Դատավորների համար անակնկալ է եղել Սեֆիլյանին եւ մյուսներին դատարան չներկայացնելը

Վերաքննիչ քրեական դատարանում այսօր պետք է քննվեր «Նոր Հայաստան» հանրային փրկության ճակատի առաջնորդ Ժիրայր Սֆիլյանի եւ մյուսների գործով վերաքննիչ բողոքը:

Վերաքննիչ բողոքով պաշտպանական կողմը պահանջում է ամբողջությամբ բեկանել առաջին ատյանի դատարանի դատավճիռը եւ կայացնել արդարացման դատական ակտ:

Դատական նիստերի դահլիճն այսօր բավական բազմամարդ էր. քաղաքացիները մեծ մասն այդպես էլ չկարողացավ մտնել նիստերի դահլիճ՝ տեղ չլինելու պատճառով: Այսօր նիստերի դահլիճում էր գտնվում նաեւ «Ժառանգություն» կուսակցության հիմնադիր Րաֆֆի Հովհաննիսյանը, օրեր առաջ 10 միլիոն գրավով ազատ արձակված Կարո Եղնուկյանը: Նիստը սկսվելուն պես նիստերի քարտուղարուհին զեկուցեց, որ դատական նիստին չեն ներկայացել ամբաստանյալները: Սա իրարանցում առաջացրեց դահլիճում ներկա գտնվողների մոտ: Մասնավորապես, Կարո Եղնուկյանը նկատեց, որ պետք է ամբաստանյալներին բերեն, ոչ թե իրենք ներկայանան. «Այդպիսի անհեթեթություններ մի ասեք՝ չեն ներկայացել, հո Yandex չէի՞ն կանչելու, նստեին գային»: Ի պատասխան նախագահող դատավոր Ռուզաննա Բարսեղյանն ընթերցեց Երեւան քաղաքի ոստիկանության վարչության պետ Մարտիրոսյանի գրությունը, որով հայտնել է դատարանին, որ սույն քրեական գործով այսօրվա դատական նիստին ամբաստանյալների ուղեկցումը հնարավոր չէ իրականացնել: Պատճառը, սակայն, դատավորի կողմից չընթերցվեց, քանի որ դահլիճում ներկա գտնվողները սկսեցին բղավել «ամոթ, դե հերիք եղավ»: Դատավորներից Մխիթար Պապոյանը փորձեց հանդարտեցնել իրավիճակը եւ պարզաբանել, թե ինչու ամբաստանյալները չեն ներկայացվել դատարան, սակայն անօգուտ: «Եթե ձեր համար ակնկալ էր նման գրությունը, ապա ընդամենը սրանից 15 րոպե առաջ նույնը բանը դատարանն է ստացել եւ մեզ համար էլ է եղել անակնկալ»,- դատավոր Մխիթար Պապոյանի այս հայտարարությունը նույնպես ընդհատվեց դահլիճում ներկա գտնվողների կողմից: Ստեղծված իրավիճակում դատավորները, անհնար համարելով նիստի շարունակումը, այն մեկ շաբաթով հետաձգեցին:

Սեֆիլյանի եւ մյուսների համակիրներն ու հարազատները, սակայն, մոտ կես ժամ մնացին Վերաքննիչ քրեական դատարանի նախասրահում՝ պահանջելով, որպեսզի ՀՀ ոստիկանապետ Վալերի Օսիպյանը գա եւ պարզաբանումներ ներկայացնի: «Նոր Հայաստան» հանրային փրկության ճակատի առաջնորդի եղբայրը՝ Թորոս Սեֆիլյանը, հայտարարեց, որ ամբաստանյալներին դատարան չբերելը կազմակերպված սադրանք է, որը խնդիր ունի սեպ խրել իրենց եւ Նիկոլ Փաշինյանի գլխավորած գործադիր իշխանության միջեւ: «Դա գցեցին այսօր շատ հստակորեն ոստիկանության վրա: Դա իրենց կողմից շատ մեծ սադրանք է, որպեսզի սաբոտաժ անեն Նիկոլին»,- ասաց Թորոս Սեֆիլյանը: Քիչ անց Ժիրայր Սեֆիլյանի պաշտպան Տիգրան Հայրապետյանը լրագրողների հետ զրույցում հայտարարեց, որ ըստ գրության՝ ամբաստանյալներին դատարան չներակայացնելու պատճառը ոստիկանների ծանրաբեռվածությունն է եղել եւ տեխնիկական խնդիրները: Սակայն ավելի ուշ գրությանը հակասող հայտարարություն եղավ: Մասնավորապես Կարո Եղնուկյանը հայտարարեց, որ նիստի հետաձգումից հետո խոսել է բարձրաստիճան ոստիկաններից մեկի հետ, որը հակասող պատասխան է տվել գրությանը: «Բարձրաստիճան ոստիկանն ասաց, որ անցած անգամ, երբ «Սասնա ծռերին» բերել են դատարան, շրջափակել էին շենքը, փողոց էին փակել եւ որ հիմա իրենք ունեն օպերատիվ ինֆորմացիա, որ նույն բանը Ժիրայր Սեֆիլյանի աջակիցները պետք է անեն այսօր եւ ասում է՝ այնքան ժամանակ մինչեւ ոստիկանությունը երաշխավարություն չունենա, որ այդպիսի բան չի լինելու, իրենք չեն բերելու: Սա նշանակում է, որ գուցե տարիներ շարունակ մեր կողմից տված երաշխավորությունը իրենց չբավարարի: Ինչքա՞ն ժամանակ կարելի է այսպես սպասել այն կասկածով, որ կա օպերատիվ ինֆորմացիա փողոց պիտի փակվի»,-հայտարարեց Եղնուկյանը՝ չնշելով բարձրաստիան ոստիկանի անունը:

Այսօր Սեֆիլյանի աջակիցները սպասում էին, որ նրան ազատության մեջ կտեսնեն: Բանն այն է, որ մինչ բողոքին անդրադառնալը պաշտպանական կողմը նրա խափանման միջոց կալանքը փոխելու միջնորդություն պետք է ներկայացներ դատարան: Վերաքննիչ դատարանը բողոքը վարույթ ընդունելիս մերժել էր նրանց ազատ արձակելու պաշտպանական կողմի միջնորդությունը: Բայց Սեֆիլյանը ոչ միայն դատարան չբերվեց, այլեւ ազատ չարձակվեց: Բանն այն է, որ այսօր ժամը 11:00-ին Շեգավիթի դատարանում տեղի էր ունենում նաեւ «Սասնա ծռերի» գործով նիստը, բայց ամբաստանյալները կրկին չէին ներկայացվել դատարան: Ակնհայտ է, որ ոստիկանները ոչ թե ծանրաբեռված են եղել եւ ինչ-ինչ տեխնիկական խնդիրներ են ունեցել, այլ Սեֆիլյանն ու մյուսները դատարան չեն բերվել աջակիցների հնարավոր անհնազանդության գործողությունների պատճառով:

Մոտ կես ժամ դատարանի ներսում գտնվելուց հետո Սեֆլյանի եւ մյուսների աջակիցները Արշակունյանց պողոտայից երթով շարժվեցին դեպի ՀՀ գլխավոր դատախազություն, ապա նաեւ Վճռաբեկ դատարան, որին միջնորդել էին վերացնել Սեֆիլյանի ու մյուսների կալանքը: Վճռաբեկ բողոքը, սակայն, ետ է վերադարձվել՝ սխալները շտկելու եւ այն կրկին ներկայացնելու պատճառաբանությամբ:

Ժիրայր Սեֆիլյանը մոտ երկու ամիս առաջ դատապարտվեց 10 տարի հինգ ամսվա ազատազրկման՝ երեք տարի առաջ՝ Ցեղասպանության 100-րդ տարելիցին, զանգվածային անկարգություններ նախապատրաստելու եւ ապօրինի զենք պահելու, շենք շինությունների զավթումը նախապատրաստելու համար: Քաղաքացիական ատիվիստ Գեւորգ Սաֆարյանը նույն գործով դատապարտվել է 5.5 տարվա ազատազրկման, մյուս հինգ ամբաստանյալները՝ 2-3,5 տարվա ազատազրկման:

Տպել
7915 դիտում

Քրտնաջան և թափանցիկ աշխատանքի ակնկալիքով. քաղաքապետը ներկայացրել է Քանաքեռ-Զեյթունի նոր ղեկավարին

էրեբունու զանգվածային անկարգությունների գործով ինքնակամ ներկայացած անձը Մասիսի սպորտդպրոցի տնօրենն է

Ոստիկանները Շենգենյան վիզայի կեղծման դեպք են բացահայտել. վիզան 6500 եվրո է արժեցել (տեսանյութ)

Ժողովուրդ ջան, հավատացե՛ք Նիկոլ Փաշինյանին, քանի դեռ ինքը հակառակը չի ապացուցել. Արփինե Հովհաննիսյան

Երևանի քաղաքապետը խոստացել է օգնել նախադպրոցական կրթության մոդելի կիրառման հարցում

Տնտեսական աճի տեմպը շարունակում է անկում ապրել՝ 6%. նախկին վարչապետ

Երևանի հ. 48 մանկապարտեզի տնօրենը կարգապահական տույժի է ենթարկվել (լուսանկար)

Վերսկսվել է «Բերդ» բնակելի շենքի կառուցապատումը

Ողբերգական վթարից մահացած Հրանտ Գասպարյանի ծնողները խնդրում են կրտսեր որդուն վաղաժամկետ զորացրել

Մոլորված ու Ադրբեջանում հայտնված Կ. Ղազարյանին դատարանում ահաբեկիչ են որակել (լուսանկարներ)

ՎՏԲ-Հայաստան Բանկը և «ՌԵՍՈ» ընկերությունը առաջարկում են իրենց հաճախորդներին «Ապահով հանգիստ» ապահովագրական փաթեթը

Մեղադրանքները Կ. Հարությունյանի հիվանդ երեւակայության արդյունքն են. ԱԺ-ն պատասխանում է աշխատակցի բողոքին

Ազգերի լիգա. Հայաստանի համար սկսվեց մեծ հույսերով, ավարտվեց, ինչպես միշտ

Նիկոլ Փաշինյանին ներկայացվել է գյուղտեխնիկայի արտադրություն հիմնելու ներդրումային ծրագիրը

Դեկտեմբերի 9-ի նախընտրական ցուցակներում ամբողջությամբ նույն տվյալներով 208 տարբեր մարդիկ կան

Գյումրու վրաերթի հեղինակն ինքնակամ ներկայացել է ոստիկանություն

Ով է փոխարինելու գեներալ Ղահրամանյանին՝ Վ. Սարգսյանի անվան ռազմական համալսարանի պետի պաշտոնում

Արմեն Սարգսյանը շնորհավորական ուղերձ է հղել Մոսկվայի եւ Համայն Ռուսիո Պատրիարք Կիրիլին

Զիբիլիքսի աղմկոտ գործով ամբաստանյալ, ՀՀԿ-ական Հրայր Անտոնյանն ընդունում է մեղադրանքը. գործը կքննվի արագացված կարգո՞վ

ՀՊՏՀ Գյումրու մասնաճյուղում եւ թիվ 37 դպրոցում կոռուպցիոն չարաշահումներով քրգործեր են հարուցվել