Հարցազրույց. բանակցել են չեն բանակցել

Տպագրվել է «Հայկական Ժամանակ» օրաթերթի՝ 2005 թվականի մայիսի 26-ի համարում

2004թ. աշնանից ՀԱԱԿ նախագահ Հովհաննես Հովհաննիսյանը խոսում է նոր ընդդիմադիր ֆորմատ ձեւավորելու անհրաժեշտության մասին, որին պետք է մաս կազմեն «Հանրապետություն» եւ «Ժառանգություն» կուսակցությունները: Եթե «Հանրապետություն» կուսակցության ներկայացուցիչները չեն բացառում նման ֆորմատի ձեւավորման հնարավորությունը, ապա «Ժառանգության» ներկայացուցիչները կամ՛ ասում են, որ ոչինչ չգիտեն նման բանակացությունների մասին, կա՛մ ընդհանրապես լռում են: Արդյոք կա՞ն նման բանակացություններ, եւ ո՞րն է  «Ժառանգություն» կուսակցության լիդեր Րաֆֆի Հովհաննիսյանի նման պարտիզանական պահվածքի պատճառը: ՀԱԱԿ նախագահ Հովհաննես Հովհաննիսյանի հետ հարցազրույցը այս խնդիրների շուրջ է:

- Պարոն Հովհաննիսյան, արդյոք դուք նոր ֆորմատ ստեղծելու շուրջ բանակցե՞լ եք «Ժառանգություն» կուսակցության լիդեր Րաֆֆի Հովհաննիսյանի հետ:

- Ես հայտարարել եմ եւ այժմ էլ վստահ ասում եմ, որ այն ազատական գործընթացները, որ պետք է իրականացնեն Հայաստանում այն խնդիրները, որ դրված են Հայաստանի ընդդիմադիր կուսակցությունների օրակարգում, պահանջում են, որ Հայաստանում ձեւավորվի նոր ընդդիմադիր ֆորմատ, որն իր վրա կվերցնի ամբողջ քաղաքական գործընթացների պատասխանատվությունը, եւ ընդհանրապես, ամբողջ երկրի քաղաքական պատասխանատվությունը: Քաղաքական դաշտում կան կուսակցություններ, որ ասում են՝ ինքնուրույն հեղափոխություն կանենք: Կան ուրիշները, որ ասում են, թե մենք ավելի շուտ հեղափոխությունը կանենք: Ես գտնում եմ, որ Հայաստանի քաղաքական դաշտում չկա այն կուսակցությունը, այն խարիզմատիկ լիդերը, որը միայնակ այս երկրում կկարողանա իրագործել այն ազատական հեղափոխությունը, որը պահանջում է հասարակությունը:

Դրա համար շատ բնական է, որ քաղաքական դաշտում պետք է ձեւավորվեն ընդդիմադիր նոր ֆորմատներ, որոնք իրենց վրա կվերցնեն այդ խնդիրների իրագործումը: Մենք բանակացում ենք բազմաթիվ կուսակցությունների հետ, նաեւ «Հանրապետություն» եւ «Ժառանգություն» եւ էլի մի շարք կուսակցությունների հետ: Այսպես թե այնպես, ապագայում նոր ընդդիմադիր ֆորմատ ձեւավորվելու է, իսկ թե այդ ֆորմատում կլինեն երկու, երեք, թե չորս կուսակցություններ, դա արդեն տվյալ կուսակցությունների քաղաքական կամքի եւ ցանկության խնդիրն է:

- Դուք հանդիպել էիք նաեւ ՀԺԿ առաջնորդի հետ, որը, սակայն, հայտարարեց, որ այդ հանդիպումները իրենք չեն համարում բանակացություններ: Հնարավո՞ր է, որ «Ժառանգության» ղեկավար Րաֆֆի Հովհաննիսյանը նույնպես նման ընկալում ունենա:

- Այդ հարցը ճիշտ կլինի ուղղել հենց նրան: Անձամբ ես համարում եմ, որ բոլոր քաղաքական հանդիպումները ուղեկցվում են քաղաքական քննարկումներով, որի արդյունքում կարող է եւ ծնվել ինչ-որ քաղաքական համաձայնություն:

- Այդ հանդիպումներում քննարկվե՞լ է նոր ֆորմատ ձեւավորելու հարցը:

- Դրանք եղել են քաղաքական քննարկումներ քաղաքական կուսակցությունների միջեւ, եւ նման հայտարարություն ես կարող եմ անել միայն այն ժամանակ, երբ կլինի ապագա ֆորմատի բոլոր անդամների համաձայնությունը: Դա քաղաքականություն է, որը ենթադրում է նաեւ շատ հարցերի փակ լինելը:

- Քննարկումների ժամանակ դուք Րաֆֆի Հովհաննիսյանին առաջարկե՞լ եք անդամակցել նոր ֆորմատին:

- Կարծում եմ, որ դա մշտապես ասել եմ մամուլում եւ շեշտել եմ, որ կան անհրաժեշտ նախադրյալներ նոր ֆորմատի ձեւավորման համար:

- Իսկ քննարկումների ժամանակ եղե՞լ է դեպք, որ Րաֆֆի Հովհաննիսյանը զայրանա, թե ինչու եք հրապարակայնորեն հայտարարություններ անում իրենց կուսակցության անունից:

- Դժվար է պատկերացնել, որ որեւէ մեկն այս երկրում կարող է իմ վրա զայրանալ, որովհետեւ ես ծնվել եւ ապրել եմ այս երկրում, եւ իմ արմատներն այս երկրում շատ խորն են: Իմ ամբողջ կյանքի ընթացքում, բացի ծնողներիցս, որեւէ մեկին իրավունք չեմ տվել իմ վրա զայրանալու:

- Գուցե զայրանալը կոպիտ է, բայց կարո՞ղ էր Րաֆֆի Հովհաննիսյանը դժգոհել իր անունը շահարկելու առիթով:

- Ես Րաֆֆի Հովհաննիսյանին գնահատում եմ, որպես բավական խոհեմ, կիրթ եւ գրագետ քաղաքական գործիչ, եւ նա իր կեցվածքով այդպիսի անձնավորություն չէ:

- Քաղաքական գործունություն ծավալելու համար դուք ակնկալում ե՞ք այլ անձանց, մասնավորապես Րաֆֆի Հովհաննիսյանի ֆինանսական աջակցությունը:

- Կարող եմ ասել, որ երբ մենք ստեղծում էինք այս կուսակցությունը, արել ենք բոլոր հաշվարկները եւ համոզված ասում եմ, որ մեր կուսակցությունը չունի եւ չի ունենալու ոչ մի ֆինանսական խնդիր:

- Ապագա ֆորմատի շրջանակներում քննարկվե՞լ է այն հարցը, թե ով ինչ դիրք է զբաղեցնելու ապագա իշխանությունում:

- Ի պատիվ իմ քաղաքական գործընկերների, քննարկումների ժամանակ որեւէ մեկը նման հարց չի բարձրացրել: Ես դա համարում եմ շատ խոհեմ մոտեցում եւ ուրախ եմ դրա համար:

Ավետիս Բաբաջանյան