Ապարան. երկքաղաքացիությունը փաստ է

Տպագրվել է «Հայկական Ժամանակ» օրաթերթի՝ 2005 թվականի նոյեմբերի 22-ի համարում

Ապարանի գործող քաղաքապետ Ռազմիկ Պետրոսյանը կիրակի օրը` նոյեմբերի 20-ին, պարտվել է քաղաքապետի ընտրություններում: Նրա մրցակից Գոռ Աբրահամյանը, հավաքելով 1901 ձայն, 188 ձայնով առաջ է անցել գործող քաղաքապետից: Երեկ առավոտյան Պետրոսյանը դժվարացավ ասել՝ արդյոք կեղծիքներ եղե՞լ են, սակայն տեղեկացրեց, որ 3 տեղամասերում էլ տվյալներ են պատրաստվում բողոքարկման համար: Ընտրված քաղաքապետ  Աբրահամյանը, որի թիկունքին այս ընտրություններում կանգնած էր «Նիգ-Ապարան» հայրենակցական միությունը եւ անձամբ ՀՀ գլխավոր դատախազ Աղվան Հովսեփյանը, տեղեկացրեց, որ Պետրոսյանի կողմնակիցները կիրակի երեկոյան ժողովրդին հանել էին փողոց եւ «ուզում էին հեղափոխության կայծի հիմքը դնել Ապարանում»: Նա նաեւ հայտարարեց. «Եթե բողոքարկեն, իմ ձայները կավելանան»:

Ինչպես տեղեկացրեց թիվ 14 ԸԸՀ նախագահ Հարություն Օհանյանը, քվեարկության ողջ ընթացքում ոչ մի բողոքարկում չի եղել, չի եղել նաեւ երեկ ժամը 14-ի դրությամբ, ինչը ԸԸՀ-ում ընտրությունների արդյունքների բողոքարկման վերջին ժամկետն էր: Ի դեպ, քվեարկությանը մասնակցել է 3746 մարդ, իսկ ընտրողների ընդհանուր թիվը 5437 հոգի էր: Երեկվանից «Նիգ-Ապարան» հայրենակցական միության հովանավորյալ եւ քաղաքապետ ընտրված Գ.Աբրահամյանի նախընտրական շտաբը, որը մայիսին «Միասնության շուրջպարի» շտաբն էր, դարձել է «Այո» քարոզարշավի շտաբ: Ողջ օրվա ընթացքում քաղաքում զբոսնում էին միլիցիայի եւ հատուկ նշանակության ջոկատի տղաները, որոնք լույս երկուշաբթի օրվա գիշերը հերթապահել են Ապարանում, քանի որ ընտրություններից հետո ապարանցիներն իմանալով, որ Պետրոսյանը պարտվել է, փակել են Ապարան-Երեւան մայրուղին, որպեսզի 3 տեղամասերի տվյալները չհասցվեն Աշտարակում գտնվող թիվ 14 ԸԸՀ:

Միայն Պետրոսյանի եւ ԱԺ նախկին պատգամավոր Մյասնիկ Մալխասյանի միջամտությունից հետո մայրուղին բացվել է: «Ճամփեն փակել ենք, որ լսենք կառավարության ձայնը»,- ասում է Պետրոսյանի կողմնակից Սուսաննա Դավթյանը: Կառավարությունը գիշերվա ժամը 4-ին ոչինչ չի ասել, պարզապես հատուկ նշանակության ջոկատի լրացուցիչ ուժեր է ուղարկել ճանապարհը բացելու համար: Իսկ ի՞նչ է եղել: Ապարանցիներն իրենց այդ քայլը բացատրում են նրանով, որ քվեարկության ողջ օրը տեղամասերում կարմիր բերետավորներ են եղել: «Հընչի մենք հանցագո՞րծ ենք»,- բորբոքված հարցնում էր մի երիտասարդ: Նրանց զայրացրել է նաեւ մի այլ փաստ. պարզվում է՝ ընտրությունների օրը Ապարանում, այսպես ասած, ներքին երկքաղաքացիությունն է գործել, Երեւանում գրանցված մարդիկ ընտրություններից մի քանի օր առաջ գրանցվել են նաեւ Ապարանում եւ քվեարկել են:

Այդ առթիվ մոտ 850 մարդ է տեղափոխվել: Ծերունիներից մեկը՝ Մնացական Պողոսյանը, տեղեկացնում է, որ հոկտեմբերի 23-ին տեղի ունեցած ավագանու ընտրություններին մասնակցել է 3080 հոգի, իսկ քաղաքապետի ընտրություններին՝ 3746 մարդ: Ապարանցիները համոզված են, որ 716 մարդ բերվել է Երեւանից: Ալեքսան Ավետիսյանը ու նրա հետ էլ մի քանի հոգի տեսել են, թե ինչպես ԱԺ պատգամավոր Սամվել Ալեքսանյանին եւ Աջափնյակի թաղապետ Արծրուն Խաչատրյանին պատկանող 70 եւ 92 համարի երթուղայինները քվեարկողներ են բերել Ապարան: Երեկ ապարանցիների մի մեծ խումբ հավաքվել էր քաղաքապետարանում եւ հայտարարում էր՝ թույլ չի տալու, որ Աբրահամյանը մտնի այս շենք: Իսկ միգուցե՝ նոր ընտրությո՞ւն:

«Ի՞նչ ընտրություն, մենք մեր գործող քաղաքապետին ենք պահանջում»,- բղավում էր անօրինականություններից դժգոհող մի կին: Հենց նա էլ սահմանադրական բարեփոխումներին իր հնարավոր մասնակցությունը եւ քվեարկությունը պայմանավորում էր նրանով, թե «վերին իշխանություններն ի՞նչ կորոշեն» Ապարանի մասով: Իսկ ինչո՞ւ հանձնաժողովներում Պետրոսյանի մարդիկ, որոնք 9-ից 3-ն էին, չեն բողոքարկել անօրինականությունները, եթե դրանք կային: «Էստեղ մարդասպանություն էր գնում, մենք ժամանակ ունեի՞նք բողոքարկելու»,- ասում էր թիվ 14/2 ընտրատեղամասի հանձնաժողովի անդամ Վրեժ Ավետիսյանը:

Վերջինս, այնուամենայնիվ, հատուկ կարծիք է գրել: Նա տեղեկացրեց, որ անօրինականություն է թեկուզ այն, որ Պետրոսյանի օգտին քվեարկած մի քանի տասնյակ քվեաթերթիկներ անվավեր են ճանաչվել, իսկ Աբրահամյանի օգտին քվեարկած քվեաթերթիկները՝ ոչ: Երեկ օրվա վերջում Պետրոսյանի կողմնակիցներն ընդհանուր հայտարարի եկան՝ դիմել դատարան, պահանջել անվավեր ճանաչել ընտրությունները: Չնայած այստեղ էլ խնդիր կա՝ քանի որ քվեարկության ընթացքում արձանագրված խախտումներն, ըստ Ալեքսան Ավետիսյանի, չեն արձանագրվել, հիմք չունենք դատարան դիմելու:

Մհեր Արշակյան