Ես ներողամտություն եմ հայցում. դպրոցի տնօրենը` «Ռուսաստանն իմ հայրենիքն է» կարգախոսի մասին

Երեկ երեկոյան կայծակնային արագությամբ համացանցում տարածվեցին Երեւանի Հակոբ Օշականի անվան N172 հիմնական դպրոցում Ռուսաստանին նվիրված միջոցառման լուսանկարները, որտեղ աշակետներն այդ երկրի ազգային հագուստով են, իսկ նրանց գլխավերեւում է «Ռուսաստանն իմ հայրենիքն է» կարգախոսը:

Քննադատություններն անխնա էին՝ ընդհուպ մինչեւ դավաճանություն որակելը: Դպրոցի տնօրեն Գայանե Մկրտչյանն այսօր մեր զրույցում հայտարարեց, որ հոկտեմբերից սկսած անցկացվում է «Աշխարհը մեր աչքերով» խորագիրը կրող միջոցառումների շարք, եւ տարբեր դասարաններ ներկայացնում են որեւէ երկիր: Ամեն մի միջոցառման համար, ըստ տնօրենի, ընտրվել է տվյալ երկրին հատուկ կարգախոս: Ռուսաստանից բացի, աշակերտներն արդեն իսկ անդրադարձել են Իտալիային՝ «VIVA ITALIA» կարգախոսով, Չինաստանին՝ «Չինանստանը մեր աչքերով» կարգախոսով, Հունաստանին նվիրված միջացոռումն ունեցել է «Ա՜խ Հունաստան, իմ քնքուշ երազ» կարգախոսը, Ճապոնիայի դեպքում ընտրվել է «Հրաշքների երկիր Ճապոնիան» եւ այլն:

Գայանե Մկրտչյանի փոխանցմամբ (լուսանկարի կենտրոնում), միջոցառումների նպատակն է ծանոթանալ տարբեր երկրների սովորույթներին, մշակույթին, խոհանոցին, բայց նաեւ ցույց տալ, որ աշխարհով մեկ շրջելուց հետո, միեւնույն է, ամենալավը Հայաստանն է: Շարքն, ըստ նրա, մայիսին եզրափակելու է «Ձոն Հայաստանին» միջոցառումը՝ դարձյալ նույն եզրահանգումով:  

«Ռուսաստանի դեպքում «Վիվա Ռոսիա» չէինք գրի, «Իմ երազանքների աշխարհ» չէինք գրի եւ այլն: Քանի որ «հայրենիք» բառը ռուսները շատ են օգտագործում, ընտրվել է այդ տարբերակը: Միգուցե, հնարավոր է, որ երբ վերնագիրն է նայվում, թվում է շատ տարօրինակ: Այո՛, իմ սխալը նրանում է, որ ես չեմ մտածել, որ մեկնաբանություններ պետք է գրվեին (դպրոցի ֆեյսբուքյան էջում-խմբ.)՝ ինչու է այդ վերնագիրը: Մենք ,որ գիտենք մեր նպատակը, չենք մտածել, որ այսպիսի մեծ աղմուկ կբարձրանա, որովհետեւ դա ոչ թե մեր կարգախոսն է՝ մեր դպրոցի, մեր Հայաստանի, մեր հայ երեխաների, այլ աշակերտների դերակատարման հետ էր կապված: Ամեն երկիր ունի իր կարգախոսը, երեխաներն այդ երկրի կարգախոսի տակ են հանդես եկել, բայց որպես դերակատարում: Ես ներողամտությունն եմ հայցում այն մարդկանցից, որոնք սխալ են ընկալել, բայց նման ձեւով մեկնաբանություններ՝ առանց մանրամասնելու, առանց ճշտելու, առանց ինձ հետ խոսելու...»,- ասաց Օշականի անվան դպրոցի տնօրենը:

Հարցին, թե ամեն դեպքում «Ռուսաստանն իմ հայրենիքն է» կարգախոսի մեջ վտանգավոր ուղերձ չի՞ տեսնում, որը երեխաները կարող են ընդունել թեկուզ ենթագիտակցաբար, Գայանե Մկրտչյանը պատասխանեց. «Բացարձակ, որովհետեւ ի սկզբանե բոլոր դասարաններին բացատրված է եղել՝ ինչու ենք շրջում ամբողջ աշխարհով ու վերջում ինչ եզրակացության ենք գալիս: Այդ եզրակացությունը լինում է նաեւ ամեն միջոցառման վերջում, կարմիր թելի նման անցնում է այդ միտքը, որ տեսեք՝ ինչ լավ է, որ մենք մեր երկրում ենք, մենք էլ ունենք լավ բան, մեր Հայաստանն է լավը, մեր հողն է լավը»:

Նա հավաստիացրեց, որ «Ռուսաստանը իմ հայրենիքն է» կարգախոսի ընտրության հարցում չի եղել դրսից որեւէ միջամտություն: «Չէ, չէ: Որ մեղադրում են՝ տնօրենը, դասվարը, դպրոցը հաճոյանում են, ո՞ւմ էինք հաճոյանալու: Ո՛չ Ռուսաստանի դեսպանատնից ենք հյուրեր ունեցել, ո՛չ որեւէ ռուս ներկայացուցիչ է եղել, որեւէ մեկը չի եղել ոչ նախարարությունից, ոչ քաղաքապետարանից, ոչ թաղապետարանից: Կամ Ռուսաստանին հաճոյանալու ի՞նչ ունենք: Մենք սովորական, պետական դպրոց ենք Հայաստանի Հանրապետությունում: Դա եղել է մեր ներքին՝ դպրոցական միջացառումը, որը ես չգիտեի, որ այսպիսի արձագանք կստանար: Երեւի պետք է իմանայի, պետք է ենթադրեի ամեն դեպքում, բայց չեմ ենթադրել, որովհետեւ ես քաղաքականացված չեմ, ես չեմ մտածել, որ ենթատեքստ կփնտրեն»,- ասաց տնօրենը:

Գայանե Մկրտչյանը հաստատեց, որ ստեղծված այս աղմուկից հետո դպրոցի ֆեյսբուքյան էջը խմբագրվել է, որովհետեւ դա նաեւ առիթ է դարձել, որ ծնողները դժգոհեն իրենց երեխաների նկարները հրապարակելուց: «Ես մտածեցի՝ միջոցառումներ կան, որ երեւի պետք է չլինեն: Մեր ֆեյսուքյան էջը պետք է շատ կոռեկտ լինի, շատ քիչ նկարներով եւ շատ զգույշ: Սա իմ մեղքն է միգուցե, որովհետեւ ես սրա տակ ենթատեքստ չեմ տեսել, ես հիմա հասկացա, որ ամեն բառը, ամեն տառը քաղաքականացվում է: Ես քաղաքականացված չեմ, եւ դպրոցը պետք է քաղաքականացված չլինի»,- կարծիք հայտնեց տնօրեն Մկրտչյանը: Նա տեղի ունեցածի վերաբերյալ բացատրագիր է ներկայացրել Երեւանի քաղաքապետարան, որի ենթակայությամբ գործում է իր ղեկավարած հաստատությունը:

Երեւանի համար 172 դպրոցում անցկացված միջոցառումն իր կարգախոսով գուցե թե այսքան ցավագին չընդունվեր հանրության շրջանում, եթե չլինեին Ռուսաստանի գաղութացման ձգտումների մասին պարբերաբար հայտնվող ազդանշանները: Ի դեպ, երեկ էլ Արցախի Մարտակերտի շրջանի Վլադիմիր Բալայանի անվան N1 դպրոցում մեծ շուքով նշվել է՝ ռուսական խոսքի օրը, որին ներկա են եղել ռուս գրողներից մեկը եւ Արցախում ռուսական համայնքի նախագահը: Ավելի վաղ հայտարարարվել էր ԱՊՀ-ն իմ հայրենիքն է խորագրով շարադրությունների մրցույթ եւ այլն:

Տպել
4362 դիտում

Քննարկվում է 500 մլն դոլարի ներդրման ծրագիր, կառուցվելու է մի քանի գործարան. Նիկոլ Փաշինյան

Մեր բանակի համար առավել օգտակար կլինեն ուղղաթիռները. ռազմական փորձագետ

Հերմինե Նաղդալյանի ամուսինը անսահման անշարժ գույք ունի

Աստված մի արասցե՝ ընտրակաշառք բաժանելու փորձ արվի եւ ես իմանամ ոչ թե իրավապահներից, այլ՝ մամուլից. վարչապետ

Վայոց ձորի կադաստրի մարզային ստորաբաժանման աշխատակիցները դիմում են վարչապետ Փաշինյանին

Ապահովել որակ եւ արագացնել կառուցապատման տեմպերը. Արշակյանն այցելել է Թալին-Լանջիկ ճանապարհահատված

Կոռուպցիան՝ բուժհաստատություններում. պետությանն ավելի քան 500 մլն դրամի վնաս է հասցվել. հարուցվել է 41 քրեական գործ

Նախագահի նստավայրը Մաշտոցի 47 հասցեից տեղափոխվելու է Բաղրամյան 26. ԱԺ-ն քվեարկեց

Պլյուշչենկոն օրերս 3-րդ անգամ Երեւանում կներկայացնի Սառույցի արքաներ շոուն. կլինի պրեմիերա

ԱՀԿ-ում ներկայացվել է «ԵԱՏՄ-ում ՀՀ անդամակցության մասին» համաձայնագիրը

Ամերիկահայությունը մեր ամենակազմակերպված համայնքներից մեկն է. Բակո Սահակյան

Փաշինյանի որոշմամբ ստեղծվում է Գերիների, պատանդների եւ անհայտ կորած անձանց հարցերով զբաղվող միջգերատեսչական հանձնաժողով

Սահակաշվիլին իրեն ընչազուրկ է անվանել

Վաշինգտոնում ամերիկահայ գործարարները աջակցում են միմյանց բիզնեսներին

Մնացականյանը Եվրոպայում ներկայացրել է ՀՀ-ում բարեփոխումների ուղղությամբ շոշափելի ձեռքբերումները

Տնտեսական ակտիվությունը աճել է 3 տոկոսով, արդունաբերությունը՝ 8.1 տոկոսով

Վաղվանից Հայաստանի զգալի մասում սպասվում են տեղումներ, հիմնականում՝ ձյան տեսքով

Նիկոլ Փաշինյանն այսօր մեկնում է Արագածոտնի մարզ. հանդիպումներ կլինեն Աշտարակում եւ Ապարանում

Ինչ արժե նախընտրական գովազդի 1 րոպեն. 100 հազարից մինչև հազար դրամ՝ մարզերում ու Երեւանում

Ջիգարխանյանի նախկին կնոջը 250-ժամյա հարկադիր աշխատանք է տրվել. նա պատրաստ է ավլել փողոցները, բայց մեղավոր չի զգում