Լինսով դեպի ընտրություններ. ինձ մի՛ իդենտիֆիկացրեք...

Տպագրվել է «Հայկական Ժամանակ» օրաթերթի՝ 2005 թվականի սեպտեմբերի 24-ի համարում

ՀՀ նախագահի աշխատակզմի ղեկավար, Լինսի հիմնադրամի կառավարման խորհրդի նախագահ Արտաշես Թումանյանը երեկ հրավիրված ասուլիսի ժամանակ պաշտոնապես հայտարարեց, որ Հայաստանում սկսվում է այդ հիմնադրամի միջոցներով իրականացվելիք աշխատանքների երկրորդ փուլը: Այն ընդհանուր առմամբ կկազմի 60 մլն դոլար: Աշխատանքները, ըստ էության, կսկսվեն արդեն այս տարի եւ կավարտվեն 2008-ի սեպտեմբերին: Մինչ այս ծրագրի մանրամասներին անցնելը, անդրադառնանք պրն Թումանյանի մի քանի ուշագրավ հայտարարությունների:  Պատահականությո՞ւն է արդյոք, թե՞ զուգադիպություն, որ Լինսի հիմնադրամի ծրագրերը սկսվում են նախընտրական շրջաններում:

«Չգիտեմ»,- բավական անակնկալ պատասխան տվեց պրն Թումանյանը լրագրողներից մեկի հարցին: Սա չափազանց կարեւոր հայտարարություն է, եւ ահա թե ինչու: Պրն Թումանյանը պատրաստվում է  ստեղծել կուսակցություն: «Ես իմ համախոհների հետ միասին նոր կուսակցության ստեղծման մասին մտածում ենք: Նաեւ որոշակի ոչ հրապարակային գործողություններ ենք անում... Եթե ստացվի, եւ կուսակցությունը կայանա` կմասնակցենք 2007թ. պառլամենտական ընտրություններին»,- ասում է նա: Ավելին` նաեւ 2008-ի նախագահական ընտրություններին: «Եթե 2007-ի ընտրություններին այն քաղաքական կառույցը, որը ես մտածում եմ, որի հետ կարող է կապված լինել նաեւ իմ կենսագրությունը, իմ գործունեությունը, հաջողություններ ունենա, այդ հաջողություններին համաչափ ձեւով 2008-ի քաղաքական պրոցեսներին կարող է մասնակցեմ»,- իր հաշվարկները ներկայացրեց պրն Թումանյանը:

Եւս մի հայտարարություն. «Ընդհանրապես, քո քաղաքական գործունեությունը որպես անհատ քո պրոֆեսիոնալ գործունեության հետ որեւէ կապ անպայման կունենա: Եթե որեւէ տեղ լավ ես աշխատում, կարծում եմ դա լավ է անդրադառնում գործունեության մյուս ոլորտներին»: Հիմա այս հայտարարությունները բերենք հանրագումարի: Պրն Թումանյանը հավանական է համարում, որ Լինսի ծրագրերի` նախընտրական շրջանում իրականացնելը պատահական չէ: Այսինքն՝ դա կարող է դիտվել որպես նախընտրական քարոզարշավին օգնող հանգամանք: Եւ քանի որ կա այդ հանգամանքը, ապա ինչո՞ւ չօգտվել: Այսինքն՝ ինչո՞ւ չստեղծել կուսակցություն, որը կմասնակցի առաջիկա խորհրդարանական ընտրություններին, իսկ ինքը` պրն Թումանյանը, մասնակցի նաեւ նախագահական ընտրություններին այն դեպքում, երբ Լինսի աշխատանքները կարող են մեծ մասամբ կապվել հենց հիմնադրամի կառավարման խորհրդի նախագահ Ա.Թումանյանի անվան հետ:

Անցած անգամ` 2002-2003թթ. նախընտրական շրջանում կար այլ անձ` Ռոբերտ Քոչարյան, որի անվան հետ կապեցին 150 մլն դոլարի աշախատանքները: Այս անգամ Քոչարյանը չի լինելու: Այլ կերպ ասած, Թումանյանը հաստատ փորձելու է այս անգամ Լինսի գումարներով կատարված աշխատանքների «փառքի դափնին» իր ճակատին դնել, եւ դրա համար կան բոլոր նախադրյալները, որոնցից չօգտվելը պարզապես միամտություն կդառնա: Մնում է մի փոքր դետալ` կուսակցության գաղափարները, անունը եւ անդամների ով լինելը: Պարզվեց՝ կուսակցության ստեղծման աշխատանքներն արդեն ընթացքի մեջ են, իսկ գաղափարները հայտնի չեն: Կուսակցության անունն էլ դեռ որոշված չէ: Համեմատաբար հստակ է, թե ովքեր են անդամանկցելու:

«Եթե լիներ այդ կուսակցությունը, դուք այնտեղ կտեսնեիք տասնյակ պայծառ դեմքեր»,- իր ապագա կուսակցության անդամների շրջանակը նկարագրեց պրն Թումանյանը: Այդպիսով անհասկանալի մնաց, թե որն է այդ կուսակցության նպատակը` պայծառ դեմքեր հավաքե՞լը, թե՞ գաղափարախոսությունը: Ի դեպ, անցած խորհրդարանական ընտրություններին պրն Թումանյանը մասնակցում էր Դաշնակցության ցուցակով: Հիմա վիճակը փոխվել է: «Դաշնակցության հետ ինձ իդենտիֆիկացնել պետք չէ»,- իր ոչ հեռավոր անցյալի հետ կապը կտրեց պրն Թումանյանը: Ինչեւէ: Բայց պրն Թումանյանի ծրագրերին կարող է խանգարել մի հանգամանք: Ասենք, հանրաքվեով սահմանադրական փոփոխությունները ընդունվեն, եւ դա հիմք դառնա, որ Քոչարյանը 3-րդ անգամ առաջադրվի: Հարցրեցինք պրն Թումանյանին` Քոչարյանը կարո՞ղ է այդ դեպքում 3-րդ անգամ առաջադրվել:

«Չեմ կարծում»,- դեմքի մտահոգ արտահայտությամբ ասաց Քոչարյանի աշխատակազմի ղեկավարը: Ի դեպ, ի՞նչ կանխատեսումներ ունի պրն Թումանյանը` հանրաքվեն կանցնի՞, թե՞ ոչ: «Ճիշտն ասած՝ իմ օրակարգում, իմ մտքում հանրաքվեի խնդիրը բոլորովին չունեմ: Ճիշտ չի հանրաքվեի արդյունքը դարձնել գերա-գերագույն նպատակ... Եթե որեւէ մեկը կասի, որ հանրաքվեն շատ դյուրությամբ «այո» պատասխան կստանա, կգերագնահատի իր ուժերն ու հնարավորությունները»,- թափանցիկ ակնարկ արեց պրն Թումանյանը: Ինչ վերաբերում է լինսի ծրագրերին, ապա 20 մլն դոլարով նախատեսվում է հիմնանորոգել 18 դպրոց: Դրանցից 13-ը՝ Երեւանում, 5-ը` մարզերում:

20 մլն դոլարով հիմնանորոգվելու են հետեւյալ ճանապարհները` Արմավիր-Բաղրամյան-Իսահակյան-Գյումրի՝ 90 կմ-անոց, Հոռոմ-Արթիկ-Ալագյազ` 50,8 կմ-անոց, Ստեփանավան-Յաղդան-Այգեհատ-Օձուն՝ 36 կմ-անոց ճանապարհները: Երեւանում կառուցվելու է Փափազյան-Հաղթանակի զբոսայգի-Սարալանջի փողոց-Աբովյան պուրակ-Բժշկական ինստիտուտ-Հերացու փողոց նոր ճանապարհը, հիմնանորոգվելու է Բարեկամության հրապարակ-Կոմիտասի փողոց հատվածը, Տիգրան մեծ` Այրարատ կինոթատրոնից մինչեւ ե/գ կայարան հատվածը, ե/գ կայարանից մինչեւ Արցախի փողոց, այնուհետեւ Էրեբունի թաղամաս հատվածը եւ Տերյանի փողոցն ամբողջությամբ:

Հայկ Գեւորգյան