Երեխե՛ք ջան, պոկեք ձեր դպրոցում կախված Սերժ Սարգսյանի դիմանկարը եւ շպրտեք. Նիկոլ Փաշինյան

Երեւանում վերջին օրերին ընթացող զանգվածային բողոքի ցույցերին զուգահեռ բնականոն հունով դասապրոցես չի ընթանում դպրոցներում եւ բարձրագույն ուսումնական հաստատություններում: Ընդ որում, մեծ կամ փոքր մասշտաբներով դասադուլների մասին տեղեկություններ են ստացվում նաեւ հանրապետության տարբեր քաղաքներից:

Մայրաքաղաքի մի քանի դպրոցներում երեկ մեր շրջայցերի ընթացքում բացակայությունների պատկերը տարբեր էր, չնայած երբեմն էլ իրավիճակի մասին ներկայացվող տեղեկությունները հակասում էին իրար: Եղիշե Չարենցի անվան N67 հիմնական դպրոցում չթույլատրեցին, որ ներս մտնենք: Փոխտնօրեն Մարգարիտա Սարգսյանն ինքը դուրս եկավ եւ հավաստիացրեց, որ դասապրոցեսը չի խաթարվել, չնայած, ի տարբերություն նախորդ օրվա, բացակաները համեմատաբար շատ են: Այդուհանդերձ, փոխտնօրենը նշեց, որ նրանց թիվը յուրաքանչյուր դասարանում 3-4-ի սահմաններում է:

«Նորմալ դասապրոցեսն ընթանում է: Բացականեր, համեմատած սովորական օրերի հետ, այո, շատ ունենք: Բայց դասղեկները ծնողների հետ կապ են հաստատել, վաղը հաստատ այդ բացակայող աշակետները կգան: Դասղեկը պարտավոր է զանգել, իրազեկ լինել, իմանալ, որ մեզ ասի՝ ինչու չի եկել երեխան դպրոց: Ամեն դասարանից ոնց էլ լինի 3-4 հոգի բացակա էին, այն որ միշտ չի լինում դա, որովհետեւ երեխաները նորմալ հաճախում են դասի»,- նշեց Մարգարիտա Սարգսյանը:

Նույն՝ Չարենցի անվան դպրոցի 5-րդ դասարանում սովորող մի տղա, սակայն, ասաց, որ դասարաններում լինում է միայն 3-4 աշակերտ: Մայրը պարզաբանեց. տղան վճարովի կրթություն է ստանում եւ այդ պատճառով դասի է գալիս: Մեկ այլ կին, որը նույնպես առաջին դասարանցի թոռնիկին տուն տանելու էր եկել, ասաց, որ նա էլ վճարովի է սովորում, բայց վաղվանից այլեւս դպրոց չեն բերելու: «Ասում են՝ վտանգավոր է, բայց վտանգի համար չէ, պարզապես հենց դասադուլի համար՝ որպես բողոքի ցույց: Թող ղեկավարությունը բոլորն իմանան, որ այս ակցիան նաեւ ծնողներին է վերաբերում, նրանք էլ համաձայն չեն: Դա կլինի բողոք՝ ընդդեմ կառավարության»,- ասաց առաջին դասարանցի աղջկա տատիկը՝ նախկին մանկավարժ Լարիսա Ոսկանյանը:  

Նելսոն Ստեփանյանի անվան N71 դպրոցում դասերն արդեն գրեթե ավարտված էին: Այստեղ նույնպես վստահեցրին, որ դասարաններում բացակաների թիվը մինչեւ 5-ի սահմաններում է: Բակում գտնվող ծնողների տպավորությամբ էլ բացակաների թիվը մեծ չէ: Այլ էր իրավիճակը Խաչիկ Դաշտենցի անվան N114 ավագ դպրոցում: Փոխտնօրեն Արմինե Կուպալյանը նշեց, որ դասարաններում 10-15 բացակա է լինում: Բոլոր դպրոցներում պատասխանեցին, որ իրենք երեխաներից չեն պահանջում անպայման դասի գալ: Չգալ նույնպես չեն առաջարկում: Համապատասխան որոշումը թողնվում է ծնողների հայեցությանը:

ԿԳ նախարարության հայտարարությունը Նիկոլ Փաշինյանի արձագանքը

«Նկատի ունենալով վերջին օրերին տեղի ունեցող իրադարձություններին դպրոցահասակ երեխաների եւ դեռահասների ներգրավման հրապարակային կոչերը՝ ՀՀ կրթության եւ գիտության նախարարությունը հորդորում է քաղաքական ուժերին, հասարակական նախաձեռնություններին եւ անհատներին զերծ մնալ զանգվածային միջոցառումներին դեռահասներին մասնակից դարձնելու փորձերից: Միաժամանակ, կոչ ենք անում ծնողներին, հաշվի առնելով դպրոցահասակների անվտանգության խնդիրը եւ տարիքային առանձնահատկություններին բնորոշ զգացմունքայնությունը, դրսեւորել հետեւողականություն եւ, համագործակցելով ուսումնական հաստատությունների հետ, բացառել սովորողների անուշադրության տիրույթում հայտնվելու հնարավորությունը»,- ասվում է նախարարության երեկ տարածած հաղորդագրության մեջ:

Դրան ավելի ուշ անդրադարձել է քաղաքացիների շարժումը գլխավորող ԱԺ պատգամավոր Նիկոլ Փաշինյանը եւ երեկոյան հրավիրած հանրահավաքում հայտարարել. «Այսօր կրթության եւ գիտության նախարարությունը կոչով դիմել է մեզ, թե դպրոցականերին մի ներքաշեք քաղաքական գործընթացների մեջ: Նախ մենք դպրոցականներին որեւէ բանի մեջ չենք ներքաշում, մեր երեխաները, ինչպես նախատեսված է Սերժ Սարգսյանի բարեփոխած Սահամանադրությամբ, կարող են իրենք իրենց համար որոշումներ կայացնել: Մեր օրենսդրությամբ անչափահասները կարող են նույնիսկ զանգվածային հրապարակային միջոցառումների կազմակերպչի դերում հանդես գալ: Բայց ես ուզում եմ կրթության եւ գիտության նաախարարությանը հիշեցնել՝ բա երեխաների մասին ինչո՞ւ չէիք մտածում, որ ստիպելով փուչիկները ձեռքը տալով նրանց քշում էիք Սերժ Սարգսյանի էժանագին քարոզչությանը»:

Շարունակելով՝ նա ասել է. «Եվ ես հիմա կոչով դիմում եմ Հայաստանի բոլոր դպրոցականներին՝ երեխեք ջան, ձեր դպրոցներից հանեք Սերժ Սարգսյանի դիմանկարները եւ շպրտեք պատուհաններից: Դուք եք այս երկրի վաղվա օրը եւ դուք այսօրվանից պետք է սովորեք, որ Հայաստանի քաղաքացին չի կարող ծնկի գալ որեւէ մեկի առաջ: Այո, դասադուլ արեք, որովհետեւ այդ դասադուլի մեջ դուք կսովորեք ամենակարեւորը՝ լինել Հայաստանի հպարտ, ամենազոր, հզոր քաղաքացի»:

Նիկոլ Փաշինայնը նաեւ շնորհակալություն է հայտնել շարժման մասնակից ուսանողներին: «Եվ դասադուլի համատեքստում ես ուզում եմ, որ մենք բոլորս գնահատանքի եւ հարգանքի հատուկ տուրք մատուցենք մեր ուսանողներին, ովքեր մեր այս շարժման ամենակարեւոր եւ ամենահպարտ շարժիչ ուժն են: Եվ ես ուզում եմ առանձնահատուկ շնորհակալություն հայտնել նրանց ներկայացուցիչը հանդիսացող Դավիթ Պետրոսյանին, Շահեն Հարությունյանին, Վահան Կոստանյանին: Կեցցե՛ք, տղերք»,- ասել է նա:

Երեւանում արդեն 5-րդ օրը բողոքի ցույցեր են անցկացվում՝ ընդդեմ Սերժ Սարգսյանի հերթական պաշտոնավաման ժամկետի ու ընդդեմ Հայաստանի ադրբեջանացաման:

Տպել
1455 դիտում

ՎՏԲ-Հայաստան Բանկը և «ՌԵՍՈ» ընկերությունը առաջարկում են իրենց հաճախորդներին «Ապահով հանգիստ» ապահովագրական փաթեթը

Մեղադրանքները Կ. Հարությունյանի հիվանդ երեւակայության արդյունքն են. ԱԺ-ն պատասխանում է աշխատակցի բողոքին

Ազգերի լիգա. Հայաստանի համար սկսվեց մեծ հույսերով, ավարտվեց, ինչպես միշտ

Նիկոլ Փաշինյանին ներկայացվել է գյուղտեխնիկայի արտադրություն հիմնելու ներդրումային ծրագիրը

Դեկտեմբերի 9-ի նախընտրական ցուցակներում ամբողջությամբ նույն տվյալներով 208 տարբեր մարդիկ կան

Գյումրու վրաերթի հեղինակն ինքնակամ ներկայացել է ոստիկանություն

Ով է փոխարինելու գեներալ Ղահրամանյանին՝ Վ. Սարգսյանի անվան ռազմական համալսարանի պետի պաշտոնում

Արմեն Սարգսյանը շնորհավորական ուղերձ է հղել Մոսկվայի եւ Համայն Ռուսիո Պատրիարք Կիրիլին

Զիբիլիքսի աղմկոտ գործով ամբաստանյալ, ՀՀԿ-ական Հրայր Անտոնյանն ընդունում է մեղադրանքը. գործը կքննվի արագացված կարգո՞վ

ՀՊՏՀ Գյումրու մասնաճյուղում եւ թիվ 37 դպրոցում կոռուպցիոն չարաշահումներով քրգործեր են հարուցվել

ՀՀ ԶՈՒ աշխատանքային խումբը մեկնել է Մոսկվա

Աֆղանստանում քննարկվել է խաղաղապահ զորքերի սպառազինությունը եւ տեխնիկական հագեցվածությունը

Անցկացվել են հայ-գերմանական երկկողմ ռազմաքաղաքական խորհրդակցությունները

Անհրաժեշտ է քայլ առ քայլ առաջ գնալ. Աննա Հակոբյանը՝ ԼՂ պատերազմի ժամանակ զոհվածների ընտանիքների խնդիրների լուծման մասին

Լուսացույցների տեղափոխություն Սայաթ-Նովայի պողոտա-Չարենցի փողոց խաչմերուկում

Քննարկվում են քրեակատարողական հիմնարկներն օտարալեզու գրականությամբ համալրելու հնարավոր ուղիները

Խարդախությամբ բանկից  փորձել են 1 մլն. եվրո հափշտակել. հայտարարվել է հետախուզում

Իմ քաղաքական գնահատականները շարունակում են մնալ նույնը՝ Սերժ Սարգսյանի նկատմամբ. վարչապետ

Հայաստանը կարեւորում է Խորվաթիայի հետ համագործակցության ընդլայնումը. հանդիպում նախագահականում

Ստեփանակերտում շուտով երկու նոր մանկապարտեզ կկառուցվի. Արայիկ Հարությունյանը՝ բարեգործական նոր ծրագրի մասին