Չընտրված քաղաքապետ. քանի՞ ձայն ունի Զախարյանը

Տպագրվել է «Հայկական Ժամանակ» օրաթերթի՝ 2005 թվականի հուլիսի 19-ի համարում

Սահմանադրական բարեփոխումների փաթեթի կարեւոր կետերից մեկն էլ Երեւանի քաղաքապետի պաշտոնը ընտրովի դարձնելն է: Հենց այս կետի շուրջ էլ մեր իշխանությունները բավական երկար ժամանակ կռիվ էին տալիս Վենետիկի հանձնաժողովի հետ ու հետո բոլորիս համար անակնկալ ձեւով, գրեթե առանց վերապահումների, ընդունեցին, որ Երեւանի քաղաքապետի պաշտոնը դառնա ընտրովի: Ի՞նչ պատահեց: Պարզապես մեր իշխանությունները մի պահ երեւի շատ լուրջ էին ընդունում քաղաքապետի ընտրովիության հեռանկարը, դրանում իրենց իշխանության համար մեծ վտանգ էին տեսնում, բայց հանկարծ թուլացան, մտածեցին եւ հասկացան` ՀՀ նախագահի պաշտոնն էլ է ընտրովի, բայց դա հո չի՞ նշանակում, որ շատ ձայներ հավաքած թեկնածուն է դառնում նախագահ:

Քաղաքապետի պարագայում էլ կկեղծեն, կպրծնի-կգնա: Եթե Երեւանի քաղաքապետի ընտրությունները լինեն ուղղակի եւ կեղծիքներ չլինեն, հետաքրքիր է, որքա՞ն ձայն կհավաքի այսօրվա քաղաքապետ Երվանդ Զախարյանը: «Ես նման սոցիոլոգիական հարցումներ չեմ անցկացրել, ես չեմ կարող դրան պատասխանել»,- մեր այս հարցին երեկ այսպես պատասխանեց ինքը` Ե.Զախարյանը: Վերջինս ասուլիս էր հրավիրել ամփոփելու առաջին կիսամյակում քաղաքային իշխանությունների գործունեության արդյունքները: Եւ իրոք, ինչո՞ւ պետք է Երվանդ Զախարյանին հետաքրքրի, թե իր ղեկավարած քաղաքի բնակչության քանի տոկոսն է վստահում իրեն: Կարեւորը, որ նրան վստահում է Ռոբերտ Քոչարյանը, ով նրան նշանակել է այդ պաշտոնում: Իսկ մեկ հոգու վստահությունը շահելու, ինչպես կասեր Օստապ Իբրահիմովիչը, 400 համեմատաբար ազնիվ եղանակ կարելի է գտնել:

Այսօր արդեն կարելի է հաստատապես պնդել, որ եթե սահմանադրական բարեփոխումների փաթեթը ընդունվի եւ Երեւանի քաղաքապետի պաշտոնի ընտրովիության հարցը կարգավորվի առանձին օրենքով, ապա այդ օրենքում ամրագրվելու է ամենավատ, ամենաաղետալի տարբերակը: Այն է` քաղաքապետին ընտրելու են ոչ թե երեւանցիները, այլ ավագանին: Այսինքն՝ մի քանի դրածոներ, որոնք իբր ընտրությունների արդյունքում դառնալու են ավագանու անդամներ, որոշելու են, թե ով է լինելու Երեւանի քաղաքապետ: Եւ դրանից հետո արդեն հնարավոր չէ ասել, թե ով է կրում պատասխանատվությունը այս կամ այն մարդուն Երեւանի քաղաքապետ նշանակելու համար:

«Ես կողմ եմ, որպեսզի Երեւանի քաղաքապետը ընտրվի ավագանու կողմից»,- մեր համապատասխան հարցին ի պատասխան ասաց պրն Զախարյանը: Սա արդեն ապացույց է, որ հենց այդպես էլ լինելու է: Ինչո՞ւ: Որովհետեւ, նախ՝ միայն դրա արդյունքում պրն Զախարյանը կարող է մնալ իր պաշտոնում, եւ երկրորդ՝ Երվանդ Զախարյանը պատկանում է մեր այն պաշտոնյաների թվին, որի կարծիքը միշտ համընկնում է վերադասի կարծիքի հետ: Պրն Զախարյանի բազմամյա գործունեության շրջանում չեք գտնի մի հայտարարություն, մի ակնարկ, մի արտահայտություն, որը չհամընկնի այդ օրվա իշխանությունների կարծիքի հետ: Երեկ մեկ անգամ եւս փորձեցինք ստուգել այս պնդումը: Հարցրինք, թե ինչպես է վերաբերվում քաղաքապետը նրան, որ ՀՀ կառավարությունը Երեւանի տարածքում բազմաթիվ հողակտորներ, օբյեկտներ, շինություններ օտարում է ուղղակի վաճառքի ձեւով` առանց մրցույթի:

«Իմ անձնական կարծիքն այն է, որ եթե կառավարությունը նման որոշումներ է կայացնում, ապա դրանք բոլորը հիմնավորված են»,- բառացիորեն ասաց պրն Զախարյանը: Կարող էինք կասկածել, որ մեր կառավարությունն իրոք հիմնավորված որոշումներ է կայացրել, եթե չունենայինք մի քանի պաշտոնական տվյալ: 2004 թվականին միայն Երեւանում օտարվել է 115 հեկտար հող, յուրաքանչյուր քառակուսի մետրը միջինը 12 դոլարով: Եւ ի՞նչ կարող էր ասել այդ պարագայում քաղաքապետը: Թերեւս կարող էր ասել, որ ինքը փոքր-ինչ մտահոգված է նրանով, որ հողը վաճառվել է իր իրական արժեքից մի քանի անգամ էժան գնով, որ այդ հարցը պետք է ուսումնասիրվի, եւ այլն եւ նմանատիպ այլ հերթապահ արտահայտություններ:

Բայց մեր քաղաքապետը, ով երբեւէ չի հետաքրքրվել իր ղեկավարած քաղաքի բնակչության շրջանում իր ունեցած վարկանիշով, գտնում է, որ իշխանությունների կայացրած բոլոր որոշումները հիմնավոր են: Իսկ սրանից ուղղակիորեն հետեւում է, որ եթե պրն Զախարյանը թեկուզ ականջի պոչով լսած լիներ, որ իշխանության վերնախավում քննարկվում է քաղաքապետի ուղղակի ընտրության տարբերակը, ապա վայրկյան անգամ չկասկածեք, որ պրն Զախարյանը իր լիարժեք համաձայնությունը կհայտներ քաղաքապետի ուղղակի ընտրության տարբերակին: Երեկվա ասուլիսում քաղաքապետը անդրադարձավ բազմաթիվ հարցերի:

Թերեւս կարեւորագույնը, որ կհետաքրքրի երեւանցիներին, այն էր, որ երթուղային տաքսիների ուղեւորավարձը առաջիկայում կթանկանա: Համենայն դեպս նման ակնարկ արեց քաղաքապետը: Ըստ վերջինիս, Ավտոբուսների եւ երթուղային տաքսիների ուղեւորավարձերը նույնն են, ինչը բերում է ավտոբուսների ոչ արդյունավետ շահագործման: «Մենք հիմա ուսումնասիրություններ անում ենք եւ աշխատում ենք պահպանել (ուղեվարձը-խմբ), եթե ոչ, ապա մենք իրոք ստիպված կլինենք վերանայել»,- ասաց պրն Զախարյանը: Հաստատ թանկանալու է:

Հայկ Գեւորգյան