Պուտինը խփեց, ինչքան՝ ուզեց

Նախօրեին Սերժ Սարգսյանը աշխատանքային այցով մեկնել էր ՌԴ եւ երեկ Մոսկվայում տեղի ունեցավ ՌԴ նախագահ Վլադիմիր Պուտինի հետ նրա հանդիպումը: Այս այցի մասին հաղորդագրություններում եւ մամուլի հրապարակումներում հատուկ շեշտվում էր, որ սա Սերժ Սարգսյանի վերընտրությունից հետո առաջին արտերկրյա այցն էր. ուշադրություն հրավիրելով այն հանգամանքի վրա, որ Սարգսյանը իր առաջին այցը կատարեց հենց Ռուսաստան, ինչն էլ ռազմավարական գործընկերությանը հավատարմության նշան է: Այս շեշտադրումն իհարկե մեծ մասամբ համապատասխանում է իրականությանը, սակայն մի քանի փոքրիկ շտկումների կարիք ունի: Նախ այցը չի կայացել Սերժ Սարգսյանի վերընտրությունից հետո, այլ միայն՝ փետրվարի 18-ի նախագահական ընտրություններից հետո: Նա չէր կարող Պուտինի հետ հանդիպման պահին իրեն վերընտրված համարել այն պարզ պատճառով, որ ընտրությունների արդյունքներն այդ նույն օրը վիճարկվում էին ՀՀ Սահմանադրական դատարանի նիստում, ու որոշում դեռ չկար: Ինչ վերաբերում է ռազմավարական դաշնակցին հավատարմության խնդրին, ապա ներկայումս ՌԴ՝ որպես այդ հավատարմության երաշխիք աշխատանքային այցը արժեք չունի. այս երկրի կառավարությունը այլ, ավելի լուրջ սպասելիքներ ունի, մասնավորապես Վլադիմիր Պուտինի հեղինակած Մաքսային եւ Եվրասիական միություններին Հայաստանի անդամակցության հրապարակային համաձայնությունը: Բնականաբար այս հանդիպման ժամանակ Պուտինի համար առաջնահերթությունը՝ հենց Հայաստանի դիրքորոշումն էր Պուտինի գաղափարի վերաբերյալ: Սերժ Սարգսյանի համար էլ առաջնահերթություն պետք է լիներ, բացահայտորեն չմերժելով Վլադիմիր Վլադիմիրովիչին՝ նաեւ չհամաձայնել մաս կազմել այդ միություններին: Սա բնականաբար բարդագույն խնդիր կլիներ, նույնիսկ այն պարագայում, եթե Սերժ Սարգսյանն իսկապես ՌԴ այցելեր որպես վերընտրված նախագահ: Սակայն վիճելի արդյունքներով նախագահական ընտրություններից հետո, այն կրկնակի դժվար է: Ընդհանրապես ցանկացած բանակցության համար անհրաժեշտ է թիկունքում ունենալ սեփական ժողովրդի աջակցությունը, իր եւ իր երկրի անունից որոշումներ կայացնելու համար տրված վստահության քվեն: Այդ դեպքում կարող ես հղում անել քաղաքացիներին, մանեւրել: Հակառակ դեպքում, այն էլ մի իրավիճակում, երբ վերընտրությունը վիճարկվում է դատարանում, իսկ երկրի բոլոր բնակավայրերի հրապարակներում ժողովուրդը հավաքվում է՝ ապացուցելու, որ այդ քվեն քոնը չէ, հայտվում ես մեղմ ասած՝ խոցելի վիճակում: Երեկ Սերժ Սարգսյան-Վլադիմիր Պուտին հանդիպումից հետո պաշտոնական Կրեմլը հաղորդագրություն տարածեց դրա մասին, որտեղ տեղադրված էր նաեւ Պուտինի ողջույնի խոսքն ուղղված Սերժ Սարգսյանին: «Մեկ անգամ եւս ցանկանում եմ Ձեզ շնորհավորել համոզիչ հաղթանակի կապակցությամբ՝ ավելի քան 60 տոկոս, դա շատ լավ արդյունք է, որը խոսում է ժողովրդի վստահության մասին եւ Ձեզ հնարավորություն տալիս իրագործել բոլոր այն ծրագրերը, որոնք Դուք Ձեր առաջ դրել էիք նախընտրական քարոզարշավի ժամանակ»,- ողջունելով Սարգսյանին՝ ասում է Պուտինը: Սա ոչ թե ողջույնի խոսքի է նման, այլ ծաղրի, որովհետեւ նախ՝ Սերժ Սարգսյանը պաշտոնապես ոչ թե ավելի քան 60 տոկոս, այլ նույնիսկ 60 տոկոս ձայն չի ստացել: Պուտինը բնականաբար տիրապետում է սրան, ինչպես նաեւ տիրապետում է Հայաստանում տեղի ունեցող հետընտրական իրադարձություններին: Բայց նա ոչ միայն չի խոսում դրանց մասին, այլեւ՝ ճոխացնում է Սարգսյանի ստացած վստահության քվեն: Միայն տոկոսները մեծացնելը, դեռ ոչինչ, ասենք կարող էր վրիպել, բայց խոսքի շարունակությունը, այն է՝ «դա խոսում է ժողովրդի վստահության մասին եւ հնարավորություն տալիս իրագործել բոլոր այն ծրագրերը...»,- հուշում է, որ վրիպակը հանգամանալից մտածված էր: Վլադիմիր Պուտինին քիչ է հետաքրքրում, թե նախընտրական քարոզարշավի ժամանակ Սերժ Սարգսյանն ինչ ծրագրեր է դրել իր առաջ: Պուտինին հետաքրքրում են այն ծրագրերը, որ ինքն է դրել ՀՀ-ՌԴ հետագա համագործակցության առաջ, եւ ահա նա քաջալերում է Սերժ Սարգսյանին՝ դրանք կատարելու համար: ՌԴ նախագահը մոտավորապես ասում է, որ կարեւոր չէ՝ ինչ է կատարվում Հայաստանում, կարեւոր չէ նույնիսկ որքան ձայն է ՀՀ իշխանական համակարգը հաջողացրել վերագրել Սերժ Սարգսյանին, ինքը կարող է ավելին անել, «ինչքան ուզես, էնքան կխփենք» տրամաբանության մեջ, բայց անհրաժեշտ է, որ Սարգսյանն էլ իրագործի «ծրագրերը»: Հանդիպումից հետո տարածված պաշտոնական հաղորդագրությունների մեջ ի դեպ խոսք անգամ չկա Մաքսային եւ Եվրասիական միություններին՝ ՀՀ-ի ինտեգրման մասին, կարծես այդ մասին չի էլ խոսվել, չնայած նրան, որ Վլադիմիր Պուտինի որեւէ հանդիպում այդ միությունների պոտենցիալ անդամ հանդիսացող երկրների ղեկավարների հետ չի շրջանցել այդ թեման եւ դա արձանագրվել է հաղորդագրություններում: Ենթադրվում է, որ այս լռությամբ ռուսական կողմն ուղղակի ժամանակ է տվել Սերժ Սարգսյանին: Ի դեպ, Սարգսյանի այցից առաջ ակնկալվում էր, որ Պուտինի հետ կքննարկվի հարցերի լայն շրջանակ` ոչ միայն Եվրասիական միության ստեղծման ուղղությամբ գործընթացները, այլեւ՝ Հայաստանին մատակարարվելիք ռուսական գազի գինը, աբխազական երկաթուղու գործարկումը, Ստեփանակերտի օդանավակայանի բացումը եւ այլն: Որեւէ մեկի վերաբերյալ պաշտոնապես ոչինչ չհաղորդվեց: Ի դեպ հանդիպման վերաբերյալ Ռուսաստանի նախագահի պաշտոնական կայքէջում տեղ գտած տեղեկատվությունը մի քանի ժամ անց թարգմանված տեղադրվեց նաեւ ՀՀ նախագահի կայքում: Խմբագրված էր միայն ամենակարեւոր հատվածը. Պուտինի խոսքում «ավելի քան 60 տոկոսը» դարձել էր՝ «մոտ 60 տոկոս»: