Վերջապես եկավ. Վ. Վ. Պուտինը Երեւանում

Տպագրվել է «Հայկական Ժամանակ» օրաթերթի՝ 2005 թվականի մարտի 25-ի համարում

ՌԴ նախագահ Վլադիմիր Պուտինը երեկ ուշ երեկոյան, նախատեսվածից մի փոքր ուշացումով այնուամենայնիվ ժամանեց Հայաստան: Հիմա արդեն Ռոբերտ Քոչարյանը եւ նրա վարչակազմը կարող են հանգիստ շունչ քաշել, քանի որ այդքան սպասված այցը մեծ դժվարություններից եւ խոչընդոտներից հետո ի վերջո իրականացավ: Հիշեցնենք, որ այս տարվա սկզբից Պուտինի մոտալուտ այցի մասին ինֆորմացիայի հոսք էր լինում ՀՀ նախագահի նստավայրից, որը, սակայն, այդպես էլ չէր հաստատվում միայն ռուսական կողմի պատճառով: Սակայն, ինչպես մեզ հայտնի դարձավ, ՌԴ նախագահ Վլադիմիր Պուտինի այս այցն իրականություն դարձնելու աշխատանքին Հայաստանի դիվանագիտական խողովակաշարը լծված է շատ ավելի վաղուց: Նշենք միայն, որ նախապես պայմանավորվածություն է եղել, որ Պուտինը Հայաստան պետք է ժամաներ դեռ նախորդ տարվա սեպտեմբերին: Սակայն պարզվում է՝ այս ամբողջ ընթացքում ՌԴ նախագահի աշխատանքային գրաֆիկի մեջ Հայաստանը ոչ մի կերպ չի տեղավորվել:

Այսպիսով, հասկանալի է, իհարկե, որ Վլադիմիր Պուտինը բավական լուրջ պատճառներ է ունեցել իր «գործընկեր» Ռոբերտ Քոչարյանի հրավերն այսօր, այս պահին  ընդունելու եւ Հայաստան Ժամանելու համար: Նշենք, որ ըստ որոշ վերլուծաբանների, Պուտինին Հայաստան բերած պատճառներից  ամենակարեւորը կարող է լինել Ռուսաստանը շրջանցող խոշոր գազամուղի կառուցման ծրագրի լրջացումը: Ի դեպ, արեւմտյան մամուլը երեկ արդեն գրում էր ՌԴ նախագահի հայաստանյան այցի մասին. «ՌԴ նախագահ Վլադիմիր Պուտինը Հայաստան է գնում իր համար ՌԴ-ի հետխորհրդային դաշնակցից հավատարմության երդում ապահովելու նպատակով»,- սա է, ըստ արեւմտյան վերլուծաբանների, այն պատճառը, որ Պուտինին բերել է Հայաստան:

Պետք է ասել, որ հավատարմության երդումն ու վերոնշյալ գազամուղի հարցը մեկը մյուսին չեն բացառում եւ նույնիսկ՝ լրացնում են: Բավական հետաքրքիր են նաեւ Վլադիմիր Պուտինի եւ Ռոբերտ Քոչարյանի առանձնազրույցի օրակարգում դրված հարցերը, որոնք նույնպես կարելի է դիտել հավատարմության երդման ֆոնին: «Հայաստանում ռուսերենի դերի եւ կարեւորության մեծացումը, ինչպես նաեւ Ռուսաստանում հայերենի դերի եւ կարեւորության մեծացումը»,- սա, ըստ «Իտառ-Տասս»-ի, նախագահների հանդիպման օրակարգային հարցերից մեկն է: Թե ինչպես կարող է Հայաստանում ռուսերենի դերը մեծանալ, մենք՝ Ռուսաստանի «ֆորպոստ» հանդիսացող երկրի քաղաքացիներս, շատ լավ պատկերացնում ենք, իսկ ահա Ռուսաստանում հայերենի դերի եւ կարեւորության մեծացումը մի քիչ չափազանցված է հնչում:

Օրակարգային հարցերից են նաեւ Հայաստանի եւ Ռուսաստանի միջեւ ռազմատեխնիկական համագործակցության վրա ավելի մեծ ուշադրություն դարձնելու խնդիրը, «Գույք պարտքի դիմաց» համաձայնագրի իրականացումը, տնտեսական եւ առեւտրային համագործակցությունը: «Երկու նախագահները պետք է համեմատեն իրենց դիրքորոշումները տարածաշրջանային խնդիրներում ներկայումս գոյություն ունեցող մտահոգությունների՝ մասնավորապես Կովկասի անվտանգությանը եւ կայունությանը վերաբերող հարցերի շուրջ: Մտքեր են փոխանակելու միջազգային ահաբեկչության եւ տարածաշրջանային հակամարտությունների լուծումների մասին:

Հատուկ ուշադրություն են դարձնելու ԱՊՀ-ում, եվրասիական տնտեսական միությունում եւ ՀԱՊԿ-ում Հայաստանի եւ Ռուսաստանի  երկկողմ շահավետ համագործակցության վրա»,- Կրեմլի մի պաշտոնյայի հղում անելով` Քոչարյան-Պուտին հանդիպման օրակարգից տեղեկություններ է հաղորդում «Իտառ-Տասս»-ը:  Ռուսական մյուս լրատվական գործակալությունները հայտնում են, որ Ռոբերտ Քոչարյանի հետ հանդիպման ժամանակ Վլադիմիր Պուտինը քննարկելու է Իրան-Հայաստան գազամուղի հարցը, որը Մոսկվային դուր չի գալիս:    

Պետք է նշել, որ ՀՀ նախագահի աշխատակազմը եւ լրատվական ծառայությունը երեկ ավելի քան զգուշավոր էին Պուտինի այցի հետ կապված տեղեկատվություն տրամադրելիս: Եւ նույնիսկ ամենատեխնիկական հարցերին նախագահի լրատվական ծառայությունից պատասխանում էին, որ իրենք տեղեկություններ չունեն: Նախագահի աշխատակազմի այս պահվածքը երկու բացատրություն ունի. կամ ռուսական կողմի պահանջն է եղել այդպիսին՝ չհրապարակել այցի որեւէ մանրամասն, կամ ՀՀ նախագահի աշխատակազմն ուղղակի վախեցած է եւ Պուտինի անունը լսելիս չորանում է: Ինչեւէ, մեզ, այնուամենայնիվ, հաջողվեց պարզել, որ Վլադիմիր Պուտինին եւ նրա տիկնոջը Ռոբերտ Քոչարյանն ու Բելա Քոչարյանը երեկ երեկոյան ընդունել են իրենց «օջախում»` «Հրազդան-1» համալիրում, որտեղ  նախագահական զույգերը ճաշել են: Այնուհետեւ ՌԴ նախագահը մեկնել է գիշերելու Ազգային անվտանգության ծառայության ընդունելությունների տանը:

Այսօր ՀՀ նախագահի նստավայրում տեղի է ունենալու Պուտին-Քոչարյան պաշտոնական հանդիպումը,  բացի այս, Վլադիմիր Պուտինը Հայաստանում ընդամենը երկու միջոցառման է մասնակցելու՝ մեկնելու է Մայր Աթոռ Սուրբ Էջմիածին, որտեղ նրան ընդունելու է Ամենայն Հայոց Կաթողիկոս Գարեգին Բ-ն, եւ ինչպես արդեն տեղեկացրել ենք, երեկոյան ժամը հինգին մասնակցելու է Հայաստանում Ռուսաստանի տարվա բացմանը, որ տեղի է ունենալու  Ալ.Սպենդիարյանի անվան օպերայի եւ բալետի ակադեմիական թատրոնում: Այնուհետեւ` միանգամից օդանավակայան: Այսինքն` Վլադիմիր Պուտինը, որ այսպես կոչված երկօրյա այցով է ժամանել Հայաստան, իրականում մեկ ամբողջ օր էլ թերեւս չանցկացնի Երեւանում: Սա, թերեւս, հուսադրող նորություն է միայն մայրաքաղաքի երթեւեկության մասնակիցների եւ Կենտրոն համայնքի բնակիչների համար:

Աննա Հակոբյան