ՀԱԿ-ին եւս 10 պատգամավորի ստորագրություն է պետք

17/12/2015 schedule10:00

Դեկտեմբերի 6-ին տեղի ունեցած հանրաքվեի արդյունքները Սահմանադրական դատարանում վիճարկելու համար ԱԺ ՀԱԿ խմբակցությանը երեկ հաջողվել է եւս 5 պատգամավորի ստորագրություն հավաքել:

Այսպիսով, հավաքված ստորագրությունների քանակը երեկ հասավ 17-ի: Հիշեցնենք, ՍԴ դիմելու համար անհրաժեշտ է 27 պատգամավորի ստորագրություն: Հանրաքվեի արդյունքները Սահմանադրական դատարանում վիճարկելու նախաձեռնությանը երեկ միացել են ՀՀ երկու նախկին արտգործնախարարները՝ Վարդան Օսկանյանը եւ Ալեքսանդր Արզումանյանը: Ձեւաթղթի տակ երեկ իրենց ստորագրությունն են դրել նաեւ ՕԵ խմբակցության երեք պատգամավորներ՝ Հովհաննես Մարգարյանը, Մհեր Շահգելդյանը եւ Իշխան Խաչատրյանը:

Նախօրեին ՀԱԿ-ի նախաձեռնության տակ ստորագրել էին պատգամավորներ Լեւոն Զուրաբյանը, Արամ Մանուկյանը, Գագիկ Ջհանգիրյանը, Նիկոլ Փաշինյանը, Ստեփան Դեմիրճյանը, Հեղինե Բիշարյանը, Լեւոն Դոխոլյանը, Զարուհի Փոստանջյանը, Թեւան Պողոսյանը, Խաչատուր Քոքոբելյանը, Տիգրան Ուրիխանյանը, Էդմոն Մարուքյանը:

Նախաձեռնությանը երեկ խոստացավ միանալ նաեւ ԱԺ «Ժառանգություն» խմբակցության նախկին ղեկավար Ռուբեն Հակոբյանը, սակայն՝ պայմանով: Ֆեյսբուքյան իր էջի միջոցով Հակոբյանը հետեւյալ հայտարարությունը տարածեց. «ՀՀ ԱԺ ՀԱԿ խմբակցությանը՝ հայտնի ստորագրահավաքի առիթով. հարգելի գործընկերներ, պատրաստ եմ իմ ստորագրությամբ աջակցել ձեր նախաձեռնությանը, եթե ՀԱԿ խմբակցությունը հանդես գա հայտարարությամբ, ընդունելով, որ դեկտեմբերի 6-ի Սահմանադրության հանրաքվեի ընթացքում, ցավոք, կրկնվեցին 1995 թվականի հուլիսի 5-ին տեղի ունեցած առաջին Սահմանադրության հանրաքվեի ժամանակ ձեւավորված տխուր ավանդույթները, որոնք հետագայում ավանդույթի ուժով կրկնվեցին համապետական գրեթե բոլոր ընտրություններում։ Դրանով իսկ փաստելով, որ ՀԱԿ խմբակցությունը ընտրողաբար չի մոտենում ընտրակեղծարարությանը եւ խստորեն դատապարտում է նաեւ ՀՀ առաջին իշխանություններին՝ 1995-ի հուլիսի 5-ի Սահմանադրության հանրաքվեն աննախադեպ կեղծելու եւ բռնություններով այն անցկացնելու իրողությունը։ Կարծում եմ, հարգելի գործընկերներ, այս դեպքում ՀԱԿ-ը կընկալվի անկողմնակալ եւ անկեղծ՝ ընտրակեղծիքների դեմ պայքարում»:

Հանրաքվեի մասին օրենքով, ստորագրահավաքի վերջնաժամկետը լրանում է դեկտեմբերի 18-ին, ժամը 18.00-ին: Լավագույն դեպքում Հայ ազգային կոնգրեսը կարող է ակնկալել եւս հինգ պատգամավորների ստորագրություններ: Խոսքը մասնավորապես ՀԱԿ խմբակցության պատգամավորներ Հրանտ Բագրատյանի եւ Լյուդմիլա Սարգսյանի, ինչպես նաեւ ԲՀԿ խմբակցության պատգամավորներ Վահե Հովհաննիսյանի, Էլինար Վարդանյանի եւ Ստեփան Մարգարյանի մասին է: Ի դեպ, Վահե Հովհաննիսյանն ու Ստեփան Մարգարյանը, ի տարբերություն մյուս երեքի, երեկ Ազգային ժողովում էին եւ խուսափեցին լրագրողներին պատասխանել՝ կմիանա՞ն ՀԱԿ-ի նախաձեռնությանը, թե՞ ոչ:

17-ին գումարած 5, բնականաբար, 27 չի ստացվի: Նախօրեին գրել էինք, որ ՀԱԿ-ին կհաջողվի լավագույն դեպքում 20 պատգամավորի ստորագրություն հավաքել: Ու դժվար թե սույն խմբակցության ղեկավարն ի սկզբանե գիտակցած չլինի, որ որեւէ պարագայում չեն հաջողելու անհրաժեշտ քանակով ստորագրություններ հավաքել: Թե ինչու են գնացել մի ճանապարհով, որն ի սկզբանե դատապարտված էր, այն դեպքում, երբ նախկինում առիթ են ունեցել հայտարարել, որ չեն գնա նման ճանապարհով կամ չեն միանա ի սկզբանե դատապարտված նախաձեռնությունների, գուցե մի օր բացատրեն:

Իսկ երեկ սույն խմբակցության ղեկավար Լեւոն Զուրաբյանը մամուլի ասուլիս էր հրավիրել եւ լրագրողներին ներկայացրեց մի քանի արձանագրություններ, պնդելով, որ տեղամասային հանձնաժողովում արձանագրված քվեարկության արդյունքները փոխվել են: Նա լրագրողներին ցույց տվեց Արաբկիրի 5/38 ընտրատեղամասի արձանագրության բնօրինակը, ըստ որի, «այո»-ն ստացել է 343 ձայն, «ոչ»-ը՝ 421, բայց նույն տեղամասից ստացված եւ Կենտրոնական ընտրական հանձնաժողովի կողմից հրապարակված տվյալներում սույն տեղամասում «այո»-ի դիմաց գրված է 1155, իսկ «ոչ»-ի դիմաց՝ 92:

Զուրաբյանը լրագրողներին ներկայացրեց նաեւ թիվ 11/22 տեղամասի արձանագրությունը եւ հայտարարեց, որ «այո»-ն այդտեղ հավաքել է 156 ձայն, «ոչ»-ը՝ 426, բայց ԿԸՀ-ի հրապարակած թվերով, «այո»-ն 11/22-ում ստացել է 418 ձայն, իսկ «ոչ»-ը՝ 169: Համեմատելով հինգ ընտրատեղամասերի ամփոփիչ արձանագրությունների քաղվածքները եւ Կենտրոնական ընտրական հանձնաժողովի հրապարակած վերջնական տվյալները՝ ՀԱԿ խմբակցության ղեկավարը լրագրողների ներկայությամբ հանցագործության մասին հաղորդում ստորագրեց եւ այն ուղարկեց ՀՀ գլխավոր դատախազություն: «Դիմում եմ գլխավոր դատախազին՝ կատարված կեղծիքների վերաբերյալ քննություն կատարելու, մեղավոր անձանց հայտնաբերելու եւ քրեական պատասխանատվության ենթարկելու համար: Կից ներկայացնում եմ տեղամասերի ամփոփիչ արձանագրությունների պատճեները»,- հայտարարեց Զուրաբյանը, որը պնդում էր, թե «այո»-ի հաղթանակն ապահովելու համար մարդիկ ողջ գիշեր զբաղված են եղել տվյալներ կեղծելով ու նոր արձանագրություններ կազմելով, «այո»-ի քվեները մի քանի անգամ ավելացվել են, իսկ «ոչ»-ինը՝ պակասեցվել, եւ իրենց բերած ապացույցներն ավելի քան բավարար են՝ ճիշտ պատկերը բացահայտելու համար: Նա հայտարարեց, որ աղաղակող այս կեղծարարության համար պետք է պատասխան տա ողջ Կենտրոնական ընտրական հանձնաժողովը եւ դրա նախագահ Տիգրան Մուկուչյանը:

Ավելի ուշ ԿԸՀ-ն պատասխանեց Զուրաբյանի մեղադրանքներին՝ հայտարարելով, որ դրանք չեն համապատասխանում իրականությանը: «ԿԸՀ-ում են գտնվում Լեւոն Զուրաբյանի կողմից նշված տեղամասերի բոլոր արձանագրությունները, որոնցում նշված տվյալները եւ ԿԸՀ կայքում հրապարակված տվյալները նույնությամբ համընկնում են, եւ ԿԸՀ կողմից այդ տվյալներում որեւէ փոփոխություն չի կատարվել: Ի դեպ, նկատենք, որ Լեւոն Զուրաբյանի կողմից հրապարակված քաղվածքներից որեւէ մեկը չի եղել կցված իր իսկ կողմից ստորագրված եւ ԿԸՀ ներկայացված` հանրաքվեի արդյունքներն անվավեր ճանաչելու մասին դիմումին»,- ասված է ԿԸՀ մամուլի ծառայության տարածած հաղորդագրությունում։

Տպել
2004 դիտում

Շոկային սկիզբը, Յուրայի պոկերը ու ՀՀ ֆուտբոլի հավաքականի ջախջախիչ հաղթանակը

Ծեծկռտուք Արտաշատի զինկոմիսարիատում. ըստ քաղաքացու ահազանգի՝ կապիտանը կոտրել է իր քիթը

Պարզաբանումներ եմ պահանջելու Բելառուսի ու Ղազախստանի նախագահներից. Փաշինյանը՝ ՀԱՊԿ նիստի զարգացումների մասին

Ոստիկանությունը օպերատիվ տվյալներ է ստացել, որ Երեւանում հիպնոսի միջոցով փող են կորզում

Ջիբրալթար-Հայաստան ֆուտբոլային հանդիպման մեկնարկային կազմերը

Երկու օր առաջ Հայաստանում էր, հիմա՝ չգիտեմ. Շարմազանովը՝ Տարոն Մարգարյանի գտնվելու վայրի մասին

Աշխարհը չէի փոխի քո հետ. Սիրուշոն շնորհավորել է Լեւոն Քոչարյանի ծնունդը

Իրական ընդդիմություն կձեւավորվի ընտրություններից հետո

Արսեն Ջուլֆալակյանն ու լրագրողը պարզաբանել են թյուրիմացությունը

Նոր մանրամասներ հոկտեմբերի 27-ին նռնակով կառավարության շենք ներխուժման դեպքից. պարզվել է՝ ով է նա

Արցախի պետնախարար Մարտիրոսյանն ընդունել է Արցախի պետական համալսարանի ուսանողների

Այդ տարածքը իմն է, իմ սեփականությունն է. Լոռու մարզպետը՝ սեփական ատամնաբուժարան կառուցելու մասին

Մարկոս Պիզելին՝ Ղազախստանի առաջնության լավագույն ֆուտնոլիստ

Քաղաքապետն ընդունել է ՀՀ-ում ԵՄ դեսպան Պյոտր Սվիտալսկիին

Վաչագան Ղազարյանը ցուցմունք է տվել. քննարկվում է կրկին գրավի միջնորդությամբ հանդես գալու տարբերակը

Ավան վարչական շրջանի ղեկավարը հրաժարական է տվել

23-ամյա Վահագնի շնորհիվ մարդկանց կյանքեր կփրկվեն. արյան տարբեր խումբ ունեցողներ շարունակում են արյուն հանձնել

Վարչապետ Նիկոլ Փաշինյանի միջնորդությամբ Սիմոն Մարտիրոսյանն ու Գոռ Մինասյանը կպարգեւատրվեն

Հույս ունեմ կկարողանանք Աբաջյանի հերոսությանն արժանի ապրել՝ անկախ նրանից` ինչով ենք զբաղվում. Փաշինյան

Հայ մարզիչը ղազախական ակումբի մանկապատանեկան ֆուտբոլը ղեկավարելու ու Հենոյի գեղեցիկ քայլի մասին