Ցնցող նշանակում Ազգային անվտանգության ծառայությունում

Երեկ Սերժ Սարգսյանի հրամանագրերով Գեորգի Կուտոյանը նշանակվեց Հայաստանի Ազգային անվտանգության ծառայության տնօրեն: Սերժ Սարգսյանը վերջին տարիներին յուրահատուկ կադրային քաղաքականություն է իրականացնում, բայց այս նշանակումով գերազանցեց անգամ ինքն իրեն: Գեորգի Կուտոյանը ընդամենը 35 տարեկան է, երբեք ԱԱԾ-ական չի եղել, եթե, իհարկե, մի օր չպարզվի, որ նա կոնսպիրատիվ գործունեություն է ծավալել: Թեեւ Կուտոյանի կենսագրությունը նման կասկածների հիմքեր չի տալիս:

1981թ. սեպտեմբերի 30-ին Երեւանում ծնված ԱԱԾ նոր տնօրենը առաջին բարձրագույն կրթությունը ստացել է ՌԴ-ում, նա 2002թ. ավարտել է Ռոստովի պետական համալսարանի իրավագիտության ֆակուլտետը: Այնուհետեւ 2005թ. ավարտել է ՀՀ ԳԱԱ փիլիսոփայության եւ իրավունքի ինստիտուտի ասպիրանտուրան եւ ստացել իրավաբանական գիտությունների թեկնածուի գիտական աստիճան: Երկու տարի անց ավարտել է նաեւ Ֆլետչերի իրավունքի եւ դիվանագիտության դպրոցը: 

Մինչեւ 2010 թվականը Կուտոյանը դասախոսությամբ է զբաղվել միաժամանակ  Հայ-֊ուսական (Սլավոնական) համալսարանում, ՀՀ պետական կառավարման ակադեմիայում եւ ՀՀ Գիտությունների ազգային ակադեմիայում: Միաժամանակ 2005-2006թթ. աշխատել է ՀՀ գլխավոր դատախազությունում, նախ՝ որպես գիտաուսումնական կենտրոնի գիտական աշխատող, ապա՝ իրավական եւ կառուցվածքային բարեփոխումների բաժնի դատախազ: Դրանից հետո 2006-2010թթ. աշխատել է ՀՀ մարդու իրավունքների պաշտպանի աշխատակազմում: Այդ ընթացքում` 2008 թվականին Կուտոյանը ստացել է փաստաբանական գործունեության արտոնագիր եւ 2010-2011թթ. զբաղվել է մասնավոր փաստաբանական գործունեությամբ:

2011-2016թթ. նա զբաղեցրել է ՀՀ նախագահի օգնականի պաշտոնը: Նա նաեւ պարգեւատրվել է Մխիթար Գոշ մեդալով, իսկ զինվորական ծառայությունն անցել է ոչ թե ՀՀ-ում, այլ զինվորական ուսուցում է ստացել Ռոստովի պետական համալսարանի ռազմական պատրաստության ֆակուլտետում՝ պահեստի սպաների պատրաստման ծրագրով: Նորանշանակ ԱԱԾ տնօրենը տիրապետում է ռուսերեն, անգլերեն, ֆրանսերեն լեզուներին, ամուսնացած է, ունի մեկ որդի:

Մինչեւ ԱԱԾ տնօրենի պաշտոնում նշանակվելը Գեորգի Կուտոյանը Սերժ Սարգսյանի փետրվարի 3-ի հրամանագրով 9 օրով վերադարձավ Գլխավոր դատախազություն` զբաղեցնելով գլխավոր դատախազի տեղակալի պաշտոնը: Սա, իհարկե, տարօրինակ է, սակայն բանն այն է, որ գործող օրենսդրության համաձայն՝ ԱԱԾ պետ կարող է նշանակվել առնվազն գնդապետի կոչում ունեցող եւ իրավապահ որեւէ կառույցի բարձրագույն խմբի պաշտոն ունեցող անձը: Գլխավոր դատախազի տեղակալի պաշտոնում նշանակվող անձը ստանում է նաեւ արդարադատության առաջին աստիճանի խորհրդականի կոչում, որը համարժեք է գնդապետին: Այսինքն, դեպի դատախազություն նրա 9-օրյա «տուրը» լուծեց թե՛ գնդապետական ուսադիրների, եւ թե՛ օրենքով անհրաժեշտ պաշտոնի հարցը: Այսպիսով, ամբողջությամբ քաղաքացիական անձ Գեորգի Կուտոյանը ընդամենը 10 օրվա գնդապետական ուսադիրներով` իր ենթակայության տակ ունենալու է թվով 4 գեներալ-լեյտենանտ եւ առնվազն 5 գեներալ-մայոր:      

Երեկ ԱԱԾ ղեկավար կազմին ներկայացնելով նորանշանակ տնօրենին, Սերժ Սարգսյանը նրա հասցեին գովեստի խոսքեր չի խնայել: Նա Կուտոյանին ներկայացրել է որպես սկզբունքային, հետեւողական, աշխատասեր եւ իր ու իր ենթակաների նկատմամբ  խստապահանջ անձ:

 «Պարոն Կուտոյանը պետական աշխատանքի բարձր պրոֆեսիոնալ է: Անգամ ընթացիկ, առօրյա խնդիրներ լուծելիս նա հիմքում քաղաքականություն է դնում: Նա ունակ է համակարգել զուգահեռ ընթացող գործընթացները եւ գտնել խնդրի լուծման ամենաճիշտ ճանապարհը»,- ասել է Սերժ Սարգսյանը: Վերջինս նաեւ շնորհակալություն է հայտնել Գորիկ Հակոբյանին երկար տարիների նվիրական աշխատանքի համար եւ նրան պարգեւատրել է Սբ. Վարդան Մամիկոնյանի շքանշանով: Գորիկ Հակոբյանը միաժամանակ  նշանակվել է ՀՀ նախագահի խորհրդական:

Ի դեպ, երկար տարիներ Սերժ Սարգսյանը Գորիկ Հակոբյանին փոխարինող  չէր գտնում եւ 2011 թվականին, երբ լրանում էր Գորիկ Գուրգենիչի թոշակի անցնելու տարիքը, նույնիսկ ստիպված եղավ հատուկ հրամանագրով 5 տարով երկարացնել նրա պաշտոնավարման ժամկետը: Գորիկ Հակոբյանի պաշտոնավարման ժամկետը երկարացնելու հրամանագիրը եղել է 2011 թվականի փետրվարին, մինչ այդ հունվարին` Գեորգի Կուտոյանն արդեն նշանակվել էր խորհրդական: Չի բացառվում, որ Սարգսյանը դեռ 2011 թվականից Կուտոյանին պատրաստում է որպես ԱԱԾ տնօրեն:

Հ.Գ. Քանի որ վերջին 14 տարում առաջին անգամ ԱԱԾ տնօրենի փոփոխություն տեղի ունեցավ, ներկայացնում ենք Հայաստանի երրորդ հանրապետության  ԱԱԾ ղեկավարներին.

Հուսիկ Հարությունյան (1991-1992),  գեներալ-մայոր

Վալերի Պողոսյան (1992-1993), գեներալ-մայոր

Էդուարդ Սիմոնյանց (1993-1994), գեներալ-մայոր

Դավիթ Շահնազարյան (1994-1995)

Սերժ Սարգսյան (1995-1999)

Կառլոս Պետրոսյան (1999-2004)

Գորիկ Հակոբյան (2004-2016), գեներալ-գնդապետ