Վարք դավաճանաց. ՀՅԴ-ն ընդդեմ Կիրկորովի

Տպագրվել է «Հայկական Ժամանակ» օրաթերթի՝ 2005 թվականի մարտի 24-ի համարում

Ֆիլիպ Կիրկորովին Երեւան հրավիրած «Մանուկյան» ՍՊԸ ղեկավարությունը խուճապի մեջ է: Նրանք տեղեկացել են, որ դաշնակցության երիտասարդական միությունը պատրաստվում է մի շարք բողոքի ակցիաներ կազմակերպել ընդդեմ Կիրկորովի: Նախօրեին «Մանուկյան» ՍՊԸ-ի տնօրեն Դավիթ Մանուկյանը մեզ փոխանցեց, որ իրենք տեղեկացել են, որ երիտասարդ դաշնակցականներն արդեն ցուցապաստառներ են պատրաստել, որոնցով ռուսական էստրադայի աստղին պատրաստվում են բողոքով դիմավորել հենց օդանավակայանում: Ըստ նրա, երիտասարդ դաշնակցականները չեն հերքել այդ ինֆորմացիան: Վերջիններիս մոտ խիստ դժգոհություն է առաջացրել այն, որ վերջերս Թուրքիայում կայացած համերգի ժամանակ հայտնի երգիչը թուրքական դրոշով հագուստ է հագել, եւ այն, որ ամիսներ առաջ համարձակվել է վիրավորել ազգությամբ հայ լրագրող Իրինա Արոյանին:

Թե կոնկրետ ինչ բովանդակություն ունեն ցուցապաստառները, «Մանուկյան» ՍՊԸ-ում տեղյակ չեն: Բայց ենթադրվում է, որ դրանք հեղեղված են լինելու «ամոթ» եւ նմանատիպ այն բառերով, որոնցով երիտասարդ դաշնակցականները սովորաբար արտահայտում են իրենց դժգոհությունը որեւէ բանի հանդեպ: Երեւանում իր հանդեպ եղած տրամադրությունների մասին, սակայն, պարզվում է, Կիրկորովը դեռ տեղյակ չէ: «Եւ ամոթ էլ է, որ մենք այդ մասին նրան ասենք: Կծիծաղի: Նախ, լրագրողին վիրավորելու համար Կիրկորովը 3 անգամ նրանից հրապարակային ներողություն էր խնդրել, եւ բացի այդ, սա շոու բիզնես է, եւ արտիստը, թերեւս, կարող էր իրեն թույլ տալ որեւէ երկրի դրոշով զգեստ կրել: Այնինչ, մենք՝ ինքներս, թուրքական շորեր ենք հագնում, թուրքական զեյթուն ենք ուտում, Հանրային հեռուստատեսությամբ Տառկանի երգերը պատվիրում, որոնք սիրով ընդունվում են, եւ հետո այլ հայտարարություններ ենք անում: Մենք չենք ուզում, որ արվեստը խառնվի քաղաքականությանը»,- մեզ հետ ունեցած զրույցի ժամանակ ասում էր երգչին Երեւան հրավիրած Դավիթ Մանուկյանը:

Նախօրեին, երբ մենք այս կապակցությամբ մեկնաբանություն խնդրեցինք ՀՅԴ երիտասարդական միությունից, մեզ փոխանցեցին, որ երգչի հանդեպ բացասական վերաբերմունք, իհարկե, կա, սակայն միջոցառումների ցանկը դեռ քննարկվում է, եւ կոնկրետ ոչինչ որոշված չէ: Չի բացառվում, որ ՀՅԴ երիտասարդական միությունը սկսի ձվեր նետել երգչի վրա, քանի որ այս գործում երիտասարդ դաշնակցականներն արդեն կարծես թե մասնագիտացել են: Հիշեցնենք, որ այդպես նրանք դիմավորեցին «Մասնավոր հայացք» միջազգային կինոփառատոնի ժամանակ Կինոյի տանը ցուցադրվող թուրքական ֆիլմը:

Տեղեկություններ կան նաեւ այն մասին, որ դաշնակցականները ցանկանում են պատռել կամ այրել Կիրկորովի նկարներն ու ցուցապաստառները: Ի դեպ, արդեն մի քանի օր Երեւանում անհայտ անձինք համառորեն պատառոտում են երգչի մենահամերգի ցուցապաստառները, եւ չի բացառվում, որ դա նույնպես երիտասարդ դաշնակցականների կազմակերպածը լինի: «Մանուկյան» ՍՊԸ-ն, սակայն, դեռ կոնկրետ փաստեր չունի այդ բանում նրանց մեղադրելու համար: Խոստովանենք, որ Ցեղասպանության թանգարան-ինստիտուտը թուրքական արտադրության տոլերով պատելուց, մեր շուկաները թուրքական արտադրության զգեստներով ու սննդամթերքով լցնելուց հետո շոու-բիզնեսի ներկայացուցչին թուրքական զգեստ կրելու համար մամուլով «որբ», «տղայիկ», «առանց ազգության լկտի» էպիտետներով նախշազարդելն ու նրա ցուցապաստառները պատառոտելու կամ այրելու ծրագրերը, իսկապես, զավեշտական են:

Իսկ Կիրկորովին «Մանուկյան» ՍՊԸ-ն մենահամերգով Երեւան է հրավիրել այն բանից հետո, երբ մայրաքաղաքում կատարված հարցումները ցույց են տվել, որ նա այստեղ մեծ պահանջարկ ունի: Բացի այդ, երգիչը մինչ այժմ Երեւանում մենահամերգով դեռ հանդես չի եկել: Ի դեպ, պարզվում է, որ Կիրկորովը Հայաստան է գալիս մեզ համար շատ նպաստավոր պայմաններում: Մեզ հայտնի դարձավ, որ Երեւանի քաղաքապետարանը «Երեւան» հիմնադրամից երգչի հյուրախաղերը կազմակերպելու համար 3 միլիոն դրամ է հատկացրել, որը, ըստ պայմանագրի, պետք է վերադարձվի անգամ այն պարագայում, եթե համերգը չկայանա: Իսկ կայանալու դեպքում քաղաքապետարանը ստանալու է 3 միլիոնից շատ ավելին: Եւ այժմ մեծ մտավախություն կա, որ համերգը կարող է տապալվել:

Չի բացառվում անգամ, որ Կիրկորովը կարող է ընդհանրապես Հայաստան չգալ, եթե իմանա այստեղ տիրող տրամադրությունների մասին, քանի որ դա, ըստ կազմակերպիչների, նրա համար ռիսկային է: Այնինչ, ըստ Դավիթ Մանուկյանի, Կիրկորովի երեւանյան մենահամերգն աննախադեպ է լինելու: Նա Երեւան է բերելու միայն 1 տոննա 200 կիլոգրամ պիրաոտեխնիկա (հրավառության նյութեր), 30 հոգանոց բալետային խումբ եւ այլն: Հետաքրքիր է, որ համերգին դեռ 20 օր կա, սակայն, ըստ Դավիթ Մանուկյանի, Կիրկորովի համերգի տոմսերի 20 տոկոսից ավելին արդեն վաճառված է, եւ բացի այդ, իրենք համերգով հետաքրքրվողներից օրական 350-500 զանգ են ստանում:

Հիշեցնենք, որ Կիրկորովը Երեւան է ժամանելու ապրիլի 8-ին: Նրա մենահամերգը Կարեն Դեմիրճյանի անվան մշակութային կենտրոնում տեղի է ունենալու ապրիլի 9-ին, որի տոմսերն արժեն 3-10 հազար դրամ: Եւս մի համերգ էլ մինչ այդ նա մարտի 8-ին կտա «Նոր Ձորաբերդ» ռեստորանային համալիրում, որի տոմսերն արժեն 80-150 դոլար: Այստեղ, սակայն, Կիրկորովը միայնակ հանդես չի գա: Նրա հետ երգելու են նաեւ հայկական էստրադայի աստղերը: Նրանց հետ նախատեսվում են անգամ զուգերգեր:

Լուսինե Բարսեղյան