Վարդան Օսկանյանը որոշ փակագծեր կբացի. կուսակցության հարցում նա կարծես` կողմնորոշվել է

Մեր տեղեկություններով, մոտ ապագայում պաշտոնապես կհայտարարվի նախկին արտգործնախարար Վարդան Օսկանյանի՝ կուսակցություն ստեղծելու մտադրության մասին:

Որ Օսկանյանը պատրաստվում է կուսակցություն ստեղծել, սկսեց խոսվել դեռ անցյալ մարտին ԲՀԿ-ն լքելու նրա հայտարարությունից մեկ-երկու ամիս անց: Անցյալ սեպտեմբերին արդեն սահմանադրական փոփոխությունների դեմ պայքարող «Չեք անցկացնի» նախաձեռնության երիտասարդները լրագրողի հարցին, թե Վարդան Օսկանյանի հետ նոր հանդիպումներ եղե՞լ են, պատասխանեցին. «...ինքը հիմա իր կուսակցաշինությամբ է զբաղված ու դրանով է առաջնորդվում...»: Սպասվում էր, որ Վարդան Օսկանյանի կուսակցությունը պետք է «Ոչ»-ի շարժման առաջնագծում լինի: Բայց կուսակցություն այդպես էլ չստեղծվեց, եւ փոխարենը նախկին արտգործնախարարը սահմանադրական փոփոխությունների դեմ պայքարի դուրս եկավ միայնակ, շատ հաճախ իր ֆեյսբուքի էջում գրառումներ կատարելով, երբեմն նաեւ՝ ԶԼՄ-ներով: Օսկանյանի կուսակցությունը, բնականաբար, կապվում է Քոչարյանի անվան հետ, համարվում է, եւ մամուլում բազմիցս գրվել է, որ կուսակցության առանցքային դեմքերը կլինեն Քոչարյանին անթաքույց համակրող քաղաքագետներ՝ Երվանդ Բոզոյանը, Անդրանիկ Թեւանյանը, ինչպես նաեւ ԲՀԿ խմբակցության պատգամավորներ Էլինար Վարդանյանն ու Ստեփան Մարգարյանը: Ակնարկներ են եղել անգամ, որ Օսկանյանի կուսակցության հետ առնչություն կունենան  Ռոբերտ Քոչարյանի օգնական Վիկտոր Սողոմոնյանը եւ ավագ որդին՝ Սեդրակ Քոչարյանը: Ինքը՝ Օսկանյանը, այս ընթացքում երբեք հրապարակային չի խոսել ոչ կուսակցություն ստեղծելու իր մտադրության եւ ոչ էլ վերոնշյալ անունների հետ առնչության մասին: 

Ընդունված վարկած է, որ նախկին արտգործնախարարը հապաղում է կոնկրետ քայլ անել, որովհետեւ կուսակցության ֆինանսավորումը կազմակերպելու հարցում կաշկանդված է նախկինում փողերի լվացման հոդվածով իրեն առաջադրված մեղադրանքով: Մեր տեղեկություններով, սակայն, կուսակցության ստեղծման ձգձգումը պայմանավորված է բացառապես քաղաքական հաշվարկներով եւ գործընթացներով: Սկզբնական հաշվարկն այն էր, որ  Գագիկ Ծառուկյանի ու բուրժուադեմոկրատական հեղափոխության տապալումից հետո հնարավոր կլինի արագ ոտքի կանգնել եւ հեղափոխության  նոր փորձ անել՝ օգտագործելով սահմանադրական փոփոխությունների առիթը: Սա, սակայն, անցյալ փետրվարտասներկուսյան իրադարձությունների առաջին, հուզական ռեակցիան էր: Այսինքն, ԲՀԿ-ի փոխարեն նոր կուսակցություն պետք է ստեղծվեր, եւ ՀԱԿ-ի ու մյուս ուժերի հետ սահմանադրական փոփոխությունների դեմ շատ ավելի մեծ համախմբում տեղի ունենար: Ավելի սառը հաշվարկը, սակայն, Օսկանյանին եւ նրա մերձավորներին հուշել է ռեալ գնահատել սեփական հնարավորությունները եւ չշտապել: Թույլ տալ, որ  «Ոչ»-ի շարժումը անի այն, ինչ կարող է, այդ ընթացքում՝ բոլոր հնարավոր ձեւերով աջակցելով շարժմանը: Իսկ կուսակցությունը պետք է պահել որպես պլան Բ, երբ արդեն իրողություն կլինի Սահմանադրության փոփոխությունը, եւ հիմքեր կդրվեն երկրի քաղաքական համակարգի փոփոխման համար: Օսկանյանի կուսակցությունն այժմ արդեն պետք է փորձի իր տեղը գրավել փոփոխված Սահմանադրությամբ թելադրված քաղաքական նոր իրականության մեջ: Նախօրեին նա ֆեյսբուքյան գրառում էր արել ԸՕ-ի մասին, որտեղ թափանցիկ ակնարկ կար նաեւ կուսակցության վերաբերյալ. «Ինչ վերաբերում է իմ եւ իմ համախոհների քաղաքական վարքագծին, ապա մենք ակտիվորեն ներգրավվելու ենք ինչպես օրենսդրական քննարկումներում, այնպես էլ բուն ընտրական գործընթացներում...»: Ընտրական գործընթացներում Օսկանյանի եւ նրա համախոհների ակտիվ ներգրավվածության ամենահավանական տարբերակը, իհարկե, ընտրություններին մասնակցությունն է:

Թեմայի շուրջ Ստեփան Մարգարյանից որեւէ տեղեկատվություն ստանալու բոլոր փորձերը երեկ ապարդյուն անցան: Նա հեռախոսով պատասխանեց, ավելի ճիշտ՝ չպատասխանեց մեր մի քանի հարցերին.

- Պարոն Մարգարյան, պատրաստվո՞ւմ եք անդամագրվել Օսկանյանի կուսակցությանը:

- Արդեն ստեղծվե՞լ է այդ կուսակցությունը: Երբ որ կստեղծվի, այն ժամանակ կխոսենք: Ես չեղած բաների մասին չեմ կարող խոսել:

- Մեր տեղեկություններով, մոտ ժամանակներում կուսակցությունը ստեղծվելու է, կամ գոնե հայտարարվելու է դրա մասին:

- Դե, երբ որ կստեղծվի, ես խոստանում եմ. մանրամասն կանդրադառնամ այդ հարցին, իմ կարծիքը կասեմ:

- Դուք,  փաստորեն, չեք մասնակցում այդ կուսակցության ստեղծման աշխատանքներին, քննարկումներին:

- Գիտե՞ք ինչ, ես շատ բանի եմ մասնակցում, կամ չեմ մասնակցում, բայց երբ որ դա կլինի փաստ, նոր այն ժամանակ ձեր հարցերին կպատասխանեմ:

- Վարդան Օսկանյանի հետ, օրինակ, վերջին անգամ ե՞րբ եք հանդիպել եւ ի՞նչ եք խոսել:

- Վարդան Օսկանյանի հետ ես միշտ էլ հանդիպում եմ, դրանք ներքին քննարկումներ են, որոնց մասին չպետք է հիմա ձեզ պատմեմ:

- Պարոն Մարգարյան, տարածված կարծիք կա, որ դուք անպայման անդամագրվելու եք այդ կուսակցությանը, ո՞րն է սրա հիմքը:

- Դե հիմա հարցերը փոխելով չի: Երբ որ կստեղծվի, խոստանում եմ, մանրամասն կխոսենք, իսկ առայժմ բան չունեմ ասելու:

Երեկ մեզ չհաջողվեց կապ հաստատել անձամբ Վարդան Օսկանյանի հետ եւ առաջին ձեռքից ինֆորմացիա ստանալ: Մեր տեղեկություններով, սակայն, այսօր կամ վաղը նախկին արտգործնախարարը ծավալուն հարցազրույց է տալու, որի առանցքում թերեւս ԸՕ-ն եւ իր կուսակցության թեման կլինեն: Տրամաբանությունը հուշում է, որ Օսկանյանն առայժմ կբավարարվի միայն կուսակցություն ստեղծելու իր մտադրության մասին ազդարարելով: