Գյումրիում Տիգրան Համասյանի համերգին մարդիկ ստիպված կլինեն գնալ ցեխերի միջով

Հայտնի ջազ երաժիշտ, բազմաթիվ հեղինակավոր միջազգային մրցույթների դափնեկիր Տիգրան Համասյանը փետրվարի 27-ին՝ ժամը 15:00-ին, համերգով հանդես է գալու Գյումրիում, ընդ որում, ուշագրավ է, որ նրա ելույթը նախատեսված է անօթեւաններից մեկի ժամանակավոր կացարանի հարեւանությամբ:

Նախաձեռնությունը SOS Գյումրի թիմինն է ու մասնավորապես Հայկ Բարսեղյանինը, որը շատերին հայտնի համացանցային «SOS» հաղորդման հեղինակներից է: Այդպիսով, եւս մեկ անգամ փորձ է արվում ուշադրություն հրավիրել 88-ի ավերիչ երկրաշարժից տասնամյակներ անց էլ անմարդկային պայմաններում ապրող գյումրեցիների խնդիրների վրա, նպաստել բրիտանական www.crowdfunder.co.uk կայքում արդեն իսկ մեկնարկած հանգանակությանը, որի նպատակն է բնակարանով ապահովել անօթեւան ընտանիքներից գոնե մի քանիսին:

Մինչ այդ Հայկը լուսանկարում եւ հրապարակում էր իշխանության անտարբերության զոհը դարձած եւ կյանքից անխնա հարվածներ ստացող ընտանիքների ապրելակերպը, այն պայմանները, որտեղ նրանք քարշ են տալիս իրենց գոյությունը: Նաեւ նախորդ դեկտեմբերի 7-ը ամոթի օր էր հայտարարել: Այժմ, ահա, Հայկ Բարսեղյանը որոշել է անցնել գործնական քայլերի՝ ստանալով նաեւ իր տաղանդավոր համաքաղաքացու` Տիգրան Համասյանի աջակցությունը:

«Ամսի 27-ի համերգի նպատակներից մեկն է տարածում գտած դրամահավաքի մասին իրազեկել բոլորին: Մյուս իմաստն այն է, որ իշխանությունը, որը երկար տարիներ անտեսել է խնդիրը, այլեւս չկարողանա դա անել: Բացի այդ, տեղում փոքրիկ դրամահավաք կկազմակերպվի՝ համերգի տոմս վաճառելու փոխարեն եւ կավելացվի ընդհանուր հավաքվող գումարին»,- մեզ հետ զրույցում ասաց Հայկ Բարսեղյանը: Մանրամասնելով՝ նա նշեց, որ Տիգրան Համասյանի համերգին ու նաեւ հանգանակությանը մասնակցել ցանկացող մարդիկ ասֆալտապատ ճանապարհով կհասնեն Գյումրու տնակային թաղամաս, այնուհետեւ ստիպված կլինեն ավտոմեքենաները թողնել այդտեղ եւ ցեխերի միջով քայլելով՝ հասնել համերգի վայրը: Միջոցառումն անցկացվելու է իր լուսանկարներից մեկի հերոսի, ինչպես Հայկն ասաց, կապույտ աչքերով Քրիստինեի ապրած ժամանակավոր կացարանի մոտ: «Բեմահարթակի կարիք բացարձակ չկա, ուղղակի տան հարեւանությամբ` հենց թիկունքում, կդրվի դաշնամուրը եւ այնպես կլինի, որ մարդիկ Տիգրանին նայելով` ստիպված կլինեն համերգի ամբողջ ընթացքում տեսնել նաեւ այդ տնակը: Ի սկզբանե որոշել էինք, որ համերգը լինի տնակի մեջ, բայց քանի որ միջոցառման մասին լուրերը շատ են տարածվում, հենց տնակի հարեւանությամբ կանցկացնենք»,- ասաց նախաձեռնության հեղինակը:

կապույտ աչքերով Քրիստինեն

Այդուհանդերձ, համերգի մասնակիցների համար նաեւ էքսկուրսիակկազմակերպվի այդ տնակում, որպեսզի նրանք շատ ավելի լավ պատկերացնեն այնտեղ ապրողների կենսապայմանները: «Տնակի տիրոջ՝ Գեղեցիկ տատիկի հետ խոսել ենք, նա ասել է, որ խնդիր չի լինի: Այսինքն` մուտքն ազատ կլինի, բայց նաեւ պիտի մտածենք, որ այդ մարդկանց տուն մտնել-դուրս գալիս քիչ ցեխոտենք եւ քիչ վնաս պատճառենք»,- շարունակեց Հայկը: Բայց, անկախ դրամահավաքին մասնակցելու հնարավորությունից, որեւէ մեկի առջեւ խոչընդոտ չի ստեղծվի եւ որեւէ մեկը չի զրկվի Համասյանի երաժշտությունն ունկնդրելու հնարավորությունից: «Նաեւ թող գան, տեսնեն՝ մարդիկ ինչպես են ապրում, վաղը գուցե մեկ այլ կերպ փորձեն նրանց օգնել»,- նկատեց մեր զրուցակիցը:

Դառնալով բրիտանական կայքում կազմակերպված հանգանակությանը՝ նշենք, որ 55-օրյա ժամկետում, որը լրանալու է մինչեւ մարտի կեսը, հարկավոր է ստանալ 120 հազար ֆունտ ստերլինգ (կամ 175 հազար դոլար) նվիրատվություն, այլապես, ժամկետը լրանալուց հետո, ըստ կարգի, գումարը վերադարձվելու է փոխանցողներին: Հայկ Բարսեղյանից տեղեկացանք՝ www.crowdfunder.co.uk կայքի միջոցով երեկվա դրությամբ հանգանակվել է ավելի քան 14 հազար ֆունտ ստերլինգ: Եվս մի այդքան գումար ստացվել է այլ հաշվեհամարների միջոցով եւ այդ գումարը նույնպես առաջիկա օրերին կվերափոխանցվի կայքին:

Ի սկզբանե նախատեսված է եղել, որ «SOS Գյումրի» թիմի հանգանակած գումարներով բնակարան է ձեռք բերվելու 13 ընտանիքի համար: «Բայց քանի որ մեր ցուցակների մեջ կան ընտանիքներ, որտեղ վեց հոգի են, իրենց մեկ սենյականոց տունը ինձ թվում է քիչ կլինի: Մենք ունենք հաստատ որոշում, որ չորս ընտանիքի միանշանակ տուն պիտի տրամադրենք բազմաթիվ պատճառներով: Անհրաժեշտության դեպքում հետո անպայման կբացատրեմ` ինչու հենց այդ չորս ընտանիքը: Մնացած ընտանիքների վերաբերյալ որոշումը կամ թե ինչպես պիտի գումարները ծախսվեն, կընդունվի ժողովով, որովհետեւ այս ընթացքում նաեւ բազմաթիվ շինարարական կազմակերպություններ՝ եվրոպական եւ ոչ եվրոպական, առաջարկներ են արել շատ էժան գներով տներ կառուցելու: Հիմա ավելի շատ կենտրոնացած ենք գումար հավաքելու վրա, իսկ ծախսելու պրոցեսը բոլորով կհավաքվենք, ժողով կանենք: Ովքեր կուզեն գալ կամ ովքեր մասնակցություն կունենան հանգանակությանը, հնարավորություն կստանան իրենց կարծիքն ու դիրքորոշումը հայտնել: Ինչու չէ, կարող է կարիք լինի այդ մարդկանց տունը գալ, տեսնել, հետո նոր որոշում ընդունել»,- եզրափակեց Հայկ Բարսեղյանը: 

Լուսանկարները` Հայկ Բարսեղյանի