Խնդիրները խորացել են այն ժամանակներից, երբ չենք վստահել ընտրության արդյունքներին. վարչապետ

10:20- «Հայաստան» համահայկական հիմնադրամի հոգաբարձուների խորհրդի եւ տեղական մարմինների 27-րդ համատեղ նիստին ներկայացվեց «Հայաստան» համահայկական հիմնադրամի գործադիր վարչության հաշվետվությունը՝ 2017 թվականի կատարած աշխատանքների մասին: «Տարիներ ի վեր մենք բոլորս լսում ենք հետևյալ արտահայտությունը՝ Սփյուռքի գործոնը օգտագործվում է միայն որպես դրամահավաքի կազմակերպման միջոց, մինչդեռ շատ ավելի մեծ դեր պետք է ունենա՝ ՀՀ-ի և Արցախի ընդհանուր կայացման համար: Բարեգործության ոլորտի հետ մեկտեղ կան նաև սփյուռքի գիտական և պրոֆեսիոնալ ուժը օգտագործելու, ներդրումներում ներգրավելու, հայրենադարձություն կազմակերպելու այլ ոլորտներ: Իմ խորին համոզումն է, որ անցած տարիների ընթացքում այդ նշված ոլորտներում իրականացված աշխատանքները, ցավոք, չեն ունեցել շոշափելի արդյունքներ, ինչի հետևանքով ստեղծվել է կարծրատիպ, թե սփյուռքը բարեգործության համար է: Համոզված եմ, որ այն պահից սկսած, երբ նշված բոլոր ոլորտներում իրականացվի հետևողական աշխատանք, այդպիսի կարծրատիպեր չենք ունենա»,- ասաց հիմնադրամի գործադիր տնօրեն Արա Վարդանյանը եւ ընդգծեց, որ հիմնադրամը քաղաքական կառույց չէ:

«Հիմնադրամը քաղաքական կառույց չէ, այն չի զբաղվում և չի զբաղվել երբեք քաղաքականությամբ»,- ասաց նա ու հավելեց, որ դրամահավաքների դեմ բոյկոտը, քարոզչությունը սփյուռքի որոշ զանգվածների կողմից դիտարկվել է անհամաձայնությունը արտահայտելու պրակտիկ գործոն: Նա ներկայացրեց, որ չնայած դրան, հիմնադրամին հաջողվել է ունենալ յոթ հարյուր հազար նվիրատու, 330 միլիոն արժողությամբ մանր ու խոշոր ծրագրեր իրականացնել: Նա նշեց, որ իրենցից բացի իրենց ոչ մեկը չի օգնելու: «Մեր փրկության, հարատևման բանալին հենց մենք են»,- հավելեց նա:

09:50- Հիմնադրամի հոգաբարձուների խորհրդի նիստին ելույթի խոսքով հանդես եկավ ՀՀ վարչապետ Նիկոլ Փաշինյանը: Նա ողջունեց ներկաներին եւ նշեց՝ ուրախ է բոլորին տեսնել մայրաքաղաք Երեւանում:

«Հիմնադրամի գործունեությունը վերլուծելիս, կարելի է լուրջ ազդակներ ստանալ՝ ինչ պրոցեսներ են տեղի ունենում, ինչ մտահոգություններ են ի հայտ գալիս Սփյուռքում եւ ինչ լուծումներ կարող են դրանց լինել»,-ասաց նա:

Փաշինյանը նշեց, որ քաղաքական իրադարձությունները, անշուշտ, համազգային համախմբման նոր ազդակ են ստացել եւ ամեն ինչ կանեն դա կոնկրետ քաղաքական արդյունքի մշտական քաղաքական գործոնի վերածելու համար:

«Քաղաքական այդ գործընթացները, որոնք տեղի ունեցան ապրիլ-մայիս ամիսներին, անշուշտ համազգային համախմբման նոր ազդակ են դարձել եւ պետք է ամեն ինչ անենք, որ համախմբման ազդակը քաղաքական գործոնի վերածենք: Մենք արդեն ՀՀ կառավարության առաջնահերթությունները ներկայացրել ենք եւ դրանցից կարեւորագույնը ՀՀ քաղաքացիների, հայ ժողովրդի հաղթանակի զգացումը պահպանելն է, դրա մշտական բնույթ կրելն է:

Մեր երկրի մեծագույն քաղաքական խնդիրը եղել է քաղաքացիների կողմից իշխանությունները ձեւավորելու իրավունքի անձեռնմխելիությունը, ես կարծում եմ, որ  խնդիրները խորացել են այն ժամանակներից, երբ հանրությունը սկսել է չվստահել ընտրությունների արդյունքներին եւ ամեն անգամ իրեն խաբված է զգացել»,- ասաց վարչապետը եւ ընդգծեց, որ այսուհետ անելու են այնպես, որ ընտրությունների արդյունքներից ոչ միայն իրեն հաղթանակած զգա ինչ-որ քաղաքական ուժ, այլ նաեւ ՀՀ քաղաքացին:

Փաշինյանը նշեց, որ հաջորդ կարեւորագույն խնդիրը կոռուպցիայի դեմ պայքարն է:

«Սկսած ընտրական, պետական համակարգից մինչեւ դատական կոռուպցիա: Մեր կառավարությունն արդեն հստակ քայլեր է ձեռնարկել այս ուղղությամբ եւ ունի հաջողություններ: Այս գործընթացը շարունակվելու է այնքան ժամանակ, մինչեւ համոզվենք, որ կոռուպցիան արմատախիլ ենք արել»,- ասաց նա եւ անդրադարձ կատարեց արտագաղթին:

«Հայաստանից արտագաղթի հազարամյա անիվը պետք է կանգ առնի եւ հետ պտտվի եւ Հայաստանում կենտրոնանալու գործընթաց սկսվի»:

09:40- ՀՀ նախագահ Արմեն Սարգսյանը նշեց, որ այսօր հոգաբարձուների խորհրդի համախմբման առաքելությունն ավելի արդիական է եւ այն պետք է լինի Սփյուռքը միավորող գործոն:

«Այն ծրագրերը, որոնք իրականացվել են հիմնադրամի միջոցով, համահայկական ջանքերի արդյունք են: Տարեցտարի պետք է կատարելագործվեն մեթոդները՝ ավելի մեծ արդյունք գրանցելու համար, ավելի հավակնոտ ծրագրեր գրանցելու համար»,- ասաց նա եւ նշեց, որ հիմնադրամի բոլոր ծրագրերը ներքուստ միավորող բովանդակություն ունեն:

«ՀՀ-ում հիմնարար իրադարձություններ են տեղի ունեցել եւ այդ ֆոնին շատ ակնհայտ է դառնում ազգային համախմբվածության անհրաժեշտությունը: Հսկայական փոփոխություններ են տեղի ունեցել, կարծում եմ 2018 թվականը պատմական տարի է լինելու, բավական է հիշել ոչ միայն ՀՀ առաջին հանրապետության հարյուր ամյակը, այլ նաեւ համազգային շատ կազմակերպությունների հարյուր ամյակը»,- ասաց նա եւ նկատեց, որ այս տարի վաղ գարնանը ՀՀ-ն թեւակոխեց իր պատմության համար նոր շրջան՝ դառնալով խորհրդարանական համակարգով կառավարվող երկիր:

«Դրան հաջորդեցին պատմական իրադարձություններ, որոնց վստահ եմ, որ բոլորը հետեւել են: ՀՀ ժողովրդի անունը աշխարհում ավելի բարձր է, որովհետեւ աշխարհը տեսավ, որ հայ ժողովուրդը իր կարեւորագույն օրերին ունի տաղանդ՝ կրկին անգամ միավորվելու, եւ միաժամանակ ցույց տալու, որ յուրօրինակ երկիր է, որովհետեւ քաղաքական մեծ փոփոխությունները կարող են տեղի ունենալ խաղաղ ճանապարհով»,- ասաց նախագահ Սարգսյանը:

09:26- Քիչ առաջ ՀՀ նախագահի նստավայրում մեկնարկեց «Հայաստան» համահայկական հիմնադրամի հոգաբարձուների խորհրդի նիստը: Այն վարում է խորհրդի նախագահ Արմեն Սարգսյանը:

Միջոցառմանը ներկա են Ամենայն Հայոց կաթողիկոս Գարեգին Բ-ն, ՀՀ վարչապետ Նիկոլ Փաշինյանը, ԱԺ նախագահ Արա Բաբլոյանը, ՍԴ նախագահ Հրայր Թովմասյանը, ԼՂՀ նախագահ Բակո Սահակյանը: