Շվեդիայի ԱԳ նախարը կհանդիպի նաեւ Հայաստանի ընդդիմության եւ քաղաքացիական հասարակության հետ

Պաշտոնական այցով Հայաստանում է  գտնվում Շվեդիայի ԱԳ նախարար Մարգոտ Վալստրյոմը: Այսօր նախարարը հանդիպումներ է ունեցել Սերժ Սարգսյանի եւ ՀՀ ԱԳ նախարար Էդվարդ Նալբանդյանի հետ: Օրը սկսել է Ծիծեռնակաբերդի հուշահամալիր կատարած այցով:

Ինչպես նշված է այցի մասին նախապես տարածած ՀՀ ԱԳ նախարարության մամուլի հաղորդագրության մեջ, այսօր Մարգոտ Վալստրյոմը  պետք է հյուրընկալվի նաեւ «Թումո» կենտրոնու:  Ենթադրվում է, որ դա տեղի կունենա աշխատանքային ճաշից հետո:

Այսքանը`համաձայն այցի մասին պաշտոնական հաղորդագրության: Սակայն Շվեդիայի ԱԳ նախարարը, ըստ մեր տեղեկությունների, հանդիպելու է նաեւ խորհրդարանական ընդդիմության, մասնավորապես «Ժառանգություն», ԲՀԿ, ՀԱԿ, եւ «Լուսավոր Հայաստան» կուսակցությունների ներկայացուցիչների հետ:  

Բացի այդ, այսօր ՀՀ ԱԳ նախարարի հետ համատեղ ասուլիսում Մարգոտ Վալստրյոմի խոսքից պարզ դարձավ, որ նա նախատեսում է հանդիպում նաեւ Հայաստանի քաղաքացիական հասարակության ներկայացուցիչների հետ: Թե կոնկրետ ովքեր են ներգարավված լինելու այս հանդիպմանը, մեզ հայտնի չէ:

Շվեդիայի ԱԳ նախարարի պաշտոնական այցի վերջին երկու դրվագների մասին ՀՀ ԱԳ նախարարության մամուլի հաղորդագրությունը, սակայն, լռում է:

Նշենք, որ հայ-շվեդական դիվանագիտական հարաբերությունները այնքան էլ հարուստ պատմություն չունեն:

Հաաստանն ու Շվեդիան դիվանագիտական հարաբերություններ են հաստատել 1992 թվականին, սակայն դեսպանություն Ստոկհոլմում մենք բացել ենք միայն 2014 թվականին, իսկ ՀՀ-ում Շվեդիայի դեսպանի նստավայրը դեռեւս Թբիլիսիում է:

Այս 24 տարիների ընթացքում Հայաստանից վեց անգամ է պաշտոնական պատվիրակություն այցելել Շվեդիա` չորս անգամ ԱԳ նախարարի մակարդակով, մեկ անգամ՝ վարչապետի եւ մեկ անգամ՝ նախագահի: Շվեդիայից  4 պատվիրակություն է այցելել Հայաստան, բոլորը նախարարների մակարդակով: Սա փաստորեն հինգերորդ այցն է, որը սակայն, վերոնշյալ վիճակագրության ֆոնին,  բավական ջերմ է ընթանում, դատելով երկկողմ հայտարարություններից:

Ինչ վերաբերում է տնտեսական հարաբերություններին, ապա այստեղ վիճակն էլ ավելի վատ է: 2015 թվականին 2014 թվականի համեմատ էականորեն նվազել է մեր երկու երկրների միջեւ ապրանքաշրջանառությունը. Հայաստանից Շվեդիա է արտահանվել 480 հազար դոլարի ապրանք, նախորդ տարվա 725 հազարի փոխարեն, եւ ներմուծվել է 15 միլիոն դոլարի ապրանք, նախորդ տարվա`31 միլիոնի փոխարեն:

Եւ այնուամենայնիվ Շվեդիան հաստատապես մեր բարեկմ երկրների շարքում է: Օրինակ՝ ԵԽԽՎ-ում վերջին աղմկոտ քվեարկության ժամանակ Շվեդիայի 5 հոգանոց պատվիրակության երեք ադմաները դեմ են քվեարկել   Ռոբերտ Ուոլթերի հեղինակած «Բռնության աճը Լեռնային Ղարաբաղում եւ Ադրբեջանի այլ օկուպացված տարածքներում» վերնագրով բանաձեւին: Մյուս երկուսը`ձեռնպահ:

Ներկայում էլ  Շվեդիայի հնագույն թանգարանում`Թագավորական զինապալատում անցկացվում են Հայաստանի օրերը:

Նշենք նաեւ, որ Շվեդիայի խորհրդարանը 2010 թվականին ընդունել է Հայոց ցեղասպանությունը, եւ այժմ հայ համայնքը (այդ երկրում 12 հազար հոգանոց հայ համայնք կա) ջանքեր է գործադրում կառավարության կողմից ցեղասպանության ճանաչմանը հասնելու ուղղությամբ:

Ինչ վերաբերում է այսօր տեղի ունեցած պաշտոնական հանդիպումներին, ապա, ինչպես նշված է ՀՀ նախագահի մամուլի ծառայության տարածած հաղորդագրության մեջ, Սերժ Սարգսյանի հետ հանդիպման ժամանակ Մարգոտ Վալստրյոմը վստահեցրել է, որ «Հայաստանն այսուհետ էլ կարող է ապավինել Շվեդիայի աջակցությանը և համոզված լինել, որ իր գլխավորած պատվիրակությունը Հայաստանում է՝ որպես ԵՄ Արևելյան գործընկերության ու այս տարածաշրջանի բարեկամ»:

ՀՀ ԱԳ նախարար Էդվարդ Նալբանդյանի հետ բանակցությունների ընթացքում քննարկվել են երկու արտաքին քաղաքական գերատեսչությունների միջև պարբերական քաղաքական խորհրդատվությունների անցկացման հետ կապված հարցեր: «Անդրադարձ արվեց Հայաստան-Եվրամիություն հարաբերություններին, ՀՀ-ԵՄ նոր շրջանակային համաձայնագրի շուրջ մեկնարկած բանակցություններին: Մարգոտ Վալստրյոմը նշեց, որ Շվեդիան սատարում է Հայաստանի հետ հավակնոտ համաձայնագրի մշակմանը»,-ասվում է ՀՀ ԱԳ նախարարության մամուլի ծառայության տարածած հաղորդագրության մեջ:

Հանդիպումից հետո երկու նախարարները հանդես են եկել համատեղ մամուլի ասուլիսով, որի ժամանակ Շվեդիայի ԱԳ նախարարը խոսելով Լեռնային Ղարաբաղի հակամարտությոան մասին հայտարարել է, որ այն ռազմական լուծում չունի։Նա ասել է, որ պետք է ամեն ինչ անել  հակամարտության սրումից խուսափելու  համար, եւ  ջանքեր գործադրել ԵԱՀԿ ՄԽ հովանու ներքո լուծում գտնելու համար։

Ասուլիսի ընթացքում հնչել է երկու հարց երկուսն էլ ՀՀ ԱԳ նախարարին ուղղված: Սահմանադրական հանրաքվեի մասին ԵԱՀԿ ԺՀՄԻԳ-ի փորձագիտական խմբի հրապարակած զեկույցին վերաբերող հարցին ի պատասխան, մասնավորապես ինչպես այն կգնահատեր ՀՀ ԱԳ նախարարը,  Էդվարդ Նալբանդյանը նախ պարզաբանել է, որ ԺՀՄԻԳ-ը չի զբաղվում հանրաքվեների դիտարկմամբ, եւ չնայած դրան, Հայաստանը հրավիրել է ԺՀՄԻԳ-ին` մեկ նպատակ ունենալով, որպեսզի հանրաքվեն անցկացվի հնարավորինս թափանցիկ և հնարավորինս շատ դիտորդների ներկայությամբ: Նալբանդյանը չի խոսել զեկույցում առկա քննադատությունների մասին, փոխարենը նշել է, որ Հայաստանը ԺՀՄԻԳ-ի հետ սերտ համագործակցության պրակտիկա ունի, եւ ինքը առաջին նախարարն է,  որն այցելել է Վարշավայում տեղակայված ԺՀՄԻԳ-ի գլխավոր գրասենյակ: ՀՀ ԱԳ նախարարը փոխանցել է, որ հանրաքվեի մասին զեկույցին կից իրենց ստացած նամակում ԺՀՄԻԳ-ը հույս է հայտնում, որ Հայաստանը նկատի կառնի այն առաջարկները, որոնք արվել են այս զեկույցում: