Մալաթիայի շուկայի ծեծկռտուքի գործով դատապարտվածը վնասում է իրեն. արդարացում է պահանջում

Լուսանկարում՝ Արման Երիցյանի հայրը՝ Լեւոն Երիցյանը

Մալաթիա-Սեբաստիա վարչական շրջանի «Անահիտ» տոնավաճառի տարածքում ծեծկռտուքի գործով դատապարտված Արման Երիցյանը 15 օր է՝ հացադուլ է անում Սեւանի քրեակատարողական հիմնարկում, քանի որ դատարանը մերժել է վերջինիս պայմանական վաղակետ ազատման դիմումը:

Արման Երիցյանի հայրը՝ Լեւոն Երիցյանը, այցելել էր «Հայկական ժամանակ»-ի խմբագրություն եւ պնդում էր, որ իր որդին անմեղ է եւ նրա «գլխին սարքել են», իսկ ինքն արդեն տարիներ շարունակ դռներ է թակում այս հարցին լուծում տալու համար, սակայն ապարդյուն: Նրա փոխանցմամբ՝ իրենք այժմ պատրաստվում են դիմել վերաքննիչ դատարան՝ վաղակետ ազատման դիմումը մերժելու որոշումը բեկանելու:

Արման Երիցյանը մեղավոր է ճանաչվել 2012 թվականի նոյեմբերի 28-ին «Մալաթիա» գյուղմթերքների շուկայում ոմն Արսեն անունով անձի հետ նախնական պայմանավորվածությամբ դանակի սպառնալիքով Սամվել Մեջլումյանի վրա հարձակվելու եւ նրանից 80.000 ՀՀ դրամ հափշտակելու մեջ:

Նախաքննության մարմնի որոշմամբ՝ Արման Երիցյանին մեղադրանք էր առաջադրվել ՀՀ քրեական օրենսգրքի 175-րդ հոդվածի 2-րդ մասի 1-ին եւ 4-րդ կետով՝ ավազակություն, որը կատարվել է մի խումբ անձանց կողմից նախնական համաձայնությամբ՝ զենքի կամ որպես զենք օգտագործվող այլ առարկաների գործադրմամբ: Ա. Երիցյանի նկատմամբ որպես խափանման միջոց էր ընտրվել կալանավորումը:

Ըստ գործի նյութերի՝ Արման Երիցյանը եւ Սամվել Մեջլումյանը «Մալաթիա» շուկայի սննդի տաղավարներից մեկում օղի եւ խեցգետին են պատվիրել, ապա իրենց է միացել ոմն Արսենը, եւ երեքով սկսել են օղի խմել: Այդ ժամանակ Մեջլումյանը Երիցյանին առաջարկել է իրեն վերադարձնել գազի բալոնը, սակայն Երիցյանն ասել է՝ «Մի անհանգստացի, առավոտյան կվերցնես», եւ ձեռքը մտցրել է Մեջլումյանի պիջակի գրպանը, ինչի արդյունքում վիճաբանություն է սկսվել վերջիններիս միջեւ:

Վեճը «Մալաթիա» գյուղմթերքների շուկայի բացօթյա հատվածից տեղափոխվել է փակ, նեղ ճանապարհի մեջտեղի հատված, որտեղ մութ եւ անմարդ է եղել: Ըստ նյութերի՝ Երիցյանը դանակը հանել է, պահել Մեջլումյանի վրա, նրան առաջարկել իրեն տալ լոլիկի վաճառքից գոյացած գումարը՝ միաժամանակ դանակով պատռելով Մեջլումյանի հագուստը: Ապա վերջինիս գրպանից հանել է 80.000 ՀՀ դրամ: Այդ ժամանակ իրենց է մոտեցել ոմն Արսենը, սպառնացել Մեջլումյանին, որ եթե վերջինս որեւէ մեկին պատմի միջադեպի մասին, իրեն կգտնեն, կմորթեն, այնուհետ հարվածել է Մեջլումյանի դեմքին, որը վայր է ընկել, իսկ Երիցյանն ու Արսենը հեռացել են:

Այս ամենից հետո, ըստ գործի նյութերի, տուժող Ս. Մեջլումյանը հակասական ցուցմունքներ էր տվել: Մի ցուցմունքում Մեջլումյանն ասել է, որ ինքը շուկայից դուրս է եկել ժամը 18:00-ի սահմաններում, այդ ժամանակ մութ է եղել եւ ինքը ընկել է շուկայում դրված արկղերի վրա, քանի որ արդեն եղել է ոգելից խմիչք օգտագործած վիճակում, ինչի հետեւանքով ոտքը ցավեցրել է, իսկ ճակատը արդեն եղել է վնասված: Երբ ուշքի է եկել, իրեն են մոտեցել 2 երիտասարդ, օգնություն առաջարկել եւ ուղեկցել են մի մեքենայի մոտ, ինքը նրանց հայտնել է, որ գումար չունի եւ չի կարող նրանց վճարել: Նրանք պատասխանել են, որ գումար անհրաժեշտ չէ եւ նստեցրել են սպիտակ գույնի մեքենա եւ վարորդը իրեն տարել է տուն:

Այնուհետեւ տուժող Մեջլումյանը 10.04.2014 թվականի դատաքննության ընթացքում ցուցմունք է տվել եւ հայտնել, որ ինքը Արման Երիցյանի ձեռքում դանակ չի տեսել, նրանք իրեն մութ տեղ են տարել ու սկսել են խուզարկել, բայց չի կարող հայտնել Արմանի ձեռքում ինչ է եղել՝ լանցետ, թե ուրիշ բան, որը շորերը պատռել է:

Սակայն, ըստ նյութերի, վկաներից մեկի պնդմամբ՝ Սամվել Մեջլումյանը ծեծված, վնասված եւ հարբած մտել է կրպակ, որտեղ մեղադրյալ Արման Երիցյանը մենակ նստած է եղել: Մեջլումյանը հարցին՝ ինչ է եղել, ով է ծեծել, պատասխանել է, թե ընկել է:  

Դատաքննության ընթացքում հարցին, թե Մեջլումյանի որ ցուցմունքներն են համապատասխանում իրականությանը, դատաքննությա՞ն ընթացքում տրված, թե՞ նախաքննության, հայտնել է, որ իրականությանը համապատասխանում են նախաքննության ընթացքում տրված իր ցուցմունքները, որտեղ հայտնել է, թե Ա. Երիցյանի ձեռքին դանակ է եղել:

Առաջին ատյանի դատարանի 2014 թվականի մայիսի 26-ի դատավճռով ճանաչվել եւ հռչակվել է Արման Երիցյանի անմեղությունը ՀՀ քրեական օրենսգրքի 175-րդ հոդվածի 2-րդ մասի 1-ին եւ 4-րդ կետերով առաջադրված մեղադրանքում եւ նա արդարացվել է:

Դատախազ Հ. Սարգսյանի վերաքննիչ բողոքի քննության արդյունքում ՀՀ վերաքննիչ քրեական դատարանը 2014 թվականի դեկտեմբերի 2-ի որոշմամբ վերաքննիչ բողոքը բավարարել է մասնակիորեն, բեկանել է Մալաթիա-Սեբաստիա վարչական շրջանի ընդհանուր իրավասության առաջին ատյանի դատարանի 2014 թվականի մայիսի 26-ի դատավճիռը եւ գործն ուղարկել է նույն դատարան՝ նոր քննության:

ՀՀ վերաքննիչ դատարանը 2015 թվականի ապրիլի 22-ի որոշմամբ մերժել է ամբաստանյալ Ա. Երիցյանի պաշտպան Ա. Ալիխանյանի վճռաբեկ բողոքը վարույթ ընդունելը: Այնուհետեւ նոր քննության ուղարկելուց հետո առաջին ատյանի դատարանի 2016-ի նոյեմբերի 3-ի դատավճռով Երիցյանը մեղավոր է ճանաչվել ՀՀ քրեական օրենսգրքի 175-րդ հոդվածի 2-րդ մասի 4-րդ կետով եւ նրա նկատմամբ պատիժ է նշանակվել ազատազրկում վեց տարի ժամկետով:

Ա. Երիցյանի նկատմամբ նշանակված պատժին հաշվակցվել է անազատության մեջ գտնվելու ժամանակահատվածը՝ 2 տարի 4 ամիս 26 օր, եւ նրան թողնվել է կրելու ազատազրկում 3 տարի 7 ամիս 4 օր ժամկետով:

Երիցյանի պաշտպան Վ. Մակարյանի վերաքննիչ բողոքի քննության արդյունքում ՀՀ վերաքննիչ քրեական դատարանը 2017-ի հունիսի 23-ի որոշմամբ վերաքննիչ բողոքը մերժել է՝ օրինական ուժի մեջ թողնելով առաջին ատյանի դատարանի 2016 թվականի նոյեմբերի 3-ի դատավճիռը: Վերաքննիչ դատարանի այս որոշման դեմ վճռաբեկ բողոք է բերել Երիցյանի մյուս պաշտպան Ա. Ալիխանյանը՝ խնդրելով վճռաբեկ բողոքն ընդունել վարույթ, բեկանել վերաքննիչ քրեական դատարանի 2017 թվականի հունիսի 23-ի որոշումը եւ օրինական ուժի մեջ թողնել առաջին ատյանի դատարանի 2014-ի մայիսի 2-ի արդարացման դատավճիռը: Վճռաբեկ դատարանը գտել է, որ բողոքաբերի կողմից չի հիմնավորվել, որ առերեւույթ թույլ է տրվել դատական սխալ, որը կարող էր ազդել գործի ելքի վրա, եւ ուրեմն բողոքաբերի ներկայացրած նախատեսված հիմքը հիմնավորված չէ եւ դատարանը ներկայացված բողոքը վարույթ չի ընդունել:

Արման Երիցյանի հայրը՝ Լեւոն Երիցյանը, մեր զրույցում նշեց, որ իր որդին առողջական լուրջ խնդիրներ ունի: Նա դեռ 1999-ին ավտոմեքենայի գողության դեպքի կապակցությամբ ծեծի է ենթարկվել ու գլխուղեղի ցնցում ստացել: Հոգեբույժի կոնսուլտացիայի արդյունքում պարզվել է, որ Ա. Երիցյանը տառապում է սաթենադեպրեսիվ համախտանիշով եւ պետք է ստանա համապատասխան բուժում: Այնինչ, Երիցյանը գտնվում է ՔԿՀ-ում: Հայրը նաեւ տեղեկացրեց, որ որդին մի քանի անգամ ինքնավնասման փորձ է կատարել եւ որ սա հացադուլի առաջին դեպքը չէ: Երիցյանը, այսպիսով՝ պնդում է, որ անմեղ է եւ պահանջում է ճանաչել եւ հռչակել իր անմեղությունը:

Արման Երիցյանի հացադուլի, վերաքննիչ բողոքի հետ կապված պարզաբանում խնդրեցինք ՀՀ ԱՆ ՔԿՎ հանրային կապերի բաժնի աշխատակից Տիգրան Տոնոյանից: Վերջինս մեր զրույցում ասաց, որ Արման Երիցյանը ոչ թե տասնհինգ, այլ տասը օր է հացադուլ անում, իսկ հունիսի 15-ին արդեն դադարեցրել է հացադուլը: Տիգրան Տոնոյանի հաղորդմամբ՝ Երիցյանը վաղաժամ ազատման դիմումի մերժման վերաքննիչ բողոքը, ըստ ընթացակարգի, ներկայացրել է:

Երիցյանի հայրն էլ փոխանցեց, որ այս պահին Արման Երիցյանի առողջական վիճակը նորմալ է, ՔԿՀ-ում նրան անհրաժեշտ օգնություն են ցուցաբերել:

Տպել
1874 դիտում

ԵԽ մարդու իրավունքների հանձնակատարն ու ՀՀ դատախազի տեղակալները խոսել են ընտանեկան բռնությունների մասին

Գուգարքի անտառտնտեսությունում բենզասղոցով ապօրինի հատվել է 68 ծառ, վնասի չափը ճշտվում է

Վարչապետն ընդունել է Եվրոպայի խորհրդի մարդու իրավունքների հանձնակատարին

ՀՀ պաշտպանության նախարարն ընդունել է ՀՀ-ում Գերմանիայի արտակարգ և լիազոր դեսպանին

Սպասվում է անձրև և ամպրոպ, քամու ուժգնացում, առանձին հատվածներում հնարավոր է նաև կարկուտ

ՀՀ ոստիկանությունն Արցախի գործընկերներին կնվիրաբերի տրանսպորտային միջոցներ և սարքավորումներ

Տրագիզմ կլինի, եթե պարզվի՝ Փաշինյանը Մսրա Մելիքն էր Հայաստանի գլխին, հետո ՀՀԿ-ն էլ չի փրկի. Աշոտյան

Բրազիլուհին մոլորվել է Սևաբերդ գյուղից դեպի Ակնալիճ տանող լեռնային հատվածում

Վաղը Հայաստանի խորհրդարանի հիմնադրման 100-ամյակն է. հրավիրված է 600 հյուր

Երթևեկության կազմակերպման փոփոխություն Երևանի Բագրատունյաց-Արարատյան խաչմերուկում

Որոշ գովազդներ կհեռարձակվեն միայն ժամը 22:00-ից մինչեւ 06:00-ն. +21 նշագրումը կլինի պարտադիր

Բաքվի գործողությունները խաթարում են խաղաղությանը նպաստող մթնոլորտի ձեւավորմանն ուղղված ջանքերը

Անցել է ժամանակը, երբ Հայաստանի ղեկավարի սիրտն ու ուղեղը հանած է ու տեղը դոլար է շարած. վարչապետ

«Ես որոշակի քիմիա զգացի մեր միջեւ». Քոչարյանի հարցազրույցը «Комерсантъ»-ին

ԱԻՆ-ում անցկացվել է միգրացիոն հոսքերի կառավարման թեմայով շտաբային ուսումնավարժություն

Հայաստանում վարչապետի քիփ, վարչապետի՝ փայ մտնող ախպեր, ավտոների վրա քշող ախպոր տղա չի լինելու

ԱԻՆ սեյսմիկ ծառայության թիմը՝ «Գեովիկտորինա» մրցույթի հաղթող

Ասում են՝ արտահերթ խորհրդարանականին կողմ չենք քվեարկի, Սերժը կասեր՝ իյա, իրո՞ք, էդ դու՞ք եք որոշում. վարչապետ

Հայ-գերմանական համագործակցությունը բարձր մակարդակի վրա է. Տոնոյանն ընդունել է Գերմանիայի դեսպանին

Պրոռեկտորի կնոջից ավտոմեքենա վարձակալելու խնդիրը կարող է լինել միայն բարոյական. Դավիթ Մուրադյան