Հրամանատարը հերքում է զինծառայողին ծեծելու մասին տեղեկությունները եւ մանրամասնում դեպքը

«Հայկական ժամանակ»-ը մի քանի օր առաջ տեղեկություն էր ստացել, որ Արցախի ՊԲ N զորամասում ուսումնական գումարտակի հրամանատար, մայոր Արթուր Արեյանը նորակոչիկ զինվորին այնպես է ծեծել, որ զինվորը Արցախից հայտնվել է Երեւանի Մուրացանի զինվորական հոսպիտալում: Նշվում էր նաեւ, որ վերոնշյալ գումարտակի հրամանատարը հաճախակի է զինվորներին ծեծի ենթարկում: Ծեծված զինծառայողը Ալբերտ Միհրանյանն է, որին ըստ հրամանատարի ծեծել է համածառայակիցը՝ Արթուր Սիմոնյանը:

Արթուր Արեյանն այսօր Արցախից եկել էր Երեւան՝ «ՀԺ» խմբագրություն դեպքի վերաբերյալ պարզաբանում ներակայացնելու եւ իր մասնակցությունն այս ծեծկռտուքին հերքելու համար:

Արթուր Արեյանը կոչումով կապիտան է: Զինված ուժերում ծառայում է արդեն 9 տարի: Այդ ընթացքում էլ հասցրել է ավարտել մագիստրատուրան:

Մեզ հետ զրույցում Արթուր Արեյանը հերքեց լուրը, նշելով, որ երբեք զինվորի չի խփել:

Գումարտակի հրամանատար Արթուր Արեյանի հետ զրույցը ներկայացնում ենք ստորեւ.

- Պարոն Արեյան, նախ, ե՞րբ է դեպքը տեղի ունեցել եւ ո՞րն է եղել միջադեպի պատճառը:

- Դեպքը տեղի է ունեցել մարտի 7-ին, ժամը 15:20-ի սահմաններում: Բաղնիքում լողանալիս երկու համածառայողեր լոգարանից դուրս գալուց սկսել են իրենց կարգի բերել, ինչի ժամանակ էլ վիճաբանություն է տեղի ունեցել նրանց միջեւ. զինծառայողը մյուսին հայհոյել է, նա էլ ասել է՝ ինձ մի հայհոյի, սա էլ հրավածել է զինծառայողի դեմքին: Դրանից հետո վաշտի հրամանատարը համածառայակցին ծեծած զինծառայողին բերում է ինձ մոտ. հարվածից զինծառայի դեմքը ջարդած է լինում ու ես միանգամից ծեծողին տանում եմ զորամասի հրամանատարի մոտ: Էդ երեխուն (նկատի ունի տուժած զինծառայողին) տեղափոխում են Ջաբրայիլի հոսպիտալ, այնտեղից տանում են Ստեփանակերտ, Ստեփանակերտում երեք օր մնալուց հետո տեղափոխում են Երեւանի զինվորական կլինիկական հոսպիտալ: Հիմա էլ ինչքան տեղյակ եմ՝ խնամքի տակ է, զինծառայողը երեք օրից կանցնի ծառայության: 

- Իսկ ի՞նչ կարգավիճակ ունի համածառայակցին հարվածած զինծառայողը:

- Նա 4 օր մնացել է, հետո 20 օր կարգապահական զորամասում մնալուց հետո անցել է սովորական ծառայության: Դեպքի առթիվ կա նաեւ հարուցված քրեական գործ:

- Դեպքի հետ կապված շրջանառվում էր ձեր անունը, մասնավորապես այն, որ դուք եք ծեծի ենթարկել զինծառայողին: Կպարզաբանե՞ք, դուք ի՞նչ առնչություն ունեք դեպքի հետ:

- Ես չգիտեմ ինչի են կապում ինձ հետ: Ես որ խփած լինեի, նախ առաջին հերթին չէի հասնի ստեղ, երկրորդն էլ՝ եթե ես հարվածում եմ, ասում եմ հարվածում եմ, կյանքում էդ մարդը չեմ եղել, եթե չեմ արել, ասում եմ՝ չեմ արել: Ամեն մարդու համար իր անունը բոլորից վեր է, մեկնաբանություններում ինձ ինչ ասես չեն ասել, հազար տեղից զանգել են, մի արարքի համար, որը ես չեմ արել: Ես վատ եմ զգում, որ իմ շրջապատը կարող է նմանատիպ բաներ լսի իմ մասին: Ինչպե՞ս կարող են ցեխ շպրտել իմ անցած ուղու վրա, ես այնպես եմ ծառայել, որ որեւէ մեկը չի կարողացել ասել՝ աչքիդ վերեւը ունք կա, թասիբի, ինքնասիրության հարց կա, որ պետք չի տենց բան անել:

- Ձեր մասնակցությամբ բանակում միջադեպեր եղե՞լ են:

- 9 տարվա մեջ հնարավո՞ր է միջադեպ չլինի, ինչը որ ես չեմ արել, ես դրա մասին եմ ասում: Պետք էր ավելի կոնկերտ դեպքը ճշտել, նոր հրապարակել, ոչ թե իմ անունս սենց պախարակվեր:

- Համածառայակցին հարվածած զինծառայողը մշտապե՞ս է ուշադրության կենտրոնում հայտնվում, միջադեպեր ստեղծում:

- Ինքը փորձել է տարբերվել, բայց միշտ սանձը քաշած է եղել, անպես չի, որ իմ մոտ ինչ-որ մեկը կարող է տարբերվել: Աշխատում ենք այնպես անել, որ բոլորը հավասար լինեն, սկզբունքը պահենք: Ի՞նչ կա էստեղ ցույց տալու:

- Դեպքից հետո դուք բացատարություն տվե՞լ եք:

- Երբ մամուլում հայտնվել է, առաջինը ես եմ ցանակցել այս հարցը պարզաբանել, ասել, որ ես դրա հետ կապ չունեմ: Ինչ որ ես չեմ արել, պետք չի, որ դա կապեն ինձ հետ: Սպասենք, տեսնեք ինչ լինի այդ գործով:

- Իսկ տուժած զինծառայողն ինչպե՞ս է ծառայում, նրա հետ խնդիրներ կա՞ն

- Շատ խելոք է, խեղճուկրակ ընտանիքից: