ՀՀՇ-ն լիբերալ ուժերի հետ դաշինքով կմասնակցի ընտրություններին. Ալեքսանդր Արզումանյան

Միայն գաղափարական հենքով 

ՀՀՇ-ն դաշինքով կգնա ընտրությունների

Հարցազրույց ՀՀՇ խորհրդի նախագահ, պատգամավոր Ալեքսանդր Արզումանյանի հետ

- Պարոն Արզումանյան, Հայոց համազգային շարժում կուսակցության կազմով օրերս ԼՂՀ մայրաքաղաքում էիք, որտեղ հանդիպեցիք նախագահ Բակո Սահակյանի հետ: Ի՞նչ այց էր դա:

- Մենք մշտապես լավ հարաբերություններ ունենք ԼՂՀ  ղեկավարության հետ, եւ այս այցը ավելի շատ ծրագրերը ճշտելու նպատակ ուներ: Մեր պատվիրակության կազմում երիտասարդներ կային, կուսակցության վարչության, խորհրդի անդամներ, որոնց համար հետաքրքիր կլիներ հենց ԼՂՀ առաջին դեմքից լսել տնտեսական ծրագրերի, սահմանամերձ գոտիներում իրավիճակի մասին եւ ընդհանրապես պարոն Սահակյանի տեսլականը Լեռնային Ղարաբաղի ապագայի եւ խաղաղ գործընթացի վերաբերյալ: Մենք նաեւ հնարավորություն ունեցանք այցելելու դիրքեր, զրուցելու մեր զինվորների հետ եւ ընդհանուր պատկեր ստացանք: Քանի որ Ղարաբաղում էլ է քննարկվում սահմանադրական բարեփոխումների գործընթաց սկսել, նաեւ մոտեցում կա, որ խորհրդարանական կառավարման ձեւին անցնեն, մենք պատմեցինք մեր ներքին քաղաքական անցուդարձի մասին, ներկայացրինք մեր պատկերացումները, պարոն Սահակյանը՝ իրենց տեսլականը: Այնպես որ, շատ գոհ ենք, կարեւորում ենք, եւ կարծում ենք, նման հանդիպումները պետք է ավանդական դառնան:

- Հայտնի իրադարձություններից հետո նորից կյանքի բերելով ՀՀՇ-ն, դուք կուսակցությունով առանձնապես ակտիվ գործունեություն չեք ծավալել քաղաքական կյանքում: Կարո՞ղ ենք համարել, որ այսպիսով՝ 2017 թվականի խորհրդարանական ընտրությունների շեմին ակտիվանալու է կուսակցությունը:

- Ես, ճիշտն ասած, հակված չեմ հենց ընտրությունների հետ կապել: Ակտիվ քաղաքական գործունեություն ասելով, նայած՝ ինչ ենք հասկանում: Այսօր դե ֆակտո ՀՀՇ-ն իմ միջոցով ներկայացված է Ազգային Ժողովում, ես հնարավորություն ունեմ մեր կուսակցության տեսակետները այստեղ արտահայտելու եւ պաշտպանելու, քվեարկելու՝ համաձայն մեր դիրքորոշումների: Մենք այս ընթացքում փորձել ենք ամրապնդել մեր կառույցները շրջաններում, որովհետեւ շատ շատերը ծանր ֆինանսական վիճակում են, կառույցների մի մասը կազմալուծվել էր, մի մասը անցել էր ՀԱԿ-ի տնօրինությանը: Փորձում էինք վերահաստատել մեր կուսակցության ավանդույթները: Իսկ հիմա, այո, որքան մոտենանք ընտրություններին, հավանաբար է՛լ ավելի ակտիվ կլինենք, հաշվի առնելով, որ կուսակցության կարծիքով, մենք պետք է մեր մասնակցությունն ունենանք հաջորդ խորհրդարանական ընտրություններին:

- Իսկ ի՞նչ ֆորմատով եք պատկերացնում մասնակցությունը՝ դաշինքո՞վ, միայնա՞կ: Այս համատեքստում ուզում եմ նշել, որ  Նիկոլ Փաշինյանը օրեր առաջ հայտարարեց, թե Հայաստանում չպետք է լինեն ընդդիմություններ, այլ պետք է լինի մեկ ընդդիմություն: Ո՞րն է ձեր տեսակետը այս հարցում:

- Մենք գիտակցում ենք, որ երբ քաղաքական դաշտը մոնոպոլիզացված է իշխանության կողմից, եւ տրոհված է ընդդիմադիր դաշտը, շատ բարդ է լինելու առանձին- առանձին հանդես գալը: Մենք գտնում ենք, որ դատապարտված ենք դաշինքով հանդես գալու: Եվ կնախընտրենք դաշինք կազմել գաղափարախոսության հենքի վրա, որովհետեւ այս տիպի խորհրդարանական կառավարումը, որի կողմնակից ենք եղել նաեւ մենք, ենթադրում է գաղափարախոսությունների բախում եւ այդ գաղափարախոսությունների պարտադիր ներկայացվածություն ԱԺ-ում: Վերջին 20-25 տարիների մեր փորձը ցույց է տալիս, որ ոչ գաղափարական դաշինքները կարճատեւ կյանք են ունենում, չի եղել որեւէ դաշինք ցայսօր, որը եթե գաղափարական հենքի վրա չէ, կարողանա մինչեւ ժամկետի ավարտը գոյատեւել: Նույնը ունենք այսօրվա ԱԺ-ում՝ ՀԱԿ-ը, «Ժառանգությունը», ինչու ոչ՝ «Բարգավաճը», որը նույնպես մեծ հաշվով դաշինք կարելի է համարել: Այնպես որ, այդ առումով մենք քննարկում ենք լիբերալ գաղափարախոսություն կրողների հետ ընդհանրական ճակատով ընտրություններում հանդես գալու հարցը: Բոլոր լիբերալ ուժերի հետ:

Ինչ վերաբերվում է Փաշինյանի ասածին, ընդդիմություն կամ իշխանություն, թերեւս դա հնարավոր կլինի ավելի երկարաժամկետ ապագայում: Նման մոտեցումը՝ կամ իշխանություն ես, կամ ընդդիմություն, իհարկե՝ մանավանդ նախագահական ընտրությունների ժամանակ, բերում է լուրջ մոբիլիզացիայի: Ես լավ չեմ պատկերացնում խորհրդարանական ընտրությունների ժամանակ դրա իրականացումը, որովհետեւ երբ նախագահական ընտրություններ էին լինում, իրոք դաշտը բաժանվում էր սեւ եւ սպիտակի, եւ մարդկանց դժգոհության ալիքը ուղղորդվում էր մեկ թեկնածուի միջոցով: Հիմա դա ինչքանով է հնարավոր իդենտիֆիկացնել մեկ ուժի հետ... Այս պարագայում, կարծում եմ՝ հնարավոր չէ, որովհետեւ դեռեւս չկան ձեւավորված քաղաքական կուսակցություններ՝ իրենց ավանդույթներով: Ապագայում դա հնարավոր կլինի:

- Ինչպե՞ս եք գնահատում ԸՕ ընդունման շուրջ ընթացող գործընթացները, տարբեր ֆորմատներով քննարկումները, այդ թվում 4+4-ը, որի շուրջ կարծես փորձ է արվում կոնսոլիդացիա ստեղծել եւ այն որպես կենտրոնական գործընթաց ներկայացնել:

- Նախ, այդ թիվը հավանաբար պայմանական է, ինչ-որ մեկի խելքին փչել է 4 ասել, կարելի էր 7+7, 8+8: Չգիտեմ, ոնց են այդ թիվը ընտրել: 4-ը հավանաբար պայմանավորված է նաեւ ԱԺ-ում ներկայացված ֆրակցիաների քանակով: Բայց այդ ֆրակցիաներից երկուսի պարագայում լեգիտիմության խնդիր կա: ՀԱԿ ֆրակցիայի ղեկավարությունը չի ներկայացնում ամբողջ ՀԱԿ ֆրակցիայի քաղաքական սպեկտորը, իսկ «Ժառանգություն» ֆրակցիան այսօր չունի ոչ ղեկավար, ոչ քարտուղար, ֆրակցիան որպես այդպիսին չի գործում, եւ բավական վիճահարույց է, թե ով կարող է ներկայացնել այն: «Բարգավաճ Հայաստան» ֆրակցիան, որը ընտրվել է որպես երկրորդ քաղաքական ուժ, նույնպես այսօր տարբեր մետամորֆոզների միջով է անցնում, եւ այնքան էլ պարզ չէ, որ խումբն է ներկայացնում այն «Բարգավաճ Հայաստանը», որը եկել էր: Այնպես որ, ավելի լավ կոնսոլիդացիայի համար կարելի էր բոլոր ընդդիմադիր ուժերի հետ առանձին մի քննարկում անցկացնել, ընդհանրական մոտեցումների փաթեթ ձեւավորել եւ դրանից հետո դա փորձել ներկայացնել իշխանությանը:  Այս գործընթացի մեջ ինչ-որ արհեստականություն կա ու անառողջ մրցակցության տարր, որը մի քիչ անհասկանալի է: Ինչեւէ, մաղթում եմ իրենց հաջողություն:

- Պարոն Արզումանյան, նախօրեին սկսվեց Սերժ Սարգսյանի այցը Միացյալ Նահանգներ: Այսօր լրագրող Թաթուլ Հակոբյանը մի վիճակագրություն է ներկայացրել, ըստ որի, նախագահի պաշտոնը զբաղեցնելու օրվանից մինչ օրս Սերժ Սարգսյանը 7 անգամ այցելել է ԱՄՆ, սակայն ոչ մի անգամ չի եղել Սպիտակ տանը: Հակոբյանի ձեւակերպմամբ՝ Սպիտակ տան դռները փակ են Սերժ Սարգսյանի առաջ: Դուք, որպես դիվանագետ եւ նախկին ԱԳ նախարար ինչպե՞ս եք մեկնաբանում այս իրողությունը: Եվ եթե ԼՂ հարցում որեւէ ինֆորմացիա ունեք, խնդրում եմ՝ կիսեք մեզ հետ:

- Սպիտակ տան դռները բաց են, երբ լինում է պաշտոնական այց: Այդ այցելությունները հիմնականում եղել են այլ ֆորմատով՝ ՄԱԿ-ի վեհաժողովի առիթով, կամ ԱՄՆ նախագահի կողմից հրավիրված տարբեր գագաթնաժողովների ձեւաչափերում, ինչը չի ենթադրում լինել Սպիտակ տան հյուր: Այդ առումով պետք է մտահոգվելու առիթ տա, որ նա պաշտոնական այցելությամբ չի եղել ԱՄՆ-ում: Բայց նաեւ, որքան գիտեմ, Ալիեւն էլ չի եղել, այնպես որ պարիտետ են այնուամենայնիվ պահել: Դա հարց է, որ մեր արտաքին գերատեսչությանը պետք է ուղղել եւ պարզել, թե ինչն է պատճառը, որ մեր դիվանագետները չեն կարողացել ապահովել երկկողմ հարաբերություններում պատշաճ մակարդակի ընդունելություն: Ինչ վերաբերում է ղարաբաղյան հարցին, կարծում են հարցը շոշափվելու է այցի ժամանակ ինչ-որ ֆորմատներով: Սարգսյան-Ալիեւ հանդիպում նախատեսված չէ, բայց Ալիեւի եւ Սարգսյանի հետ քննարկելու են ապագային միտված տարբեր մոտեցումներ, եւ եթե ինչ-ինչ համաձայնություններ եւ ցանկություն կողմերը ցուցաբերեն, կարծում եմ, հերթական հանդիպումը չի ուշանա:

Աննա Հակոբյան