«Վեոլիա ջուր» ՓԲԸ-ն չի տուգանում, պարզապես գումար է շորթո՞ւմ

«Հայկական ժամանակ»-ը բազմիցս անդրադարձել է քաղաքացիների ահազանգերին, որոնք բողոքում են ««Վեոլիա ջուր»» ՓԲԸ-ի չհիմնավորված եւ ահռելի մեծ տուգանքներից: Այս ընթացքում բարձրաձայնված տարատեսակ բողոքների հիման վրա փորձեցինք «Վեոլիա ջուր» ՓԲԸ-ից պարզել, թե ինչ հիմքով են որոշվում ջրաչափի տուգանքներն ու դրանց չափերը:

Մեր հարցմանն ի պատասխան «Վեոլիա ջուր» ՓԲԸ-ից հայտնում են. «Վեոլիա ջուր» ՓԲԸ-ն չի տուգանում, ընկերությունը նման վարչական իրավասություն չունի»: ՓԲԸ-ից հայտնում են, որ գոյություն ունեցող անկախ չափագիտական մարմինը՝  ՀՀ տնտեսական զարգացման եւ ներդրումների նախարարության «Չափագիտության ազգային ինստիտուտ» ՓԲԸ-ն է իրականացնում արտաքին միջամտության շուրջ որոշումներն ու տուգանքի չափերը:

Հայտնում են, որ «Չափագիտության ազգային ինստիտուտ»-ի կողմից է սահմանվում նաև ջրաչափերի աշխատանքի խափանման պատճառների վերաբերյալ ցանկ, որտեղ նշված են արտաքին միջամտության դեպքերը: «Չափագիտության ազգային ինստիտուտ»-ից խնդրեցինք ներկայացնել, թե ջրաչափին վնաս հասցնելու դեպքում ինչ սկզբունքով է հաշվարկվում տարբեր մասերին հասցված վնասի չափը՝ գանձվող տուգանքը:

«Չափագիտության ազգային ինստիտուտ»-ի բաժնի վարիչ Կարապետ Սարգսյանը բացառեց «Վեոլիա ջուր»-ի կողմից հայտարարվածը, թե իրենք են որոշում եւ ասաց, որ իրենց մոտ միայն նշվում են միջամտությունների տեսակները. «Մենք ուսումնասիրում ենք միայն այն միջամտությունները, որոնք արվել են ջրաչափի վրա, այսինքն՝ թե ապակին ճաքած է, ծակված է, ինչ չափի է վնասված: Այսինքն՝ մենք միջամտում ենք միայն այն դեպքում, երբ սարքի վնասվածությունը կարող է խանգարել ջրի ցուցմունքին, իսկ հետագայում մնացած գործողությունները կատարվում են «Վեոլիա ջուր» ընկերության կողմից, մենք գործ չունենք»:

Կարապետ Սարգսյանի վստահեցմամբ՝ իրենց կողմից միայն արտաքին միջամտությունն է ուսումնասիրվում, իսկ մնացածը «Վեոլիա ջուր»-ն է նայում եւ տվյալ քաղաքացու կատարած ջրի մուծումներից հասկանում՝ արդյո՞ք դիտավորյալ միջամտություն է եղել, որը ցուցմունքին խոչընդոտել է, թե՞ ոչ:

Մեր հարցին, թե ինչպես է, որոշվում ջրաչափի վնասման դեպքում տուգանքի չափը՝ «Վեոլիա ջուր» ընկերությունից պատասխանել են. «Խոսքը ջրի սպառման ծավալների վերահաշվարկի մասին է, որն իրականացվում է ջրի օգտագործման կանոնները խախտելու դեպքում՝ գործող օրենսդրությամբ հաստատված կարգով, ծավալով եւ ժամկետներում»:

Հայտնում են, որ ջրաչափական սարքի անսարքության պարագայում «Վեոլիա ջուր»-ը ղեկավարվում է ՀՀ հանրային ծառայությունները կարգավորող հանձնաժողովի թիվ 378-Ն որոշմամբ, մասնավորապես՝ «Խմելու ջրի մատակարարման եւ ջրահեռացման (կեղտաջրերի մաքրման) ծառայությունների մատուցման կանոններով»:

Հարցին, թե ինչպես են որոշում ջրաչափի տուգանքը, եթե պարզում են, որ արտաքին միջամտությամբ չի արվել, այլ պատահականության արդյունք է: Պատասխանում են, որ եթե առևտրային հաշվառքի սարքի խախտման դեպքերը արտաքին միջամտության արդյունք չեն, ապա «Վեոլիա ջուր»-ը ղեկավարվում է նշված որոշման թիվ 46 կետով, հղում անելով ստորև ներկայացված անհասկանալի հաշվման բանաձևին: 

Բանաձև՝ համաձայն որի հաշվում են քաղաքացիների տուժանքը

Իսկ արտաքին միջամտության արդյունք հանդիսանալու պարագայում նշում են, որ տուժանքը կարգավորվում է թիվ 47 կետով: Այն է՝ եթե ջրաչափի սարքի խախտումը պայմանավորված է բաժանորդի գործողություններով, ապա մատակարարը՝ տվյալ դեպքում «Վեոլիա ջուր» ՓԲԸ-ն, իրավունք ունի բաժանորդից պահանջել վճարել տուժանք` մատուցված ծառայության վերահաշվարկված քանակի դիմաց վճարման ենթակա գումարի չափով: Տուժանքը վճարելու պահանջին Բաժանորդի չհամաձայնելու դեպքում «Վեոլիա ջուր» ՓԲԸ-ն վեճը լուծում է դատական կարգով:

«Վեոլիա ջուր» ՓԲԸ-ից վստահեցնում են, որ վերահաշվարկված գումարը ժամանակին չվճարելու համար բնակիչ բաժանորդների նկատմամբ տուժանք նախատեսված չէ, սակայն նշենք մի կարևոր հանգամանք, որ բազմիցս քաղաքացիներն ահազանգել են, որ տուժանքը չվճարելու դեպքում չեն դադարում իրար հաջորդող նամակներն ու տարբեր տիպի ծանուցումները, ապա եւ սպառնալիքները՝ գործը ԴԱՀԿ հասցնելու հետ կապված: Իսկ ԴԱՀԿ-ի հետ առնչվելիս մեր քաղաքացիները բազմիցս հասցրել են ճաշակել դառը պտուղները:

Նշենք, որ «Վեոլիա ջուր» ՓԲԸ-ին ուղղված մեր հարցերի մի մասն այդպես էլ անպատասխան մնացին, մասնավորապես այն, թե տարեկան քանի խախտում է արձանագրվում, ջրաչափի տուգանքը չվճարելու դեպքում տոկոսներն ինչքա՞ն են ավելանում եւ ի՞նչ հաճախականությամբ:

Ինչ վերաբերում է ջրաչափը վնասելու մասին անհապաղ զգուշացնելու դեպքում ջրամատակարարման գործող կանոններով զիջումներին, ապա այդպիսիք այնտեղ նախատեսված չեն: Անպատասխան մնաց նաև տուգանքի չափը՝ այն դեպքում, երբ ջրաչափի վնասված հատվածը խանգարում է ջրի ցուցմունքին եւ երկրորդ, երբ չի խանգարում:

Տպել
3635 դիտում

Հայկական ստորաբաժանումը առաջիկայում լիովին պատրաստ կմեկնի Սիրիա. Դավիթ Տոնոյան

Կարգադրվել է բարձրացնել զինվորականներին տրվող ներքնաշորերի որակը. Դավիթ Տոնոյան

Արցախում կայացել է մարտավարական զորավարժություն. ՊԲ-ն ներկայացնում է լուսանկարներ

Բուռն քննարկումներից հետո ՀԱԿ-ը որոշել է չմասնակցել արտահերթ ընտրություններին

Հայաստանի մի մասում անձրեւ, մյուսում՝ ձյուն է սպասվում. ԱԻՆ-ը հորդորում է անցնել ձմեռային անվադողերի

Գալուստ Սահակյանին փոխարինելու է Նաիրա Կարապետյանը

Պարգեւատրվել են լավագույն պարտադիր ժամկետային զինծառայողների ուսուցիչները

Դատախազությունն ուսումնասիրում է Հակոբ Հակոբյանի հայտարարությունը՝ կեղծ դեղեր գնվելու մասին

Հիմա էլ որպես ընդդիմություն են ստում. վերջին վարիանտ՝ Սերժ Սարգսյանը չէր հրաժարվի նաեւ ժողովրդի դեմ չերյոմուխա կիրառել

Քաղաքապետը Միջազգային պարալիմպիկ կոմիտեի նախագահի հետ հանդիպմանը կարևորել է պարասպորտի զարգացումը

Քրեական հեղինակություն Շալիկոյի սպանությունը նախապատրաստելու համար մարզիկին մեղադրանք է առաջադրվել

Ամփոփվել են ՎՏԲ-Հայաստան Բանկի #երբշահումես  մարքեթինգային արշավի արդյունքները

Աննա Հակոբյանը Մոսկվայում է. հանդիպումների ժամանակ ներկայացրել է իր ծավալած գործունեությունը

Վարչապետի խորհրդականը՝ ռեյտինգային թեկնածու

Ազգային ժողովի արձակումից հետո նոյեմբերի 11-ին տեղի կունենա առաջին լիագումար նիստը

Թուրքիային Քեմալ Օքսուզին հանձնելու միջնորդությունը ստացվել է ԱՄՆ-ի միջնորդությունը բավարարելուց հետո

Քունջութի յուղից և մածուկից մինչև դիզայն ու փրոդաքշն. սփյուռքահայերի բիզնեսը Հայաստանում (տեսանյութ)

Աննա Հակոբյանն այցելել է սիրված դերասան, թատրոնի ռեժիսոր Արմեն Ջիգարխանյանին

Տնակից դուրս չեն գալիս, որ նպաստ ստանան. Գյումրու ավագանին 2 ուղերձ հղեց կառավարությանը

Հ. Մարությանի որոշմամբ ապամոնտաժվել է ևս մեկ ինքնակամ շինություն, այս անգամ՝ Գյուրջյան փողոցում