Նախիջեւանում Երեւանի չափով տարածք ենք վերահսկում, այդ թվում՝ միջազգային օդանավակայանը

Նախիջեւանում Երեւանի չափով տարածք ենք վերահսկում, այդ թվում՝ միջազգային օդանավակայանը: Այս մասին ՀԺ-ի հետ զրույցում հայտարարել է ԱԺ ՀՀԿ խմբակցության պատգամավոր Միհրան Հակոբյանը: Երկու օր առաջ նա հայտարարել էր Նախիջեւանում 20 հազար հեկտար տարածքի նկատմամբ հայկական կողմի վերահսկողության մասին: Մեր զրույցում Հակոբյանը նշել է, որ Նախիջեւանում պաշտպանական բալանսի լուրջ փոփոխություն է եղել, իսկ օրինակ Լելե Թեփեի բարձրունքի գրավումը հակառակորդի կողմից որեւէ նշանակություն չունի:

- Պարոն Հակոբյան, հայտարարել եք, որ Սերժ Սարգսյանի ղեկավարման ժամանակահատվածում 20 հազար հեկտար հողային ձեռքբերում ենք ունեցել: Նկատի եք ունեցել, որ հակառակորդից 20 հազար հեկտար տարածք ենք գրավե՞լ:

- Պատերազմական գործողություններում, երբ երկու պետություններ պատերազմի մեջ են, սահմանային փոփոխություններ են լինում: Մի տարածքը մեկի վերահսկողության ներքո է անցնում, իսկ մյուսի վերահսկողության տակից դուրս գալիս: Շատ շահարկվում է, որ Սերժ Սարգսյանի կառավարման ընթացքում 800 հեկտար հողային կորուստ ենք ունեցել եւ դա օգտագործվում է քաղաքական շահարկումների նպատակով: Մինչդեռ հողային կորստի մասին խոսք չկա: Այդ 800 հեկտարի նկատմամբ մենք ունենք վերահսկողության խնդիր: Մեծ հարց է՝ այդ տարածքն ադրբեջանցիներն են վերահսկու՞մ, թե՞ մենք: Ես կարծում եմ, որ մենք համատեղ ենք վերահսկում: Կրակային տեսադաշտի խնդիր է սա: Ինչ վերաբերվում է Նախիջեւանին, ես նշել եմ, որ այդ շրջանում ունեցել ենք ձեռքբերում: Նախիջեւանում Երեւան քաղաքի չափով տարածք մենք վերահսկում ենք, որը մինչ այդ մեր վերահսկողության տակ չի եղել, բայց 2014 թվականի փայլուն գործողությունների հետեւանքով վերահսկում ենք այդ տարածքը, այն մեր դիրքապահ զինվորների կրակային հասանելիության գոտում է: Չխոսել սրա մասին՝ արդար չէ, եթե նրա մասին խոսում ենք, սրա մասին էլ պետք է խոսենք: Աղմկանման մի բան կա մամուլում, որ կիսահեգնական ոճով փորձում են կծել Նախիջեւանի հատվածի այդ գործողությունները: Այս 800 հեկտարը, եթե բալանս չի փոխել ռազմաճակատում, Նախիջեւանում լուրջ բալանս է փոխվել: 2014-ի գործողություններից հետո Նախիջեւանի միջազգային օդանավակայանն ու քաղաքը մեր դիրքապահների կրակային հասանելիության գոտում է հայտնվել: Թե այստեղ քանոնով չափել է պետք, որ խոսքը 20 հազար հեկտարի մասին է, թե 17 հազար 230 հեկտարի մասին, դա էական չէ: 800 հեկտարը, որ շահարկվում է, ուրեմն, պետք է խոսվի, որ 15, 20 անգամ ավելի շատ տարածք մենք Նախիջեւանում ենք վերահսկում:

- Ռազմական փորձագետներից մեկը Ձեր այս հայտարարության մասով ասել է՝ խոսքը 2015 թվականի Սյունիք-Նախիջեւան սահմանի դիրքերի բարելավման մասին է, սակայն դուք «հողային ձեռքբերում» եզրն եք օգտագործում: Իսկապե՞ս խոսքն այս մասին է:

- Ես չգիտեմ, թե ում մասին է խոսքը, բայց, եթե տերմինների ճաշակով մոտենանք, ում ինչ տերմին է դուր գալիս, չգիտեմ, չեմ կարծում, որ սա արդյունավետ մոտեցում է: Մենք զինադադարի խախտող կողմ չենք եւ երբեք նախահարձակ չենք լինում: Հիմա բարելավվում է ներկայացվում, թե ձեռքբերում, բայց հիմա մենք ձեւի մասին ենք խոսու՞մ, թե՞ բովանդակության: Մենք բովանդակության մասին ենք խոսում, սա շատ կարեւոր է: Ես, որպես քաղաքական գործիչ, տերմիններում ավելի ազատ կարող եմ լինել, քան մեր պետական հաստատությունների ներկայացուցիչները:

- Ձեր խոսքում նշեցիք, որ Սերժ Սարգսյանի կառավարման շրջանում 800 հեկտարի կորուստը շատ է շահարկվում քաղաքական ենթատեքստով: Դուք էլ նշում եք, որ նրա ղեկավարման ժամանակ Նախիջեւանում 20 հազար հեկտար տարածքի ձեռքբերում ենք ունեցել: Արդյո՞ք սա էլ շահարկում չէ իշխանությունների կողմից՝ ի պատասխան 800 հեկտարի շահարկողների:

- Եկեք այդքան պրիմիտիվ չգտնվենք: Այստեղ փաստարկ չկա, որ մի հատ էլ հակափաստարկ լինի: Լրագրողը հարց է տվել 800 հեկտարն այսպես է, ես էլ նշել եմ, որ կա այս իրավիճակը: Ես մեկ փաստարկ էլ եմ բերել, որ նախկինում 90-ականներին էլ եղել են դեպքեր, որոնց կարելի է այլ գնահատականներ տալ: Ասել, որ սա օրակարգային հարց է եւ ՀՀ իշխանությունները բան ու գործը թողած, նստել մտածում են, որ սրա դիմաց սա պետք է ասել... մութ սենյակում սեւ կատու չպետք է փնտրել, եթե այնտեղ անգամ կատու էլ չկա:

Հարցազրույցը տպագրվել է «Հայկական ժամանակ» օրաթերթի մարտի 24-ի համարում: