Վտանգավոր վերելակների ցանկը

Երեւանում շահագործվող, բազմաբնակարան շենքերի վերելակների կասկածելի անվտանգության խնդիրը հաճախ է տարբեր քննարկումների առարկա դառնում: Դրանք հատկապես մեծ թափ են ստանում, երբ գրանցվում է հերթական դժբախտ դեպքը:

Եւ օրեր առաջ հենց այդպիսի մի առիթով Տարածքային  կառավարման եւ արտակարգ իրավիճակների նախարարության պաշտոնյաներից մեկը հայտարարեց, որ Երեւանում շահագործվող 4341 վերելակներից 50-ի դեպքում փորձաքննությունը տվել է բացասական եզրակացություն: Ասել է թե՝ տվյալ վերելակները պիտանի չեն շահագործման: Մեր հարցմանն ի պատասխան՝ նախարարությունից տրամադրել են այդ վերելակների ցանկը, որն ըստ հասցեների ներկայացնում ենք ստորեւ:

Դավթաշեն վարչական շրջան 

2-րդ թաղամաս -21-րդ շենք, 22-րդ շենքի 1-ին մուտք, 4-րդ «բ» շենքի 1-ին եւ 2-րդ մուտք, 4-րդ թաղամաս-20-րդ շենք, 25-րդ շենք, 27-րդ շենք ( թե՛ մարդատար եւ թե՛ 2 բեռնատար վերելակ), 29-րդ շենք

Էրեբունի վարչական շրջան
Արցախի փողոց - 8.3-րդ շենք,10-րդ «դ» շենք, 10-րդ «վ» շենք, 10-րդ «բ» շենք 

Կենտրոն վարչական շրջան
Տիգրան Մեծ պողոտա - 53-րդ շենք
Նալբանդյան փողոց - 7/1-րդ շենք (բեռնատար) 

Մալաթիա-Սեբաստիա վարչ. շրջան
Անդրանիկի փողոց -109-րդ շենքի 1-ին մուտք (մարդատար եւ բեռնատար),
Բաբաջանյան փողոց - 121շ 1-ին մուտք, Բ-2թ 33շ, 133շ 2-րդ մուտք, Բ-2թ 39շ 2մ, 143շ 3-րդ մուտք, Բ-2թ 44շ 3մ,
Իսակովի պողոտա - 30շ 1-ին մուտք, Բ-2թ 81շ 1մ, 30 շ 2-րդ մուտք, Բ-2թ 81շ 2մ, 28շ, Բ-2թ 81ա շ 1մ,
ՀԱԹ Բ-2 թաղամաս - 85շ 2 մուտք, Բ-2թ 85շ 2մ, 93շ1 մուտք, Բ-2թ 93շ 1մ,
Հ.Ա Ա. - 1-ին թաղ. -157-րդ շենք,
ՀԱԹ Բ.- 1 թաղ. - 89-րդ շենք 

Նոր Նորք վարչական շրջան
Մառի փողոց -12-րդ շենք (մարդատար, բեռնատար)
Գալշոյան փողոց -12-րդ շենք (բեռնատար),18-րդ շենք,19-րդ շենք, 36-րդ շենք, 38.1-րդ շենք, 50-րդ շենք
Վիլնյուսի փողոց - 46-րդ շենք (103), 2-րդ մուտք
Նանսենի փողոց - 6-րդ շենք (76.77) 1-ին եւ 2-րդ մուտք,
Լվովյան փողոց  - 5-րդ շենք
Գայի պողոտա - 81.82-րդ շենք, 1-ին եւ 2-րդ մուտք, 2-րդ շենք (93.94շ), 1-ին եւ 2-րդ մուտք, 4-րդ շենք (95.96), 1-ին եւ 2-րդ մուտք, 8-րդ շենք (97.98), 1-ին եւ 2-րդ մուտք
Մոլդովական փողոց - 38-րդ շենք, 42-րդ շենք
Միկոյան փողոց - 2-րդ շենք (բեռնամարդատար)

Փորձաքննությունից հետո ՏԿԱԻՆ համապատասխան կառույցը վերելակների տեխնիկական վիճակի մասին գրավոր հայտնել է  դրանք շահագործող կողմին՝ համատիրությանը՝ պահանջելով դադարեցնել վերելակների շահագործումը: Բայց թե ինչպե՞ս են վարվել համատիրությունները այդ գրությունը ստանալուց հետո՝ նախարարությունը դա պարզելն իր գործը չի համարում:  Վերը բերված ցանկի հենց առաջին  վերելակները շահագործող համատիրությունից՝ «Դ-4 Արփա»-ից երեկ հետաքրքրվեցինք՝ ինչպե՞ս են վարվելու բացասական եզրակացություն ստացած այդ վերելակների հետ: «Թող հանձնաժողով ստեղծեն, գան Դավթաշենի բոլոր վերելակները ստուգեն, համեմատեն այն վերելակները, որոնք դրական եզրակացություն են ստացել եւ նրանք, որոնց եզրակացությունը բացասական է: Եթե դրանք ինչ-որ բանով տարբերվում են, պատրաստ եմ հենց այդ օրը հրաժարական տալ ու բոլոր վերելակների շահագործումն էլ դադարեցնել»,- հայտարարեց համատիրության նախագահ Ստեփան Ստեփանյանը, ով առայժմ վերելակների աշխատանքը կանգնեցնելու անհրաժեշտություն չի տեսնում: Դիտարկմանը՝ եթե վերելակների վիճակի մեջ ոչ մի տարբերություն չկա, այդ դեպքում ինչու, իր կարծիքով, որոշներն ընդգրկվել են «սեւ ցուցակում», մեր զրուցակիցն արձագանքեց՝ ակնարկելով, որ եղել է շահադիտական մոտեցում: Բոլոր վերելակների դեպքում, ըստ նրա, խնդրահարույց է համարվել արագության սահմանափակման շկիֆը, ինչից հետո իրեն տեղեկացրել են, որ փորձաքննություն իրականացնող անձը, ի դեպ, երիտասարդ կին, ներկրում է այդ շկիֆը, ուստիեւ՝ նրանից կարելի է ձեռք բերել ու հինը փոխարինել: Ստեփանյանը վստահեցնում էր, որ ինքը զբաղվում է անհրաժեշտ մեխանիզմը գնելու հարցով, որն արժե 30 հազար դրամ, բայց դա ՏԿԱԻՆ պաշտոնյայից ձեռք բերել չի պատրաստվում: «Ինձ մոտ 6 վերելակ է գրել, 6-ում էլ՝ շկիֆի խնդիրը, որը դռների բացել-փակելու հետ կապ ունի կամ՝ մի քիչ վերեւ-ներքեւ կանգնելու: Դա թերություն է, որը պետք է ընթացքում վերացվի: Բայց դա վտանգավորության աստիճան համարել եւ վերելակ կանգնեցնել՝ աբսուրդ է: Եթե ճոպանները կտրված, մաշված լինեն, եթե մեծ թափանիվը, որը ճոպաններն է պտտեցնում, մաշված լինի, ուրիշ բան, որովհետեւ վերելակը կարող է ընկնել»,- ասաց «Դ-4 Արփա»-ի նախագահը, ապա նաեւ ընդգծեց. «Տեխասմոտրի ժամանակ պետք է գրուզով գան, գրուզ կախեն: Մի սիրուն աղջիկ, բարձրակրունկներով եկել է, բարձրացել 9-րդ հարկ, մի կերպ հանել ենք վերեւ, մի հատ տորմուզը խփում է, ասում է՝ չէ, սա պիտի չլինի, սա պիտի լինի: Այդպե՞ս են անում»: Նա, ի դեպ, փոխանցեց, որ համատիրության կողմից շահագործվող յուրաքանչյուր վերելակի համար ՏԿԱԻՆ համապատասխան կառույցին տարեկան վճարում են շուրջ 4-5 հազար դրամ՝ կախված շենքի հարկայնությունից, իսկ ընդհանուր առմամբ՝ շուրջ 250 հազար, ինչից հետո միայն մասնագետը գալիս է փորձաքննություն իրականացնելու: Նախորդ տարի, ըստ Ստեփանյանի, գումարը վճարել են, իսկ փորձաքննություն չի արվել: Իսկ այս տարի, ըստ նրա, դա պատշաճ իրականացվել է՝ հաշվի առնելով վերելակներ հետ կապված դեպքերը: