Հենց հմի բդի հանենք, լորդենք. մարալիկցիները պահանջում են Արտակ Գեւորգյանի հրաժարականը

Արդեն 3-րդ օրն է՝ Անի խոշորացված համայնքում պայքար է սկսվել ընդդեմ համայնքի ղեկավար Արտակ Գեւորգյանի: Հիմնականում Մարալիկ համայնքի բնակիչներն են պահանջում համայնքի ղեկավար Արտակ Գեւորգյանի հրաժարականը: Վերջինս 14 տարի եղել է նաեւ Մարալիկի համայնքապետը: Բողոքի ակցիայի մասնակիցները պատմել են, որ իրենց պայքարն առանց հիմքի չէ: Ըստ բողոքողների, Արտակ Գեւորգյանը Մարալիկի համայնքապետ եղած տարիներին թալանել է քաղաքը, սեփականաշնորհել է 4 մանկապարտեզներից մեկը, որը դարձրել է առաձնատուն եւ ապրում է հիմա, 2-րդ մանկապարտեզը տվել է նախկին փոխքաղաքապետին, ով այն տնօրինում է որպես անասնագոմ: Ներկա պահին Մարալիկն ունի մեկ մանկապարտեզ, որն ըստ մարալիկցիների, վերանորոգվում է բարերարների օգնությամբ:

«Գեւորգյանները մեր Մարալիկը սաղ զարկել են իրար, մեկը մեկին պաշտոն են տվել, սաղ իրանց: Էն ժամանակ մարդիկ չէին ըսում էս մասին, որովհետեւ վախենըմ էին, հմի հեղափոխություն է եղել, մարդիկ էլ չեն վախենըմ, էն վախտ որ ըսման խոսայինք միլիցին գուկար կբռներ, կտանիր, տիա մեր Հարությունին 2008-ին քանի տարի դատին, որովհետեւ ելավ ըսավ, որ լենանականցինք ավտոբուսով մարդ են բերել, լեւի ընտրել տվել, սարքին գլխուն, տարան Հարությունին նստցրին: Ինքը չի հասկընը՞մ որ ժամանակը փոխվել, է, հանգիստ թողա ռադ էղնի երտա: Էսօր հանրապետական է, էգուց կդառնա ուրիշ կուսակցություն, իրա համարա սեռավնոյ է, լիժբը իրան աթոռը պահե»,-բողոքեց ակցիայի մասնակիցներից մեկը:

«Ինքը ընձի դուր է գալըմ, բարեկամ է, շատ լավ տղա է, բայց դուր չի գալըմ էն, որ ինքը 150.000 դրամ աշխատավարձով կարողանում է 40.000 դոլարանոց Լեքսուս մեքենա գնի, ու էդ գաղտնիքը ընձի չի ըսե: Ես 250.000 եմ ստանըմ ու չեմ կարըմ ապրի: Ընձի դուր չի գալըմ, որ մանկապարտեզը դառել է փոխքաղաքապետի անասնագոմը, Մարալիկը 4 մանկապարտեզ ունիր, էսօր ունի 1-ը: Մեկը գործող քաղաքապետի առանձնատունն է, մյուսը նախկին փոխքաղաքապետի անասնագոմը»,- բողոքեց Մոսկվայում բնակվող եւ վերջերս Մարալիկ վերադարձած մի քաղաքացի:Անի խոշորացված համայնքի ղեկավար Արտակ Գեւորգյանը համամիտ չէր հնչած կարծիքների հետ: Ասաց՝ ինքը լեգիտիմ ընտրված ղեկավար է, 4000 քվե է ստացել, որը կազմում է ընտրության մասնակից քաղաքացիների շուրջ 50 տոկոսը, ազնիվ եւ մաքուր կենսագրություն ունի: Ուղղակի իրեն ուզում են մրոտել: Ըստ Գեւորգյանի, մոտ 30 հոգի են, ոչ ղեկավար ունեն, ոչ գաղափարախոսություն, ամբոխ են:

«Մարդիկ մինչեւ հիմա չեն պատկերացնում, որ սա Մարալիկի քաղաքապետի պաշտոնը չէ, այլ խոշորացված Անի համայնքի ղեկավարի պաշտոնն է: Գալիս են, ներխուժում են աշխատասենյակ, երբ ես գործնական այցով գտնվում եմ այլ բնակավայրում, եւ ընդամենն իրենց ունեցած դատարկամիտ պատկերացումով մտածում են, թե եկել են քաղաքապետ նշանակեն, գնան: Էս աթոռն Արտակ Գեւորգյան անձինը չէ, սա ժողովրդինն է: Ո՞վ եք դուք, այսինք ժողովրդին արհամարհած ունե՞ք, արհամարհած ունե՞ք ժողովրդի ուժը, ժողովրդի իշխանությունը: Ես լեգիտիմ ընտրված ղեկավար եմ, իսկ այս մարդկանց բոլորին էստեղ մեկ շահ է բերել, աթոռին տիրելու գաղափարը: Նրանք բոլոր ժամանակների եւ վերջին ընտրությունների պարտված թեկնածուներն են»,- իր հրաժարականը պահանջողներին հակադարձեց Արտակ Գեւորգյանը:

Անիի ղեկավարը նաեւ ընդգծեց, որ բամաթիվ ստուգումներ եւ աուդիտ է իրականացվել, ոչ մի խնդիր, թերացում կամ չարաշահում չի հայտնաբերվել: Եթե այսօր էլ հրաժարվի իր պաշտոնից եւ նորից մասնակցի ընտրությանն արդեն կրկնակի ավել ձայն կհավաքի, քանի որ այս ժամանակամիջոցում իր աշխատանքի շնորհիվ խոշորացված համայնքի բոլոր բնակավայրերում կարողացել է կայուն աշխատանքային թիմեր ձեւավորել եւ տեսանելի աշխատանք կատարել:

Անկախ Արտակ Գեւորգյանի ցանկությունից՝ հավաքվածները խոստացան բողոքի ակցիան շարունակել նաեւ վաղը, այն ավելի բազմամարդ կլինի, ասացին: «Մենք մեր մեջը ղեկավարի թեկնածու չունինք, ղեկավարը կեղնի էն մարդը, ում որ Փաշինյանը ընտրե, որ էգուց էլ որ ընտրություն էղնի, ստեղ արդարություն էղնի, եթե չհանեցինք, լորդեցինք իրան, Փաշինյանը Երեւանից հեչ բա չի իրնա էնե»:

Արտակ Գեւորգյանն էլ հայտարարեց, որ հրաժարականի մասին խոսակցություն լինել չի կարող: Ոչ նման միտք եղել է, ոչ էլ կա: Բայց հակառակ ուղղությամբ քայլեր ձեռնարկել է:

«Կայացել է ավագանու արտահերթ նիստ եւ ավագանին, ինչպես նաեւ Անի համայնքի վարչական ղեկավարները, որոնց թիկունքում հարյուրավոր բնակիչներ են կանգնած, ՇՄ դատախազին, Ոստիկանությանը, ԱԱԾ-ին, Շիրակի մարզպետին, Տարածքային կառավարման եւ զարգացման նախարարությանը ուղերձ են հղել, որպեսզի տեր կանգնեն իրավիճակին եւ սթափության կոչ անեն»,-լրագրողների հետ զրույցում ասաց Անի համայնքի ղեկավար Արտակ Գեւորգյանը:

Նշենք, որ Անին 17 բնակավայր ունի, 19 բնակատեղի, 23100 բնակիչ: