Հետեւողական են. «Ա1+»-ը զրկվեց տարածքից

Տպագրվել է «Հայկական Ժամանակ» օրաթերթի՝ 2005 թվականի մայիսի 27-ի համարում

Մինչ Եվրոպայի խորհուրդը, այլեւայլ միջազգային կառույցներ իրենց բանաձեւերում եւ զեկույցներում հորդորում են ՀՀ իշխանություններին խոսքի լիարժեք ազատություն ապահովել երկրում եւ պայմաններ ստեղծել, որ «Ա1+» հեռուստաընկերությունը վերադառնա եթեր, մեր իշխանությունը ձեռնամուխ է եղել «Ա1+»-ի վերջնական ոչնչացմանը: Երեկ տնտեսական եւ քաղաքացիական գործերով վճռաբեկ դատարանը «Ա1+»-ին իր զբաղեցրած տարածքից վտարելու վերջնական որոշում է կայացրել: Այս տարիներին մենք դադարել ենք զարմանալ իշխանության դրսեւորած ցինիզմի վրա, սակայն վերեւում նստածների երեւակայությունն այդ առումով սահմաններ չի ճանաչում: Նախ ժողովրդի սիրած հեռուստաալիքը ջնջեցին եթերից, ապա «Ա1+»-ի համար պայքարողներին հաշտեցրին այն մտքի հետ, որ հեռուստաընկերությունը երբեւէ չի վերադառնալու եթեր, իսկ վերջում, փաստորեն, շենքը առան ձեռքներից:

Ամենասոսկալին այն է, որ «Ա1+»-ին խեղդելու գործընթացները կատարվում են ոչ միայն զանազան պնակալեզների (ամալյանական հանձնաժողովի անունը հիշատակելն արդեն հակաէսթետիկական զգացումներ է առաջացնում), այլեւ գիտության մշակների, ազգիս մտավորականների ձեռքով: Թվում է՝ Գիտությունների ազգային ակադեմիայի նախագահ, ակադեմիկոս Ֆադեյ Սարգսյանը նման կյանք ապրելուց, այդքան փորձ ու վաստակ կուտակելուց հետո պետք է իր այս տարիքում դառնար ազգի խիղճը, շանթարգելի դեր խաղար իշխանության եւ հանրության միջեւ, բռներ ապօրինություններ ու անարդարություններ անող ղեկավարի ձեռքը, սակայն, փաստորեն, միացել է «Ա1+»-ին հայտարարված պատերազմին՝ ոչնչով չտարբերվելով ամալյաններից:

Նա 2003-ի մարտի 2-ին հայցադիմում է ներկայացրել տնտեսական դատարան՝ ընդդեմ «Մելտեքս», «Ուրարտու» ՍՊԸ-ների, «Աղբյուր» մանկապատանեկան ամսագրի, «Առաջին ալիք» ԲԲԸ-ի՝ պահանջելով ազատել  ԳԱԱ-ին պատկանող Գր.Լուսավորչի 15 շենքի 400 ք/մ տարածքը: «Ա1+»-ի կողքին մյուս կազմակերպություններին ընդգրկելն անշուշտ միայն շղարշի եւ Եվրոպայի աչքին թոզ փչելու համար է արվել, որ վտարման գործընթացը «Ա1+»-ի դեմ բացահայտ տեռորի տպավորություն չթողնի: Վտարման պահանջը ԳԱԱ նախագահն իր հայցում բացատրել է նրանով, որ կառավարության 2003թ. փետրվարի 2-ի որոշմամբ ԳԱԱ Աբովյան 15 հասցեում գտնվող Լեզվի ինստիտուտի շենքը տրամադրվել է Հայաստանյայց Առաքելական եկեղեցուն, ուստի ԳԱԱ Լեզվի եւ տնտեսագիտության ինստիտուտները պետք է տեղափոխվեն ԳԱԱ Մ.Աբեղյանի անվան գրականության ինստիտուտին պատկանող Լուսավորչի 15 հասցեում գտնվող շենք:

Նկատենք, որ «Ա1+»-ին ճզմողների շարքերը, փաստորեն, համալրվել են նաեւ հոգեւոր առաջնորդով՝ սեփական հեռուստաընկերություն ունեցող կաթողիկոսը որոշել է նպաստել մեկ այլ հեռուստաընկերությանը դուրս մղելու գործընթացին: Ֆ.Սարգսյանի հայցադիմումը Տնտեսական դատարանը՝ Անատոլի Մաթեւոսյանի նախագահությամբ, բավարարել է 5 րոպեում՝ անգամ թույլ չտալով, որ «Մելտեքս»-ի ներկայացուցիչը բառ արտաբերի: Վտարման վճիռը, բնականաբար, «Ա1+»-ը բողոքարկել է վերջին ատյան՝ վճռաբեկ դատարան: Երեկ առավոտյան, ժամը 10.00-ին «Ա1+»-են բերել դատարանի ծանուցագիրը, որտեղ նշված է եղել, որ նրանց բողոքի քննությունը տեղի կունենա նույն օրը՝ ժամը 11.00-ին:

«Մելտեքս»-ի տնօրեն Մեսրոպ Մովսիսյանն այդ 1 ժամում չի հասցրել գտնել իր ներկայացուցչին, միայն օրվա երկրորդ կեսին մենք վճռաբեկից տեղեկացանք, որ «Մելտեքս»-ի բողոքը քննվել է դիմողի բացակայությամբ, եւ տնտեսական դատարանի վճիռը թողնվել է անփոփոխ: Այսինքն՝ «Ա1+»-ի վտարման վճիռը հաստատել են: Տեղեկացանք նաեւ, որ Լուսավորչի 15 հասցեում գտնվող ոչ բոլոր կազմակերպություններին է ԳԱԱ-ն վտարում՝ «Գարուն» ամսագրին եւ արդարադատության նախարարության պետռեգիստրին ձեռք չեն տալիս: Մի ուշագրավ լուր եւս՝ մոտ մեկ տարի առաջ այս շենքից վտարված «ԱԻՄ»-ի տարածքը դեռեւս թափուր է, այսինքն՝ ԳԱԱ-ն շենքի, տեղի պակաս եւ աշխատողներ տեղավորելու խնդիր չունի:

Խոսում են նաեւ, որ շենքը մոտ ժամանակներս վաճառելու են, ընդ որում՝ գնորդներից ամենահավանականը մոսկվացի Արա Աբրահամյանն է, որն ուզում է Ռուսաստանի դեսպանության հարեւանությամբ տեղավորվել: Ինչ վերաբերում է «Մելտեքս»-ին, ապա կազմակերպությունն այստեղ գտնվելու օրվանից՝ 1991-ից, մեծ ներդրումներ է կատարել, շենքն այն ժամանակ անմխիթար վիճակում է եղել՝ վերանորոգել են, բարեկարգել, կոմունիկացիաներ անցկացրել՝ ծախսելով մոտ 32 հազար դոլար: Այժմ նրանք պահանջում են, որ գոնե իրենց ներդրումները վերադարձվեն՝ նրանց պատասխանում են, որ ակադեմիան փող չունի: Ի դեպ՝ պայմանագրով նախատեսված է եղել, որ «Ա1+»-ի վարձավճարների գումարից պետք է նորոգման ծախսերը ժամանակի ընթացում դուրս գան, սակայն նույն Ֆադեյ Տաճատիչի խնդրանքով «Մելտեքս»-ը վարձավճարները վճարել է ամբողջությամբ, քանի որ ակադեմիան «բենզինի փող անգամ չի ունեցել»:

Ի՞նչ է սպասվում «Ա1+»-ին: Անշուշտ, խոսքը հեռուստաընկերության մասին չէ, այլ ինտերնետ կայքի եւ «Այբ ֆե» շաբաթաթերթի, որը մեր իշխանությունները պարբերաբար մտցնում են միջազգային դիտորդների աչքը, թե՝ տեսեք, նրանց ոչ ոք չի զրկել հանդես գալու հնարավորությունից, ուղղակի հեռուստաալիքը փոխարինել են լրատվության այլ միջոցներով: Մ.Մովսիսյանն ասաց, որ իրենց վտարելուն պես ե՛ւ թերթը, ե՛ւ սայթը կկանգնեն, քանի որ անհրաժեշտ կոմունիկացիաները շենքից տեղափոխել չեն կարող եւ տարածքի հարց չեն լուծել: Սա նշանակում է, որ Ռոբերտ Քոչարյանի իշխանությունը խնդիր է դրել «պատմության թատերաբեմից» վերջնականապես ջնջել «Ա1+» անունը: Եվ դա անել ավելի վաղ, քան կհասցնեն ջնջել իր իսկ անունը:        

Արմինե Օհանյան