«Հայաստան» համահայկական հիմնադրամը ներկայացնում է «Նախագահի մրցանակ 2018» մրցույթի պայմանները

«Հայաստան» համահայկական հիմնադրամը ներկայացնում է Հայաստանի հանրապետության նախագահի 2018 թվականի մրցանակի համար հայտարարված մրցույթի պայմանները:

Հայաստանի Հանրապետության Նախագահի մրցանակը  ֆինանսավորում է «Պողոսյան» հիմնադրամը (Բելգիա-Շվեյցարիա): Որպես մրցանակ շնորհվում են` մրցանակի դափնեկրի վկայագիր, կրծքանշան եւ դրամական պարգեւ` 10.000 (տասը հազար)  ԱՄՆ դոլարին համարժեք դրամի չափով:

Մրցանակը շնորհվում է յուրաքանչյուր տարի` լավագույն ստեղծագործություններ, հայտնագործություններ (գյուտեր) եւ աշխատանքներ կատարած Հայաստանի Հանրապետության քաղաքացի հանդիսացող հեղինակներին հետեւյալ յոթ բնագավառներում՝

• բնական գիտություններ
• տեխնիկական գիտություններ եւ ինֆորմացիոն տեխնոլոգիաներ
• ֆիզիկա
• բժշկագիտություն
• արվեստ (այդ թվում ճարտարապետություն, կերպարվեստ, թատրոն, կինոարվեստ, ֆոտոարվեստ եւ արվեստի այլ ձեւեր) - 2 մրցանակ
• գրականություն (գեղարվեստական, գեղարվեստա-թարգմանական)
• հումանիտար գիտություններ

Մրցանակաբաշխությանը կարող են ներկայացվել միայն այն գործերը, որոնք առաջին անգամ հրատարակվել, հրապարակվել, կատարվել, ցուցադրվել, բեմադրվել,  կառուցվել-ավարտվել են մրցանակի համար հայտերի ներկայացման ժամկետի ավարտին նախորդող երեք տարվա (2016-2018թթ.) ընթացքում:

Ներկայացվող գիտական աշխատանքը պետք է ունենա թեմատիկ ընդհանրություն:

ԾԱՆՈՒՑՈՒՄ

-Մրցույթին «Բնական գիտություններ»,  «Տեխնիկական գիտություններ եւ ինֆորմացիոն տեխնոլոգիաներ», «Ֆիզիկա» բնագավառներում, կարող են մասնակցել նախորդ տարիներին ներկայացված, բայց հաղթող չճանաչված աշխատանքները՝ պայմանով որ դրանք իրականացված լինեն 2016-2018թթ. ընթացքում:

-Մրցույթին չեն կարող ներկայացվել բառարաններ, կատալոգներ, փաստաթղթերի ժողովածուներ, հուշագրություններ, դասագրքեր, ատենախոսություններ, ինչպես նաեւ այնպիսի աշխատանքներ եւ մենագրություններ, որոնց հիմքում ընկած են ատենախոսության նյութեր:

- Մրցույթին ներկայացվող մեկ հայտում մրցանակի հավակնորդների թիվը չպետք է գերազանցի հինգը:

 - Մրցույթին մասնակցելու հայտ չի կարող ներկայացվել մահացած անձի համար:

- ՀՀ Նախագահի մրցանակ ստացած անձը այլեւս չի կարող մրցանակ ստանալու համար աշխատանք ներկայացնել` ինչպես անհատական եղանակով, այնպես էլ համահեղինակների խմբի միջոցով՝ լինելով այդ խմբի հեղինակներից մեկը: ՀՀ Նախագահի մրցանակ տրվում է միայն մեկ անգամ:

Հայտատուն կարող է իր գործը ներկայացնել տվյալ բնագավառում գործող հաստատության կամ այլ անձի միջոցով, ինչպես նաեւ անձամբ:  Հայտատուն կարող է ներկայացնել միայն մեկ հայտ:

Հայտերն ընդունվում են 2018 թվականի դեկտեմբերի 3-ից մինչեւ 2019 թվականի հունվարի 31-ը ներառյալ:

Ներկայացման համար անհրաժեշտ փաստաթղթերի ցանկը կարելի է ստանալ «Հայաստան» համահայկական հիմնադրամի գործադիր վարչության գրասենյակից կամ հիմնադրամի կայքից http:// www.himnadram.org:

Գործերը ներկայացնելու եւ մանրամասն տեղեկությունների համար դիմել «Հայաստան» համահայկական հիմնադրամի գործադիր վարչություն` Աիդա Խաչիկյանին:

Հեռ. 52-09-40 (106); 56-01-06 (106); է-փոստ` [email protected]

0010, Երեւան, Հայաստանի Հանրապետություն,  Կառավարական 3-րդ մասնաշենք, 2-րդ հարկ:

Հայոց ցեղասպանության ճանաչման գործում նշանակալի ավանդ ներդրած անձանց շնորհվող մրցանակ

Հայոց ցեղասպանության ճանաչման գործում նշանակալի ավանդ ներդրած անձանց շնորհվող մրցանակը ֆինանսավորում է «Պողոսյան» հիմնադրամը (Բելգիա-Շվեյցարիա): 

Որպես մրցանակ շնորհվում է մրցանակի դափնեկրի վկայագիր, կրծքանշան եւ դրամական պարգեւ` 10.000 (տասը հազար) ԱՄՆ դոլարի չափով:

Մրցանակը շնորհվում է յուրաքանչյուր տարի` արժեքավոր ուսումնասիրություն կամ ստեղծագործություն ներկայացրած այն անձին, որը նշանակալի ավանդ է ներդրել հայոց ցեղասպանության ճանաչման գործում:

Սույն անվանակարգում շնորհվում է երկու մրցանակ.

ա) Հայաստանի Հանրապետության  քաղաքացի կամ ծագումով հայ գործչի կամ Հայաստանի Հանրապետության կազմակերպության` մեկ մրցանակ,

բ) օտարազգի գործչի կամ օտարերկրյա կազմակերպության` մեկ մրցանակ:

Մրցանակաբաշխությանը կարող են մասնակցել ցեղասպանության միջազգային ճանաչման գործին նպաստած անձինք իրենց գործունեության արդյունքներով կամ ստեղծագործություններով, որոնք  արդեն իրականացված են՝  հրատարակված, հրապարակված, կատարված, ցուցադրված մրցանակի համար հայտերի ներկայացման ժամկետին նախոր¬դող երեք տարվա  (2016-2018թթ.) ընթացքում:

Հայտատուն կարող է իր գործը ներկայացնել տվյալ բնագավառում գործող հաստատության կամ այլ անձի միջոցով, ինչպես նաեւ անձամբ:

Հայտերն ընդունվում են 2018թ. նոյեմբերի 15-ից մինչեւ  2019թ. փետրվարի 15-ը:

Ներկայացման համար անհրաժեշտ փաստաթղթերը կարելի է ստանալ «Հայաստան» համահայկական հիմնադրամի գործադիր վարչության գրասենյակից կամ Հիմնադրամի կայքից՝ http://www.himnadram.org/

Գործերը ներկայացնելու եւ մանրամասն տեղեկությունների համար դիմել «Հայաստան» համահայկական հիմնադրամի գործադիր վարչություն`  տ-ն Աիդա Խաչիկյանին

Հեռ. 52-09-40 (106); 56-01-06 (106); email [email protected]

0010, Երեւան, Հայաստանի Հանրապետություն, Կառավարական 3-րդ մասնաշենք 2-րդ հարկ: