունների նախաշեմը, սակայն կոալիցիա կազմած երեք կուսակցություններն այլեւս բացահայտ նյարդայնանում են փոխադարձ գոյությունից: Իսկ շաբաթը մեկ նախագահ Քոչարյանի մոտ տեղի են ունենում այլեւս ոչ թե կոալիցիայի խորհրդի նիստեր, այլ կոալիցիոն ռազբորկաներ: Նախագահի մոտ հրավիրված վերջին երկու ներկոալիցիոն ռազբորկաների թեման ԱԺ նախագահ Արթուր Բաղդասարյանին առընթեր խորհուրդներն են եղել, որոնց ստեղծումը ՀՀԿ-ն ու ՀՅԴ-ն համարում են ԱԺ-ռեսուրսների հաշվին ՕԵԿ-ի պատվին իրականացվող PR ակցիա:

Ավելին, ՀՀԿ անդամ մեր զրուցակիցները նշում են, որ ԱԺ նախագահը, իրեն վերջնականապես դնելով Լենինի տեղը, խորհրդարանը վերածել է Ձմեռային պալատի, ուր պարբերաբար էքսկուրսիաներ են կազմակերպվում սոցիալապես անապահով խավերի, հաշմանդամների, դպրոցականների, երիտասարդ իրավաբանների ու այլոց համար, որոնք անարգել շրջում են խորհրդարանի միջանցքներում. «Պատգամավորի աշխատանքը ժողովրդի համար տեսանելի դարձնելն ու ԱԺ-ի դերը բարձրացնելը չի նշանակում խորհրդարանը վերածել «պրախադնոյ դվորի», երբ փողոցից հայտնված ցանկացած մեկը կարող է մտնել նիստերի դահլիճ: Խորհրդարանը վեր է ածվել տեսարժան վայրի, ուր պարբերաբար տարբեր խմբեր են գալիս էքսկուրսիայի»,- բողոքում էին ՀՀԿ-ում (նկատենք, որ աշխարհի բոլոր քաղաքակիրթ երկրներում խորհրդարանը համարվում է տեսարժան վայր եւ այնտեղ էքսկուրսիաներ են կազմակերպվում-խմբ.):

Ու եթե խորհրդարանը հասարակական թամաշայի վայրի վերածելը ՀՀԿ-ն ու ՀՅԴ-ն համարում են մարդկային թուլություն եւ պատրաստ են այդ թուլությանն ըմբռնումով մոտենալ, ապա ԱԺ նախագահին կից խորհուրդների հարցը ՀՀԿ-ն ու ՀՅԴ-ն չեն պատրաստվում մարսել, քանզի դա համարում են իշխանական լծակի օգտագործում՝ նեղ կուսակցական շահի համար: Բնականաբար, ԱԺ նախագահ Արթուր Բաղդասարյանն իրեն կից խորհուրդների վերաբերյալ ՀՀԿ-ի ու ՀՅԴ-ի գնահատականները չի կիսում: Ավելին, երեկ մեզ հետ զրույցում ԱԺ նախագահը նշեց, որ իրեն կից խորհուրդները բացառապես Սահմանադրության եւ ԱԺ կանոնակարգի սահմաններում  են.

 «Այդ խորհուրդներն օրենքի սահմաններում են: Դրանք հասարակական հիմունքներով գործող խորհրդատվական մարմիններ են, որոնք ԱԺ նախագահին խորհուրդներ են տալիս: Ի՞նչ վատ բան կա այդ խորհուրդներում, որ որոշ մարդիկ նման աղմուկ են բարձրացրել: Նույն տրամաբանությամբ կարող ենք ասել, որ եթե կա մշակույթի, սպորտի եւ երիտասարդության հարցերի նախարարություն, ինչո՞ւ է վարչապետն իրեն կից ստեղծել երիտասարդության հարցերի խորհուրդ: Բայց մենք որեւէ առարկություն չունենք. ստեղծել է, լավ է արել: Եթե այդ խորհուրդը լրացուցիչ կերպով օգնելու է գործին, մենք դա միայն կողջունենք»,- ասում է ԱԺ նախագահը:

Չնայած, ԱԺ նախագահի պնդմանը, մենք ո՛չ ՀՀ Սահմանադրության եւ ո՛չ էլ ԱԺ կանոնակարգում չգտանք այնպիսի դրույթ, որն ԱԺ նախագահին իրավունք տար իրեն կից խորհուրդներ ստեղծել: Փոխարենը, կառավարության հասարակայնության հետ կապերի վարչությունից ճշտեցինք այն օրինական հիմքը, որը վարչապետին է իրավունք տալիս, անգամ երիտասարդության հարցերով զբաղվող նախարարություն ունենալու պարագայում, իրեն կից երիտասարդության հարցերի խորհուրդ ստեղծել: Ըստ ՀՀ նախագահի 2002 թվականի մարտի 16-ի հրամանագրի, որը սահմանում է կառավարության գործունեության կարգը, վարչապետն իրավասու է ընթացիկ հարցերի լուծման նպատակով ստեղծել աշխատանքային խմբեր եւ հանձնաժողովներ:

Բացի այդ, եթե վարչապետն իր հերթին, ՀՅԴ ղեկավարներն իրենց հերթին գործադիրի իրենց օղակներին հրահանգել են չպատասխանել ԱԺ նախագահին առընթեր խորհուրդների դիմում-նամակներին, երեկ ԱԺ նախագահից փորձեցինք ճշտել՝ արդյո՞ք այդ խորհուրդների օգտակար գործողության գործակիցը չի հավասարվում զրոյի, եւ այդ խորհուրդները չեն դառնում ինքնանպատակ, եթե այդ խորհուրդների բարձրացրած ցանկացած հարցին գործադիրը ոչ միայն լուծում չի տալու, այլ նաեւ չի էլ պատասխանելու.

«Սահմանադրությամբ գործադիրի օղակները որեւէ իրավասություն չունեն չպատասխանելու պատգամավորի կամ քաղաքացու դիմումներին: Նրանք պարտավոր են պատասխանել եւ պատասխանելու են»,- ասում է ԱԺ նախագահը: Իսկ ՀՀԿ-ում եւ ՀՅԴ-ում տեղեկացնում են, որ արդեն ԱԺ նախագահին առընթեր խորհուրդների բազմաթիվ դիմումներ գործադիրի իրենց օղակները ետ են ուղարկել՝ թողնելով անպատասխան: Թե ինչով կավարտվի ներկոալիցիոն այս հակամարտությունը, պարզ չէ. համենայնդեպս, ԱԺ նախագահը վճռական է՝ չզիջել իրեն կից խորհուրդներն ու վստահ է, որ անկախ իր բազմաթիվ չուզողներից, եթե ժողովուրդն իրեն է դիմում, ուրեմն ժողովուրդն իր օժանդակության կարիքն ունի:     

Նաիրա Զոհրաբյան