Բերեզովսկու, Ռոհնի և Հայաստանի պետական սիմֆոնիկ նվագախմբի համատեղ համերգով ամփոփվեց Խաչատրյանի 6-րդ միջազգային փառատոնը

Արամ Խաչատրյանի Ջութակի և Դաշնամուրի կոնցերտների կատարմամբ ամփոփվեց Խաչատրյանի 6-րդ միջազգային փառատոնը, փառատոն, որը մեկ ամիս շարունակ երաժշտասերներին ներկայացրեց սիմֆոնիկ և կամերային հետաքրքիր համերգներ։

Խաչատրյանի փառատոնի փակման երեկոյին Հայաստանի պետական սիմֆոնիկ նվագախմբի հետ ելույթ ունեցան աշխարհահռչակ մենակատարներ՝ ջութակահար Դենիել Ռոհնը և դաշնակահար Բորիս Բերեզովսկին, ովքեր ներկայացրին խաչատրյանական երաժշտության իրենց մեկնաբանությունը։

Դենիել Ռոհնը Խաչատրյանի Ջութակի կոնցերտը նախկինում էլ կատարել է, սակայն առաջին անգամ այն նոյեմբերի 13-ին հնչեցրեց կոմպոզիտորի հայրենիքում։ «Ես միշտ սիրել եմ Խաչատրյանի Ջութակի կոնցերտը։ Այն բավականին ուշ եմ սովորել՝ ընդամենը մի քանի տարի առաջ։ Աննկարագրելի, հրաշալի երաժշտություն է, այն ասես ազատ ճախրանք լինի տիեզերքում»,- ասաց ջութակահարը՝ նշելով, որ ծանոթ է Խաչատրյանի նաև այլ գործերի։ Մասնավորապես, վերջերս կատարել է կոմպոզիտորի ջութակի, կլարնետի և դաշնամուրի տրիոն։ Հայաստանի պետական սիմֆոնիկ նվագախմբի հետ համագործակցության մասին խոսելով՝ Դենիել Ռոհնը նկատում է, որ շատ հեշտ, հարմարավետ է աշխատել նվագախմբի հետ։

Դաշնակահար Բորիս Բերեզովսկին համերգից առաջ լրագրողների հետ զրույցում ընդգծեց, որ Խաչատրյանը նրա ամենասիրած կոմպոզիտորներից է. «Խաչատրյանի Դաշնամուրի կոնցերտը միշտ մեծագույն հաճույքով եմ կատարում, այն մեծ հաջողությամբ է ընդունվում հանդիսատեսի կողմից, որովհետև շատ վառ, հրաշալի ու գեղեցիկ երաժշտություն է, ինչի համար մեր երախտիքը պետք է մատուցենք կոմպոզիտորին»։ Բորիս Բերեզովսկին նկատում է, որ շատ կոմպոզիտորների, այդ թվում՝ Արամ Խաչատրյանի ստեղծագործությունների վրա ակնառու է ժողովրդական երաժշտության դրոշմը։ Դաշնակահարը հիշում է, երբ տարիներ առաջ սիմֆոնիկ համերգներից մեկում կատարվեց Խաչատրյանի «Գայանե» բալետից Լեզգինկան, դահլիճն ուղղակի պայթեց ծափահարություններից։ Ժողովրդական երաժշտությունը, ըստ դաշնակահարի, լավագույն երաժշտությունն է, այն ստեղծվել է ոչ թե հանուն գումարի, հանուն փառքի, այլ միայն վայելքի համար, և դրա մեջ է նրա գեղեցկությունն ու ուժը։ Աշխարհում մեծ համբավ վայելող երաժիշտը բարձր գնահատեց համագործակցությունը Հայաստանի պետական սիմֆոնիկ նվագախմբի հետ։

Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, ամփոփելով Խաչատրյանի 6-րդ միջազգային փառատոնը, ընդգծեց, որ ամբողջ փառատոնի ընթացքում հնչեցին Խաչատրյանի մեղեդիները։ Փակման գալա համերգը խոսում է փառատոնի միջազգային հաջողության մասին. Բորիս Բերեզովսկին, Դենիել Ռոհնը ներկայացնում են Արամ Խաչատրյանի ամենահայտնի կոնցերտները։ Այն բոլոր ծրագրերը, որոնք հնչեցին փառատոնի համերգների ընթացքում, ըստ դիրիժորի, շատ նշանակալի էին։

«Կարծում եմ՝ հաջողություն է Հայաստանում նման միջազգային փառատոն ունենալը, և այն պետք է զարգացնել: Ձեռքբերումները, որոնք եղել են վեց տարիների ընթացքում, պայմանավորված են նաև արտիստների մասնակցությամբ՝ միջազգային համբավ ունեցող երաժիշտներ, որոնք եկել են Հայաստան՝ մեզ հետ տոնելու այս փառատոնի հաջողությունները, և որ մեզ համար շատ կարևոր է՝ հնչեցնելու Խաչատրյանի ստեղծագործությունները»,- ընդգծեց դիրիժորը:

Նշենք, որ Խաչատրյանի փառատոնի փակման գալա համերգին ներկա էին նաև Երևանի  Սամվել Գևորգյանի անվան համար 189 դպրոցի սաները, որոնք ԴասA ծրագրի շրջանակներում գիտելիքներ են ստացել դասական երաժշտության, Խաչատրյանի ստեղծագործությունների մասին, իսկ համերգասրահում կայացավ նրանց շփումը բարձրարվեստ երաժշտության հետ։

Խաչատրյանի 115-ամյակին նվիրված Խաչատրյանի 6-րդ միջազգային փառատոնը կազմակերպել էր Հայաստանի պետական սիմֆոնիկ նվագախումբը՝ ՀՀ մշակույթի նախարարության աջակցությամբ։

Տպել
270 դիտում

Կողոպուտ բենզալցակայանում. 29 հազար դրամ հափշտակած կասկածյալը ձերբակալված է

Այսօր ու վաղը սպասվում են ձյան տեղումներ, մառախուղ, ջերմաստիճանը կնվազի 4-6 աստիճանով

ՌԱԿ-ն իր համակիրներին կոչ էր արել քվեարկել «Իմ քայլը» դաշինքի օգտին, հուսով է՝ հույսերը կարդարանան

Վահե Էնֆիաջյանը վերահաշվարկ է պահանջել. ձայներն ավելացել են 6-ով

Ստեփանավանի ողբերգական հրդեհի փաստով կստեղծվի հատուկ աշխատանքային խումբ. մարզպետ

Նարեկ Սարգսյանի ձերբակալության մասին լուրը հրապարակելը քարոզչության վերջին օրը զուգադիպություն էր. Օսիպյան

ՀՀ-ում կամավոր բաժին է ներկայացել 2006 թվականից հետախուզվող կինը

Հայտնի է 20-րդ դարում ամենաշատը հեռարձակված հիթը

Գործընկերություն կառուցելու հիմքում մենք դնում ենք հայաստանամետ քաղաքական մոտեցում. նախարար

Մոսկվայում կկանգնեցնեն Շառլ Ազնավուրի արձանը

Հանրապետության գլխավոր տոնածառը գրեթե պատրաստ է, լույսեր են վառվում (տեսանյութ)

Սպասում ենք Հայաստան-Սփյուռք աննախադեպ համախմբման. Եվրոպայի հայերի համագումարի շնորհավորանքը

Գյումրի, Մարալիկ քաղաքներում, Աշոցքի, Ամասիայի տարածաշրջաններում, Ախուրյանում ձյուն է տեղում

Ընդդիմությունը պետք է հարցերի լուծումների այլ ճանապարհ առաջարկի, քան իշխանությունը. Քոչարյան

Մեր գլխավոր նպատակը ժողովրդավարությունն է. Փաշինյանը պատասխանել է թուրք լրագրողի հարցերին

Անգլիայում 14-ամյա ֆուտբոլիստը մահացու վնասվածք է ստացել խաղի ժամանակ

Ընտրություններ՝ առանց թաղայինների

78 հաղորդում, 2 քրգործ. ամփոփ տվյալներ՝ ընտրությունների օրվա և քարոզարշավի հաղորդումներից

Ինչպես կարելի է ստանալ ընտրատեղամասի տեսանկարահանումների պատճենները

Ո՞վ կփոխարինի Արա Մինասյանին. թափուր պաշտոնի մրցույթում հաղթողները երեքն են