Լ.Մկրտչյանը «Ֆեյսբուքում» չի գրանցվի, նաեւ կփոխի Աշոտյանի ներկած պատերի գույնը (ֆոտոներ)

ՀՀ կրթության եւ գիտության նախարարությունում այսօր տեղի ունեցավ նախարարների փոփոխություն: Վարչապետ Հովիկ Աբրահամյանն աշխատակազմին ներկայացրեց նորանշանակ Լեւոն Մկրտչյանին, նրան հաջողություններ մաղթեց, իսկ արդեն նախկին նախարար Արմեն Աշոտյանին շնորհակալությամբ հրաժեշտ տվեց: Նաեւ գոհունակություն հայտնեց, որ փոփոխությունը տեղի է ունենում համերաշխության մթնոլորտում:

«Մենք աշխատել ենք երկար տարիներ, նաեւ կուսակցական գործընկերներ ենք, աշխատել ենք Ազգային ժողովում: Կարծում եմ` այդ տարիների ընթացքում բավականին կարողացել ենք ճանաչել միմյանց, եւ ես բոլոր հարթակներում պարոն Աշոտյանի աշխատանքային գործունեությունը գնահատել եմ բարձր: Ցանկանում եմ շնորհակալություն հայտնել պարոն Աշոտյանին համատեղ աշխատանքի համար, եւ դուք տեղյակ եք նաեւ հանրապետության նախագահի մոտեցումները, որ պարոն Աշոտյանը զբաղվելու է կուսակցությունով, մեծ դերակատարություն ունի այդ գործընթացներին, մինչեւ նոր պառլամենտական ընտրությունները: Շնորհակալ եմ, պարոն Աշոտյան»,- ասաց վարչապետ Հովիկ Աբրահամյանը:

Այնուհետեւ դարձավ Լեւոն Մկրտչյանին. «Պարոն Մկրտչյանին բոլորդ ճանաչում եք, նրա հետ մենք աշխատել եք նաեւ 2000-ական թվականներին` կառավարությունում, եւ այդ տարիների ընթացքում նույնպես հաջողվել է ճանաչել պարոն Մկրտչյանին: Ես կարծում եմ` այդ աշխատանքի ընթացքում ինքն իր պարտականությունները կատարել է բավականին բարձր, եւ այսօր համոզված եմ, որ այս համագործակցության շրջանակներում պարոն Մկրտչյանը ամեն ինչ կանի, որպեսզի այն բարեփոխումները, այն ծրագրերը, որոնք  նախարարությունը պարտավորվել է իրականացնել առաջիկա տարիների ընթացքում, իրականացվեն:  Շնորհավորում եմ, պարոն Մկրտչյան եւ ցանկանում եմ բեղմնավոր աշխատանք»:  

Ավելի ուշ` արդեն իր աշխատասենյակում, Լեւոն Մկրտյանը պատասխանեց լրագրողների բլից հարցերին նախ այն մասին, թե ինչպես է իրեն զգում նոր աշխատաեսնյակում:

- Մի քիչ անսովոր է: Ես պարոն Աշոտյանին խնդրել եմ, որ եթե հանկարծ գույների մի քիչ փոփոխություն լինի, որեւէ անձնական խնդիր չկա:

- «Արմենիա» TV- Փոխելո՞ւ եք աշխատասենյակի գույները:

- Չգիտեմ, տեսնենք: 

- armtimes.com-Բայց ամեն դեպքում, փաստորեն, այնքան էլ ձեր սրտով չէ:

- Այսպես ասեմ` անսովոր է:

- yerkir.am - Պարոն Մկրտչյան, աշխատողներից մեծ մասի հետ դուք աշխատել եք նախկինում, թիմը ձեզ համար նոր չէ...

- Իհարկե: Այստեղ մեծ մասը մարդիկ են, որոնք իմ առաջին մուտքը, երբ 1998 թվականին եղավ, այստեղ աշխատում էին եւ պատասխանատու էին աշխատում: Այսինքն` կրթության նախարարության մեջ այդ հաջորդականությունը պահպանվել է աշխատանքային իմաստով:

- yerkir.am - Այսինքն` միայն միջավայրն է անսովոր:

- Ոչ մի բան էլ անսովոր չէ, մեր երկրում ենք ապրում, ամեն ինչ նորմալ է: Շենքն է դրսից շատ տպավորիչ, ներսից էլ վատ չէ:

- armtimes.com - Կադրային փոփոխություններ չե՞ն լինի:

- Ինձ ժամանակ է պետք, բայց չափանիշը հստակ միայն պրոֆեսիոնալիզմն է, այսինքն` որեւէ այլ խնդիր չկա:

- armtimes.com- Այս ընթացքում հետեւել եք պարոն Աշոտյանի գործունեությանը, այն փոփոխություններին, որոնք ձեռնարկում էր...

-Ես ենթակա էի պարոն Աշոտյանին, որովհետեւ այս ողջ յոթ տարիների ընթացքում Երեւանի պետական համալսարանում դասավանդել եմ Հայոց պատմության ամբիոնում: Ուրիշ մի ավելի հետաքրքիր փորձառություն ունեմ: Այն նույն բարեփոխումները, որոնք մենք սկսել էինք` ե´ւ Բոլոնիայի գործընթացը, ե´ւ մյուսները, արդեն իբրեւ դասախոս ինձ վրա զգացել եմ թե´ դրականը եւ թե´ որոշակի դիսկոմֆորտ առաջացնող պահերը, եւ այդ պրակտիկան ինձ ավելի կօգնի: Օրինակ` միանշանակ կարող եմ ասել, որ բյուրոկրատիզմը եւ թղթատարությունը շատ-շատ են: Այսինքն` երբ վերեւից իջեցվում է պահանջը (երեւի ուսուցիչների մոտ էլ այդպես կլինի), շատ մեծ ժամանակ է ծախսվում ինչ-որ թղթեր լրացնելու վրա: Այդ բյուրոկրատական բեռնաթափման անհրաժետությունն ինձ համար հստակ է:

- armtimes.com -Իսկ ընդհանուր առմամբ եթե գնահատելու լինեք այն գործունեությունը, որն Արմեն Աշոտյանն էր ծավալում, ձեզ գոհացնո՞ւմ էր, թե շատ բաներ կփոխվեն:

-Կրթության եւ գիտության նախարարությունը տարիներ շարունակ` 1997 թվականից, աշխատում է ծրագրերով: Երբ ես 1998-ին նշանակվեցի, արդեն Արտաշես Պետրոսյանի պաշտոնավարման ընթացքում սկսվել էր համագործակցությունը Համաշխարհային բանկի հետ, եւ ընդհանուր երկու կարեւոր սկզբունքներ վերցրին` համապատասխանության ու որակի: Այսինքն` մեր կրթական համակարգը նախ պիտի համապատասպանի եվրոպական եւ միջազգային չափանիշներին, իսկ երկրորդը որակի խնդիրն է: Համապատասխանությունը այս տարիների ընթացքում ինչ-որ ձեւով արեցին, որակի հարց ոււնենք եւ երեւի թե հաջորդ փուլը պիտի որակի ապահովեումը լինի: Այսինքն` որակի. բովանդակության վրա պետք է շատ մեծ ուշադրություն դարձնենք:

- armtimes.com - Իսկ կրթական հաստատություններում արդարության, մրցակցայնության չափաբաժինը կավելանա՞:

- Ինձ ժամանակ տվեք, գոնե երկու շաբաթ: Ոլորտից մեծ իմաստով ես կտրվել եմ յոթ-ութ տարի:

- armtimes.com - Ֆեյսբուքում գրանցվա՞ծ եք:

- Ես սոցիալական ցանցերում գրանցված չեմ, չեմ գրանցվելու:

- armtimes.com - Հանրությունը սովորել է միանգամից օպերատիվ կերպով ստանալ իրեն առնչվող տեղեկությունները:

- Ներող կլինեք: Ես շատ թափանցիկ աշխատել եմ եւ կաշխատեմ:

- aravot.am - Այսինքն` որքանով հասանելի կլինեք:

- Ամբողջությամբ հասանելի եմ լինելու:  Նաեւ մեզ մոտ կլինի մամլո քարտուղար, որը կլինի շատ գործուն, ոչ կուսակցական, բացի այդ մեծ վարչություն ունենք` հասարակայնության հետ կապերի: Հասարակական կազմակերպությունները լիարժեք, պատասխանատվությամբ եւ իրավունքով կաշխատեն, այսինքն` այդ իմաստով վստահ եղեք, որ որեւէ խնդիր չի լինի:  Շատ հասանելի եւ թափանցիկ կլինենք:

- armtimes.com - Արդեն ընտրե՞լ եք` ով է լինելու մամուլի քարտուղարը:

- Այո, մոտ ժամանակներս կասեմ: Այդտեղ փոփոխություն կլինի: