Մեդիադաշտը ճնշումների տակ. ոստիկանապետը 24 ժամ է տալիս

Օրերս կայքերից մեկում հայտնվեց բավական ուշագրավ մի տեղեկատվություն, որը, սակայն, շատ արագ անհետացավ նույն այդ կայքից:

Եւ ուրեմն. կայքը, հղում անելով իր հավաստի աղբյուրներին, գրել էր, որ բարձրաստիճան պաշտոնյայի թիկնազորի պետի փեսան կրակել է Լոշտ մականունով անձի ոտքին: Նույն կայքը նշել էր նաեւ, թե ականատեսները պատմում են, որ Լոշտին հիվանդանոց չեն տեղափոխել ու դեռ փամփուշտը նրա ոտքի մեջ է: «Մեր աղբյուրներն առայժմ չեն ուզում անունները բացահայտել: Խոստանում են անել առաջիկայում»,- գրել էր կայքը: Բայց առաջիկայում մանրամասներ ոչ միայն չեղան, այլ, ինչպես վերը նշեցինք, կայքում տեղադրված նյութն էլ անհետացավ:

Փորձեցինք գնալ անհետացած նյութի հետքերով: «ՀԺ»-ի իրավական հարցերով լրագրողին հաջողվեց պարզել, որ կայքի նշած դեպքը տեղի է ունեցել մոտ տասն օր առաջ, Մասիս քաղաքում: Կայքում տեղեկություններ են ունեցել, որ բարձրաստիճան պաշտոնյան ոչ այլ ոք, քան ինքը` ՀՀ ոստիկանապետ Վլադիմիր Գասպարյանն է, ում թիկնազորի պետ Արշակ Հակոբյանի փեսան էլ, ըստ շրջանառվող լուրերի, կրակել է Լոշտի ոտքին: Երեկ, երբ մեր թղթակիցը ոստիկանության լրատվական ծառայությունից հետաքրքրվեց, թե ինչու Մասիսում տեղի ունեցած դեպքը ոստիկանության ամփոփագրերում տեղ չի գտել եւ խնդրեց մանրամասներ հայտնել դեպքի մասին, նրան պատասխանեցին, թե մարտի 3-ին մի դեպք է եղել Սիս գյուղում, գյուղապետը հաղորդում է ներկայացրել ոստիկանություն, թե գյուղում վիճաբանություն է եղել, ինքն էլ կողմերին հանգստացնելու նպատակով գազային ատրճանակից կրակել է: Ըստ ոստիկանության, հարուցվել է քրգործ քրեական օրենսգրքի 258 հոդվածի հատկանիշներով (խուլիգանություն): Երբ մեր թղթակիցը նշել է, որ ինքը խոսում է Մասիսում տեղի ունեցած դեպքի մասին, եւ հետաքրքրվել է, թե ճի՞շտ է արդյոք, որ կրակոցի հեղինակը ոստիկանապետի թիկնազորի պետ Արշակ Հակոբյանի փեսան է, ոստիկանությունից պատասխանել են. «Ասացինք այն, ինչ կա»:

Այս պատմության մեջ առավել ուշագրավ է ոչ թե այն, որ ոստիկանապետի թիկնազորի պետի փեսան կրակել է ինչ-որ մեկի ոտքին (Հայաստանում բարձրաստիճան պաշտոնյաների որդիների, թիկնազորի անդամների վարքով որեւէ մեկին վաղուց արդեն հնարավոր չէ զարմացնել), այլ այն, որ այդ մասին գրված լուրը, ընդ որում, առանց անունների գրված լուրը, անհետացել է կայքից:

Պարզվում է, ՀՀ ոստիկանապետ Վլադիմիր Գասպարյանն ու նրա ենթակաները հատուկ աշխատաոճ ունեն լրատվամիջոցների հետ: Տեւական ժամանակ է, լրատվական դաշտի կուլիսներում տեղեկություններ էին շրջում, թե Գասպարյանը «մեծ ներդրում» է ունեցել nrnak.com կայքի փակման գործում, որի հետեւում, ի դեպ, կանգնած էր իր երբեմնի մերձավոր, հանրությանը ոչ անհայտ Դոգը` նախկին ոստիկան Վարդան Ղուկասյանը: Երեկ, երբ «ՀԺ» թղթակիցը զանգահարել է փակված կայքի խմբագիր Հովհաննես Եսայանին եւ մեկնաբանություններ խնդրել այս լուրերի կապակցությամբ, Եսայանը պատմել է. «Ոչ միայն ոստիկանապետը, այլ նաեւ նրա խորհրդական Մալյան Նարեկը եւ նրա PR-ը ապահովող Մենուա Հարությունյանը: Ես, քանի որ բազմաթիվ ակտիվիստ ընկերներ ունեմ, ում հետ մասնակցում եմ ակցիաների, nrnak.com-ը շատ անգամներ լուսաբանել է ակցիաները, նման դեպքերի ժամանակ, երբ մեկ անգամ ես հանրային հարթակում Վլադիմիր Գասպարյանի մասին արտահայտություններ էի հնչեցրել, դա հունվար ամիսն էր, ինձ զանգահարում է Մալյան Նարեկը եւ բառացի կրկնում եմ նրա խոսքերը, որը, ի միջի այլոց, ես ձայնագրած ունեմ իմ մոտ. «Հովհաննես, Վլադիմիր Գասպարյանը քեզ տալիս է 24 ժամ ժամանակ` nrnak.com-ը փակես, հրապարակավ ներողություն խնդրես, հակառակ դեպքում նա ինչ-որ ձայնագրություններ դուրս կհանի եւ այլն»: Այսինքն, երկրի ոստիկանապետը կայքի խմբագրի, այսինքն, ինձ հետ խոսեց սպառնալիքների լեզվով: Ես քանի որ գիտեմ, որ ոչ մի խնդիր չկա, ես ձայնագրության խնդիր էլ չունեի, ասացի` ինչ ուզում եք արեք եւ շարունակեցի իմ գործունեությունը: Այդ ժամանակ նրանք ամեն ինչ արեցին, որպեսզի Դոգը խառնվի, Դոգը խառնվեց, քանի որ կայքի մոտավորապես 50 տոկոսը պատկանում էր նրան, կայքի հիմնական հատվածը փակվեց: Մի քանի հատված մնաց, այնուհետեւ ես իմ մասը վերականգնեցի, փորձեցի աշխատանքներս սկսել  բայց կայքը թե՛ ֆինանսապես, թե՛ բոլոր հարցերով ճգնաժամի առաջ կանգնեց եւ փակվեց: Վլադիմիր Գասպարյանը ամեն կերպ փորձում էր այնպես անել, որ իր անվան հետ կապ չունենար nrnak.com-ը, բայց ամեն անգամ կապում էին նրա հետ, իսկ այս վերջին հարցում արդեն նա զգաց, որ բացարձակապես հնարավոր չէ այդ կայքն իր անունից կտրել, փորձեց դիմել շանտաժի մեթոդի: Արդյունքում, կարելի է ասել, որ նրանք հաղթեցին, բայց ոչ թե նրա համար, որ կար ինչ-որ շանտաժ, այլ զուտ նրա համար, որ Դոգը կարողացավ անել այն, ինչ ուզում էին նրանք: Բայց տեսաք, հետո ինչ եղավ. Դոգին հանեցին, աշխատանքից դուրս շպրտեցին»:

nrnak.com-ի խմբագրի վերը շարադրածն ընդամենը մի դրվագ է ՀՀ ոստիկանապետ Վլադիմիր Գասպարյանի աշխատաոճից: Մեդիադաշտի կուլիսներում խոսվում է նաեւ, որ բոլոր այն լրատվամիջոցները, որոնք համարձակվում են որեւէ բան գրել Գասպարյանի դեմ, խնդիրներ են ունենում: Նրանց այցելում կամ զանգահարում են Նարեկ Մալյանը կամ Մենուա Հարությունյանը եւ զրույցներ ունենում, իսկ գովազդատուներին հրահանգում են համապատասխան այդ կայքերին գովազդ այլեւս չտալ:

Ըստ այդ խոսակցությունների, վերջերս նման մի փաստի առջեւ է կանգնել «Հայելի» կայքը: Երբ մեր թղթակիցը կայքի խմբագիր Անժելա Թովմասյանին հարցրել է` ճի՞շտ է, որ «Հայելին» գովազդատուների հետ խնդիր է ունեցել, քանի որ ոստիկանապետ Վլադիմիր Գասպարյանը հրահանգել է կայքին գովազդ չտալ իր դեմ գրված նյութերի պատճառով, Թովմասյանը պատասխանել է. «Նման խնդրի առաջ կանգնել ենք ամիսներ առաջ: Մի գիշերվա մեջ մի քանի գովազդատուներ որոշել էին իրենց աշխատանքը մեզ հետ դադարեցնել: Պարզ է, որ մտածում ենք` ճնշում է եղել:

Բայց մի քանի օրից զանգեցին, ասացին` նորմալ է: Թե ինչն էր աննորմալ, եւ ինչն է հիմա նորմալ, դժվարանում եմ ասել, միայն կարող եմ կռահել: Բայց քանի որ փաստեր չունեմ, անուններ դժվարանում եմ ասել»: Երեկ մեր թղթակիցը փորձել է մեկնաբանություն ստանալ նաեւ ոստիկանապետի խորհրդական Նարեկ Մալյանից: Նրա հետ կապ հաստատել չի հաջողվել, իսկ ֆեյսբուքով Մալյանին ուղարկված հարցերը երեկվա դրությամբ անպատասխան էին մնացել: