Հարձակում լրագրողի դեմ. հրկիզվել է «Սյունյաց երկիր»-ի խմբագրի մեքենան

Տպագրվել է «Հայկական Ժամանակ» օրաթերթի՝ 2005 թվականի ապրիլի 2-ի համարում

Ապրիլի լույս 1-ի գիշերը՝ ժամը 03.30-ի սահմաններում, անհայտ անձինք Գորիսում  հրկիզել են «Սյունյաց երկիր» պարբերաթերթի գլխավոր խմբագիր Սամվել Ալեքսանյանի «Նիվա» մակնիշի անձնական օգտագործման ավտոմեքենան: Մեզ հետ զրույցում Ս. Ալեքսանյանը պատմում է, որ հինգշաբթի Կապանից վերադարձել է Գորիս, մեքենան կանգնեցրել իրենց շենքի բակում, այն նույն տեղը, ուր սովորաբար կանգնեցնում է: «Գիշերը ձայներ լսեցինք, արթնացանք, տեսանք մեքենաս այրվում է: Անմիջապես զանգեցինք ոստիկանություն,  հրշեջ ծառայություն ու հաջողվեց կիսով չափ փրկել ավտոմեքենան»,- ասում է Ալեքսանյանը: Ըստ վերջինիս հայտարարության, մեքենայի  հրկիզման ողջ պատասխանատվությունը ընկնում է Սյունիքի մարզպետի վրա:

«Սա ես անհիմն չեմ ասում: Վերջերս հաճախակի էին դարձել անանուն միջնորդավորված հեռախոսազանգերը, որոնք ե՛ւ սաստում էին, ե՛ւ փորձում էին խորհուրդ տալ հեռու մնալ մարզպետից ու նրա մասին  քննադատական նյութեր չտպագրել»,- ասում է թերթի գլխավոր խմբագիրը, որի կարծիքով,  իր եւ մարզպետի միջեւ սկսված հակասությունը խորացավ  «Նովոյե Վրեմյա» թերթին իր տված հարցազրույցից հետո: Այդ հարցազրույցում Ս. Ալեքսանյանը մասնավորապես նշել էր, որ ոչ մեկին հայտնի չէ մարզպետ Սուրիկ Խաչատրյանի իրական կենսագրությունը, ու որ Սյունիքում չի գործում ՀՀ Սահմանադրությունը: Ավելին, գլխավոր խմբագիրը հայտարարել էր, որ մարզպետն անձամբ հիմնարկ-ձեռնարկությունների ղեկավարներին արգելել է բաժանորդագրվել «Սյունյաց երկիր» թերթը:

Հիշեցնենք, որ մարզպետ-գլխավոր խմբագիր հակասությունը սկսվել էր անցյալ տարվա սեպտեմբերից, երբ Ս. Ալեքսանյանն ազատվեց մարզպետի մամլո խոսնակի պաշտոնից, իսկ նրա խմբագրած թերթին առաջարկվեց ազատել մարզպետարանում զբաղեցրած սենյակները:  Ս. Ալեքսանյանը մեր զրույցում պատմեց, որ ընդամենը երկու օր առաջ  «խաղաղարար առաքելությամբ» խմբագրություն է այցելել Սյունիքի մարզպետի ընկերը, որը հիշեցրել ու զգուշացրել է, որ «Սյունիքի մարզպետը լուրջ հովանավորներ ու թիկունք ունի»: «Կոնկրետ նշեց տարածքային կառավարման նախարար Հովիկ Աբրահամյանի,  Սերժ Ազատիչի անունները ու սաստեց, որ մարզպետը ինչ ուզենա, այն էլ կանի»,- մեր հեռախոսազրույցում նշեց Ս. Ալեքսանյանը:

Վերջինս ժամանակին պատրաստ էր նստել ու մարզպետի հետ բանակցել, քննարկել «տեղի ունեցած կամ առկա խնդիրները»: «Սակայն, երբ արդեն ընտանիքիս անդամներին են ճնշում ու նույնիսկ Գորիսի գրադարանը լուծարում, որ իմ կինը աշխատանք չունենա, դրանից հետո ես չեմ կարող նստել ու զրուցել այդ մարդկանց հետ»,- մեր հեռախոսազրույցում ասաց Ալեքսանյանը: Անցած տարվա հոկտեմբերին, երբ «Սյունյաց արծիվներ» կազմակերպության նախագահը ներխուժել էր թերթի խմբագրասենյակ ու ծեծել գլխավոր խմբագրին, այդ օրվանից Ալեքսանյանը բոյկոտ է հայտնել մարզի իրավապահ մարմիններին: Այժմ էլ նա իր մեքենայի հրկիզման գործի բացահայտման հույսը չի կապում իրավապահների հետ եւ նրանց «կհավատա այն ժամանակ, երբ Սյունիքում գործի ՀՀ Սահմանադրությունը»:

«Դիմում եմ ՀՀ նախագահ Ռ. Քոչարյանին. ինչո՞վ են մեղավոր սյունեցիները, որ մարզը մատաղ եք արել մի ելուզակի»,- ասում է Ս. Ալեքսանյանը: Վերջինս  չի կարողանում հասկանալ, թե իշխանական կոալիցիայի որ կուսակցությունն է պատասխան տալու մարզում կատարվող իրադարձությունների համար: «Չէ՞ որ ամբողջ հանրապետությունը, նախարարությունները, վարչությունները, պաշտոնները համահավասար բաշխվել են կոալիցիայի միջեւ: Բայց մինչ հիմա պարզ չէ, Սյունիքի մարզը ո՞ւմ են տվել»,- հարցնում է  Ս. Ալեքսանյանը:  Գլխավոր խմբագիրն իրեն համեմատում է Բակունցի հերոս Արթին պապի հետ, որի նամակները անպատասխան են մնում:

Իսկ ինչպե՞ս Է Ս. Ալեքսանյանը տեսնում ելքը, երբ չի վստահում իրավապահ մարմիններին. «Ես այսօր իրավապահ մարմինների հետ զրուցելու միայն մի թեմա ունեմ: Ի՞նչ անեմ, ո՞ւմ դիմեմ, որ ինձ անձնական օգտագործման զենք տան, որպեսզի ես կարողանամ պաշտպանել ինձ ու իմ ընտանիքի անդամներին, որովհետեւ հիմա ես մեր անվտանգությունն եմ ցանկանում ապահովել»: Ինչ վերաբերում է իր խմբագրած թերթին, ապա խմբագրի խոսքերով` ««Սյունյաց երկիրը» չի փոխելու ո՛չ իր առաքելությունը, ո՛չ էլ որդեգրած քաղաքականությունը, ու թերթն անկախ ահաբեկչական ցանկացած գործողությունից շարունակվելու է տպագրվել»:

Նշենք նաեւ, որ Սյունիքի մարզպետ Սուրիկ Խաչատրյանն էլ մեր հեռախոսազրույցում ասաց, որ ինքն ընդհանրապես կապ չունի ավտոմեքենայի հրկիզման հետ: «Ես պատրաստվում եմ Ս. Ալեքսանյանի ահավոր մեղադրանքներից պաշտպանվելու համար դիմել դատական ատյաններին»,- ասում է Սուրիկ Խաչատրյանը: Ի դեպ, ուշ երեկոյան հայտնի դարձավ, որ Սյունիքի մարզի ոստիկանության քննչական բաժանմունքում Ալեքսանյանի ավտոմեքենայի հրկիզման փաստի առիթով քրեական գործ է հարուցվել:  Չնայած, ոստիկանները սպասում են ոստիկանների եզրակացությանը. այրե՞լ են մեքենան, թե՞ էլի ինքնահրկիզվել է: 

Արմեն Մկրտչյան