Աստված մեր կողմից է. Իջեւանի քաղաքապետ

Վաղը Իջեւանում լռության օր է: Կիրակի օրը իջեւանցիները պետք է ընտրություն կատարեն Իջեւանի քաղաքապետի երկու ՀՀԿ-ական թեկնածուների՝ գործող քաղաքապետ Վարդան Ղալումյանի եւ նախկին քաղաքապետ Վարուժան Ներսիսյանի միջեւ: Վերջինս 4 ժամկետ պաշտոնավարելուց եւ նախորդ ընտրություններում Ղալումյանին պարտվելուց հետո նշանակվել էր անշարժ գույքի կադաստրի Տավուշի ստորաբաժանման ղեկավար:

Իջեւանում իսկապես թեժ է: Մեր հարցերին երեկ պատասխանել է Վարդան Ղալումյանը:

- Պարոն Ղալումյան, համացանցում ձեր մրցակցին վարկաբեկող տեսանյութեր էին տարածվել, որի համար նա դիմել է ոստիկանություն, դուք ասել էիք, որ կապ չունեք տեսանյութերի հետ, նույնիսկ կասկածում եք, որ ձեր մրցակիցն է դա արել, չե՞ք պատրաստվում սեփական հետաքննություն անել, պարզելու՝ ով է կանգնած այդ ամենի հետեւում:

- Բացարձակ չգիտեմ, տեղյակ չեմ, չեմ էլ հետաքրքրվել, ես իմ ընտրողներին էլ խնդրել եմ, որ եթե իրենք տեղյակ են, միջամտեն, համացանցից հանեն, բայց կրկին ասում եմ, որ մենք բացարձակ տեղյակ չենք, մենք մեզ թույլ չենք տա նման բան:

- Կանե՞ք սեփական հետաքննություն:

- Իհարկե, ինձ էլ է շատ հետաքրքիր` ում ձեռագիրը կարող է լինել, որովհետեւ ես գտնում եմ, որ այդ նյութերով ինձ վրա ցեխ են շպրտում, իսկ ես այդ մարդը չեմ, որ նման բաներով գնամ մրցապայքարի:

- Կարծում եք, ձեր մրցակիցը ունա՞կ էր նստել, նման նյութեր սարքել, որ նման աղմուկ բարձրանար:

- Ես իմ մրցակցին շատ լավ եմ ճանաչում, ինքն ամեն ինչի ունակ է: Դա ոչ թե իմ կարծիքն է, այլ իրեն ճանաչողների կարծիքն է:

- Անգամ այն վատ տեսարանները, որ կային այդ տեսանյութերում, նույնիսկ դա՞, անգամ այդ գնո՞վ, որ աղմուկ լինի:

- Ես չեմ նայել ձեր ասած տեսանյութերը, քանի որ ինձ բացարձակ հետաքրքրիր չէ: Բայց ես հաստատ համոզված եմ, որ իմ ընտրազանգվածի մեջ չկան այդպիսի մարդիկ, որ նման բաներ սարքեն եւ ինտերնետում տեղադրեն: Ես ինչքան գիտեմ, իմ գովազդային պաստառն էլ են ինչ-որ բան արել, գործը թողեմ, նման բաներո՞վ զբաղվեմ: Ժողովրդական խոսք կա, չէ՞` շունը հաչելով է սատկում:

- Դուք ասել էիք, թե վստահ եք, որ մինչեւ ընտրությունների օրը Վարուժան Ներսիսյանը կհանի իր թեկնածությունը, երբ հասկանա, որ ձայն չունի, բայց նա չհանեց եւ շարունակում է պայքարել: Կարո՞ղ է հասկացել է, որ այդուամենայնիվ, ձայն ունի:

- Երկու օր մնաց ընտրություններին, կհամոզվեք, որ չունի:

- Ձեր մրցակիցն ասում է, որ վարչական լծակներ եք կիրառում ձեր ընտրվելու համար:

- Ե՞ս եմ վարչական լծակներ կիրառում: Ես վարչական լծակ ունե՞մ, որ կիրառեմ: Իմ վարչական լծակները աղբահանության համար կարող եմ միայն կիրառել, որ գումար չեն մուծում, տուգանք նշանակեմ, բայց ոչ մի անգամ տուգանք էլ չեմ կիրառել:

- Քարոզարշավի ընթացքում աշխատանքից հեռացվեց ոստիկանության Իջեւանի պարեկապահակային ծառայության պետ Գագիկ Գրիգորյանը, քանի որ ժողով էր արել ու իր ենթականերին հրահանգել քվեարկել Վարուժան Ներսիսյանի օգտին: Փաստորեն, շատ օպերատիվ եք գործում:

- Ես ի՞նչ կապ ունեմ պահակայինի պետին հանելու հետ, նա իմ ենթակայության աշխատո՞ղ է: Ես չգիտեմ՝ նա ինչ ժողով է արել: Դա իմ հակառակորդը կարող է իմանալ, որովհետեւ իր համար են արել, ինձ համար չեն արել: 

- Ձեր մրցակիցը ձեզ մեղադրում է, որ ձեր պաշտոնավարման ընթացքում ոչ մի բան չեք արել Իջեւանի համար, միայն այգին եք սարքել, բայց դա էլ նրա ծրագիրն էր, ինքն էր սկսել, ընդ որում` բազալտե քարերով, իսկ դուք շարունակել եք սովորական քարերով, ինչո՞ւ:

- Իմ մրցակցի ձեռագիրն է իրականությունը աղավաղելը: Համեցեք Իջեւան, ժողովրդին հարցրեք` արե՞լ ենք, թե չենք արել: 12 տարի քաղաքապետ է եղել, բա թող իրագործեր իր ծրագրերը, հո ծրագիրը միայն ցանկություն ունենալը չէ՞, կարեւորը ծրագրով նպատակին հասնելն է: Ու հիմա իմ կատարած աշխատանքները վերագրում է իրե՞ն: Ցեխ է շպրտում, որ տանիք չեմ վերանորոգել: 5 բազմաբնակարան շենքի տանիք եմ վերանորոգել, 11 վերելակ եմ վերանորոգել, շահագործման հանձնել, 12 տարվա մեջ 11 վերելակ չէր կարողանում շահագործման հանձներ, առաջին տարում միանգամից արեցի: Քաղաքում լուսաֆորներ եմ տեղադրել, լուսավորությունը տարեկան մոտ 250 հազար էր կազմում, միլիոն 100 հազար է դարձել, աշխատանք չէ՞: Քաղաքի կենտրոնական փողոցները լրիվ ասֆալտապատված, սալիկապատված են, երաժշտական շատրվանների սալիկները թափված էին, քայլել չէր լինում, հիմնանորոգում ենք կատարել. շարունակե՞մ: Քաղաքի մուտքերն եմ լուսավորել մոտ 25 միլիոն դրամ արժողությամբ, ՀՀ-ում նման տարածք չկա, որ այդպիսի մուտք ունենա: Իր ծրագրից է խոսում, ասում է` գալիս եմ տանիք վերանորոգեմ: Նա ի՞նչ տանիք վերանորոգող է, երբ իր սեփական մետաղամշակման գործարանը տանիք չունի, հաստոցներն էլ տարան վաճառեցին: Իրենց ձեռագիրը դա է: Քաղաքի կենտրոնում ընտիր հյուրանոց ենք ունեցել, ի՞նչ գործունեության մասին է խոսում, եթե լուսամուտներն են տարել, վաճառել:

- Ինքն ասում է, որ ձեր պաշտոնավարման օրոք չեք կարող մի փողոցի անուն նշել, որ մինչեւ վերջ ասֆալտապատել եք:

- Ո՞նց չեմ կարող, այսքան թվեցի, ինքը թող նշի՝ իր արածը որն է, իր արածը միայն գերեզմաններ տանող ճանապարհի ասֆալտապատումն է եղել, երբ քաղաքի տարեկան բյուջեն հաստատելիս ասել ենք, որ պետք է այդ ճանապարհը վերանորոգի, չէր վերանորոգում, անվստահություն հայտնեցինք, խնդրում էր, որ անվստահությունը հետ վերցնենք, գործը կանի, մենք էլ ասացինք` չէ, հա՛մ նա, հա՛մ անվստահություն, ճանապարհը ասֆալտապատվեց: Միայն դա է եղել: Մնացածը ասե՞մ որն է եղել, որ չէր ընտրվել, կառուցապատման իրավունքով տարբեր տեղեր հողեր էին վերցրել, որպեսզի այդ պայմանագրերը չխզեմ, ստիպված կադաստրային գները մուծեց, համայնքի բյուջե մոտ 20 մլն դրամ մտավ, եւ որպեսզի այդ գումարները չփոխանցվեն ինձ, քանի որ պաշտոնս ստանձնելու ժամանակաշրջանն էր, մարզպետարանի մոտից 150-200 մետր տարածք մայթերը սարքեց ու անորակ, հիմա շեշտում է, որ գործ է արել: Այդ գործը գիտե՞ք ինչի համար է, որ բյուջեն դատարկ տա ինձ: 10 մլն պարտքով եմ ընդունել, տարեվերջին բոլոր պլանները կատարել եմ: Ոչ մի բան չէի ասում, բայց քանի որ իր քարոզարշավը սկսեց ցեխ շպրտելով, իրականությունը աղավաղելով, հիմա փակագծերը կբացեմ: Քաղաքում ինչ կա` իր սեփականությունն է, անգամ Կադաստրի շենքը, որտեղ հիմա աշխատում է. վարձով տվել է, ամիսը չգիտեմ ինչքան է վերցնում: Այդ շենքը մանկապարտեզ էր, հիմա ես մանկապարտեզի շենք եմ ուզում գտնել, որ նոր մանկապարտեզ բացեմ, որովհետեւ երեխաների թիվը ավելացել է, շենք չունենք: Քարոզարշավի ժամանակ էլ ասում է` համայնքային բյուջեն վատնել եմ, աշխատավարձ եմ տալիս, կարո՞ղ է չտամ: 

- Նրա դեմ տարբեր քրեական գործեր կան, եղբոր, եղբոր տղաների դեմ, նա հայտարարում է, որ դա հետապնդում է, որ կազմակերպում եք դուք եւ մարզի քննչականի պետը:

- Քրեական գործերը իր դեմ են, հարցը իրենք ուղղեք, ես ոչ մի քրեական արարք չեմ կատարել, որ անհանգստանամ կամ վախեմ, այդ իր ձեռագիրն է, ինքն է անընդհատ շփվում նման բաների հետ:

- Բայց վերջին քրգործը օգոստոսի 28-ին էր հարուցվել:

- Բայց ինչի՞ է անհանգստանում, եթե ոչ մի բան էլ չկա: Էն մարդն է անհանգստանում, որ ինչ-որ բան է արել, այդպես չէ՞: Եթե խնդիր չունի, թող չանհանգստանա: Թե չէ՝ ով արեց, ինչ արեց, ես ոչ մի քրեական արարքների հետ կապ չունեմ, այդ հարցը իրեն ուղղեք` ինչ է արել, ոնց է արել:

- Ի՞նչ մթնոլորտ է հիմա Իջեւանում:

- Խաղաղ, արեւ, ընտիր, եղանակը լավ է:

- Տպավորություն է, որ շատ լարված է:

- Ո՞ւմ հետ է լարված:

- Իր ու ձեր եւ ձեր կողմնակիցների:

- Բայց ինքը կողմնակից ունի՞: Անգամ շտաբներում մարդ չունի:

- Այդ դեպքում, ինչի՞ վրա է հույսը դրել:

- Հույսն Աստծո վրա է դրել, Աստված էլ մեր կողմն է:

- Քանի՞ տոկոս ձայն եք ակնկալում:

- Շատ է, շատ, 2 օր մնաց, կտեսնեք: