ՏԻՄ. ազատ եւ արդար Հրազդան

Տպագրվել է «Հայկական Ժամանակ» օրաթերթի՝ 2005 թվականի մայիսի 31-ի համարում

Այս կիրակի Հրազդանում տեղի ունեցան քաղաքապետի ընտրություններ, որոնց ավարտը դժվար է կանխատեսել: Ընտրությունների ամփոփման ժամանակ կարմիր բերետավոր ոստիկանները տեղամասերից մեկում ծեծ ու ջարդ են կազմակերպել, իսկ երեկ արդեն մոտ հազար հրազդանցիներ բողոքի ցույց էին կազմակերպել ընտրությունների կազմակերպած թիվ 41 ընտրատարածքային ընտրական հանձնաժողովի դիմաց, որը այսօր քաղաքապետի թեկնածու Արթուր Շաբոյանի կողմնակիցների բողոքների հիման վրա պետք է ստուգի քաղաքի բոլոր 23 տեղամասերի ընտրական փաստաթղթերը: Ընտրությունների նախնական արդյունքներով Հրազդանի քաղաքապետ, ՀՀԿ անդամ Արամ Դանիելյանի օգտին տրվել է 10 հազար 482 քվե, իսկ նրա միակ հակառակորդը` անկուսակցական Արթուր Շաբոյանը, ստացել է 10 հազար 133 ձայն:

Ըստ այս տվյալների, գործող քաղաքապետը ընտրություններում 349 ձայն ավել ստանալով` հաղթել է, սակայն այս տվյալները, կրկնում ենք, նախնական են, եւ բացառված չէ, որ այսօր կայանալիք ստուգումների արդյունքում պատկերը փոխվի: Քվեարկության թվերից ուշագրավ է անվավեր քվեաթերթիկների ցուցանիշը` այն Հրազդանում կազմել է 1209, ինչը բավական բարձր ցուցանիշ է, առավել եւս, որ առանձին տեղամասերում անվավեր ճանաչված քվեաթերթիկները կազմել են տվյալ տեղամասի քվեատուփում եղած քվեների մոտ 10 տոկոսը:  Ինչեւէ, քվեարկության օրը մինչեւ ժամը 14.00-ը Հրազդանում իրավիճակը բավական հանդարտ էր: Երկու թեկնածուների շտաբներում էլ մինչ այդ ընտրությունների հետ կապված բողոքներ առանձնապես չունեին:

Ժամը 14.45-ին թիվ 14 տեղամասից, որը տեղակայված էր Հրազդանի 5-րդ դպրոցում, ահազանգ ստացվեց: Այս թաղամասում Շաբոյանի կողմնակիցները իրենց շատ վստահ էին զգում, քանի որ թեկնածուն այստեղ է ծնվել մեծացել: Բայց պարզվեց, որ հանձնաժողովի անդամները քվեարկելու պահին բռնել էին ոմն Լիպարիտ Գրիգորյանի, որը այս տեղամասում քվեարկելու իրավունք չի ունեցել. քվեաթերթիկը քվեարկված էր Ա. Շաբոյանի օգտին: Հատկապես, այս տեղամասում նման միջադեպի արձանագրումը տարակուսանքի տեղիք էր տալիս, քանի որ ի՞նչ իմաստ ուներ կեղծիք թույլ տալ մի տեղամասում, որտեղ ընտրողներն առանց այդ էլ քվեարկելու էին Ա.Շաբոյանի օգտին: Մյուս կողմից տեղամասի չկնքված քվեաթերթիկները գտնվում էին ՏԸՀ այն անդամի մոտ, որը Ա.Դանիելյանի ամենաակտիվ կողմնակիցներից էր:

Ավելին, այս եւ մնացած տեղամասերում որպես կանոն ՏԸՀ անդամների մեծ մասը  Դանիելյանի կողմնակիցներն էին: Ուշագրավ էր նաեւ այն փաստը, որ թիվ 41 ԸԸՀ նախագահի տեղակալ Գարեգին Գյուրջյանը, որի հետ մենք գնացինք թիվ 14 տեղամաս, միանշանակ համոզված էր, որ կեղծիքն իրական է եւ Ա.Շաբոյանի կողմնակիցների ձեռքի գործն է: Գ.Գյուրջյանի նման համոզվածությունը սկզբում մեզ զարմանալի թվաց, բայց երբ մոտ մեկ ժամ անց նրան հանդիպեցինք մյուս թեկնածուի` Ա.Դանիելյանի կենտրոնական շտաբում` ինչ-որ տվյալներ հաղորդելիս, մեզ համար արդեն ակնհայտ դարձավ, թե ինչու էր ԸԸՀ նախագահի տեղակալն այդքան «համոզված»: Ի դեպ, նա ԸԸՀ անդամ է նշանակվել Ռոբերտ Քոչարյանի կողմից եւ մինչ Ա.Դանիելյանի շտաբի հանդիպումը պնդում էր, որ ինքը թեկնածուներից ոչ մեկին նախապատվություն չի տալիս եւ իր համար կարեւորը ընտրությունների արդարացիությունն է:

Ինչեւէ, քվեաթերթիկի հետ կապված այս պատմությունից հետո Հրազդանում իրավիճակը սկսեց սրվել: Երկու թեկնածուների շտաբերի դիմաց սկսեցին թանկարժեք ավտոմեքենաների շարասյուներ գոյանալ: Ժամը 18.00-ի սահմաններում շտաբերի դիմացի ավտոմեքենաներն ինչ-որ տեղ մեկնեցին: Ա.Շաբոյանի շտաբում մնացած մի քանի հոգին մեզ ասացին, որ շտաբի մարդիկ գնացել են Հրազդանում շրջելու եւ իրավիճակի հետ տեղում ծանոթանալու համար: Իսկ երեկ արդեն պարզ դարձավ, որ մեզ ճշմարտությունը չեն ասել: Նշված ժամին Հրազդանի թիվ 9 դպրոցի մոտ տեղի է ունեցել առաջին ծեծկռտուքը: Դպրոցի հարեւանությամբ կայանված ավտոմեքենայում նստած են եղել Ա. Շաբոյանի կողմնակից 4 տղաներ եւ Աստղիկ Հարությունյանը, որ վերը նշված դպրոցում գտնվող տեղամասում եղել է Ա.Շաբոյանի վստահված անձը:

Ըստ Ա.Հարությունյանի, որը բավական պատկառելի տարիքի կին է, իրենք ավտոմեքենայում նստած հաց ուտելիս են եղել, երբ ոստիկանի համազգեստով դիմակավորված մի խումբ հարձակվել է իրենց վրա եւ սկսել մահակներով հարվածել, որից հետո այդ չորս տղաներին նրանք գցել են իրենց «Գազելը» եւ տարել: Ա.Շաբոյանին սատարող ԱԺ պատգամավոր Սասուն Միքայելյանի խոսքերով, այդ տղաներին բաց են թողել միայն այն ժամանակ, երբ մարդիկ երեկոյան սկսել են հավաքվել եւ շրջափակել են ոստիկանական ավտոմեքենաներից մեկը: Դրանից հետո ոստիկանները բաց են թողել իրենց «տարած» տղաներին: Մի խոսքով, տեղի է ունեցել «գերիների» փոխանակում: Հաջորդ ծեծը տեղի էր ունեցել արդեն կեսգիշերին թիվ 14 տեղամասում:

Այստեղ մի պահ մեծ թվով մարդիկ են հավաքված եղել, քանի որ քվեարկության արդյունքների հետ կապված ինչ-որ տարաձայնություններ են եղել: Գիշերը ժամը 3-ի սահմաններում հանկարծակի կարմիր բերետավորները մուտք են գործել տեղամաս եւ սկսել տեղում եղածներին մահակներով ծեծել ու ցրել: Ըստ ներկաների, նրանք օգտագործել են նաեւ էլեկտրոշոկեր: Ի դեպ, թիվ 41 ԸԸՀ նախագահ Գագիկ Հարությունյանն ասում է, որ վերը բերված ծեծ ու ջարդերի մասին իրեն ոչինչ հայտնի չէր, ուստի նրա գնահատմամբ ընտրություններն անցել են շատ նորմալ: Փոխարենը, Ա.Շաբոյանի կողմնակիցներն, ինչպես արդեն նշեցինք, երեկ բողոքի ցույց էին կազմակերպել: Ցուցարարները խոստանում են պայքարել այնքան ժամանակ, մինչեւ որ գործող քաղաքապետը կհեռանա իր պաշտոնից:

Վահագն Հովակիմյան