«Ոչ»-ը անգամ Երեւանը չի կարողացել փակել. ՀՀԿ-ն կլրացնի ընդդիմության տեղերը

14/11/2015 schedule16:00

Ընդդիմությունը մարդկային ռեսուրսի լուրջ խնդիր ունի: Նախօրեին ավարտվել է սահմանադրական հանրաքվեից առաջ կազմավորված 1997 ընտրական տեղամասերում հանձնաժողովի անդամներ նշանակելու ժամկետը:

Ինչպես մեզ փոխանցեց Կենտրոնական ընտրական հանձնաժողովի նախագահ Տիգրան Մուկուչյանը, ՏԸՀ-ներում 1-ական անդամներ նշանակելու իրավունք ունեցող խորհրդարանական 6 ուժերից միայն 4-ն են նշանակումներ արել բոլոր 1997 ընտրատեղամասերում: Խոսքը իշխող ՀՀԿ-ի, ԲՀԿ-ի, ՀՅԴ-ի եւ ՕԵԿ-ի մասին է: Սրանցից 3-ը, հիշեցնենք, «այո»-ի կողմնակից են, եւ միայն ՕԵԿ-ն է ասում, որ դեմ է սահմանադրական փոփոխություններին: Խորհրդարանական 6 ուժերից 2-ը՝ ՀԱԿ-ն ու Ժառանգությունը, որոնք փոփոխությունների դեմ ձեւավորված «Ոչ»-ի 2 ճակատների մաս են կազմում, անգամ Երեւանում չեն կարողացել նշանակումներ անել բոլոր տեղամասերում:

Սահմանադրական փոփոխությունների դեմ ձեւավորված «Ոչ»-ի ճակատին մաս կազմող ՀԱԿ-ը նշանակումներ չի արել 245 տեղամասային հանձնաժողովներում, իսկ «Ոչ»-ի մյուս՝ «Նոր Հայաստան» հանրային փրկության ճակատի մաս կազմող «Ժառանգությունը»՝ 118 տեղամասային հանձնաժողովներում: Կենտրոնական ընտրական հանձնաժողովի նախագահ Տիգրան Մուկուչյանը երեկ մեզ հայտնեց, որ ՀԱԿ-ի թափուր թողած 245 տեղերից մոտ 2 տասնյակում ՀԱԿ-ը հանձնաժողովի քարտուղարի պաշտոն նշանակելու իրավունք է ունեցել, իսկ 5-6-ում՝ հանձնաժողովի նախագահի: «Ժառանգությունը» մի քանի տեղամասերում հանձնաժողովի քարտուղարի պաշտոն է կորցրել: Թափուր մնացած տեղերը, բնականաբար, կլրացվեն իշխանության ներկայացուցիչներով:

Ըստ ԿԸՀ նախագահի, ՀԱԿ-ը անդամներ չի նշանակել թիվ 1 ընտրատարածքի (Ավան) 4 տեղամասերում, թիվ 2 ընտրատարածքի (Նոր Նորք) 16 տեղամասերում, Երեւանի Կենտրոն համայնքն ընդգրկող թիվ 10 ընտրատարածքում տեղամասային հանձնաժողովի անդամ չնշանակելով, ՀԱԿ-ը կորցրել է հանձնաժողովի քարտուղարի պաշտոնը, թափուր տեղեր է թողել թիվ 3, 7, 8, 21, 26, 27 ընտրատարածքների որոշ տեղամասերում: Բավական մեծ են թիվ 15 ընտրատարածքում եւ Սյունիքի մարզի թիվ 38 ընտրատարածքում թափուր թողնված տեղերը:

Ժառանգությունը, ըստ ԿԸՀ նախագահի, Երեւանում եզակի թվով ընտրատեղամասեր է թափուր թողել, բայց փոխարենը մեծ թվով թափուր տեղեր է թողել թիվ 12, 16, 18, 33 ընտրատարածքների տեղամասային հանձնաժողովներում: Այս տվյալները ԿԸՀ-ն հիմա ամփոփում է եւ առաջիկայում պաշտոնապես կներկայացնի: Օրենքով սահմանված կարգով, ԸԸՀ-ներում թափուր տեղեր մնալու դեպքում այդտեղ նշանակումներ է կատարում ընտրատարածքային ընտրական հանձնաժողովի նախագահը եռօրյա ժամկետում, տվյալ դեպքում` նոյեմբերի 14-ին: Այսպիսով, «Ոչ»-ի երկու ճակատները բազմաթիվ տեղամասերում հեշտացրել են իշխանության գործը:

Ընդ որում, «ոչ»-ականները չեն կարողացել փակել բոլոր 1997 ընտրատեղամասերը անգամ այն բանից հետո, երբ ԿԸՀ-ն հոկտեմբերի 29-ին նիստ է գումարել եւ որոշում կայացրել՝ երկարաձգել 2012թ. հանձնաժողովի անդամ դառնալու իրավունք ստացած բոլոր այն անձանց արտոնագրերի ժամկետները, որոնք լրացել են 2015 թվականին: Նշենք, որ ՀԱԿ խմբակցության ղեկավար Լեւոն Զուրաբյանը դիմել էր ԿԸՀ՝ ասելով, որ դեկտեմբերի 6-ին նշանակված սահմանադրական հանրաքվեն իրենից արտահերթ ընտրական գործընթաց է ենթադրում, եւ քանի որ ընտրական հանձնաժողովներում ընդգրկվելու իրավունքի համար նախատեսված դասընթացները տեղի են ունեցել հանրաքվե նշանակելուց առաջ՝ օգոստոսին, դա եղել է արձակուրդային ժամանակահատված, ուստի առաջարկել էր, որ հանձնաժողովը երկարաձգեր 2015-ին լրացած արտոնագրերի ժամկետները եւ դրանք թողնել ուժի մեջ` ներառյալ հանրաքվեի անցկացումը: Հոկտեմբերի 29-ին ԿԸՀ-ն նիստ է հրավիրել, որի ժամանակ քննարկել է նաեւ ԱԺ ՀԱԿ խմբակցության ղեկավարի դիմումը եւ որոշում կայացրել՝ բավարարել այդ դիմումը: Փաստորեն, եթե ԿԸՀ-ն նշված դիմումը չբավարարեր, «Ոչ»-ի ճակատներին մաս կազմող ուժերը շատ ավելի մեծ թվով տեղամասերում չէին կարողանալու հանձնաժողովի անդամներ նշանակել:

Այնինչ, ԿԸՀ-ն որակավորման դասընթացներ է կազմակերպել օգոստոս-սեպտեմբեր ամիսներին: Ընդդիմադիրները, փաստորեն, ժամանակ չեն ունեցել վերապատրաստման գնալու կամ էլ հավես ու ցանկություն չեն ունեցել:

Լեւոն Զուրաբյանը երեկ «Ազատություն» ռադիոկայանին ասել է, թե եղած բացը կլրացնեն վստահված անձանցով: Նկատենք, սակայն, որ հանձնաժողովի անդամի եւ վստահված անձի իրավասությունները բոլորովին տարբեր են: Հանձնաժողովի անդամի իրավասությունները, բնականաբար, շատ ավելի մեծ են: Մասնավորապես, հանձնաժողովի անդամը ընտրության օրը հատուկ կարծիքի մասին նշում է անում, կարող է վերահաշվարկի դիմում ներկայացնել, կարող է դիմում ներկայացնել տեղամասում քվեարկության արդյունքները անվավեր ճանաչելու մասին: Իսկ վստահված անձինք, ԶԼՄ-ների ներկայացուցիչներն ու դիտորդները, ըստ էության, վերահսկողական բնույթի լիազորություններ ունեն:

Նկատենք, որ ՀԱԿ-ի տարբեր ներկայացուցիչներ այս ընթացքում հայտարարել են, թե մարդկային ռեսուրսի որեւէ խնդիր չունեն եւ ներկայացված կլինեն բոլոր 1997 ընտրատեղամասերում: Բայց Ժառանգությունը խոստովանել էր, որ մարդկային ռեսուրսի խնդիր ունի եւ չի կարողանալու բոլոր տեղամասերում նշանակումներ անել: 

Հիշեցնենք, «ոչ»-ի երկու ճակատներն էլ իշխանափոխության մասին հայտարարություններով են հանդես գալիս: «Նոր Հայաստան» հանրային փրկության ճակատն անգամ իշխանափոխության հերթական ժամկետ է հայտարարել ՝ դեկտեմբերի 6-ը եւ հանդես է գալիս անհնազանդության կոչերով, հորդորում է բոյկոտել հանրաքվեն, դուրս գալ փողոց, այնտեղ մնալ մի քանի օր եւ այդ կերպ տապալել ապօրինի ռեժիմը: «Ոչ»-ի մյուս ճակատն էլ կոչ է անում գնալ քվեարկության եւ «ոչ» ասել սահմանադրական փոփոխություններին, տապալել հանրաքվեն, ձեւավորել  համաժողովրդական հզոր շարժում եւ հեռացնել իշխանություններին: Թե ինչպես են դա պատկերացնում այս 2 ճակատները իրենց ունեցած այս ռեսուրսներով, երբ անգամ 1997 հոգի չեն կարողացել գտնել՝ բոլոր ՏԸՀ-ները «փակելու» համար, մի փոքր անհասկանալի է:

Հ.Գ. Նշենք, որ օրենքով սահմանված կարգով տեղամասային հանձնաժողովի անդամը եւ քարտուղարը աշխատավարձ են ստանում նվազագույն աշխատավարձի չափով, այսինքն, 55 հազար դրամ, իսկ հանձնաժողովի նախագահի աշխատավարձը կրկնակի է՝ 110 հազար դրամ: Այդ գումարները, փաստորեն, ընդդիմության ներկայացուցիչների փոխարեն կստանան իշխանության կողմից նշանակված անձինք:

Տպել
2092 դիտում

Զարկ տալով ընտանեկան գինեգործական ավանդույթներին. գյուղնախարարը Էջմիածին քաղաքում էր

Պայթյուն «Սուրբ Գրիգոր Լուսավորիչ» ԲԿ–ում. թթվածնի արտադրամասի օպերատորը մահացել է

Գյուղատնտեսական հարցերի մասին բարձրաձայնում են շահագրգիռ անձիք. հանդիպում է եղել նաև գյուղատնտեսության նախարարի հետ

Ո՞ւր են հոսել Կեչուտի ջրամբարի ջրերը. հաղորդում իրավապահ եւ պետական մարմիններին. ՀԲՃ

Լեւոն Երանոսյանը կասկածյալի կարգավիճակ ունի. նա ապրիլին լուսաձայնային նռնակ կիրառելու իրավասություն չի ունեցել

ԵԱՏՄ պետությունների մաքսային ծառայությունների միավորված կոլեգիայի հաջորդ նիստն անցկացվելու է Հայաստանում. ՊԵԿ

Ծառուկյանը փորձում է վերահսկողություն իրակացնել բոլոր ֆեդերացիաների վրա. Արթուր Գեւորգյան

ԼՂ հիմնախնդրի շուրջ քննարկումներն այլ հարթակներ տեղափոխելու փորձերը վնասում են տարածաշրջանում կայունությանը. ԱԳՆ

Վիրահայոց թեմը գրադարան եւ համայնքային կենտրոն է վարձակալել. թեմապատկան 3-րդ կենտրոնը Թբիլիսիում

Բաքուն սպառնում է հայկական իշխանություններին ավիացիայի ոչնչացմամբ

Հայկ Մարությանի գլխավորությամբ Երեւանի ավագանու առաջին նիստը պետք է հրավիրվի հոկտեմբերի 10-ին

ԿԸՀ-ն հրապարակել է Երեւանի ավագանու ընտրություններին մասնակցած ընտրողների ստորագրված ցուցակները

Առաջին անգամ  ԵԽ նախարարների կոմիտե է ներկայացվել ՄԻԵԴ վճռի կատարման հետ կապված Պաշտպանի հատուկ դիրքորոշում

Թրամփը պատրաստ է հանդիպել Իրանի իր պաշտոնակցին. Ռոհանին մեղադրում է ԱՄՆ-ի դաշնակինցերից մեկին

Հայաստանի անդամակցումը ԵԱՏՄ-ին բխում է մեր պետական շահերից. Էդուարդ Շարմազանով

ՀՀ ՊՆ ռազմական ոստիկանության պետը մասնակցել է «ՆԱՏՕ-գործընկերներ» ձեւաչափով ՌՈ պետերի ամենամյա համաժողովին

Նիկոլ Փաշինյանն այցելել է Նյու Յորքի Մետրոպոլիտեն թանգարանում բացված «Արմենիա» խորագրով ցուցահանդեսին

Առաջիկա օրերին ՀՀ առանձին հատվածներում սպասվում է անձրեւ, ամպրոպ, մառախուղ, ջերմաստիճանի նվազում

Մանրամասներ ԲՀԿ–ի կաշառքի գործից. մի մասով վճարումներ են արել, մյուսով ներկայացել ոստիկաններին

Իրավապահները Աշոցք գյուղում զենք-զինամթերք են հայտնաբերել եւ առգրավել (տեսանյութ)