Շարունակություն. հայց ընդդեմ Արմեն Սարգսյանի

Տպագրվել է «Հայկական Ժամանակ» օրաթերթի՝ 2005 թվականի հունիսի 14-ի համարում

2002-ի դեկտեմբերին սպանված լրագրող Տիգրան Նաղդալյանի հայրը՝ Հովհաննես Նաղդալյանը, իր որդու սպանությունից գրեթե երեք տարի անց որոշել է Վազգեն Սարգսյանի ընտանիքից, իսկ ավելի կոնկրետ՝ Արմեն Սարգսյանից, դատական կարգով պահանջել իր որդու թաղման ծախսերը: Հովհաննես Նաղդալյանը հայցով դիմել է Արարատի մարզի առաջին ատյանի դատարան (Վեդի)` հայցադիմումի մեջ նշելով, որ իր որդու թաղման ծախսերի, ինչպես նաեւ որդու մահից հետո ընտանիքի միակ կերակրողին կորցնելուց հետո ինքը Արմեն Սարգսյանից, որպես կրած վնասի փոխհատուցում, պահանջում է 100 հազար ԱՄՆ դոլար:

Ինչպես երեկ մեզ հետ զրույցում ասաց Վեդիի առաջին ատյանի դատարանի դատավոր Ռազմիկ Հովհաննիսյանը, որի վարույթում է գտնվում այս գործը, հունիսի 6-ին արդեն տեղի է ունեցել դատական առաջին նիստը, բայց քանի որ իրենք մինչեւ հունիսի 6-ը հայցվորի պահանջի մասին գրավոր տեղյակ էին պահել Արմեն Սարգսյանին եւ դատական նիստի օրը դեռ պատասխան չէին ստացել, նիստը հետաձգվել է: Դատական հաջորդ նիստը կկայանա հունիսի 23-ին: Իսկ երբ մենք պարոն Հովհաննիսյանին հիշեցրեցինք, որ Տիգրան Նաղդալյանի թաղման ծախսերն արվել են պետության կողմից, եւ ստեղծված է եղել թաղման կառավարական հանձնաժողով, ուստի ի՞նչ հիմնավորմամբ է Հովհաննես Նաղդալյանը 100 հազար դոլար պահանջում, դատավորը պատասխանեց. «Տուժողի իրավահաջորդը, անկախ նրանից, թե ով է կատարել թաղման ծախսերը, իրավունք ունի դիմելու դատարան՝ կրած վնասի փոխհատուցում պահանջելու համար:

Ուստի, Քաղաքացիական օրենսգրքով ամեն ինչ հիմնավորված է եւ Նաղդալյան Հովհաննեսի հայցը օրինական է: Այլ հարց է, թե ի՞նչ որոշում ամսի 23-ին կկայացնի դատարանը: Ըստ օրենքի, պատասխանող կողմը, այսինքն՝ Արմեն Սարգսյանը, եւս պետք է ներկա լինի դատական նիստին, սակայն հաշվի առնելով այն հանգամանքը, որ վերջինս կալանքի տակ է, կարծում եմ, որ հաջորդ նիստի ընթացքում հայցը կլսվի առանց պատասխանողի, եւ դատարանը կկայացնի համապատասխան որոշում»,- ասում է դատավոր Ռազմիկ Հովհաննիսյանը: Եւ քանի որ անգամ ամենաճոխ թաղումների դեպքում դժվար է երեւակայելը, թե ինչի՞ վրա է հնարավոր ծախսել 100 հազար դոլարը, դիմեցինք նաեւ Տիգրան Նաղդալյանի հորը: Նա հաստատեց, որ իր որդու թաղման ծախսերը հոգացել է պետությունը, բայց եւ պարզվեց, որ Հովհաննես Նաղդալյանը որոշակի վերապահումներ ունի  պետական ճաշակի նկատմամբ.

«Այո, պետությունն է արել ծախսերը, սակայն մենք գերեզմանին դրված խաչը չենք հավանել ու նորն ենք դրել: Բացի այդ, ես անձամբ թանկարժեք ծաղկամաններ եմ տարել եւ դրել գերեզմանոցում եւ ամեն տարի էլ իմ որդու ծննդյան տոներն եմ կազմակերպում: Բայց միայն թաղման ծախսերի մասին չէ խոսքը. այդ 100 հազարի մեջ մտնում է նաեւ մեր ընտանիքի կրած բարոյական վնասի փոխհատուցումը: Սակայն ես ուզում եմ պաշտոնապես հայտարարել, որ այդ ընտանիքի գողացված միլիոններն ինձ պետք չեն:

Եթե դատարանը կբավարարի իմ հայցը, ես արդեն իսկ մի քանի թաղապետի հետ պայմանավորվածություն ունեմ, որ ստացված գումարն իմ տուն չի մտնելու եւ մինչեւ վերջին կոպեկը բաժանվելու է զոհված ազատամարտիկների ընտանիքներին: Ես այնպիսի տղա եմ կորցրել, որ դրանից հետո իմ աչքին ոչ մի բան չի գալիս: Ես ինքս այս տարիների ընթացքում առողջությունս եմ կորցրել, նյարդային խանգարում եմ ստացել, երեք տարբեր հիվանդանոցներում եմ բուժվել, իսկ այդ ամենը հսկայական ծախս է: Այնպես որ, այդ ընտանիքի գողացված միլիոնների դիմաց իմ պահանջած 100 հազարը չնչին գումար է: Այդ գումարն ինձ համար թույն կդառնա, եթե ես դա վերցնեմ եւ օգտագործեմ: Թքած այդ 100 հազարի վրա: Այսօր նույնիսկ մեր դարավոր թշնամիները, թուրքերն ու ադրբեջանցիներն են մեր ընտանիքին բազմաթիվ հեռագրեր  ուղարկում, որտեղ իրենց խորին ցավակցությունն են հայտնում Տիգրանի մահվան առիթով: Անգամ մեր թշնամին է նման սպանությունից ազդված, էլի ինչի՞ մասին կարող է խոսք լինել»,- մեզ հետ զրույցում ասաց Տիգրան Նաղդալյանի հայրը:

Եւ չնայած արդեն իսկ կարծիքներ են հնչում, որ հերթական այս դատավարությամբ քաղաքական նոր սկանդալի մեջ են փորձում ներքաշել Սարգսյանների ընտանիքին, եւ Հովհաննես Նաղդալյանին ինչ-ինչ ուժեր պարզապես դրդել են նման քայլի, սակայն հայր Նաղդալյանը պնդում է, որ նման հայցով դատարան դիմելը բացառապես իր անձնական նախաձեռնությունն է եղել: Իսկ «Հանրապետություն» կուսակցությունում հերթական այս դատավարությունը համարում են իշխանությունների հերթական կեղտոտ եւ հեռահար նպատակներ հետապնդող շոուն ու հրաժարվում որեւէ մեկնաբանությունից: Ամեն դեպքում, ամառային թմբիրի մեջ մտնող քաղաքական դաշտին կարծես թե հերթական սկանդալային դատավարությունն է սպասվում:

Նաիրա Զոհրաբյան