Երբ Սերժ Սարգսյանը ԳԱԱ-ում է, գիտությունը «սառեցվում է». իսկ նա դեռ վարչապետ է աշխատելու

Սերժ Սարգսյանն այսօր վերջին անգամ նախագահի կարգավիճակով մասնակցել է ՀՀ գիտությունների ազգային ակադեմիայի տարեկան ընդհանուր ժողովին: Նա խոսել է այդ միջոցառումներին ավանդաբար ներկա գտնվելու մասին ու ասել, որ գիտնականների հետ հանդիպումները շարունակական են լինելու՝ ըստ էության հասկացնելով, որ պատրաստվում է ապրիլից հետո երկիրը ղեկավարել որպես վարչապետ: Ի դեպ, ելույթ ունեցող գիտնականներից մեկն էլ նրան սխալմամբ դիմել է «պարոն վարչապետ»:

Սարգսյանը նաեւ ընդգծել է գիտնականների նկատմամբ իր ու ժողովրդի հարգանքի մասին: Նշել է, որ ակադեմիայի տարեկան ժողովներին իր մասնակցությունը ոչ միայն այդ հարգանքի դրսեւորումն է, այլեւ գիտական հանրության խնդիրներին, գործունեությանը, գիտության վիճակին ծանոթանալու եւս մեկ ու շատ լավ հնարավորություն:

Բայց ժողովի ժամանակ տարբեր գիտնականների դիտարկմանը, թե սարքավորումների կարիք ունեն, փող է պետք, Սերժ Սարգսյանն արձագանքել է. «Գումա՞ր եք ուզում: Ես էլ եմ ուզում: Բոլորն էլ ուզում են»: Ավելին, նա նաեւ ապագայի՛ համար հույս չի թողել. «Մի բան իսկապես բոլորիս հայտնի է, մենք համոզված ենք, որ մեր ժողովուրդը միշտ ակնածանք է ունեցել գիտության բնագավառի նկատմամբ եւ գիտությունը Հայաստանում միշտ պահանջված է: Ե՛վ դուք, ե՛ւ ձեզանից հետո եկողները պետք է դա անեն, ցավոք սրտի, սուղ միջոցներով: Մեր ճակատագիրը դեռեւս տեւական ժամանակ այդպիսին է լինելու՝ փոքր հնարավորություններով մենք լուրջ խնդիրներ պետք է լուծենք»: 

Սերժ Սարգսյանի ծառայողական ու նաեւ նրան ուղեկցող ավտոմեքենաները

Իսկ գիտությունների ազգային ակադեմիայի շենքից դուրս կարելի էր ականատես լինել գիտնականի նկատմամբ Սերժ Սարգսյանի ասած հարգանքի «ապացույցին»: Տարեկան ժողովի ընթացքում ԳԱԱ գլխավոր մասնաշենք մտնելու հնարավորություն էին ստանում միայն այն մարդիկ, որոնց անուններն ընդգրկված էին նախագահականի կազմած ցուցակում: Սերժ Սարգսյանի անվտանգության աշխատակիցները մուտքի դռան մոտից հետ ուղարկեցին մի քաղաքացու, որն ակնհայտորեն առողջական խնդիրներ ուներ: Մեր հարցին, թե ինչ նպատակով էր եկել, տղամարդը պատասխանեց, որ հայտնագործություն ունի եւ այն բերել էր ներկայացնելու: Քիչ անց Ակադեմիայի գլխավոր մասնաշենք եկան երեք կանայք, որոնց մուտքը նույնպես կասեցվեց: Ինչպես տեղեկացանք, նրանք ԳԱԱ ֆունդամենտալ գրադարանի աշխատակիցներ էին, ու հրավիրված են պահոցում աշխատելու:

Երբ այս երեւույթի վերաբերյալ ԳԱԱ նախագահ Ռադիկ Մարտիրոսյանի կարծիքը հարցրինք, նա հայտարարեց՝ «Այդպիսի բան չկա»:

ԳԱԱ տարեկան ընդհանուր ժողովի ընդմիջումից հետո դահլիճում փոքրաթիվ մարդիկ էին մնացել: Մեկնեց նաեւ Սերժ Սարգսյանը

Անդրադառնալով ակադեմիայի գիտական ինստիտուտներում անցկացված արդյունավետության գնահատմանն ու ստացված եզրակացությանը՝ Մարտիրոսյանը նշեց, որ դրա նպատակն է եղել բացահայտել համակարգի ուժեղ եւ թույլ կողմերը՝ դրանց ուղղությամբ ճիշտ աշխատելու համար:

«Մենք չենք գնահատել, որ սա ամենալավն է, սա ամենավատն է: Այդպիսի բան չենք անելու: Մենք հաշվի ենք առնելու մեկի դրական կողմը, մյուսի բացասականը, որ սրա դրական կողմը ներդնենք այն մյուսի համար, որ նրան էլ բարձրացնենք: Եթե մեկը ինչ-որ միջոցներ ունի, որը նպատակային չի ծախսել եւ արդյունքներն այնքան էլ բարձր չեն, ուշադրություն հրավիրենք, որ տե՛ս, այն միջոցները, որոնք քեզ տրամադրվել են, դու պիտի լավ օգտագործես, ոչ թե քամուն տաս: Մյուսին պիտի ասենք, որ եթե դու ունես աշխատողներ, որոնք ի վիճակի չեն գիտական լուրջ արդյունքներ ունենալ, դու պիտի ազատվես նրանցից եւ այն միջոցները, որոնք տրամադրում ես, տրամադրել նորմալ աշխատողներին, եւ այդպես շարունակ, որ այն ինստիտուտը, որն իր գիտական արդյունքներով կազմակերպում է արտադրություններ, մատուցում ծառայություններ, որի համար ստանում է եւ միջոցներ, դա տեսանելի դարձել հանրությանը»,- չառանձնացնելով գիտական ինստիտուտները՝ ասաց ԳԱԱ նախագահը:

Նաեւ հավելեց. «Այ, ինչո՞ւ համար դուք մեր գիտությունը կարգին չեք ներկայացնում, որովհետեւ հանրությունը ավելի շատ հետաքրքրված է վատ բաներով: Լավ բաներ դուք չեք գրում, երբեւիցե: Դրա համար էլ եղել է այսպես, որ մեր հանրությունը առանձնապես գիտություն չի սիրում, մի հատ ինչ-որ կազմակերպության մասին տարիներով կգրեք, նրանց հետաքրքրում է դա, իսկ գիտություն չէ»:

Երբ նորից նկատեցինք, որ Սերժ Սարգսյանը գալիս է ակադեմիա ու գիտաշխատողը կամ գիտնականը չի կարողանում մտնել շենք՝ իր աշխատանքը կատարելու եւ հետաքրքրվեցինք, թե արդյո՞ք հանրության վերաբերմունքը դրա հետ փոխկապակցված չէ, Ռադիկ Մարտիրոսյանը կրկնեց. «Այսպիսի բան չկա»:

Ինչ վերաբերում է Սերժ Սարգսյանի «ավետիսին», թե փող չկա, եւ բոլորս ենք փող ուզում, Ռադիկ Մարտիրոսյանն արձագանքեց. «Բա ի՞նչ պիտի ասեր նախագահը, երբ որ չկա: Ասի կա՝ չե՞նք տալիս»:

Իսկ եթե գիտնականը, պատկերավոր ասած, թուղթ չունի, որի վրա կարող է, օրինակ, բանաձեւեր մշակել, անիմաստ չէ՞ ակնկալել, որ նա գիտական արդյունք է ապահովելու: «Պարտադիր չէ թղթի վրա գրել: Մտքում կպահի, կոմպյուտերի մեջ կպահի»,- պատասխանեց Գիտությունների ազգային ակադեմիայի նախագահը:

Տպել
2555 դիտում

12-րդ դասարանում կենտրոնացված ավարտական քննություն կլինի միայն հայոց լեզու առարկայից

Վարդան Մինասյանը հեռացել է ՀՀ ֆուտբոլի հավաքականից

Անկախության տոնին պարգեւատրումներ, ցուցահանդեսներ, «Սուտլիկ որսկան» ու տոնական համերգ Գյումրիում

Սեւ մածուն. մոնստր է, մոնստր

ՀՀՇ-ով մեզ թող չվախեցնեն. ասում է Հովհաննես Հովհաննիսյանը

Ընտրություններին մասնակցող ամենահարուստ ուժը ՀՅԴ-ն է. ունեցվածքը սփռված է ողջ երկրով

Անկախության տոնի առթիվ վարչապետ Նիկոլ Փաշինյանին շնորհավորական ուղերձ է հղել ՌԴ նախագահ Վլադիմիր Պուտինը

Հայաստանի անկախության տոնի առթիվ Թբիլիսիի հեռուստաաշտարակը լուսավորվել է հայոց եռագույնով

GOOGLE որոնողական համակարգը եռագույնով է ներկվել՝ ի պատիվ Հայաստանի անկախության տոնի

Ամենից շատ վճարովի եթերաժամանակ ԲՀԿ-ն է գնել ու գրանցել ռեկորդ. նման ցուցանիշ դեռ չի եղել

Մեգան Մարքլը ներկայացրել է իր խոհարարական գիրքը

Պաշտպանը Գլխավոր դատախազին է ուղարկել Նաիրա Զոհրաբյանի տրամադրած նյութերը

Արագած գյուղում օտարերկրացիներ են մոլորվել

ՀԱՊԿ-ն Հայաստանից որևէ դիմում չի ստացվել. Միացյալ շտաբի պետը՝ հայ-ադրբեջանական սահմանի լարվածության մասին

Խաղաղ շարժումը մի նոր դարաշրջան բացեց Հայաստանում. Դոնալդ Թրամփի շնորհավորական ուղերձը

Սա առիթ է հիշել մեր երկրների միջև սերտ պատմական կապերը. Էլիզաբեթ 2-րդ թագուհին շնորհավորել է անկախության տոնի առթիվ

«Արսենալը» սկսում է պայքարը Եվրոպա լիգայում. Մխիթարյանը մեկնարկային կազմում է

Պետք է բացահայտվի Ռոբերտ Քոչարյանի մեղսակցությունը. Պողոս Պողոսյանի հարազատները դիմել են ԱԱԾ-ին և դատախազությանը

Անցել է 3 օր, սակայն խուզարկությունների հիմնավորումներ չկան. լրագրողական կազմակերպությունների հայտարարությունը

ՀՀ ոստիկանության պետի ուղերձը Երևանի ավագանու ընտրությունների առթիվ