ՀՀԿ-ի շահած 2 շաբաթը շատ թանկ է նստելու այդ կուսակցության վրա

Մայիսի 1-ին Ազգային Ժողովը ընտրում էր Հայաստանի Հանրապետության վարչապետ: Խորհրդարանում լարված եւ թեժ քննարկումներին զուգահեռ Հանրապետության հրապարակում անմիջական եւ տոնական տրամադրություն էր: Հրապարակում դեռեւս վաղ առավոտից սկսել էին հավաքվել քաղաքացիները՝ տոնելու իրենց թեկնածուի հաղթանակը եւ ժողովրդական շարժման հերթական քայլի կատարումը: ԱԺ նիստը ողջ ընթացքը ցուցադրվում էր հրապարակում տեղադրված էկրանների վրա:

Ավաղ, մայիսի 1-ին հրապարակում հավաքված ժողովուրդն այդ էկրանների վրա չտեսավ իր թեկնածուի վարչապետ ընտրվելը: Փաշինյանին դեմ քվեարկեց 56, կողմ՝ 45 պատգամավոր:

ԱԺ Ծառուկյան եւ ՀՅԴ խմբակցություններն իրենց աջակցությունն էին հայտնել ԵԼՔ խմբակցության առաջադրած թեկնածու Նիկոլ Փաշինյանին եւ հայտարարել, որ քվեարկելու են նրա վարչապետության օգտին: Խորհրդարանում մեծամասնություն կազմող ՀՀԿ-ն հայտարարել էր, որ որոշում կկայացնի Փաշինյանի հետ հարցուպատասխանից հետո: Հարցուպատասխանից եւ ելույթներից հետո ՀՀԿ խմբակցության ղեկավար Վահրամ Բաղդասարյանը հայտարարեց, որ ՀՀԿ-ն դեմ է քվեարկելու Փաշինյանի թեկնածությանը:

Խմբակցության վրա, փաստորեն, ազդեցություն չունեցավ նաեւ ԵԼՔ խմբակցության պատգամավոր Արարատ Միրզոյանի՝ վարչապետի թեկնածուին ներկայացնելիս արված կոչը՝ չառաջնորդվել անձնական կամ խմբային շահերով եւ քվեարկել ժողովրդի վստահությունը վայելող թեկնածուի օգտին:

«Դադարեցրեք ինքնապաշտպանական ռեակցիան այս փոփոխություններին: Ինքնապաշտպանության կարիք չկա: Պաշտպանեք հայոց պետականությունը գոնե առաջիկա ժամերի ընթացքում: Մի առաջնորդվեք անձնական, խմբային նեղ շահերով, դադարեցրեք քաղաքական հին մեթոդներով զանազան սցենարների խաղարկումը եւ իբրեւ մեր պետության, պետականության, ժողովրդի մասին մտածող իրական պետական այրե՛ր, օգնեք միահամուռ ուժերով լավագույն հնարավորը քաղել մեր երկրի համար ստեղծված, հիրավի պատմական եւ բացառիկ այս հնարավորությունից: Կոչ եմ անում կողմ քվեարկել Հայաստանի քաղաքացիների լիակատար աջակցությունը վայելող թեկնածուի՝ Նիկոլ Փաշինյանի օգտին»,- ասել էր Միրզոյանը:

Խորհրդարանը ընտրում էր անցումային շրջանի ժամանակավոր վարչապետ, որը պետք է ապահովի երկիրը ճգնաժամից դուրս բերելու նախադրյալները՝ արտահերթ ազատ ու արդար խորհրդարանական ընտրությունների միջոցով նոր որակի քաղաքական վերնախավ: Այս առումով, հանրապետական պատգամավորներից խնդրին անդրադարձավ միայն Շուշան Սարդարյանը: Նա, մասնավորապես, հետաքրքրվեց, թե որոնք են սահմանադրական այն մեխանիզմները, որոնք հնարավորություն կտան արտահերթ ընտրություններ անցկացնել:

Փաշինյանը պատասխանեց, որ մեխանիզմները մի քանիսն են, իսկ թե դրանցից, որը ի վերջո կընդունվի՝ կարելի է քննարկել: Որպես հնարավոր տարբերակներից մեկը նա ներկայացրեց Ազգային ժողովի կողմից կառավարության ծրագրի երկու անգամ չընդունումը, որի հետեւանքով ԱԺ-ն լուծարվում է եւ նշանակվում են նոր ընտրություններ:

Ելույթներում, որոշ բացառություններով, նկատվում էր կտրուկ բեւեռացվածություն: Ընդհանրությունը մեկն էր՝ երկու բեւեռներն էլ հանդես էին գալիս կայունության պահպանման եւ ճգնաժամից դուրս գալու դիրքերից: Այդուհանդերձ, բեւեռների մոտեցումները ելույթներում կտրուկ տարբերվում էին: Քաղաքացիական փոքրամասնություն կազմող քաղաքական մեծամասնության պատգամավորների ելույթները, նույնպես եզակի բացառություններով, իշխանության պահպանման հարթությունում էին: Այս առումով Բաղդասարյանի՝ դեմ քվեարկելու մասին հայտարարությունը միանգամայն տրամաբանական էր:

Կողմ քվեարկելով Փաշինյանի վարչապետությանը ՀՀԿ խմբակցությունը կփաստեր, որ կուսակցությունը որոշել է հավելյալ չսրել իրավիճակը: Դա վատագույն դեպքում կդիտարկվեր որպես նահանջ՝ արտահերթ խորհրդարանական ընտրություններին պատշաճ տեսքով ներկայանալու համար: Այդ քայլով Հանրապետական կուսակցությունը հնարավորություններ կպահպաներ Ընտրական օրենսգրքի փոփոխությունից հետո գալիք արտահերթ ընտրությունների արդյունքում մաս կազմել Հայաստանի քաղաքական համակարգի եւ այլ ուժերի հետ միասին ձեռնամուխ լինելու ժողովրդի երազած երկրի կառուցմանը:

Դեմ քվեարկելով Փաշինյանի վարչապետությանը ՀՀԿ խմբակցությունը, ըստ էության, փորձում է ժամանակ շահել եւ հոգնեցնել հասարակությանը: Չի բացառվում, որ առաջիկա մեկ շաբաթվա խաղաղ անհնազանդության ակցիաները հանդիպեն ավելի բիրտ ուժի՝ նպատակ հետապնդելով սադրել ցուցարարներին եւս պատասխանել բռնի ուժով, ինչը կարձակի իշխանության ձեռքերը: Այդուհանդերձ, հասարակության շրջանում միտվածություն չկա դավաճանել խաղաղ պայքարի սկզբունքներին: Բողոքի ալիքը չունի նաեւ հանգելու միտում: Հանրապետականների դեմ քվեարկելը գործնականում ուղղակի հետ գցեց շարժումը մինչեւ ապրիլի 23-ի դրություն, երբ Սերժ Սարգսյանը ներկայացրեց իր հրաժարականը: Հանրապետական խմբակցության շահած երկու շաբաթը քաղաքական առումով շատ թանկ է նստելու ողջ կուսակցության վրա, թեեւ առայժմ չնչին հնարավորություն պահպանվում է, որ մեկ շաբաթ անց քվեարկությունը կկայանա, եւ ժողովրդի վստահությունը վայելող թեկնածուն կընտրվի ժամանակավոր վարչապետ: Այս համատեքստում ՀՀԿ խմբակցության պատգամավորներին, թերեւս, կարելի է խորհուրդ տալ հետեւել Ֆելիքս Ցոլակյանի՝ խղճի թելադրանքով ժողովրդի թեկնածուի օգտին քվեարկելու օրինակին:

Վլադիմիր Մարտիրոսյան

Տպել
4508 դիտում

192 ընտրատեղամասի վերջնական արդյունքներով՝ «Իմ քայլը» դաշինքն առաջատար է՝ ձայների 81.05 %-ով

Դավիթ Խաժակյանն ու Արտակ Զեյնալյանը «Իմ քայլը» դաշինքի շտաբում են, շնորհավորում են հաղթանակի առթիվ

4/36 ընտրատեղամասում հաղթել է «Իմ քայլը» դաշինքը, 8 քաղաքական ուժեր ձայներ չեն ստացել

6/05 ընտրատեղամասում 734 քաղաքացուց 560-ը քվեարկել է «Իմ քայլը» դաշինքի օգտին

էրեբունու 10/49 ընտրատեղամասում եւս բացարձակ հաղթանակ է տարել «Իմ քայլը» դաշինքը

Հայկ Մարությանը 547 քվե ստացավ 01/08 ընտրատեղամասում

էրեբունու 10/50 ընտրատեղամասում 789 ընտրողից 678-ը քվեարկել են «Իմ քայլը» դաշինքի օգտին

Ավանի 1/09 տեղամասում ձայների ճնշող մեծամասնությամբ հաղթեց «Իմ քայլը» դաշինքը՝ 569 ձայն, «Լույսը»՝ 95, ԲՀԿ-ն 68 ձայն

Որքան ձայն է ստացել յուրաքանչյուր քաղաքական ուժ. ԿԸՀ հաշվիչը միացել է. արդյունքները՝ ուղիղ

Մարմնով պաշտպանել ենք քվեատուփը, կռիվ ենք տվել, հայտնվել մահակների տակ՝ այս օրը մոտեցնելու համար

Երեւանի 8/28 ընտրատեղամասում մի քանի հարյուր ձայնով առաջատար է «Իմ քայլը» դաշինքը

Արաբկիրի 4/38 ընտրատեղամասում «Իմ քայլը» դաշինքը հավաքել է 516 ձայն. նախնական տվյալներ

09/18 ընտրատեղամասում «Իմ քայլը» ստացել է 530 քվե, ԲՀԿ-ն՝ 73, «Լույսը»՝ 59

9/18 ընտրատեղմասում առաջատարը կրկին «Իմ քայլը» դաշինքն է. նախնական արդյունքներ

«Իմ քայլը» դաշինքի կենտրոնական շտաբում՝ այս պահին. հետեւում են ընտրությունների արդյունքներին

Շենգավիթում «Իմ քայլը» դաշինքը 80,23% է հավաքել. նախնական արդյունք

Երեւանի 7/35 ընտրատեղամասում եւս հաղթում է «Իմ քայլը» դաշինքը. նախնական արդյունք

6/51 ընտրատեղամասում «Իմ քայլը» դաշինքը հաղթանակ է տարել. նախնական տվյալ

Նախընտրական շրջանում ամենաշատ մուծումներ է արել ԲՀԿ-ն, ամենամեծ գումարը ծախսել է «Իմ քայլը» դաշինքը

Նորք-Մարաշ համայնքի 9/03 ընտրատեղմասում կրկին առաջատարը «Իմ քայլը» դաշինքն է. նախնական արդյունք