Առիթ լինի. հաղթիլ տեն, համա ուշացնում են

Տպագրվել է «Հայկական Ժամանակ» օրաթերթի՝ 2005 թվականի հուլիսի 15-ի համարում

Իշխանությունները երեկ առավոտից ջանք չեն խնայել տապալելու «Նոր ժամանակներ» կուսակցության՝ Նոր Նորքի զանգվածում նախատեսված հանրահավաքը: Երեկ վաղ առավոտյան 10-ից ավելի ոստիկաններ մուտք են գործել «ՆԺ» Արտաշատի տարածքային կազմակերպության նախագահ Նշան Ասրյանի բնակարան ու նրան բերման ենթարկել ոստիկանության բաժին` զրույցի: Շուրջ 40 րոպե անց Ասրյանին արդեն բաց են թողել: Երեկ Նոր Նորքի առաջին զանգվածում «ՆԺ» հրավիրած հանրահավաքի ժամանակ պարոն Ասրյանը տեղեկացրեց, որ ոստիկանությունում իրեն հիմնականում հարցրել են կուսակցության թվաքանակի, գործունեության, ֆինանսական աղբյուրների մասին: Նաեւ հորդորել են, որ չմասնակցի երեկոյան կայանալիք հանրահավաքին ու Արտաշատից էլ մարդիկ չտանի:

Բացի այդ, ինչպես տեղեկացանք «ՆԺ» գրասենյակից, ոստիկանությունից երեկ զանգահարել են Թալինի, Աբովյանի, Նոր Հաճնի եւ Արմավիրի տարածքային կազմակերպությունների ղեկավարներին ու ահաբեկել նրանց: Ոստիկանները «ՆԺ» տարածքային կազմակերպությունների ղեկավարներից պահանջել են, որ ո՛չ իրենք մասնակցեն հանրահավաքին, ո՛չ էլ մարդկանց հասցնեն Երեւան: Իսկ Երեւանին հարող շրջաններից «ՆԺ» հանրահավաքին մասնակցելու ցանկություն ունեցող մարդկանց Երեւան տեղափոխող ավտոբուսներին էլ թույլ չեն տվել հասնել մայրաքաղաք: «Իշխանություններն ընդամենը ուզում են մեր հանրահավաքները տապալել, ամեն ինչ անում են, որ հնարավորինս քիչ մարդ մասնակցի հանրահավաքին: Դրա համար որդեգրել են ահաբեկման այս քաղաքականությունը»,- հայտարարում է «ՆԺ» նախագահ Արամ Կարապետյանը:

Սակայն նրա խոսքերով, ավելի լավ է «ՆԺ»-ին այսկերպ ահաբեկեն, քան թե հանրահավաքի ժամանակ հավաքված մարդկանց վրա կրակեն: Մանավանդ, որ Արամ Կարապետյանի վստահեցմամբ, իրենք այդ ահաբեկումները բավական հանգիստ են ընդունում: «Առաջ որ իմանում էինք մեր ընկերների ձերբակալման մասին, անհանգստանում էինք, գնում էինք բաժին: Հիմա այդ ամենը մեզ համար սովորական է դարձել, այդ ամենին շատ հանգիստ ենք վերաբերվում: Այդ ռեպրեսիաների նկատմամբ վախն իսպառ բացակայում է: Նույնիսկ զարմանում ենք, եթե միտինգից առաջ որեւէ բան չի պատահում»,- ասում է պարոն Կարապետյանն ու ավելացնում, որ իշխանություններն այսպես քարշ գալով չեն կարող հասնել մինչեւ 2008 թվականի հերթական ընտրություններ եւ որ ներքաղաքական կյանքում հեղափոխությունից բացի անհնար են այլ զարգացումները:

Նրա մեկնաբանմամբ, արտաքին քաղաքականության մեջ ՀՀ-ն այնպիսի վիճակում է հայտնվել, որ ընդամենը առիթ է հարկավոր՝ հեղափոխություն իրականացնելու համար: «Իրանում կայացած ընտրություններից հետո հասկանալի դարձավ, որ տարածաշրջանում լուրջ փոփոխություններ են տեղի ունենում: Ընտրությունները ցույց տվեցին, որ Իրանը պատրաստվում է գնալ մի ճանապարհով, որտեղ ընդունելի են ներքին արժեքները: Դա ցույց է տալիս, որ տարածաշրջանային զարգացումների մեջ աշխարհի արտաքին ազդակներն ավելի կոշտանալու ու զսպելու են Իրանին: Բացի այդ, վերջին շրջանում ակտիվացել է Ղարաբաղյան հիմնախնդրի կարգավորման հարցը: Շատ կարեւոր արտաքին հանգամանքներ կան, որոնք խարխլում են ՀՀ իշխանությունների հիմքերը»,- կարծում է Ազգային հեղափոխության առաջնորդը:

Իսկ մինչ այդ, նա կարեւոր է համարում, որ ազգային հեղափոխության կողմնակիցները սկսեն ներկայացնել իրենց ծրագրերը: «Հեղափոխության կոնկրետ ժամկետները կարող ենք ասել միայն վերջին պահին, երբ արդեն ամեն ինչ վերջնականապես հասկանալի է: Բայց հիմա գործընթացներ են գնում: Ես լիովին համոզված եմ, որ օգոստոսի մեջ Արամ Զավենիչի գլխավորած «Հանրապետություն» կուսակցությունն ինքն էլ կսկսի հեղափոխական գործընթաց: Իսկ սեպտեմբերին արդեն այդ պրոցեսները շարունակական կլինեն, ու իմ անձնական կարծիքով, շատ շուտով հեղափոխությունն իր տրամաբանական ավարտին կհասնի»,- վստահեցնում է նա: Իսկ Ազգային հեղափոխությունն Արամ Կարապետյանը պատրաստվում է անել, իր խոսքերով ասած, «ներսի եւ դրսի ուժերի համադրմամբ»: Չնայած, ՀՀ ապագան նա տեսնում է միայն «ՌԴ-ի գեոքաղաքական դաշտում»:

Հ.Գ. «Նոր ժամանակներ» կուսակցությունը սեպտեմբերին պատրաստվում է կուսակցության շարքերը մաքրել պատեհապաշտներից ու ականներից: «Մինչեւ սեպտեմբեր մաքրազատման աշխատանքներ ենք տանելու կուսակցության ներսում: Միգուցե դրա արդյունքում մի քիչ կրճատվի մեր կուսակիցների թիվը, սակայն ավելի կուռ, շատ հեղափոխական կառույց ենք ստեղծելու»,- երեկ մեզ հետ զրույցում ասում էր «ՆԺ» նախագահ Արամ Կարապետյանը: Վերջինիս խոսքերով, ինքը ժամանակին ՀՀ ոստիկանապետ Հայկ Հարությունյանի ու ԱԱԾ այն ժամանակվա տնօրեն Կառլոս Պետրոսյանի հետ ունեցած հանդիպումների ժամանակ խնդրել է, որ իրեն ներկայացնեն կուսակիցների մասին իրենց ունեցած տեղեկությունները, կոմպրոմատները: «Դա արել եմ, որպեսզի ես էլ իմանամ՝ նրանց մեջ կա՞ն արդյոք քրեական անցյալ ունեցողներ, թե՞ ոչ»,- ասել է Ա.Կարապետյանը՝ չկոնկրետացնելով, թե արդյոք նրանք տրամադրել են իրենց ձեռքի տակ եղած տեղեկատվությունը:

Արման Գալոյան