Քննարկում. այս անգամ էլ չստացվեց

Տպագրվել է «Հայկական Ժամանակ» օրաթերթի՝ 2005 թվականի մայիսի 27-ի համարում

Մեր կուսակցական գործիչները բավական պարապ մարդիկ են: Իհարկե, նրանք օրվա ընթացքում լուծում են կենցաղային եւ անձնական խնդիրներ, ինչն անշուշտ կարեւոր է, սակայն օրվա մեծ մասն, այնուամենայնիվ, դատարկ է մնում, եւ նրանք այդ ընթացքն օգտագործում են քաղաքականությամբ զբաղվելու համար: Մինչեւ վերջերս դա անելը շատ դժվար էր, որովհետեւ հասարակությունը նրանցից շատերին դադարել է լուրջ վերաբերվել՝ համարելով, որ նրանք անընդունակ են որեւէ բան անելու, իրենք էլ հասարակությանը լուրջ չեն վերաբերվում, քանի որ համարում են, որ հասարակությունը մեզ մոտ ոչինչ չի որոշում, այնպես որ հասարակական աջակցություն ունենալ-չունենալն այնքան էլ կարեւոր մի բան չի: Բայց քաղաքականությամբ, այնուամենայնիվ, պետք է զբաղվել:

Քաղաքականությամբ զբաղվելու նպատակով մոտ 20 կուսակցությունների կողմից մայիսի սկզբին ստեղծված միջկուսակցական խորհրդակցական մարմինը երեկ «Ժողովրդավարական հայրենիք» կուսակցության գրասենյակում անցկացրեց իր հերթական նիստը: Այս մարմնում ստեղծված են քաղաքականությամբ զբաղվելու բոլոր նպաստավոր պայմանները: Նախ աշխատակարգը նախատեսում է, որ նիստերը հերթականությամբ պետք է նախագահեն ՄԽՄ անդամ կուսակցությունների ներկայացուցիչները, այնպես որ, իրենցից յուրաքանչյուրը հնարավորություն է ստանալու լինել նախագահողի կարգավիճակում, այսինքն, որոշելու՝ ո՞ւմ ձայն տալ, ե՞րբ եւ որքա՞ն, բացի այդ, իր նախագահության ընթացքում անսահմանափակ խոսել: Բացի այդ, չկա որեւէ պարտավորություն, եւ կա զրոյական պատասխանատվություն:

Օրինակ, արդեն 2-րդ շաբաթն է, որ ՄԽՄ անդամները ձեւավորում են ապագա նիստի օրակարգը՝ այն հագեցնելով իրարամերժ կամ իրար կրկնող հայտարարություններով, որոնք եթե նույնիսկ օրակարգ էլ մտնեն, ՄԽՄ անդամներից յուրաքնչյուրն ինքն է որոշելու՝ միանա՞լ դրան, թե՞ ոչ: Մասնավորապես ԱԻՄ նախագահ Պարույր Հայրիկյանը ներկայացրել է ԱԺ-ի կողմից առաջին ընթերցմամբ ընդունված սահամանդրական փոփոխությունների վերաբերյալ իր նկատառումները՝ հատկապես ընդգծելով այն փոփոխությունները, որոնց ընդունման դեպքում Հայաստանում էլ ավելի կսահմանափակվեն ժողովրդավարությունը եւ մարդու իրավունքների պաշտպանությունը: Հայրիկյանն առաջարկում է դիտողություններով ակտիվ մասնակցել սահմանադրական բարեփոխումների քննարկմանը:

Այս մոտեցմանը դեմ է Աշոտ Մանուչարյանը, որն անիմաստ է համարում կրիմինալ իշխանությունների հետ որեւէ հարց քննարկելը եւ առաջարկում է կանխել Հայաստանում ձեւավորված կրիմինալ իշխանությունների գործունեությունը: Ըստ Մանուչարյանի, անկախ նրանից՝ ինչպիսի Սահմանադրություն կամ ընտրական օրենսգիրք կընդունվի, միեւնույն է, կրիմինալ իշխանությունները թքած ունեն այդ փաստաթղթերի վրա: «Ժողովրդավարական հայրենիք» կուսակցության նախագահ Պետրոս Մակեյանը երեկ ներկայացրել էր միանգամից երեք հայտարարության նախագիծ, որոնցից մեկն էլ վերաբերում էր սահամանադրական փոփոխություններին: Պարոն Մակեյանը նույնպես առաջարկում է հրաժարվել սահմանադրական փոփոխությունների բովանդակային քննարկումներին մասնակցելուց:

Եւ «արտաքին ճնշումների տակ հանրաքվեի նախաձեռնության տակ այն վերածել Ռոբերտ Քոչարյանի վստահության հանրաքվեի եւ ժողովրդի ակտիվ մասնակցությամբ հասնել իշխանափոխության»,- ասված է ԺՀԿ-ի ներկայացրած հայատարության մեջ: Ներկաների մեծամասնությունն, իհարկե, կողմ էր իշխանափոխությանը, սակայն, օրինակ, Պարույր Հայրիկյանը կողմ է նաեւ, որ Սահմանադրությունը փոփոխվի, քանի որ նրանում սահմանափակվում են նախագահի խորհրդարանը լուծարելու լիազորությունները: Իսկ Արշակ Սադոյանը կողմ է, որ իշխանափոխության մասին խոսելու փոխարեն կոնկրետ գործ կատարվի. «Հերիք չէ՞ ճառ ասենք, ավելի լավ է մտածել զանգը կախելու մասին»,- հայտարարեց պարոն Սադոյանը, որը ցանկացած հարցի վերաբերյալ իր պարտքն էր համարում արտահայտել իր հատուկ կարծիքը:

«Ես կամաց-կամաց սկսում եմ հասկանալ Լեւոն Տեր-Պետրոսյանին, Բաբկեն Արարքցյանին, Արթուր Բաղդասարյանին, թե չէ մտածում էի, որ նախագահությունն է մեղավոր»,- Սադոյանի նման պահվածքից հոգնած՝ հայտարարեց Վազգեն Մանուկյանը: «Ես էլ կամաց-կամաց ձեզ եմ նմանեցնում նրանց»,- պատասխանեց Արշակ Սադոյանը, ինչին Մանուկյանը հակադարձեց. «Դա նշանակում է, որ ես ունեմ խոստումնալից ապագա»: Այս չափազանց հետաքրքիր ու շատ կարեւոր քննարկումը դեռ երկար կշարունակվեր, եթե Վազգեն Մանուկյանը չհայտարարեր, որ ինքը կարեւոր հանդիպման պետք է գնա՝ Արշակ Սադոյանը ԱԺ, իսկ մյուսները՝ իրենց գործերով: Բայց քանի որ քննարկելու շատ կարեւոր հարցեր կան, որոշեցին արտահերթ նիստ անել առաջիկա երկուշաբթի օրը:

Ավետիս Բաբաջանյան