«1000 դրամների հիմնադրամը» կատարել է 523,050,000 ՀՀ դրամի հատուցում. պարզաբանում

Վերջերս սոցիալական ցանցերում սկսեցին շրջանառվել հիմնադրամի նպատակների, կոռուպցիոն մեխանիզմներից զերծ լինելու, հրապարակայնության եւ արդյունավետության վերաբերյալ կասկածներ: Հիմնադրամը, ելնելով հրապարակային գործելու սկզբունքից, կարեւորում է հանրության առջեւ բաց լինելը: Այս մասին ասված է հիմադրամի տարածած հաղորդագրության մեջ:

«Այդ կապակցությամբ հայտնում ենք, որ Հիմնադրամի առաջնային արժեքներն են սոցիալական արդարության պահպանումը, վճարվող գումարների հավասարությունը, երկարաժամկետությունը, հատուցումների միայն դրամական լինելը, միջոցների անձեռնմխելիությունը եւ բացարձակ  հաշվետվողականությունը հասարակությանը: 

Զինծառայողների ապահովագրության հիմնադրամը հավատարիմ է իր առջեւ դրված նպատակներին ու արժեքներին, եւ այսօր եւս բնականոն ճանապարհով շարունակում է իր աշխատանքը:

Ինչպես եւ նախկինում, Հիմնադրամը շարունակում է յուրաքանչյուր ամսի 5-ին եւ 20-ին ապահովագրական վճարներ փոխանցել մեր շահառու 13 հաշմանդամ զինծառայողների եւ 37 զոհված զինծառայողների ընտանիքների: Կից ներկայացվող ցուցակում կարող եք գտնել այդ 50 զինծառայողին ՝ անուն առ անուն՝ Հիմնադրամի շահառու դառնալու ժամանակագրական հերթականությամբ:

Հիմնադրամը այս պահի դրությամբ արդեն իսկ կատարել է 523,050,000 ՀՀ դրամի հատուցում: Ընդ որում` այն պահից սկսած, երբ հաշմանդամ զինծառայողը կամ զոհված զինծառայողի ընտանիքի անդամները դառնում են Հիմնադրամի շահառու, նրանցից յուրաքանչյուրի անունով մենք  բացում ենք անհատական հաշիվ «Կոնվերս Բանկ» ՓԲԸ-ում, «Արցախբանկ» ՓԲԸ-ում կամ «Հայբիզնեսբանկ» ՓԲԸ-ում: Այդ հաշիվները պատկանում են բացառապես շահառուներին եւ լինելով հատուկ հաշիվներ՝ անձեռնամխելի են: Այսինքն, անգամ եթե շահառուները ունեն պարտքեր, վարկային պարտավորություններ, այդ հաշիվներին փոխանցված գումարի վրա չի կարող տարածվել բռնագանձում, այդ գումարները չեն կարող սառեցվել կամ այլ կերպ տնօրինվել:

Կարեւորում ենք եւս մեկ անգամ հիշեցնել, որ հատուցման գործընթացն ամբողջությամբ եւ անմիջականորեն կազմակերպվում է Հիմնադրամի կողմից, ինչը բացառում է երրորդ կողմի ցանկացած միջամտություն:

Հիմնադրամի հրապարակայնությունը եւ հաշվետվողականությունն իր առաջնային արժեքներից է: Հիմնադրամի կայքի միջոցով կարող եք համոզվել, որ ցանկացած լումա, որը Ձեր կողմից ուղղվել է մեր զինվորների սոցիալական բարօրությանը, օգտագործվում է բացառապես այդ նպատակով:

Կոչ ենք անում ծանոթանալ կայքում տեղադրված հաշվետվություններին, խոսել մեր գործընկեր բանկերի, ինչպես նաեւ Հիմնադրամի շահառուների հետ: Թեեւ Հիմնադրամի կայքում առկա է ողջ տեղեկատվությունը Հիմնադրամի կատարած եւ կատարվելիք գործունեության մասին, ցանկանում ենք տեղեկացնել, որ Հիմնադրամը պատրաստ է պատասխանել ցանկացած մտահոգության, որ կարող է առաջանալ Ձեզ մոտ, տրամադրել պարզաբանումներ այն հարցերի շուրջ, որոնք ըստ Ձեզ ունեն հավելյալ պարզաբանման կարիք, կազմակերպել հանդիպումներ՝ առավել մոտիկից Հիմնադրամի գործունեությանը ծանոթացնելու համար:

Ցանկանում ենք նաեւ շնորհակալություն հայտնել թե՛ Արցախի Հանրապետության, թե՛ Հայաստանի Հանրապետության յուրաքանչյուր քաղաքացու, ով բարեխղճորեն վճարում է ամսական 1000 դրամ, ինչպես նաեւ բոլոր նվիրաբերողներին, որոնք վստահում են Հիմնադրամին եւ նվիրաբերում՝ վստահ լինելով, որ իրենց նվիրաբերությունները կհասնեն իրենց հասցեատերերին: Մենք երախտապարտ ենք:

Ստորեւ կարող եք ծանոթանալ Հիմնադրամի կողմից կատարված հատուցումների անվանացուցակին.

*Օրենքի համաձայն՝ եթե հատուցման դեպքը տեղի ունենալու օրվա դրությամբ զինծառայողն ունի 3 կամ ավելի 18 տարին չլրացած երեխաներ, ապա վճարվող ամսական գումարին ավելացվում է ամսական լրացուցիչ 100,000 ՀՀ դրամ:

** Բացառության կարգով (դեպքի ամսաթիվ՝ նախքան 01 Հնվ 2017թ.) տրամադրված հատուցումներ, որոնք կատարվում են առանց միանվագ հատուցվող գումարի:

Այս ինֆոգրաֆիկայի միջոցով կարող եք ծանոթանալ Հիմնադրամի ընդհանուր հավաքագրված միջոցներին, որը պարտադիր վճարների եւ կատարված նվիրաբերությունների արդյունքում հավաքված գումարն է:

Իսկ այստեղ երեւում է փաստացի կատարված թվով 50 հատուցումների եւ առաջիկա 20 տարիների կատարվելիք պարտավորությունների նկարագիրը.